ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⴰⵎⴻⵙⵏⵉ ⵙ ⵜⵎⴰⵛⵉⵏⵜ ⵉ ⵓⵙⵙⴻⵏⵇⴻⵙ ⵏ ⵜⴻⵄⴽⴻⵎⵜ ⵖⴻⴼ ⵢⵉⴱⵔⵉⴷⴻⵏ ⵏ ⵢⵉⵔⵉ ⵏ ⵍⴻⴱⵃⴻⵕ ⴷⴻⴳ ⵜⵎⴰⵏⴻⵖⵜ

ⵍⴻⵣⵣⴰⵢⴻⵔ – ⴷⴻⴳ ⴷⵓⵊⴻⵎⴱⴻⵕ ⴰⵢ ⴷ-ⵢⴻⵜⵜⴻⴷⴷⵓⵏ ⴰⵔⴰ ⵢⴻⵔⵥⴻⵎ ⵓⴱⵔⵉⴷ ⵏ ⵡⵓⵣⵣⴰⵍ ⵙ ⵜⵔⵉⵙⵉⵜⵉ ⴳⴰⵔ ⴱⵉⵔⵜⵓⵜⴰ ⴷ ⵣⵔⴰⴷⵍⴰ (21 ⵏ ⵢⵉⴽⵉⵍⵓⵎⵉⵜⵔⴻⵏ), ⵢⴻⵔⵏⴰ ⴰⴱⵔⵉⴷ-ⴰ ⴷ ⵡⵉⵏ ⴰⵔⴰ ⵢⴻⴼⵔⵓⵏ ⵢⵉⵡⴻⵏ ⵙⴻⴳ ⵡⵓⴳⵓⵔⴻⵏ ⵉⵎⴻⵇⵔⴰⵏⴻⵏ ⴷⴻⴳ ⵜⴻⵎⵏⴰⴹⵜ ⵏ ⵙⵙⴰⵃⴻⵍ ⵏ ⵜⵡⵉⵍⴰⵢⵜ ⵏ ⵍⴻⵣⵣⴰⵢⴻⵔ.

ⵉⵎⵉ ⴰⵢ ⵓⵍⴰⵛ ⴰⵎⴻⵙⵏⵉ ⴰⵢ ⵢⴻⵜⵜⴰⵡⵉⵏ ⵍⵖⴰⵛⵉ ⴱⴻⵕⵕⴰ ⵉ ⵓⴱⵔⵉⴷ ⵏ ⵜⴽⴻⵕⵕⵓⵙⵉⵏ (ⵜⴰⵎⴰⵛⵉⵏⵜ, ⴰⵟⵔⴰⵎⵡⴰⵢ, ⴰⵖⴻⵔⵔⴰⴱⵓ), ⵜⵉⵖⵉⵡⴰⵏⵉⵏ ⵏ ⵢⵉⵔⵉ ⵏ ⵍⴻⴱⵃⴻⵕ ⵏ ⵜⵡⵉⵍⴰⵢⵜ ⵏ ⵍⴻⵣⵣⴰⵢⴻⵔ ⴳⴰⵔ ⵙⵟⴰⵡⴰⵍⵉ ⴷ ⵣⵔⴰⴷⵍⴰ ⵙⵄⴰⵏⵜ ⵓⴳⵓⵔ ⵏ ⵓⵎⴻⵙⵏⵉ, ⴷ ⴰⵛⵓ ⴽⴰⵏ, ⴰⴱⵔⵉⴷ-ⴰ ⵏ ⵡⵓⵣⵣⴰⵍ ⴰⵎⴰⵢⵏⵓ ⴰⴷ ⵢⴻⴼⵔⵓ ⵓⴳⵓⵔ-ⴰ. ⴰⴱⵔⵉⴷ-ⴰ ⴰⴷ ⵢⴻⵔⵥⴻⵎ ⴷⴻⴳ ⵜⴳⴰⵔⴰ ⵏ ⵓⵙⴻⴳⴳⴰⵙ-ⴰ, ⴰⴷ ⵢⴻⵇⵇⴻⵏ ⵜⵉⵎⴷⵉⵏⵉⵏ ⵏ ⴱⵉⵔⵜⵓⵜⴰ ⴷ ⵣⵔⴰⴷⵍⴰ, ⵢⴻⵔⵏⴰ ⴰⴷ ⵢⴻⴵⴵ ⵜⴰⵎⵏⴰⴹⵜ-ⴰ ⴰⴷ ⵜⵏⴻⴼⴼⴻⵙ ⵍⴰⴷⵖⴰ ⵉⵎⵉ ⵣⵉⴽ ⵍⵍⴰⵏ ⵣⴳⴰⵏ ⵢⵉⴱⵔⵉⴷⴻⵏ-ⵏⵏⴻⵙ ⵞⵞⵓⵕⴻⵏ ⴷ ⵜⵉⴽⴻⵕⵕⵓⵙⵉⵏ ⴰⵢ ⵢⴻⵜⵜⴻⴷⴷⵓⵏ ⴳⴰⵔ ⵜⵎⴰⵏⴻⵖⵜ ⴷ ⵜⵖⵉⵡⴰⵏⵉⵏ ⵏ ⵢⵉⵔⵉ ⵏ ⵍⴻⴱⵃⴻⵕ ⵏ ⵙⵙⴰⵃⴻⵍ (ⵙⵟⴰⵡⴰⵍⵉ, ⵣⵔⴰⴷⵍⴰ, ⴷⵡⴰⵡⴷⴰ, ⴼⵓⴽⴰ ⴷ ⴱⵓⵙⵎⴰⵄⵉⵍ).

ⵉⵎⵉ ⴰⵢ ⵉⵃⴰⵔ ⵍⵃⴰⵍ ⵉ ⴼⴻⵔⵔⵓ ⵏ ⵜⴻⴳⵏⵉⵜ-ⴰ, ⵢⴻⵔⵏⴰ ⵢⴻⵙⵙⴻⴼⴽ ⴰⴷ ⴷ-ⵢⴰⵡⴻⴹ ⵓⵙⴻⵏⴼⴰⵔ-ⴰ ⴷⴻⴳ ⵡⴰⴽⵓⴷ, ⴰⵏⴻⵖⵍⴰⴼ ⵏ ⵓⵎⴻⵙⵏⵉ, ⴱⵧⵓⴷⵊⴻⵎⴰⴰ ⵜⴰⵍⴰⵉ, ⴰⴷ ⵢⴻⵔⵣⵓ, ⴰⵙⵙ ⵏ ⵜⵜⵍⴰⵜⴰ, ⵖⴻⴼ ⵡⴰⵟⴰⵙ ⵙⴻⴳ ⵢⵉⵃⵔⵉⵛⴻⵏ ⵏ ⵓⵛⴰⵏⵟⵉ-ⴰ, ⵍⴰⴷⵖⴰ ⵜⴰⵖⵙⴻⵔⵜ ⵏ ⵜⴻⵙⴷⴰⵡⵉⵜ ⵏ ⵙⵉⴷⵉ ⵄⴻⴱⴷⴻⵍⵍⴰⵀ (ⴰⵢ ⵡⴻⵔⵄⴰⴷ ⵉⴼⵓⴽⴻⵏ ⵙ ⵍⴻⴱⵏⵉ) ⴷ ⵓⴱⵔⵉⴷ ⴰⵎⴻⵇⵔⴰⵏ ⵏ ⵜⴰⵙⴰⵍⴰ ⵍⵎⴻⵔⴵⴰ.

ⵜⵉⵔⵣⵉ ⵜⴰⵏⴻⴳⴳⴰⵔⵓⵜ ⵏ ⵓⵙⵙⴻⴼⵇⴻⴷ ⵏ ⵓⵛⴰⵏⵟⵉ-ⴰ ⵉⴳⴰ-ⵜⵜ ⵓⵏⴻⵖⵍⴰⴼ ⴰⵇⴱⵓⵔ ⵏ ⵓⵎⴻⵙⵏⵉ, ⴰⵎⴰⵔ ⴳⵀⵧⵓⵍ, ⴷⴻⴳ 7 ⵢⴻⴱⵔⵉⵔ ⵢⴻⵣⵔⵉⵏ ⵢⴻⵔⵏⴰ ⴰⵏⴻⴳⴳⴰⵔⵓ-ⴰ ⵢⴻⵏⵏⴰ-ⴷ ⴷ ⴰⴽⴽⴻⵏ ⵉⵎⵓⵀⴰⵍ (ⵉⵅⴻⴷⴷⵉⵎⴻⵏ) ⵏ ⵍⴻⴱⵏⵉ « ⴷⴷⴰⵏ ⵎⵍⵉⵃ ⵖⴻⵔ ⵙⴷⴰⵜ », ⵓⵍⴰ ⵎⴰ ⵍⵍⴰⵏ ⴽⵔⴰ ⵏ ⵡⵓⴳⵓⵔⴻⵏ ⴷⴻⴳ ⵜⵉⵖⵉⵏ ⵏ ⵡⴰⴽⴰⵍ ⵙ ⵓⵙⴳⵉⴵⴵⵉ ⵏ ⵢⵉⵎⴻⵣⴷⴰⵖⴻⵏ ⵏ ⵢⵉⴱⴻⵕⵕⴰⴽⴻⵏ. ⵉⵎⵉⵔ-ⴰ, ⵓⴳⵓⵔⴻⵏ-ⴰ ⴼⵔⴰⵏ.

ⵎⴰⵙⵙ ⵜⴰⵍⴰⵉ ⴰⴷ ⵢⴻⵙⵙⴻⴼⵇⴻⴷ, ⴰⵙⵙ ⵏ ⵍⴻⵜⵏⵉⵢⴻⵏ, ⴰⵢⴻⵏ ⴰⵢ ⵢⴻⵜⵜⵡⴰⴱⵏⴰⵏ ⵙⴻⴳ ⵓⵛⴰⵏⵟⵉ-ⴰ ⵙⴻⴳ ⵡⴰⵙⵎⵉ ⴰⵢ ⵜⵜⵡⴰⴽⴽⵙⴻⵏ ⵡⵓⴳⵓⵔⴻⵏ ⴷⴻⴳ ⵓⵏⵔⴰⵔ.

ⴰⵙⴻⵏⴼⴰⵔ-ⴰ ⵢⴻⵜⵜⵓⵏⴻⴼⴽ ⵉ ⵢⵉⵡⴻⵜ ⵏ ⵜⴽⴻⴱⴱⴰⵏⵉⵜ ⵜⴰⵖⴻⵍⵏⴰⵡⵜ (ⵉⵏⴼⵔⴰⵔⴰⵉⵍ) ⴰⵢ ⵍⴰ ⵢⴻⵜⵜⴻⵎⵄⴰⵡⴰⵏⴻⵏ ⴷ ⵢⵉⵡⴻⵜ ⵏ ⵜⴽⴻⴱⴱⴰⵏⵉⵜ ⵜⴰⵟⴻⵔⴽⵉⵜ (ⵢⴰⵒⵉⵎⴻⵔⴽⴻⵣⵉ) ⵢⴻⵔⵏⴰ ⴷ ⵡⴰ ⴰⵢ ⴷ ⴰⴱⵔⵉⴷ ⵏ ⵡⵓⵣⵣⴰⵍ ⴰⵎⴻⵣⵡⴰⵔⵓ ⴰⵔⴰ ⵢⴻⵜⵜⵡⴰⴱⵏⵓⵏ ⴳⴰⵔ ⴱⵉⵔⵜⵓⵜⴰ ⴷ ⵣⵔⴰⴷⵍⴰ. ⴰⵙⴻⵏⴼⴰⵔ-ⴰ ⴷ ⴰⵃⵔⵉⵛ ⵙⴻⴳ ⵓⵙⴻⵏⴼⴰⵔ ⴰⵎⴻⵇⵔⴰⵏ ⵏ ⵓⵀⴻⵢⵢⵉ ⵏ ⵢⵉⴱⵔⵉⴷⴻⵏ ⵏ ⵡⵓⵣⵣⴰⵍ ⴷⴻⴳ ⵜⴻⵎⵏⴰⴹⵜ ⵏ ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ.

ⴰⴱⵔⵉⴷ-ⴰ ⵢⴻⵙⵄⴰ ⴷⴰⵖ ⴰⵣⴰⵍ ⴷⴻⴳ ⵓⵙⵙⵉⵡⴻⴹ ⵏ ⵙⵙⴻⵍⵄⴰ ⴰⵎ ⵡⴰⴽⴽⴻⵏ ⴰⵔⴰ ⵢⵓⵔⴰⵔ ⴷⴷⵓⵕ ⴷⴻⴳ ⵜⵎⴻⵔⵔⵉⵜ ⴷⴻⴳ ⵜⴻⵎⵏⴰⴹⵜ-ⴰ, ⵢⴻⵔⵏⴰ ⴰⴱⵔⵉⴷ-ⴰ ⴷ ⴰⵙⵙⴻⵖⵣⴻⴼ ⵏ ⵓⴱⵔⵉⴷ ⵏ ⵡⵓⵣⵣⴰⵍ ⵢⴻⵇⵇⵏⴻⵏ ⵍⴻⵣⵣⴰⵢⴻⵔ ⵖⴻⵔ ⵍⴻⴱⵍⵉⴷⴰ. ⵙ ⵓⴱⵔⵉⴷ-ⴰ, ⵜⴰⵎⴷⵉⵏⵜ ⵏ ⴱⵉⵔⵜⵓⵜⴰ ⴰⴷ ⵜⴻⵜⵜⵡⴰⵇⵇⴻⵏ ⵖⴻⵔ ⵣⵔⴰⴷⵍⴰ ⵢⴻⵔⵏⴰ ⴰⴷ ⵉⵄⴻⴷⴷⵉ ⵓⴱⵔⵉⴷ-ⴰ ⵖⴻⴼ ⵜⴻⵎⴷⵉⵏⵜ ⵏ ⵙⵉⴷⵉ ⵄⴻⴱⴷⴻⵍⵍⴰⵀ, ⴰⵎ ⵡⴰⴽⴽⴻⵏ ⴰⵔⴰ ⵢⴻⵇⵇⴻⵏ ⴱⵉⵔⵜⵓⵜⴰ ⵖⴻⵔ ⵡⵍⴰⴷ ⵛⴱⴻⵍ, ⵜⴰⵙⴰⵍⴰ ⵍⵎⴻⵔⴵⴰ, ⴷⴷⵡⵉⵔⴰ ⴷ ⵕⴻⵃⵎⴰⵏⴻⵢⵢⴰ.

« (ⴰⴱⵔⵉⴷ-ⴰ) ⴷⴻⴳ-ⵙ 3 ⵏ ⵍⴼⴰⵢⴷⴰⵜ. ⴱⵉⵔⵜⵓⵜⴰ ⵜⴻⵇⵇⴻⵏ ⵢⴰⴳⵉ ⵖⴻⵔ ⵓⵥⴻⴹⴹⴰ ⴰⵖⴻⵍⵏⴰⵡ ⵏ ⵢⵉⴱⵔⵉⴷⴻⵏ ⵏ ⵡⵓⵣⵣⴰⵍ ⵢⴻⵔⵏⴰ ⴰⴷ ⵜⵉⵍⵉ ⴷ ⴰⵏⴻⵎⵍⴰⵍ ⵏⴻⵖ ⴷ ⵜⵉⵣⴷⵉⵜ ⴰⵔⴰ ⵢⴻⵇⵇⵏⴻⵏ ⴰⵟⴰⵙ ⵏ ⵜⵡⵉⵍⴰⵢⵉⵏ ⵖⴻⵔ ⵓⵜⴰⵔⴰⵎ (ⵍⵖⴻⵔⴱ) ⵏ ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ ⵡⴰⵔ ⵎⴰ ⵢⴻⵍⵍⴰ-ⴷ ⵓⵄⴻⴷⴷⵉ ⵖⴻⴼ ⵍⴻⵣⵣⴰⵢⴻⵔ ⵜⴰⵍⴻⵎⵎⴰⵙⵜ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⵜⵏⴻⴳⴳⴰ ⵜⴰⵖⴻⵍⵏⴰⵡⵜ ⵏ ⵜⴻⵣⵔⴰⵡⵉⵏ ⴷ ⵓⴹⴼⴰⵔ ⵏ ⵓⵙⵙⴻⴹⵔⵓ ⵏ ⵢⵉⵙⵙⴻⴼⵜⵉⵢⴻⵏ ⵏ ⵓⴱⵔⵉⴷ ⵏ ⵡⵓⵣⵣⴰⵍ (ⴰⵏⴻⵙⵔⵉⴼ), ⵢⴻⵍⵍⴰⵏ ⴷⴰⵖ ⴷ ⵎⵢⴰⵍⵍ ⵏ ⵓⵙⴻⵏⴼⴰⵔ.

ⴰⵙⴻⵏⴼⴰⵔ-ⴰ ⴷ ⴰⵎⴰⵀⵉⵍ « ⴰⵢ ⵢⴻⵜⵜⵇⴰⴷⴰⵔⴻⵏ ⵜⵉⵍⵓⴳⴰⵏ ⵜⵉⴳⵔⴰⵖⵍⴰⵏⵉⵏ ⵢⴻⵔⵣⴰⵏ ⵍⴻⴱⵏⵉ ⵏ ⵢⵉⴱⵔⵉⴷⴻⵏ ⵏ ⵡⵓⵣⵣⴰⵍ », ⵖⴻⴼ ⵍⴻⵃⵙⴰⴱ ⵏ ⵜⵏⴻⴳⴳⴰ-ⴰ.

ⴰⴱⵔⵉⴷ ⵏ ⵡⵓⵣⵣⴰⵍ ⵏ ⴱⵉⵔⵜⵓⵜⴰ-ⵣⵔⴰⴷⵍⴰ ⵖⴻⵣⵣⵉⴼ 21 ⵏ ⵢⵉⴽⵉⵍⵓⵎⵉⵜⵔⴻⵏ ⵢⴻⵔⵏⴰ ⵍⵍⴰⵏ ⴷⴻⴳ-ⵙ 16 ⵏ ⵢⵉⵎⵓⵀⴰⵍ ⵏ ⵜⵥⵓⵔⵉ, 12 ⵏ ⵜⵍⴻⴳⴳⵉⵢⵉⵏ (ⴰⵊⴻⵎⵎⴰⵍ ⵏ ⵜⴻⵖⵣⴻⴼ-ⵏⵙⴻⵏⵜ 784 ⵏ ⵢⵉⵎⵉⵜⵔⴻⵏ), 4 ⵏ ⵜⵍⴻⴳⴳⵉⵢⵉⵏ ⵜⵓⵏⵏⵉⴳⵉⵏ (ⴰⵊⴻⵎⵎⴰⵍ ⵏ ⵜⴻⵖⵣⴻⴼ-ⵏⵙⴻⵏⵜ 1914 ⵏ ⵢⵉⵎⵉⵜⵔⴻⵏ), ⵢⵉⵡⴻⵏ ⵏ ⵓⴳⴻⵏⵏⴰⵔⵉ ⵏ 341 ⵏ ⵢⵉⵎⵉⵜⵔⴻⵏ ⴷ 7 ⵏ ⵢⵉⵇⵓⴷⴰⵙ ⵏ ⵓⵖⵔⴰⵎ ⵏ ⵡⴰⵎⴰⵏ.

ⵉⵣⵉⵔⵉⴳ ⵏ ⵓⴱⵔⵉⴷ ⵏ ⵡⵓⵣⵣⴰⵍ ⵏ ⴱⵉⵔⵜⵓⵜⴰ-ⵣⵔⴰⵍⴷⴰ ⴰⴷ ⵢⴻⵙⵄⵓ ⴰⵣⴰⵍ ⵎⴻⵖⵖⵔⴻⵏ ⵓⴳⴰⵔ ⴰⵙⵎⵉ ⴰⵔⴰ ⵜ-ⵙⵖⴻⵣⴼⴻⵏ ⵙ ⵙⵉⵏ ⵏ ⵢⵉⴱⵔⵉⴷⴻⵏ ⵏⵉⴹⴻⵏ, ⵢⵉⵡⴻⵏ ⴷ ⵣⵔⴰⴷⵍⴰ-ⵄⵉⵏ ⵍⴱⴻⵏⵢⴰⵏ (ⴰⵔⴰ ⵉⵄⴻⴷⴷⵉⵏ ⵖⴻⴼ ⵙⵟⴰⵡⴰⵍⵉ ⴷ ⵛⵛⵔⴰⴳⴰ (15 ⵏ ⵢⵉⴽⵉⵍⵓⵎⵉⵜⵔⴻⵏ), ⵎⴰ ⴷ ⵡⴰⵢⴻⴹ ⴷ ⵣⵔⴰⴷⵍⴰ-ⴳⵓⵔⴰⵢⴰ (90 ⵏ ⵢⵉⴽⵍⵉⵍⵓⵎⵉⵜⵔⴻⵏ) ⵢⴻⵔⵏⴰ ⴰⴷ ⵢⴻⵣⵔⵉ ⵖⴻⴼ ⴱⵓⵙⵎⴰⵄⵉⵍ, ⵜⵉⵒⴰⵣⴰ ⴷ ⵛⴻⵔⵛⴰⵍ.