ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⴰⵡⴰⵍ ⵖⴻⴼ ⵓⵙⵙⴻⵇⴷⴻⵛ ⵏ ⵜⵓⵜⵍⴰⵢⵜ ⵜⴰⵢⴻⵎⵎⴰⵜ ⴷⴻⴳ ⵓⵖⴻⵔⴱⴰⵣ ⴰⴷ ⴷ-ⵢⴰⵡⵉ « ⴰⵢⴻⵏ ⵢⴻⵍⵀⴰⵏ »
ⵍⴻⵣⵣⴰⵢⴻⵔ – ⵜⴰⵏⴻⵖⵍⴰⴼⵜ ⵏ ⵓⵙⵙⴻⴳⵎⵉ ⴰⵖⴻⵍⵏⴰⵡ, ⵏⵧⵓⵔⵉⴰ ⴱⴻⵏⴳⵀⴻⴱⵔⵉⵜ, ⵜⴻⵏⵏⴰ-ⴷ ⴰⵙⵙ ⵏ ⵍⴻⵜⵏⵉⵢⴻⵏ ⴷⴻⴳ ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ ⴷ ⴰⴽⴽⴻⵏ ⴰⵙⴽⴰⵙⵉ ⵖⴻⴼ ⵓⵙⵙⴻⵇⴷⴻⵛ ⵏ ⵜⵓⵜⵍⴰⵢⵜ ⵜⴰⵢⴻⵎⵎⴰⵜ ⴷⴻⴳ ⵓⵖⴻⵔⴱⴰⵣ ⴰⵎⴻⵏⵣⵓ ⴷ ⴰⵢⴻⵏ ⴰⵔⴰ ⴷ-ⵢⴰⵡⵉⵏ « ⴰⵢⴻⵏ ⵢⴻⵍⵀⴰⵏ », ⵢⴻⵔⵏⴰ ⵜⵡⴻⴽⴽⴻⴷ-ⴷ ⴷ ⴰⴽⴽⴻⵏ « ⴰⵙⵙⴻⵍⵎⴻⴷ ⵏ ⵜⵓⵜⵍⴰⵢⵜ ⵜⴰⵄⵕⴰⴱⵜ ⵓⵔ ⴷ-ⵢⴻⵍⵍⵉ ⵛⵛⴻⴽ ⴷⴻⴳ-ⵙ ⵢⴻⵔⵏⴰ ⵓⵔ ⵢⴻⵙⵙⴻⴼⴽ ⴰⵔⴰ ⴰⴷ ⵜⴻⵜⵜⵡⴰⴹⴻⵍⵍⴻⵍ ⵜⵎⴻⵜⵜⵉ ».
ⵎⴰⵙⵙⴰ ⴱⴻⵏⴳⵀⴻⴱⵔⵉⵜ, ⴰⵢ ⴷ-ⵢⴻⵙⵙⴰⵡⵍⴻⵏ ⴷⴻⴳ ⵜⴳⴰⵔⴰ ⵏ ⵓⵙⴰⵔⴰⴳ ⴰⵎⵏⴰⴹⴰⵏ ⵏ ⵓⵇⴻⵢⵢⴻⵎ ⵏ ⵢⵉⴽⴰⵢⴰⴷⴻⵏ ⴷⴻⴳ ⵜⵡⵉⵍⴰⵢⵉⵏ ⵏ ⵓⴳⴰⴼⴰ ⵏ ⵢⵉⴳⵏⴰⵏ ⵓⵏⵏⵉⴳⴻⵏ, ⵜⴻⵏⵏⴰ-ⴷ ⴷ ⴰⴽⴽⴻⵏ « ⴽⵔⴰ ⵏ ⵜⴻⵏⴼⴰⵍⵉⵢⵉⵏ ⴰⵢ ⴷ-ⵢⴻⵍⵎⴻⴷ ⵓⴳⵔⵓⴷ ⵙⴻⴳ ⵜⵡⴻⵏⵏⴰⴹⵜ-ⵏⵏⴻⵙ, ⵎⴰ ⵜⵜⵡⴰⵙⵇⴻⴷⵛⴻⵏⵜ ⴷⴻⴳ ⵓⵖⴻⵔⴱⴰⵣ, ⵣⴻⵎⵔⴻⵏⵜ ⴰⴷ ⵜ-ⴵⴵⴻⵏ ⴰⴷ ⴷ-ⵢⴻⵔⴱⴻⵃ ⵜⴰⵎⵓⵙⵙⵏⵉ ⵙ ⵜⴻⴼⵙⴻⵙ ⵢⴻⵔⵏⴰ ⵓⵔ ⵉⵅⴻⵚⵚⴻⵔ ⴰⵔⴰ ⴷⴻⴳ ⵜⴻⵣⵔⴰⵡⵉⵏ-ⵏⵏⴻⵙ ⵜⵉⵖⵓⵔⴱⵉⵣⵉⵏ ».
ⵜⴰⵏⴻⵖⵍⴰⴼⵜ ⵜⴻⵏⵏⴰ-ⴷ, ⵙⴻⴳ ⵢⵉⴷⵉⵙ ⵏⵉⴹⴻⵏ ⴷ ⴰⴽⴽⴻⵏ ⴰⵙⴽⴰⵙⵉ-ⴰ ⴰⵔⴰ ⴷ-ⵢⴰⵡⵉⵏ « ⴰⵢⴻⵏ ⵢⴻⵍⵀⴰⵏ » ⴷ ⵡⵉⵏ ⴰⵢ ⵢⴻⴵⴵⴰⵏ ⵉⴷⵉⵙⴰⵏ ⴰⴷ ⵎⴱⴰⴷⴷⴰⵍⴻⵏ ⵜⵉⵎⵓⵖⵍⵉⵡⵉⵏ ⵖⴻⴼ ⵍⴻⵡⵚⴰⵢⴰⵜ ⵏ ⵓⵙⴰⵔⴰⴳ ⴰⵖⴻⵍⵏⴰⵡ ⵏ ⵓⵇⴻⵢⵢⴻⵎ ⵏ ⵜⵙⴻⵎⵎⴻⵙⴽⴻⵍⵜ ⵏ ⵓⵖⴻⵔⴱⴰⵣ, ⴰⵎ ⵡⴰⴽⴽⴻⵏ ⴰⵢ ⴷ-ⵜⴻⵔⵏⴰ ⴷ ⴰⴽⴽⴻⵏ « ⵜⵉⵎⴻⵜⵜⵉ ⵜⴻⵃⵡⴰⴵ ⴰⴷ ⵜⴻⵙⵙⴻⵏ ⵍⵎⴻⴵⵀⵓⴷ ⴰⵢ ⵍⴰ ⵢⴻⵜⵜⴻⴳ ⵓⵖⵍⵉⴼ ».
ⵍⴻⵡⵚⴰⵢⴰⵜ ⵏ ⵓⵙⴰⵔⴰⴳ ⴰⵎⵏⴰⴹⴰⵏ ⵔⵣⴰⵏⵜ, ⴳⴰⵔ ⵜⵖⴰⵡⵙⵉⵡⵉⵏ ⵏⵉⴹⴻⵏ, ⴰⵙⵙⴻⵍⵀⵓ ⵏ ⵓⴳⴻⵔⵔⴻⵣ ⴷⴻⴳ ⵜⵓⵜⵍⴰⵢⵉⵏ ⴷ ⵜⵏⴻⴳⵡⴰ ⵏ ⵍⵍⵙⴰⵙ ⴰⵎ ⵜⵓⵙⵏⴰⴽⵜ ⴷ ⵜⵓⵜⵍⴰⵢⵜ ⵜⴰⵄⵕⴰⴱⵜ ⵉ ⵓⵙⵏⴻⵔⵏⵉ ⵏ ⵓⴼⵎⵉⴹⵉ ⵏ ⵔⵔⴱⴻⵃ.
ⵍⴻⵡⵚⴰⵢⴰⵜ-ⴰ ⵔⵣⴰⵏⵜ ⴷⴰⵖ ⴰⵙⵙⵓⴳⴳⴻⵜ ⵏ ⵜⵏⴻⵖⵔⵉⵢⵉⵏ ⵢⴻⵜⵜⴻⴷⴷⵓⵏ ⵙⴻⴳ ⵜⴻⵎⵏⴰⴹⵜ ⵖⴻⵔ ⵜⴰⵢⴻⴹ ⴷⴻⴳ ⵜⴻⵎⵏⴰⴹⵉⵏ ⵜⵓⴱⵄⵉⴷⵉⵏ ⴷⴻⴳ ⵓⴽⴰⵜⴰⵔ ⵏ ⵓⵙⵙⴻⴼⵄⴻⵍ ⵏ « ⵓⵎⴻⵏⵣⴰⵢ ⵏ ⵜⴳⴰⴷⴷⴰ ⵏ ⵜⵍⴻⵎⵎⵉⵥⵉⵏ ».
