ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⴰⵙⴻⵍⵡⴰⵢ ⴱⵧⵓⵜⴻⴼⵍⵉⴽⴰ ⵢⴻⵎⵎⵓⴳⴻⵔ ⴰⵏⴻⵖⵍⴰⴼ ⵏ ⵜⵖⴰⵡⵙⵉⵡⵉⵏ ⵏ ⵓⵣⵖⴰⵔ ⵏ ⵜⵙⴻⵍⵟⵏⴰ ⵏ ⵄⵓⵎⴰⵏ
ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – ⴰⵙⴻⵍⵡⴰⵢ ⵏ ⵜⴻⴳⴷⵓⴷⴰ, ⴰⴱⴷⴻⵍⴰⵣⵉⵣ ⴱⵧⵓⵜⴻⴼⵍⵉⴽⴰ, ⵢⴻⵎⵎⵓⴳⴻⵔ ⴰⵙⵙ ⵏ ⵍⴻⵅⵎⵉⵙ ⴷⴻⴳ ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ ⴰⵏⴻⵖⵍⴰⴼ ⵏ ⵜⵖⴰⵡⵙⵉⵡⵉⵏ ⵏ ⵓⵣⵖⴰⵔ ⵏ ⵜⵙⴻⵍⵟⵏⴰ ⵏ ⵄⵓⵎⴰⵏ, ⵢⵧⵓⵛⴻⴼ ⴱⴻⵏ ⴰⵍⴰⵧⵓⵉ ⴱⴻⵏ ⴰⴱⴷⴰⵍⵍⴰⵀ. ⴷⴻⴳ ⵢⵉⵡⴻⵜ ⵏ ⵜⵙⴻⵖⵔⵓⵜ ⵏ ⵜⵖⴻⵎⵙⴰ ⵎⵉ ⵉⴼⵓⴽ ⵓⵎⵢⴰⴳⴻⵔ-ⵏⵏⵉ, ⵢⴻⵏⵏⴰ-ⴷ ⵓⵏⴻⵖⵍⴰⴼ ⴰⵄⵓⵎⴰⵏⵉ ⴷ ⴰⴽⴽⴻⵏ ⵢⴻⵙⵙⴰⵡⴻⴹ-ⴰⵙ-ⴷ ⵉ ⵓⵙⴻⵍⵡⴰⵢ ⴱⵧⵓⵜⴻⴼⵍⵉⴽⴰ ⴰⵣⵓⵍ ⵏ ⵓⵙⴻⵍⵟⴰⵏ ⵇⴰⴱⵧⵓⵙ ⴱⴻⵏ ⵙⴰⵉⴷ ⴷ ⵜⴻⴱⵕⴰⵜ ⵖⴻⴼ ⵡⴰⵙⵙⴰⵖⴻⵏ ⵓⵛⵔⵉⴽⴻⵏ.
« ⴰⵎⵢⴰⴳⴻⵔ-ⴰ ⵢⴻⴵⴵⴰ-ⴰⵖ ⴰⴷ ⴷ-ⵏⴻⵙⵙⵓⴽⴽ ⵜⵉⵟ ⵖⴻⴼ ⵜⴻⴷⵢⴰⵏⵉⵏ ⵜⵉⵏⴻⴳⴳⵓⵔⴰ ⴰⵢ ⴷ-ⵢⴻⵍⵍⴰⵏ ⴷⴻⴳ ⵓⵎⴰⴹⴰⵍ ⴰⵄⵕⴰⴱ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵏⴻⵖⵍⴰⴼ ⴰⵄⵓⵎⴰⵏⵉ ⵏ ⵜⵖⴰⵡⵙⵉⵡⵉⵏ ⵏ ⵓⵣⵖⴰⵔ ⴰⵢ ⴷ-ⵢⴻⵔⵏⴰⵏ ⴷ ⴰⴽⴽⴻⵏ ⵢⴻⵙⵙⴻⴼⴽ ⴰⴷ ⴷ-ⵢⵉⵍⵉ ⵓⵅⴻⴷⴷⵉⵎ « ⵉⴷⵉⵙ ⵙ ⵉⴷⵉⵙ ⴰⴽⴽⴻⵏ ⴰⴷ ⴼⵔⵓⵏⵜ ⵜⵍⵓⴼⴰ-ⴰ ⴰⵢ ⴷ-ⵢⴻⴳⴳⵜⴻⵏ ⵖⴻⴼ ⵓⴳⵎⵓⴹ ⴰⵍⴻⵎⵎⴰⵙ ». « ⵢⴻⵍⵍⴰ-ⴷ ⴷⴰⵖ ⵡⴰⵡⴰⵍ ⵖⴻⴼ ⵜⴻⴳⵏⵉⵜ ⴷⴻⴳ ⵍⵉⴱⵢⴰ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵏⴻⵖⵍⴰⴼ ⴰⵄⵓⵎⴰⵏⵉ ⴰⵢ ⵉⵄⴰⵡⴷⴻⵏ ⵉⵡⴻⴽⴽⴻⴷ-ⴷ ⴰⴱⴷⴰⴷ ⵏ ⵍⴻⵣⵣⴰⵢⴻⵔ ⴷ ⵜⵎⵓⵔⵜ-ⵏⵏⴻⵙ ⵖⴻⵔ ⵢⵉⴷⵉⵙ ⵏ ⵓⴽⴰⵍⴰ ⵏ ⵓⵎⵙⵓⵖⴰⵍ ⴰⵖⴻⵍⵏⴰⵡ ⴷⴻⴳ ⵍⵉⴱⵢⴰ.
ⴰⴷⵉⵡⴻⵏⵏⵉ ⴰⵢ ⴷ-ⵢⴻⵍⵍⴰⵏ ⴳⴰⵔ-ⴰⵙⴻⵏ ⴷ ⵡⵉⵏ ⴷⴻⴳ ⴷ-ⵜⴻⵜⵜⵡⴰⴱⴷⴻⵔ ⴷⴰⵖ ⵜⴻⵎⵙⴰⵍⵜ ⵏ ⵓⵙⵙⴻⴱⴷⴻⴷ ⵏ ⵜⵙⴻⵇⵇⴰⵎⵓⵜ ⵜⵓⵅⵍⵉⴹⵜ ⵜⴰⴷⵣⴰⵢⵔⵉⵜ-ⵜⴰⵄⵓⵎⴰⵏⵉⵜ ⴰⵢ ⵙⵙⴻⴼⵔⴰⵏ ⴰⴷ ⵜⵜ-ⵉⴷ-ⵙⴱⴻⴷⴷⴻⵏ ⴷⴻⴳ ⵡⴰⵎⴱⴻⵕ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵎⴰⵙⵙ ⵢⵧⵓⵛⴻⴼ ⴱⴻⵏ ⴰⵍⴰⵧⵓⵉ ⴱⴻⵏ ⴰⴱⴷⴰⵍⵍⴰⵀ, ⴰⵎ ⵡⴰⴽⴽⴻⵏ ⴰⵢ ⴷ-ⵉⵅⴻⴱⴱⴻⵔ ⴷ ⴰⴽⴽⴻⵏ ⴰⴷ ⴷ-ⵔⵣⵓⵏ ⵢⵉⵎⴰⵣⵣⴰⵢⴻⵏ ⵉⴷⵣⴰⵢⵔⵉⵢⴻⵏ ⵖⴻⴼ ⵄⵓⵎⴰⵏ ⴰⵎ ⵡⴰⴽⴽⴻⵏ ⴰⵔⴰ ⴷ-ⵔⵣⵓⵏ ⵢⵉⵎⴰⵣⵣⴰⵢⴻⵏ ⵉⵄⵓⵎⴰⵏⵉⵢⴻⵏ ⵖⴻⴼ ⵍⴻⵣⵣⴰⵢⴻⵔ ⵉ ⵍⵎⴻⵏⴷ ⵏ ⵓⵎⵄⴰⵡⴻⵏ ⵓⵛⵔⵉⴽ ⴷⴻⴳ ⵢⵉⵃⵔⵉⵛⴻⵏ ⵢⴻⵎⴳⴻⵔⵔⴰⴷⴻⵏ.
ⵜⵉⵖⵉⵎⵉⵜ-ⴰ ⵜⴻⵍⵍⴰ-ⴷ ⵙ ⵓⵃⴷⴰⵕ ⵏ ⵓⵏⴻⵖⵍⴰⴼ ⵏ ⵓⵡⴰⵏⴰⴽ, ⴰⵏⴻⵖⵍⴰⴼ ⵏ ⵜⵖⴰⵡⵙⵉⵡⵉⵏ ⵏ ⵓⵣⵖⴰⵔ ⴷ ⵓⵎⵢⴰⵍⴻⵍ ⴰⴳⵔⴰⵖⵍⴰⵏ, ⵔⴰⵎⵜⴰⵏⴻ ⵍⴰⵎⴰⵎⵔⴰ. ⴰⵏⴻⵖⵍⴰⴼ ⵏ ⵜⵖⴰⵡⵙⵉⵡⵉⵏ ⵏ ⵓⵣⵖⴰⵔ ⵏ ⵜⵙⴻⵍⵟⵏⴰ ⵏ ⵄⵓⵎⴰⵏ ⵢⴻⵡⵡⴻⴹ-ⴷ ⵖⴻⵔ ⵍⴻⵣⵣⴰⵢⴻⵔ ⴰⵙⵙ ⵏ ⵍⴰⵕⴻⴱⵄⴰ ⵜⴰⵎⴻⴷⴷⵉⵜ ⵉ ⵍⵎⴻⵏⴷ ⵏ ⵢⵉⵡⴻⵜ ⵏ ⵜⴻⵔⵣⵉ ⵏ ⵓⵅⴻⴷⴷⵉⵎ ⵏ ⵙⵉⵏ ⵏ ⵡⵓⵙⵙⴰⵏ.
