ⴰⴱⵢⴰⵏⵏⵓ ⵖⴻⵔ ⵡⴰⵢⵜ ⵎⵥⴰⴱ
ⴰⵞ ⵢⵉⵖⴻⴼ ⵏ ⵓⵙⵓⴳⴳⴰⵙ, ⵙⴻⴳ ⵡⵓⴷⵓⴼ ⵏ ⵎⵓⵃⴻⵕⵕⴻⵎ ⴰⵔ ⴰⵙⵙ ⴼⴰⵢⴷ (ⵡⵉⵙ) ⵎⵕⴰⵡ ⴷⵉ ⵓⵢⵓⵔ, ⵜⵉⴷⴷⴰⵔ ⵏ ⴰⵜ ⵎⵥⴰⴱ ⵜⵜⴻⴳⴳⴻⵏⵜ ⵜⴼⴰⵙⴽⴰ ⵏ "ⴰⴱⵢⴰⵏⵏⵓ" ⵏⵉⵖ "Αⴱⵢⴰⵀⴰⵏⵏⵓ": ⴷ ⵉⴳⴳⴻⵜ ⵜⴼⴰⵙⴽⴰ ⵜⵓⵙ‑ⴰⵏⴻⵖ‑ⴷ ⵙⴻⴳ ⵣⵉⴽ ⵏ ⵣⵉⴽ, ⵜⵜⴻⴳⴳⴻⵏ-ⴰⵙⴻⵏ-ⵜⵜ ⵎⵉⴷⴷⴻⵏ ⵉ ⵜⴰⵔⵡⴰ ⵜⴰⵣⴷⴰⴷⵜ. ⵎⵉ ⵡⴰⵏⵏⴰⵏ (ⵏⴻⴽⴹⴻⵏ) ⴰⵙⵙ ⵙⴻⴳ ⵡⵓⵙⵙⴰⵏ ⴷⴻⴳ ⵢⵉⴳⴳⴻⵜ ⵙⵉ ⵜⴻⴷⴷⴰⵔ, ⴰⴷ ⴰⵣⵏⴻⵏ ⵉ ⴰⵜ ⵖⴻⵔ‑ⵙⴻⵏ ⴷ ⴰⵜ ⵡⴻⵖⵍⴰⴷ: " ⵉⵡⴰⵜ ⵉⵏⵜ-ⴰⵙⴻⵏ ⵉ ⵜⴰⵔⵡⴰ-ⵏⵡⴻⵎ ⴰⴷ ⴷ‑ⴰⵙⴻⵏ ⴰⵙⵙ ⵏ ⵡⴰⵢⴼⵍⴰⵏⵉ ⴰⴷ ⴳⴳⴻⵏ ⵢⵉⴷ‑ⵏⴻⵖ ⴰⴱⵢⴰⵏⵏⵓ!" ⵉⵀⵉ, ⵎⵉ ⵢⵉⵡⴻⴹ ⵡⴰⵙⵙ‑ⵏⵏⵉ ⴰⴷ ⴷ-ⴰⵙⴻⵏ ⵉⵎⴰⵔ‑ⴰ ⴰⵢⴻⵏ ⵜⴰⵔⵡⴰ ⵙⵙⵢⴰ ⴷ ⵙⵙⵢⴰ, ⴰⴷ ⴳⴻⵔⵡⴻⵏ ⴰⵢ ⵓⵍⵓⵏ (ⴰⴽⴽ) ⴷⵉ ⵜⴻⴷⴷⴰⵔⵜ-ⵏⵏⵉ, ⴰⴷ ⴷ-ⴱⴱⵉⵏ ⴰⵢⴻⵏ ⴰⵜ ⵜⴻⴷⴷⴰⵔⵜ ⴰⴷ ⵙⵙⵓⵏ ⵛⵔⴰ ⵙ ⴷⴷⴰⵡ ⵢⵉⵎⵉ ⵏ ⵉⵜⵔⴰⵏ (ⵛⴻⴱⴱⴰⴽ), ⴰⵙⴻⵏ‑ⵡⵛⴻⵏ ⵉ ⵢⵉⵛⵉⴷⵡⴰⵏ (ⵉⵔⴱⴰⵜⴻⵏ), ⴰⵞ ⵢⵉⴳⴳ ⵙⵉ‑ⵙⴻⵏ, ⴱⴻⵙⵙⵉ (ⵉⵎⵉⴽ) ⵏ ⵉⴱⴰⵡⴻⵏ, ⴱⴻⵙⵙⵉ ⵏ ⴽⴰⵡⴽⴰⵡ ⵏⵉⵖ ⵏ ⵜⵛⵉⵛⴻⵜ (ⵍⵍⵓⵣ), ⴱⴻⵙⵙⵉ ⵏ ⵜⴻⵎⵣⵉⴹⵉⵏ ⵏ ⵡⴻⵊⴹⵉⴹ (ⵍⴻⵃⵍⴰⵡⵉ ⵏ ⵓⴱⵓⵄⵓⴷ) ⵏⵉⵖ ⵓⵛⵉⵏ‑ⴰⵙ ⴷ ⵍⴳⴰⵟⵓ, ⴱⴻⵙⵙⵉ ⴷⴻⵅ ⵏ ⵉⴽⴻⵕⵕⴰⵢⴻⵏ ⵎⴰ ⵍⵍⴰⵏ, ⴱⴻⵙⵙⵉ ⵏ ⵙⵙⵓⴽⴽⴻⵔ, ⴰⵞ ⵢⵉⴳⴳⴻⵏ ⴷ ⵡⴰⵢⴻⵏ ⵉ ⵢⴻⵅⵙ ⴰⴷ ⵢⴻⴳⴳ.. ⴰⵙⴻⵏ‑ⵛⵛⴰⵕⴻⵏ ⴷ ⴰⵡⴻⵃⴷⵉ (ⵎⵍⵉⵃ) ⵓⵕⴰⵏ‑ⵏⵙⴻⵏ ⴷ ⵢⵉⵅⴻⵎⵎⴰⵍⴻⵏ ⵏ ⵜⵛⴻⴱⵔⵉⵏ‑ⵏⵙⴻⵏ ⴷ ⵉⵄⴻⴱⴱⴰⵏ‑ⵏⵙⴻⵏ, ⴰⵞ ⴰⵔⵔⴰⵡ ⵢⵇⴰⵙ ⴰⴷ ⵢⵛⴻⵎⵎⴻⵕ ⵓⵊⴰⵔ ⵏ ⴰⵢⵜⵎⴰ-ⵙ... ⵉⵀⵉ, ⴰⴷ ⴰⵍⵉⵏ ⵉⵎⴰⵔ‑ⴰ ⴰⵢ ⵓⵍⵓⵏ ⵖⴻⵔ ⵏⵏⴻⴵ‑ⵡⴰⴷⴷⴰⵢ (ⴰⵙⵡⵉⵔ ⵓⵏⵏⵉⴵ ⵏ ⵡⴻⵅⵅⴰⵎ) ⴰⵙ‑ⵏⵏⴻⴹⴻⵏ ⵉ ⵡⴻⵢⴷⴻⵔ ⵏ ⵍⵙⴰⵙ (ⵛⴻⴱⴱⴰⴽ) ⴰⴷ ⵏⵜⴰⵏ ⵙⵙⴻⵏⴵⵓⴵⵓⵢⴻⵏ ⵓⵕⴰⵏ‑ⵏⵙⴻⵏ ⴷ ⵡⴰⵢⴻⵏ ⵉ ⴷ-ⵛⴻⵎⵎⵕⴻⵏ, ⵛⴻⵏⵏⵓⵏ ⵇⵇⴰⵔⴻⵏ: "ⴰⴰⴰⴱⵢⴰⴰⴰ ⵀⴰⴰⴰ ⵏⵏⵓⵓⵓ.. ⵍⴰⵍⵍⴰ-ⵏⵏⵓ, ⵚⴰⴷⴰⵇ-ḷḷⴰⴰⴰⵀ ⵡⴰ ⵜⵄⴰⵍⵍⴰⴰⴰ... ⵀⴰⴰⵢ!" (ⴰⵡⴰⵍ‑ⴰ ⵖⴻⵔ ⴰⵜ ⵉⵣⴵⴻⵏ, ⵎⴰⵛⴰ ⴰⵞ ⵢⵉⵖⵔⴻⵎ ⴷ ⵡⴰⵢ ⵉ ⵇⵇⴰⵔⴻⵏ ⵎⵉⴷⴷⴻⵏ‑ⵙ). ⵉⵀⵉ, ⵜⴰⵔⵡⴰ ⴰⴷ ⵇⵇⵉⵎⴻⵏ ⵛⴻⵏⵏⵓⵏ ⵉⵡⴰⵍⴻⵏ-ⵏⵏⵉ ⵜⵜⵄⴰⵡⴰⴷⴻⵏ‑ⵜⴻⵏ, ⵔⴻⵏⵏⵉⵏ ⵓⵊⴰⵔ ⴷ ⵓⵊⴰⵔ ⴰⵥⴰⴳⴳⴰ,... ⴰⴰⴰⵔ ⵎⵉ ⵏⵏⴰⵏ "ⵀⴰⴰⵢ" ⵜⴰⵏⴻⴵⴵⴰⵔⵓⵜ, ⵜⵉⵎⵉⵔⵜ-ⵏⵏⵉ ⴽⴰⵏ, ⴰⴷ ⴷ‑ⴽⵍⵉⵏ (ⴰⴷ ⴷ‑ⴳⴳⵔⴻⵏ) ⴰⴽⴽ ⴰⵢ ⵉ ⴳⴻⵔⵡⴻⵏ ⴷⴻⴳ ⴼⴰⵙⵙⴻⵏ‑ⵏⵙⴻⵏ! ⴰⴷ ⴰⵜ‑ⵛⴻⵜⵜⴻⴹⴻⵏ ⵖⴻⵔ ⵓⴵⴻⵏⵏⴰ ⴰⴷ ⴷ‑ⵢⵓⴹⴰ ⵖⴻⵔ ⵡⴰⴷⴷⴰⵢ ⵙⴻⴳ ⵢⵉⵎⵉ ⵏ ⵉⵜⵔⴰⵏ ⴰⵎ ⵡⴻⵏⵥⴰⵔ. ⵜⵜⵡⴰⵏⵏⴰⵏ ⴰⴽⴰⵏ ⵙ ⵜⵉⵟⵟⴰⵡⵉⵏ‑ⵏⵙⴻⵏ, ⵓⵔ ⵢⴻⵜⵜⴻⵙⵙⴻⵏ ⴱⴰⴱ‑ⵙ ⵎⴻⵍⵎⵉ ⵖ ⴰⴷ ⴽⵍⵉⵏ ⵎ'ⵓⵔ ⵢⴻⵍⵍⵉ ⵢⵉⴷ‑ⵏⵙⴻⵏ. ⵎⵉ ⴽⵍⵉⵏ, ⴰⴷ ⵣⵣⴻⵍⴻⵏ ⵎⵣⴰⵡⵔⴻⵏ ⵜⵉⵙⵓⵏⴰⵏ ⵖⴻⵔ ⵡⴰⴷⴷⴰⵢ, ⵖⴻⵔ ⵡⴰⵙⵙⵓ (ⵜⴰⴼⴻⵔⵔⴰⵛⵉⵜ) ⵉ ⴰⵙⴻⵏ‑ⵙⵙⵓⵏ ⴷⴷⴰⵡ ⵢⵉⵜⵔⴰⵏ, ⴰⴷ ⵡⴹⴰⵏ ⵖⴻⴼ ⵡⴰⵢⴻⵏ ⵉⴼⵙⴰⵏ ⴷⵉ‑ⵙ ⴳⴻⵔⵔⵡⴻⵏ‑ⵜ, ⴷ ⵏⴻⵜⵏⵉⵏ ⵜⵜⴼⴻⵔⵄⴻⵏⴻⵏ ⴹⴻⵙⵙⴻⵏ, ⵜⴰⵏⴻⴵⴵⴰⵔⵓⵜ, ⴰⴷ ⵡⵛⴻⵏ ⴰⴽⴽ ⴰⵢⴻⵏ ⵉ ⴳⴻⵔⵡⴻⵏ ⵉ ⴰⵜ ⵜⴻⴷⴷⴰⵔⵜ‑ⵏⵏⵉ, ⴰⵙⴻⵏ‑ⵜ-ⵥⵓⵏⴻⵏ (ⴱⴹⴰⵏ) ⴷ ⵜⵉⵣⴳⵉⴱⵉⵏ ⴷ ⵜⵉⵎⴻⵥⵢⴰⵏⵉⵏ ⴰⵞ ⵉⴳⴳⴻⵏ ⵢⴰⵖ ⵜⵓⵏⵜ‑ⵏⵏⴻⵙ (ⵜⵏⵓⴱⴰ) ⵢⴻⵥⵡⴰ ⵖⴻⵔ‑ⵙⴻⵏ ⴷ ⵏⴻⵜⵜⴰ ⵢⴻⵙⴱⴰ ⵢⴻⵜⵜⴳⴻⵥⴳⴻⵥ... ⵢⴻⵜⵜⵊⵓⵔ ⵢⴻⵇⵇⴰⵔ ⴷⴻⴳ ⵡⵓⵍ‑ⵏⵏⴻⵙ : ⴰⵡⵉⵙⵙⴻⵏ ⵎⴰⵏⵉ ⵖ ⴰⴷ ⵢⵉⵍⵉ ⴰⴱⵢⴰⵏⵏⵓ ⵏ ⵓⵣⴻⵞⵞⴰ ?
ⵓⵍⵙⴻⵏ ⴰⵜ ⵣⵉⴽ ⵖⴻⴼ ⵜⴻⵏⴼⵓⵙⵜ ⵏ ⴰⴱⵢⴰⵏⵏⵓ, ⵢⴻⵍⵍⴰ ⵡⴰ ⵉⵇⵇⴰⵔⴻⵏ : ⵜⴻⴷⵡⴻⵍ ⵖⴻⵔ ⵢⵉⵎⴰⵔ ⵏ ⴱⴰⴱⴰ-ⵏⵏⴻⵖ Νⵓⵃ ⴰⵙⴻⵔ, ⵙⴻⴳ ⵎⵉ ⵢⴻⵔⵙⵓ ⵓⵖⴻⵔⵔⴰⴱⵓ‑ⵏⵏⴻⵙ ⵜⴰⵎⵓⵔⵜ ⵜⴻⵇⵇⵓⵔ, ⵢⴻⴳⵔⴻⵡ ⴱⵏⵓⴷⴰⵎ ⴷ ⵉⵎⵓⴷⴰⵔ ⵉ ⴷ‑ⵓⵙⵉⵏ ⵢⵉⴷ‑ⵙ ⴰⴽⴽ, ⵢⴻⴱⴱⵉ‑ⴷ ⵢⴻⵏⵜⴰ ⵢⴻⴽⵍⵉ‑ⴰⵙⴻⵏ‑ⴷ ⵙⵉ ⵓⴵⴻⵏⵏⴰ ⵏ ⵓⵖⴻⵔⵔⴰⴱⵓ ⴰⵢⴻⵜⵍⵉ ⴷ ⵡⵓⵛⵛⵓ ⵉ ⴷ‑ⵉⵡⵉⵏ ⵢⵉⴷ‑ⵏⵙⴻⵏ,... ⵉⵍⵉⵏ ⵜⵜⴻⵣⵣⵍⴻⵏ, ⵜⵜⵏⴰⵇⵇⴰⵏ, ⴰⵞ ⵓⵎⴻⵅⵍⵓⵇ ⵢⴻⵜⵜⴻⴱⴱⵉ ⵜⵓⵏⵜ ⵉ ⵢⵉⵍⵉ.., ⵉⵍⵉⵏ ⵉⵛⵉⴷⵡⴰⵏ ⴷⴻⵖ ⵏⴻⵜⵏⵉⵏ ⵜⵜⴱⵉⴱⵉⵣⴻⵏ ⵖⴻⴼ‑ⵙ ⴰⵔ ⴰⵙ‑ⵜⵜⵉⵏⵉⵏ ⵙ ⵢⵉⵍⴻⵙ‑ⵏⵙⴻⵏ ⵓⴽⵔⵉⴷ: "ⴰⴱⵉ ⴰ ⵏⵓ, ⴰⴱⵉ ⴰ ⵏⵓ, ⴰⴱⵉ ⴰ ⵏⵓ, ..." (ⴰⵡⵉ-ⴷ ⴰ ⵏⵓⵃ). ⵓⵔ ⵏⴻⵙⵙⵉⵏ ⵏ ⵜⵉⴷⴻⵜ ⵏⵉⵖ ⵓⵀⵓ.
ⴰⵎⴻⵣⵡⴰⵔ ⵏ ⵎⵓⵃⴻⵕⵕⴻⵎ, ⵇⵇⴰⵔⴻⵏ ⵎⵉⴷⴷⴻⵏ ⵜⵡⴰⵜⵔⴰ ⵏ ⵢⵉⵖⴻⴼ ⵏ ⵓⵙⵓⴳⴳⴰⵙ. ⵎⵉ ⵜⵓⴷⴻⴼ ⵜⴰⵄⴰⵛⵓⵔⵜ (ⴰⵙⵙ ⵏ ⵎⵕⴰⵡ ⴷⵉ ⵓⵢⵓⵔ), ⴰⴷ ⴷ‑ⴽⴽⵔⴻⵏ ⵎⵉⴷⴷⴻⵏ ⵣⵉⴽ ⵙ ⵢⵉⴹⴻⵙ, ⴰⴷ ⵙⵙⵉⵔⴷⴻⵏ ⵙ ⵡⴰⵎⴰⵏ ⵏ ⵜⵣⵓⴳⴳⴰⵔⵜ (ⵙⵙⴻⴷⵔⴻⵜ) ⵉ ⵜⴻⵡⵡⴻⵜ ⵜⴰⴼⵓⵢⵜ, ⴰⴷ ⵖⵔⴻⵏ ⵉⴱⴻⴷⴷⵓⵔⴻⵏ ⵏ ⵓⵢⵓⵛ ⵖⴱⴻⵛⵛⴰ‑ⵏⵏⵉ, ⴳⴳⴻⵏ ⵜⵡⴰⵜⵔⴰ, ⵡⵛⴻⵏ ⵙⵍⴰⵎ ⵊⴰⵔ‑ⴰⵙⴻⵏ ⴷ ⵡⵉ ⵎⵍⵉⵍⴻⵏ ⴰⴽⴽ ⴷⴻⴳ ⵡⴰⵙⵙ‑ⵏⵏⵉ, ⵥⵡⴰⵏ ⵖⴻⵔ ⵜⴻⵏⴹⴰⵍ ⴷ ⵜⵉⴵⵔⴰⵔⴰⵡⵉⵏ, ⵉⵔⴵⴰⵣⴻⵏ - ⵜⵉⵙⴻⴷⵏⴰⵏ - ⵜⴰⵔⵡⴰ, ⴱⴰⵛ ⴰⴷ ⵎⵎⴻⴽⵜⵉⵏ ⵉⵎⵔⵉⵡⴻⵏ‑ⵏⵙⴻⵏ ⴷ ⵉⵍⵎⴻⵖⵔⵉⵡⴻⵏ ⵉⵍⵍⴰⵏ ⴰⵙⵙ‑ⴰ ⴷⴷⴰⵡ ⵓⵛⴰⵍ... ⵎⵎⴻⴽⵜⵉⵏ ⵉ ⵢⴻⵍⵍⴰ ⵣⴻⴷⴷⵉⵖ (ⵎⴰⵣⴰⵍ) ⴰⴷ ⵜⴻⵏ‑ⴹⴻⴼⵔⴻⵏ ⵜⴰⵔⵣⴻⴼⵜ ⵓⵍⴰ ⵎⵓⵇⵇⴻⵍ ⵎⴻⵏⵏⴻⵛⵜ ⵉ ⵣⴻⴷⵖⴻⵏ ⴷⵉ ⵜⴷⵓⵏⵏⵉⵜ.
ⴰⴱⵢⴰⵏⵏⵓ ⴰⵎⵉⵎⵓⵏ. ⴰⵔ ⵢⵉⵎⴰⵍ, ⵜⴻⵔⵙ‑ⴷ ⵜⵏⴻⵎⵎⵉⵔⵜ.
