ⴰⵙⵉⴼ ⵏ ⵎⵉⵙⵙⵉⵙⵙⵉⵒⵒⵉ
ⴰⵙⵉⴼ ⵏ Mississippi ⴷ ⴰⵙⵉⴼ ⴰⵎⴻⵇⵔⴰⵏ ⴰⴽⴽ ⴷⴻⴳ ⵜⴻⵎⵔⵉⴽⵜ ⵏ ⵓⴳⴰⴼⴰ. ⵉⴱⴻⴷⴷⵓ-ⴷ ⵙⴻⴳ ⵓⴳⴻⵍⵎⵉⵎ ⵏ Itasca (ⴷⴻⴳ Minnesota, ⴷⴻⴳ ⵢⵉⵡⵓⵏⴰⴽ ⵢⴻⴷⴷⵓⴽⴽⵍⴻⵏ), ⵢⴻⵔⵏⴰ ⴰⵎⴰⵏ-ⵏⵏⴻⵙ ⵜⵜⴻⵏⵖⴰⵍⴻⵏ ⵙ ⴰⵏⵥⵓⵍ [1] ⴰⵔⵎⴰ ⴷ ⴰⴱⴰⴳⵓ ⵏ ⵎⵉⴽⵙⵉⴽ. ⵉⵙⴰⴼⴻⵏ ⵏ Missouri ⴻⴷ Ohio ⵙⵙⴻⵏⵖⴰⵍⴻⵏ-ⴷ ⴷⴰⵖⴻⵏ ⴰⵎⴰⵏ-ⵏⵙⴻⵏ ⵙ ⴰⵙⵉⴼ-ⴰ. Mississippi ⵖⴻⵔ-ⵙ 3.780 ⵏ ⵢⵉⴽⵉⵍⵓⵎⵉⵜⵔⴻⵏ ⴷⴻⴳ ⵜⴻⵖⵣⴻⴼ, ⵢⴻⵔⵏⴰ ⵜⴰⵊⵓⵎⵎⴰ-ⵏⵏⴻⵙ [2] ⵜⵓⵡⴻⴹ ⵖⴻⵔ 3,1 ⴽⵎ2 [3].
ⴷ ⴰⵏⴰⵔⴰⵎ [4] Hernando de Soto ⴰⵢ ⴷ ⵓⵕⵓⴼⵉ ⴰⵎⴻⵣⵡⴰⵔⵓ ⴰⵢ ⵢⵓⵡⴹⴻⵏ ⵙ ⴰⵙⵉⴼ-ⴰ ⴷⴻⴳ 1541. ⴷⴻⴳ 1673, ⵉⴼⵕⴻⵏⵙⵉⵙⴻⵏ Louis Jolliet ⴻⴷ Jacques Marquette ⵙⵙⴰⴽⵍⴻⵏ [5] ⴷⴻⴳ ⵡⴰⵙⵉⴼ-ⴰ ⵢⴻⵔⵏⴰ ⵓⵡⴹⴻⵏ ⴰⵔⵎⵉ ⴷ ⴰⵙⵉⴼ ⵏ Arkansas. ⴰⵏⴰⵔⴰⵎ ⴰⴼⵕⴻⵏⵙⵉⵙ La Salle ⵢⵓⵡⴻⴹ ⵙ ⴰⴷⴻⵍⵜⴰ ⵏ ⵡⴰⵙⵉⴼ-ⴰ ⴷⴻⴳ 1682 ⵢⴻⵔⵏⴰ ⴷ ⵏⴻⵜⵜⴰ ⴰⵢ ⴷ ⴰⴼⵕⴻⵏⵙⵉⵙ ⴰⵎⴻⵣⵡⴰⵔⵓ ⴰⵢ ⴷ-ⵢⴻⵙⵖⴻⵔⵜⴻⵏ [6] ⵜⴰⵎⴰ ⵏ Mississippi ⴻⴷ Louisiana ⴷ ⴰⵢⵍⴰ ⵏ ⴼⵕⴰⵏⵙⴰ. ⴷ ⴰⵢⴰ ⴰⵢ ⵢⴻⵊⵊⴰⵏ ⴼⵕⴰⵏⵙⴰ ⴰⴷ ⵜⴻⵃⴽⴻⵎ ⵜⴰⵎⴰ ⵏ ⵓⴳⴰⴼⴰ ⵏ ⵡⴰⵙⵉⴼ-ⵏⵏⵉ. ⵎⴰ ⴷ ⵜⴰⵎⴰ ⵏ ⵡⴻⵏⵥⵓⵍ-ⵏⵏⴻⵙ ⵜⴻⵇⵇⴻⵍ ⴷⴷⴰⵡ ⵓⴷⴰⴱⵓ ⵏ ⵙⵒⴻⵏⵢⵓⵍ ⵙⴻⴳ 1769 ⴷ ⴰⵙⴰⵡⴻⵏ. ⴷⴻⴳ 1783, ⵉⵡⵓⵏⴰⴽ ⵢⴻⴷⴷⵓⴽⴽⵍⴻⵏ ⵔⵔⴰⵏ ⴰⵙⵉⴼ ⵏ Mississippi ⴷ ⵜⴰⵍⴰⵙⵜ-ⵏⵙⴻⵏ ⵜⵓⵜⵔⵉⵎⵜ [7], ⵙⴰⴽⴽⵉⵏ, ⴷⴻⴳ 1803, ⴼⵕⴰⵏⵙⴰ ⵜⴻⵙⵙⴻⵏⵣ ⴰⴽⴰⵍ-ⵏⵏⴻⵙ ⵏ Mississippi ⴻⴷ Louisiana ⵉ ⵢⵉⵡⵓⵏⴰⴽ ⵢⴻⴷⴷⵓⴽⴽⵍⴻⵏ. ⴷⴻⴳ 1863, ⴷⴻⴳ ⵜⴰⵍⵍⵉⵜ ⵏ ⵡⴻⵎⴳⴰⵔⵓ ⴰⵖⴰⵔⵉⵎ [8] ⴷⴻⴳ ⵢⵉⵡⵓⵏⴰⴽ ⵢⴻⴷⴷⵓⴽⴽⵍⴻⵏ, ⵉⵖⴰⵍⵍⴻⵏ ⵉⵎⴰⵔⵉⴽⴰⵏⵉⵢⴻⵏ ⵏ ⵜⴷⵓⴽⵍⵉ ⴹⴹⴼⴻⵏ ⵜⴰⵎⴷⵉⵏⵜ ⵏ Vicksburg ⴰⵢ ⴷ-ⵢⴻⵣⴳⴰⵏ ⵖⴻⴼ ⵡⴰⵙⵉⴼ ⵏ Mississippi ⵢⴻⵔⵏⴰ ⴷ ⴰⵢⴰ ⴰⵢ ⵜⴻⵏ-ⵢⴻⵊⵊⴰⵏ ⴰⴷ ⵙⴱⴻⵄⴷⴻⵏ ⵉⵖⴰⵍⵍⴻⵏ ⵉⴽⵓⵏⴼⵉⴷⵉⵕⴰⵍⵉⵢⴻⵏ ⵖⴻⴼ ⵡⴰⵙⵉⴼ-ⴰ. ⴰⵙⵙ-ⴰ, ⴰⵙⵉⴼ ⵏ Mississippi ⵢⴻⵇⵇⴻⵍ ⴷ ⴰⴱⵔⵉⴷ ⴰⵎⴻⵇⵔⴰⵏ ⵏ ⵢⵉⵖⴻⵔⵔⵓⴱⴰ ⴷⴻⴳ ⵢⵉⵡⵓⵏⴰⴽ ⵢⴻⴷⴷⵓⴽⴽⵍⴻⵏ.
