ⴷⵣⴰⵢⴻⵔ/ⵜⴰⵔⵉⴼⵉⵜ
ⴷⵣⴰⵢⴻⵔ
ⴷⵣⴰⵢⴻⵔ ⴷ ⵉⵛⵜ ⵜⵎⵓⵕⵜ ⴷ ⵜⴰⵎⴻⵇⵇⵔⴰⵏⵜ, ⵜⴻⴱⴹⴰ ⵅⴻⴼ ⵙⵉⵏ ⵏ ⵢⵉⵎⵓⵔⴻⵏ ⵉⵎⴻⵇⵇⵔⴰⵏⴻⵏ :
- ⵜⴰⵎⵏⴰⴹⵜ ⵏ ⵓⴳⴰⴼⴰ ⵍⵍⴰⵏ ⴷⴻⴳ-ⵙ ⵢⵉⵣⵓⵖⴰⵔ, ⵉⴷⵓⵔⴰⵔ, ⵉⵖⴻⵣⵔⴰⵏ ⴷ ⵜⵥⵓⴹⵉⵡⵉⵏ ⴰⵢ ⴷ-ⵢⵓⵙⵉⵏ ⵖⴻⵔ ⵢⵉⴷⵉⵙ ⵏ ⵢⵉⵍⴻⵍ ⴰⴳⵔⴰⴽⴰⵍ.
- ⵜⴰⵎⵏⴰⴹⵜ ⵏ ⵡⴻⵏⵥⵓⵍ ⴰⵢ ⵢⴻⵟⵟⴼⴻⵏ 4 ⵣⵉ 5 ⵏ ⵢⵉⵎⵓⵔⴻⵏ ⵏ ⵓⵛⴰⵍ ⵏ ⵜⵎⵓⵕⵜ. ⴷ ⵜⴻⵏⵏ ⵓⵎⵉ ⵇⵇⴰⵔⴻⵏ "ⵜⵉⵏⵉⵔⵉ ⵜⴰⵎⴻⵇⵇⵔⴰⵏⵜ" ⵏⴻⵖ "ⴰⵏⴻⵥⵔⵓⴼ".
ⵉⵛⴰⵍⴻⵏ
ⴷⴻⴳ ⵓⵎⵓⵔ ⵏ ⵓⴳⴰⴼⴰ ⵏ ⵜⵎⵓⵕⵜ, ⵍⵍⴰⵏ ⵙⵉⵏ ⵏ ⵢⵉⴱⵓⵢⴰⵙ ⵏ ⵢⵉⴷⵓⵔⴰⵔ ⴰⵢ ⵉⵥⴻⵡⵡⴰⵏ ⵜⴰⵎⵓⵕⵜ ⵣⴻⴳ ⵢⵉⴱⵓⴷⴰ ⵏ ⵓⵎⴰⵕⵕⵓⴽ ⴰⵔ ⴰⴳⵎⵓⴹ ⵏ ⵜⵎⵓⵕⵜ, ⵖⴻⵔ ⵜⵎⴰ ⵏ ⵢⵉⵍⴻⵍ ⴰⴳⵔⴰⴽⴰⵍ.
ⴰⴱⵢⴰⵙ ⵏ ⵢⵉⴷⵓⵔⴰⵔ ⵏ ⵓⴳⴰⴼⴰ ⴷ ⵡⴻⵏⵏ ⵓⵎⵉ ⵇⵇⴰⵔⴻⵏ "ⴰⵟⵍⴰⵙ ⵏ ⵓⵜⴻⵍⵍ". ⴰⵎⵓⵔ ⴰⵎⴻⵇⵇⵔⴰⵏ ⵏ ⵢⵉⵖⵓⵔⴰⵎ ⵏ ⴷⵣⴰⵢⴻⵔ ⵓⵙⵉⵏ-ⴷ ⴷⴻⴳ ⵢⵉⵣⵓⵖⴰⵔ ⴰⵢ ⵢⴻⵍⵍⴰⵏ ⵊⴰⵔ ⵢⵉⴷⵓⵔⴰⵔ ⵏ ⵡⴰⵟⵍⴰⵙ ⵏ ⵓⵜⴻⵍⵍ ⴷ ⵢⵉⵍⴻⵍ ⴰⴳⵔⴰⴽⴰⵍ. ⴰⵛⴰⵍ ⵏ ⵢⵉⵣⵓⵖⴰⵔ-ⴰ ⵢⴻⴽⵔⵓⵥ. ⵔⵏⵉ-ⴷ, ⴰⵎⵓⵔ ⴰⵎⴻⵇⵇⵔⴰⵏ ⵏ ⵢⵉⵎⴻⵣⴷⴰⵖ ⵏ ⵜⵎⵓⵕⵜ ⴷⵉⵏ ⴰⵢ ⵣⴻⴷⴷⵖⴻⵏ. ⵜⴰⵎⵏⴰⴹⵜ-ⴰ ⵏ ⵓⴳⴰⴼⴰ ⵏ ⴷⵣⴰⵢⴻⵔ ⴰⵢ ⴷⴻⴳ ⵎⵓⵏⴻⵏ ⵢⵉⴷⵓⵔⴰⵔ ⴷ ⵢⵉⵣⵓⵖⴰⵔ ⵇⵇⴰⵔⴻⵏ-ⴰⵙ "ⴰⵜⴻⵍⵍ", ⵔⵏⵉ-ⴷ ⵍⵍⴰⵏ ⴷⴻⴳ-ⵙ ⵢⵉⴷⵓⵔⴰⵔ ⵏ ⵡⴰⵟⵍⴰⵙ ⵏ ⵓⵜⴻⵍⵍ, ⵉⵖⴻⵣⵔⴰⵏ ⴰⵢ ⴷ-ⵢⵓⵙⵉⵏ ⵊⴰⵔ ⵢⵉⴷⵓⵔⴰⵔ-ⴰ ⴷ ⵢⵉⵣⵓⵖⴰⵔ ⴰⵎ ⵡⴻⵏⵏ ⵏ ⵜⵎⴻⵜⵜⵉⵊⵜ, ⵔⵏⵉ-ⴷ ⴰⵛⴰⵍ ⴰⵢ ⵢⵓⴷⵙⴻⵏ ⵉⵍⴻⵍ ⴷ ⵜⴻⵡⵔⵉⵔⵉⵏ, ⵎⴰⵛⴰ ⵜⵜⵉⵍⵉⵏ ⵊⴰⵔ-ⴰⵙⴻⵏⵜ ⵢⵉⴷⴻⴳⴳⴻⵏ ⵢⵓⴷⴰⵔⴻⵏ ⵎⴰⵏⵉ ⵜⵜⵡⴰⵙⵓⵍⵉⵏ ⵢⵉⵙⵓⴳⴰⵏ.
ⴰⴱⵢⴰⵙ ⵏ ⵉⴷⵓⵔⴰⵔ ⵏ ⵡⴻⵏⵥⵓⵍ ⴷ ⵡⴻⵏⵏ ⵓⵎⵉ ⵇⵇⴰⵔⴻⵏ "ⴰⵟⵍⴰⵙ ⵏ ⵓⵏⴻⵥⵔⵓⴼ". ⴷ ⵉⵏⵏⵉ ⴰⵢ ⵢⴻⵍⵍⴰⵏ ⴷ ⵉⴷⵔⴰⵔⴻⵏ ⴰⵢ ⵜⵜⴻⵟⵟⴼⴻⵏ ⵉⵊⴷⵉ ⵏ ⵓⵏⴻⵥⵔⵓⴼ ⵃⵓⵎⴰ ⵓⵔ ⴷ-ⵢⴻⵜⵜⴰⵡⵡⵉⴹ ⵛⵔⴰ ⵖⴻⵔ ⵓⴳⴰⴼⴰ ⴰⵣⴻⴳⵣⴰⵡ ⵏ ⵜⵎⵓⵕⵜ. ⵊⴰⵔ ⵙⵉⵏ-ⴰ ⵏ ⵢⵉⴱⵓⵢⴰⵙ ⵏ ⵢⵉⴷⵓⵔⴰⵔ, ⵜⴻⵍⵍⴰ ⵉⵛⵜ ⵜⴻⵎⵏⴰⴹⵜ ⴷ ⵜⴰⵎⵉⵔⵉⵡⵜ ⵏ ⵜⴻⵡⵔⵉⵔⵉⵏ ⴷ ⵜⵥⵓⴹⵉⵡⵉⵏ. ⴷ ⵜⴻⵏⵏ ⵓⵎⵉ ⵇⵇⴰⵔⴻⵏ "ⵜⵉⵥⵓⴹⵉⵡⵉⵏ ⵏ ⵡⴰⵏⵏⴻⵊ". ⵜⴰⵎⵏⴰⴹⵜ-ⴰ ⵜⵓⵣⴻⵖ ⵍⵍⴰⵏ ⴷⴻⴳ-ⵙ ⵢⵉⵊⴻⵍⵎⴰⵎⴻⵏ ⵏ ⵜⵉⵙⴻⵏⵜ.
ⵙⵉⵏ-ⵏⵏⵉ ⵏ ⵢⵉⴱⵓⵢⴰⵙ ⵏ ⵢⵉⴷⵓⵔⴰⵔ ⵏ ⵓⴳⴰⴼⴰ ⵏ ⵜⵎⵓⵕⵜ (ⴰⵟⵍⴰⵙ ⵏ ⵓⵜⴻⵍⵍ ⴷ ⵡⴰⵟⵍⴰⵙ ⵏ ⵓⵏⴻⵥⵔⵓⴼ) ⵜⵜⵎⵓⵏⴻⵏ ⴷⴻⴳ ⵡⴻⴳⵎⵓⴹ ⵏ ⵜⵎⵓⵕⵜ ⵏ ⴷⵣⴰⵢⴻⵔ. ⴷⴻⴳ ⵜⴻⵎⵏⴰⴹⵜ ⴰⵢ ⴷⴻⴳ ⵜⵜⵎⵓⵏⴻⵏ, ⴰⵛⴰⵍ ⴷ ⴰⵎⴰⵜⵜⴰⵢ ⴰⵎ ⵖⴻⵔ ⵢⵉⴷⵉⵙ ⵏ ⵢⵉⵍⴻⵍ (ⵜⵉⵎⵏⴰⴹⵉⵏ ⵏ ⴵⵉⴵⴻⵍ, ⵙⴽⵉⴽⴷⴰ ⴷ ⵄⴻⵏⵏⴰⴱⴰ), ⴰⵎ ⵖⴻⵔ ⵓⴳⴻⵏⵙⵓ ⵏ ⵜⵎⵓⵕⵜ (ⵇⵙⴻⵏⵟⵉⵏⴰ). ⴷⴻⴳ ⵡⴻⵏⵥⵓⵍ ⵏ ⵜⴻⵎⵏⴰⴹⵜ-ⴰ, ⴰⴷ ⵏⴰⴼ ⵓⵍⴰ ⴷ ⵉⴷⵓⵔⴰⵔ ⵏ ⵡⴰⵡⵔⴰⵙ ⴷ ⵢⵉⵍⴻⵎⵎⵓⵛⴻⵏ ⴰⵢ ⵢⵓⴹⴰⵏⴻⵏ ⴷ ⴰⵎⵓⵔ ⵣⴻⴳ ⵢⵉⴷⵓⵔⴰⵔ ⵏ ⵡⴰⵟⵍⴰⵙ. ⵔⵏⵉ-ⴷ, ⵉⴷⵓⵔⴰⵔ-ⴰ ⵜⵜⵙⵉⵖⵉⵏ ⴰⵔ ⵉⴱⵓⴷⴰ ⵏ ⴷⵣⴰⵢⴻⵔ ⴷ ⵜⵓⵏⴻⵙ. ⵉⴷⵓⵔⴰⵔ-ⴰ ⵣⴻⴳ ⵣⵉⵛ ⴰⵢ ⵍⵍⴰⵏ ⴷ ⵜⴰⵎⵏⴰⴹⵜ ⵏ ⵓⴷⵓⵔⵔⵉ ⵢⵓⵍⵖⴰ ⴰⴷ ⵜⴻⵏ-ⵢⴰⴷⴻⴼ ⵓⵛⴻⵏⴳⵓ.
ⴰⵏⴻⵥⵔⵓⴼ ⴷ ⵉⵛⵜ ⵜⴻⵎⵏⴰⴹⵜ ⴷ ⵜⴰⵎⵉⵔⵉⵡⵜ ⴰⵟⵟⴰⵙ, ⵛⵔⴰ ⵣⴻⴳ ⵜⴻⵎⵏⴰⴹⵉⵏ-ⵏⵏⴻⵙ ⵢⴻⴷⵍⴰ-ⵜⴻⵏⵜ ⵢⵉⵊⴷⵉ, ⵜⵉⵏⵏⴻⴹⵏⵉ ⴷ ⵉⵥⵔⴰ ⴰⵢ ⵜⴻⵏⵜ-ⵢⴻⴷⵍⵉⵏ. ⵛⵔⴰ ⵏ ⵜⴻⵎⵏⴰⴹⵉⵏ, ⵅⵎⵉⵏⵏⵉ ⵅⴰⴼ-ⵙⴻⵏⵜ ⵢⴻⵛⵛⴰⵜ ⵡⴻⵏⵥⴰⵔ, ⵜⵜⵛⴰⵕⴰⵏ ⵢⵉⵖⴻⵣⵔⴰⵏ-ⵏⵙⴻⵏⵜ. ⵜⵉⵎⵏⴰⴹⵉⵏ ⵏⵏⵉⴹⴻⵏ, ⴷⴻⴳ-ⵙⴻⵏⵜ ⴰⵎⴰⵏ ⴰⵢ ⴷ-ⵉⵜⵜⴻⴼⴼⵖⴻⵏ ⵣⴻⴳ ⵡⴰⴷⴷⴰⵢ ⵏ ⵜⵎⵓⵕⵜ. ⵔⵏⵉ-ⴷ, ⴷ ⵎⴰⵏⴰⵢⴰ ⴰⵛⵛ ⴰⵢ ⵉⵜⵜⴻⵊⵊⴰⵏ ⴰⴷ ⵉⵍⵉⵏ ⵢⵉⵎⴻⴷⵡⴰⵏ ⴷ ⴱⴻⵙⵙⵉ ⵏ ⵜⵓⵣⵣⴻⵢⵣⴻⵡⵜ ⴷⴻⴳ ⵜⴻⵎⵏⴰⴹⵉⵏ-ⴰ.
