ⵜⵉⵔⴰⵏⴰ
ⵜⵉⵔⴰⵏⴰ ⴷ ⵜⴰⵎⴰⵏⴻⵖⵜ ⵏ ⴰⵍⴱⴰⵏⵢⴰ ⵢⴻⵔⵏⴰ ⴷ ⵏⴻⵜⵜⴰⵜ ⴰⵢ ⴷ ⵜⴰⵎⴷⵉⵏⵜ ⵜⴰⵎⴻⵇⵔⴰⵏⵜ ⴰⴽⴽ ⵏ ⵜⵎⵓⵔⵜ-ⴰ (ⵣⴻⴷⵖⴻⵏ-ⵜⵜ 520.000 ⵏ ⵢⵉⵎⴻⵣⴷⴰⵖⴻⵏ).
ⵜⵉⵔⴰⵏⴰ ⵜⴻⵣⴳⴰ-ⴷ ⵖⴻⴼ ⵡⴰⵙⵉⴼ ⵏ ⵉⵙⵀⵎ, ⵢⴻⵔⵏⴰ ⴷ ⵏⴻⵜⵜⴰⵜ ⴷ ⵓⵍ ⵏ ⵜⴻⵎⴳⵓⵔⵉ[1] ⴻⴷ ⵢⴻⴷⵍⴻⵙ ⵏ ⴰⵍⴱⴰⵏⵢⴰ. ⴷⴻⴳ ⵜⵉⵔⴰⵏⴰ ⴰⴷ ⵏⴰⴼ ⵍⵍⵓⵣⵉⵏⴰⵜ ⵏ ⵜⵓⵛⵛⵉⵜ, ⵏ ⵜⵎⴰⵛⵉⵏⵉⵏ, ⵏ ⵛⵛⴰⵛ, ⵏ ⵢⵉⵙⴰⴼⴰⵔⴻⵏ ⴻⴷ ⵢⴻⵎⵖⵓⵣⴻⵏ[2]. ⵙⴻⴳ ⵢⵉⵙⴻⴳⴳⴰⵙⴻⵏ ⵏ 1920 ⴰⵔ ⴰⵙⵙ-ⴰ, ⵜⵉⵔⴰⵏⴰ ⵜⴻⵏⵏⴻⵔⵏⴰ ⵙ ⵡⴰⵟⴰⵙ ⵢⴻⵔⵏⴰ ⴽⴻⵛⵎⴻⵏⵜ-ⵜⵜ-ⵉⴷ ⴰⵟⴰⵙ ⵏ ⵜⴻⵎⴳⵉⵔⵢⵉⵏ ⵜⵉⵎⴰⵢⵏⵓⵜⵉⵏ.
ⴷⴻⴳ ⵜⴻⵎⴷⵉⵏⵜ-ⴰ, ⵏⴻⵣⵎⴻⵔ ⴷⴰⵖⴻⵏ ⴰⴷ ⵏⴰⴼ ⵜⴰⵙⴷⴰⵡⵉⵜ (ⴰⵢ ⴷ-ⵢⴻⵜⵜⵡⴰⵙⴱⴻⴷⴷⴻⵏ ⴷⴻⴳ 1957) ⴻⴷ ⵓⵙⵓⴷⵓ ⴰⵍⴱⴰⵏⵉ ⵏ ⵜⵓⵙⵙⵏⵉⵡⵉⵏ.
ⴰⵙⵙ-ⴰ, ⵉⴷⵓⴱⴰ[3] ⵏ ⴰⵍⴱⴰⵏⵢⴰ ⵍⴰ ⵄⴻⵔⵔⴹⴻⵏ ⴰⵎⴻⴽ ⴰⵔⴰ ⵔⵔⴻⵏ ⵜⵉⵔⴰⵏⴰ ⴷ ⵜⴰⵎⴷⵉⵏⵜ ⴰⵢ ⴷ-ⵉⵊⴻⴱⴱⴷⴻⵏ ⵉⵎⴻⵔⵔⴰⵢⴻⵏ[4], ⵖⴰⵙ ⵎⴰ ⵢⴻⵍⵍⴰ ⵜⴰⵎⴰ ⵏ ⴱⴰⵍⵇⴰⵏ ⵎⴰⵣⴰⵍ ⵍⵍⴰⵏ ⴷⴻⴳ-ⵙ ⵡⵓⴳⵓⵔⴻⵏ ⵉⵙⴻⵔⵜⵉⵢⴻⵏ ⴰⵢ ⴷ-ⵢⴻⴱⴷⴰⵏ ⴷⴻⴳ ⵢⵉⵙⴻⴳⴳⴰⵙⴻⵏ ⵏ 1990 ⴷⴻⴳ ⴰⵍⴱⴰⵏⵢⴰ, ⴱⵓⵙⵏⵢⴰ ⴻⴷ Hirziguvina, Kosovo ⴻⴷ ⵎⴰⵙⵉⴷⵓⵏⵢⴰ.
ⴰⵎⴻⵣⵔⵓⵢ
ⴷ ⴰⵊⵉⵏⵉⵕⴰⵍ ⴰⵄⴻⵜⵎⴰⵏⵉ Sulejman Pasha ⴰⵢ ⴷ-ⵢⴻⵙⴱⴻⴷⴷⴻⵏ ⵜⵉⵔⴰⵏⴰ ⴷⴻⴳ 1614, ⵢⴻⵔⵏⴰ ⵉⵙⴻⵎⵎⴰ-ⴰⵙ, ⴷⴻⴳ ⵍⴰⵚⴻⵍ, « ⵟⴻⵀⵔⴰⵏ » ⵉ ⵡⴰⴽⴽⴻⵏ ⴰⴷ ⵢⴻⵔⵔ ⵜⴰⵊⵎⵉⵍⵜ ⵉ ⵢⵉⵎⴻⵏⵖⵉ-ⵏⵏⵉ ⴰⵢ ⵢⴻⵔⴱⴻⵃ ⴷⴻⴳ ⵟⴻⵀⵔⴰⵏ (ⴷⴻⴳ ⵉⵕⴰⵏ). ⴷⴻⴳ ⵢⴻⵏⵏⴰⵢⴻⵔ ⵏ 1920, ⴰⵏⴰⴱⴰⴹ ⵓⵄⴹⵉⵍ[5] ⵏ ⵡⴻⵙⵡⵉⵔ ⵏ ⵍⵓⵙⵀⵊ ⵢⴻⴼⵔⴻⵏ ⵜⵉⵔⴰⵏⴰ ⴷ ⵜⴰⵎⴰⵏⴻⵖⵜ ⵏ ⵜⵎⵓⵔⵜ, ⵖⴰⵙ ⴰⴽⴽⴻⵏ ⵜⴻⵍⵍⴰ ⵎⴰⵣⴰⵍ-ⵉⵜⵜ ⴷ ⵜⴰⵎⴷⵉⵏⵜ ⵜⴰⵎⴻⵥⵢⴰⵏⵜ. ⴷⴻⴳ ⵡⴰⵎⴱⴻⵕ ⵏ 1944, ⴷⴻⴳ ⵜⵉⵔⴰⵏⴰ ⴰⵢ ⴷ-ⵢⴻⵜⵜⵡⴰⵙⵙⴻⴱⴷⴻⴷ ⵓⵏⴰⴱⴰⴹ ⴰⵙⴷⵓⴽⵍⴰⵏ[6] ⵏ Enver Hoxha.
ⴷⴻⴳ ⵢⵉⵙⴻⴳⴳⴰⵙⴻⵏ ⵏ 1950, ⵜⴰⵎⴳⵓⵔⵉ ⵜⴻⵏⵏⴻⵔⵏⴰ ⵙ ⵡⴰⵟⴰⵙ ⵢⴻⵔⵏⴰ ⵙ ⵜⵖⴰⵡⵍⴰ ⴷⴻⴳ ⵜⵉⵔⴰⵏⴰ, ⵢⴻⵔⵏⴰ ⴷ ⴰⵢⴰ ⴰⵢ ⴷ-ⵉⵊⴻⴱⴷⴻⵏ ⵖⴻⵔ-ⵙ ⵎⴻⴷⴷⴻⵏ ⴰⵔⵎⵉ ⴷ ⴰⵙⵎⵉ ⵜⵓⵡⴻⴹ ⵖⴻⵔ 137.000 ⵏ ⵢⵉⵎⴻⵣⴷⴰⵖⴻⵏ ⴷⴻⴳ 1960. ⴷⴻⴳ ⵜⴳⴰⵔⴰ ⵏ ⵢⵉⵙⴻⴳⴳⴰⵙⴻⵏ ⵏ 1980 ⴻⴷ ⵜⴻⵣⵡⴰⵔⴰ ⵏ ⵢⵉⵙⴻⴳⴳⴰⵙⴻⵏ 1990, ⵍⵍⴰⵏⵜ-ⴷ ⵜⵎⴻⵙⴽⴰⵏⵉⵏ ⵜⵉⵎⴻⵇⵔⴰⵏⵉⵏ ⴷⴻⴳ ⵜⴻⵎⴷⵉⵏⵜ-ⴰ, ⵢⴻⵔⵏⴰ ⴷ ⴰⵢⴰ ⴰⵢ ⵢⴻⵙⵙⴰⵡⴹⴻⵏ ⵖⴻⵔ ⵓⵖⴻⵍⵍⵓⵢ ⵏ ⵓⵏⴰⴱⴰⴹ ⴰⵙⴷⵓⴽⵍⴰⵏ ⵏ ⴰⵍⴱⴰⵏⵢⴰ.
