ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵍⴰⵕⴻⴱⵄⴰ, 29 ⵢⴻⴱⵔⵉⵔ 2015 0951

ⴰⵙⴼⴰⴹ ⵏ ⵢⵉⴷⵍⴻⵙ ⴰⴼⴰⵍⴻⵙⵟⵉⵏⵉ ⴷ ⵓⵙⵙⵓⴷⴻⵢ ⵏ ⵍⵇⵓⴷⵙ ⵓⵔ ⵢⴻⵜⵜⴰⵡⴻⴹ ⴰⵔⴰ ⵙ ⵉⵙⵡⵉ

ⵇⵙⴻⵏⵟⵉⵏⴰ – ⴷⴻⴳ ⵢⵉⵡⴻⵏ ⵏ ⵓⵙⴰⵔⴰⴳ ⴰⵢ ⵉⴳⴰ ⴰⵙⵙ ⵏ ⵜⵜⵍⴰⵜⴰ ⴷⴻⴳ ⵍⴻⵇⵚⴻⵔ ⵏ ⵢⵉⴷⵍⴻⵙ ⵏ ⴰⵍ ⴽⵀⴰⵍⵉⴼⴰ ⴷⴻⴳ ⵇⵙⴻⵏⵟⵉⵏⴰ, ⵢⴻⵏⵏⴰ-ⴷ ⵓⵎⴰⵔⵓ ⴰⴼⴰⵍⴻⵙⵟⵉⵏⵉ ⴷⵊⴰⵎⵉⵍ ⴰⵍ ⵙⴰⵍⵀⵧⵓⵜ ⴷⴰⴽⴽⴻⵏ ⵓⵍⴰ ⵎⴰ ⵉⵙⵕⴰⵢⵉⵍⵉⵢⴻⵏ ⵍⴰ ⵄⴻⵔⵔⴹⴻⵏ ⴰⴷ ⴰⵙ-ⴽⴽⵙⴻⴱⵏ ⵉⴷⵍⴻⵙ-ⵏⵏⴻⵙ ⵉ ⵓⵖⵔⴻⴼ ⴰⴼⴰⵍⴻⵙⵟⵉⵏⵉ ⵢⴻⵔⵏⴰ ⴰⴷ ⵔⵔⴻⵏ ⵜⴰⵎⴷⵉⵏⵜ ⵏ ⵍⵇⵓⴷⵙ ⴷ ⵜⵓⴷⴰⵢⵜ, ⵓⵔ ⵙⵙⴰⵡⴰⴹⴻⵏ ⴰⵔⴰ ⵖⴻⵔ ⵢⵉⵙⵡⵉ-ⵏⵙⴻⵏ.

ⴷⴻⴳ ⵓⵙⴰⵔⴰⴳ-ⵏⵏⴻⵙ ⵖⴻⴼ ⵜⴻⴳⵏⵉⵜ ⵏ ⵢⵉⵎⵓⴽⴰⵏ ⵏ ⵢⵉⴷⵍⴻⵙ ⴷⴻⴳ ⵜⴻⵎⴷⵉⵏⵜ ⵏ ⵍⵇⵓⴷⵙ, ⴷ ⴰⵙⴰⵔⴰⴳ ⴰⵢ ⴷ-ⵉⵇⴻⴷⴷⴻⵎ ⴷⴻⴳ ⵓⵇⴰⵍⴻⴱ ⵏ ⵓⵡⴰⵀⵉⵍ ⵏ ⴷⴷⵓⵕⵜ ⵜⴰⴼⴰⵍⴻⵙⵟⵉⵏⵉⵜ (ⴷ ⴰⵃⵔⵉⵛ ⵙⴻⴳ ⵇⵙⴻⵏⵟⵉⵏⴰ, ⵜⴰⵎⴰⵏⴻⵖⵜ ⵢⵉⴷⵍⴻⵙ ⴰⵄⵕⴰⴱ 2015), ⵢⴻⵏⵏⴰ-ⴷ ⵎⴰⵙⵙ ⴰⵍ ⵙⴰⵍⵀⵧⵓⵜ ⴷⴰⴽⴽⴻⵏ ⴰⵖⵔⴻⴼ ⴰⴼⴰⵍⴻⵙⵟⵉⵏⵉ « ⵉⵄⴻⵡⵡⴻⵍ ⵓⴳⴰⵔ ⵏ ⵣⵉⴽ ⴰⴽⴽⴻⵏ ⴰⴷ ⵢⴻⵃⵔⴻⵣ ⵜⴰⵎⴰⴳⵉⵜ-ⵏⵏⴻⵙ ⵢⴻⵔⵏⴰ ⴰⴷ ⵢⴻⵔⴱⴻⵃ ⴷⴻⴳ ⵢⵉⵎⴻⵏⵖⵉ-ⵏⵏⴻⵙ ⴰⴷⴻⵍⵙⴰⵏ ».

ⴷⵖⴰ ⵢⴻⵏⵏⴰ-ⴷ ⵓⵎⴰⵔⵓ-ⴰ ⵖⴻⴼ ⵜⴻⵎⵙⴰⵍⵜ-ⴰ ⴷⴰⴽⴽⴻⵏ « ⵉⵙⴻⵔⴷⴰⵙⴻⵏ ⵉⵙⵕⴰⵢⵉⵍⵉⵢⴻⵏ ⵙⵙⵓⴼⴼⵖⴻⵏ-ⴷ 6.000 ⵏ ⵍⴰⵎⵕⴰⵜ ⴰⴽⴽⴻⵏ ⴰⴷ ⴳⴻⴷⵍⴻⵏ ⴰⵏⴻⴽⵛⵓⵎ ⵏ ⵢⵉⴷⵍⵉⵙⴻⵏ ⵖⴻⵔ ⵢⵉⴽⴰⵍⵍⴻⵏ ⵉⴼⴰⵍⴻⵙⵟⵉⵏⵉⵢⴻⵏ », ⴷ ⴰⵛⵓ ⴽⴰⵏ ⴰⵖⵔⴻⴼ ⴰⴼⴰⵍⴻⵙⵟⵉⵏⵉ « ⵎⴰⵣⴰⵍ-ⵉⵜ ⵍⴰ ⵢⴻⵙⵙⴻⴷⴷⴰⵢ ⴰⵎⴻⵣⵔⵓⵢ-ⵏⵏⴻⵙ ⵢⴻⵔⵏⴰ ⵍⴰ ⵢⴻⵙⵙⴻⴱⵖⴰⵙ ⵜⵉⴽⵜⴰ ⴷ ⵓⵙⵏⵓⵍⴼⵓ » ⴷⴻⴳ ⵓⵏⵔⴰⵔ ⵏ ⵢⵉⴷⵍⴻⵙ.

ⴰⵎⴰⵔⵓ-ⴰ ⴰⴼⴰⵍⴻⵙⵟⵉⵏⵉ ⵢⴻⵏⵏⴰ-ⴷ ⴷⴰⵖ ⴷⴰⴽⴽⴻⵏ ⵍⴰ ⴷ-ⵜⵜⵉⵍⵉⵏ ⵙⴻⴳ-ⴰ ⵖⴻⵔ ⴷⴰ ⵢⵉⵙⴰⵔⴰⴳⴻⵏ ⵉⴷⴻⵍⵙⴰⵏⴻⵏ, ⵉⵏⵎⴻⵜⵜⵉⵢⴻⵏ ⴷ ⵡⵓⵙⵙⵏⴰⵏⴻⵏ, ⵜⵜⴳⴻⵏ-ⵜⴻⵏ ⵢⵉⵎⵓⵔⴰ ⴷ ⵢⵉⵙⴷⴰⵡⴰⵏⴻⵏ ⴷⴻⴳ ⵓⵎⴻⵣⴳⵓⵏ ⴰⵖⴻⵍⵏⴰⵡ ⴰⴼⴰⵍⴻⵙⵟⵉⵏⵉ ⵏ ⵀⴰⴽⴰⵧⵓⴰⵜⵉ ⴰⴽⴽⴻⵏ ⴰⴷ ⵙⵎⴻⴽⵜⵉⵏ ⵎⴻⴷⴷⴻⵏ ⵖⴻⴼ ⵡⴰⵟⴰⵙ ⵏ ⵜⴻⵎⵙⴰⵍ ⵢⴻⵔⵏⴰ ⴰⴷ ⴷ-ⵙⵙⴻⴽⵏⴻⵏ ⴰⵣⴰⵍ ⴰⵢ ⵜⴻⵙⵄⴰ ⵜⴻⵎⴷⵉⵏⵜ ⵏ ⵍⵇⵓⴷⵙ, «  ⴷ ⵜⴰⵎⴷⵉⵏⵜ ⵏ ⵜⵓⴳⴳⵜⴰ ⵏ ⵜⴳⴻⵎⵎⵉⵡⵉⵏ ⴷ ⵢⵉⴷⴻⵍⵙⴰⵏ ».

ⵉⵅⴻⴱⴱⴻⵔ-ⴷ ⵓⵎⴰⵔⵓ-ⴰ ⴷⴰⴽⴽⴻⵏ ⵢⴻⵍⵍⴰ ⵢⵉⵡⴻⵏ ⵏ ⵓⵙⴻⵏⴼⴰⵔ ⵉ ⵓⵙⵙⴻⴱⴷⴻⴷ ⵏ ⵓⵙⴰⵍⴰⵢ ⴰⴼⴰⵍⴻⵙⵟⵉⵏⵉ ⴷⴻⴳ ⵍⵇⵓⴷⵙ, ⴰⵎ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴷⴰⴽⴽⴻⵏ ⵢⴰⵍ ⴷⴷⵓⵕⵜ, ⵙⴻⴳ 1999, ⵢⴻⵜⵜⵉⵍⵉ-ⴷ ⵓⵙⴰⵔⴰⴳ ⵓⵎⵉ ⵜⵜⵉⵏⵉⵏ « ⴰⵙⵙ ⵡⵉⵙ ⵙⴻⴱⵄⴰ », ⴰⴽⴽⴻⵏ ⴰⴷ ⵙⵇⴻⵔⴷⵛⴻⵏ ⵖⴻⴼ ⵜⵏⴻⵇⵇⵉⵙⵉⵏ, ⵉⴷⵍⵉⵙⴻⵏ ⴷ ⵡⵓⵏⴳⴰⵍⴻⵏ ⴰⵢ ⴷ-ⵢⴻⴼⴼⵖⴻⵏ ⴷ ⵉⵎⴰⵢⵏⵓⵜⴻⵏ, ⵏⴻⵖ ⵖⴻⴼ ⵜⵎⴻⵣⴳⵓⵏⵉⵏ.

ⵎⵉ ⴷ-ⵢⴻⴱⴷⴻⵔ ⵍⵎⴻⵊⵀⵓⴷ ⵢⴻⵜⵜⴽⴻⵎⵎⵉⵍⴻⵏ ⵡⴰⵔ ⴰⴼⵛⴰⵍ ⵉ ⵓⵃⵔⴰⵣ ⵏ ⵜⵎⴰⴳⵉⵜ ⵜⴰⴼⴰⵍⴻⵙⵟⵉⵏⵉⵜ, ⵢⴻⵏⵏⴰ-ⴷ ⵓⵎⴰⵔⵓ-ⴰ ⴷⴰⴽⴽⴻⵏ « ⵜⴻⵍⵍⴰ-ⴷ ⵜⵎⴻⵙⴱⴰⵏⵉⵜ ⵏ ⵓⵣⵔⴰⵔ ⵏ ⵢⵉⴼⴰⵍⴻⵙⵟⵉⵏⵉⵢⴻⵏ ⴰⵢ ⵢⴻⵎⵢⵓⴹⴹⴰⴼⴻⵏ ⴰⴼⵓⵙ ⵢⴻⵔⵏⴰ ⵣⵣⵉⵏ-ⴷ ⵖⴻⴼ ⵓⵖⵔⴰⴱ ⵏ ⴱⴻⴹⴹⵓ ⴰⵢ ⴱⵏⴰⵏ ⵢⵉⵙⵕⴰⵢⵉⵍⵉⵢⴻⵏ ⴰⴽⴽⴻⵏ ⴰⴷ ⴷ-ⵢⴻⵣⵣⵉ ⵖⴻⴼ ⵜⴻⵎⴷⵉⵏⵜ ⵏ ⵍⵇⵓⴷⵙ », ⴰⵎ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴷⴰⴽⴽⴻⵏ ⴰⵜⵏⵉ ⵜⵜⵡⴰⵄⴻⵔⴹⴻⵏ-ⴷ ⵎⴻⴷⴷⴻⵏ, ⴰⵎⴰ ⴷ ⵉⵍⴻⵎⵥⵉⵢⴻⵏ, ⴰⵎⴰ ⴷ ⵉⵎⴻⵇⵔⴰⵏⴻⵏ, ⴰⴽⴽⴻⵏ « ⴰⴷ ⴷ-ⵃⴽⵓⵏ ⵖⴻⴼ ⵜⴻⵎⴷⵉⵏⵜ ⵜⴰⵄⵕⴰⴱⵜ, ⵜⴰⵎⴷⵉⵏⵜ ⵢⴻⵍⵍⴰⵏ ⵙⴻⴳ ⵜⴼⴻⵊⵔⵉⵜ ⵏ ⵓⵎⴻⵣⵔⵓⵢ, ⴷ ⵓⵍ ⵏ ⵢⵉⴷⵍⴻⵙ, ⵏ ⴷⴷⵉⵏ ⴷ ⵜⵙⴻⵔⵜⵉⵜ ⵏ ⵓⵖⵔⴻⴼ ⴰⴼⴰⵍⴻⵙⵟⵉⵏⵉ. »

ⴷⴻⴳ ⵡⴰⵢⴻⵏ ⵢⴻⵔⵣⴰⵏ « ⴰⵙⵙⵓⴷⴻⵢ ⴷ ⵓⵅⵏⴰⵇ ⵏ ⵜⴻⵎⴷⵉⵏⵜ-ⴰ ⵜⵉⵎⵇⴻⴷⴷⴻⵙⵜ », ⵢⴻⵏⵏⴰ-ⴷ ⴷⴰⵖ ⵓⵎⴰⵔⵓ-ⴰ ⴷⴰⴽⴽⴻⵏ ⵎⴰⵣⴰⵍ ⵍⵍⴰⵏ 34000 ⵏ ⵢⵉⵅⵅⴰⵎⴻⵏ ⵉⴼⴰⵍⴻⵙⵟⵉⵏⵉⵢⴻⵏ ⴷⴻⴳ ⵍⵇⵓⴷⵙ, ⴰⵎ ⵡⴰⴽⴽⴻⵏ ⴰⵢ ⵍⵍⴰⵏ 74000 ⵏ ⵢⵉⵅⵅⴰⵎⴻⵏ ⵉⵙⵕⴰⵢⵉⵍⵉⵢⴻⵏ. ⴰⵎⴳⴻⵔⵔⴰⴷ-ⴰ ⵢⴻⵍⵍⴰ-ⴷ ⵖⴻⴼ ⵍⵊⴰⵍ ⵏ « ⵛⵛⵓⵔⵓⴹ-ⵏⵏⵉ ⵉⵡⴻⵄⵕⴰⵏⴻⵏ » ⴰⵢⵢⴻⵙ ⵜⵜⵡⴰⵇⴻⵀⵔⴻⵏ ⵢⵉⴼⴰⵍⴻⵙⵟⵉⵏⵉⵢⴻⵏ ⴰⵢ ⵢⴻⴱⵖⴰⵏ ⴰⴷ ⴱⵏⵓⵏ ⵉⵅⵅⴰⵎⴻⵏ.

ⵎⴰⵙⵙ ⴷⵊⴰⵎⵉⵍ ⴰⵍ ⵙⴰⵍⵀⵧⵓⵜ ⵢⴻⴼⴽⴰ-ⴷ ⵍⴻⵃⵙⴰⴱⴰⵜ ⴰⵢ ⴷ-ⵢⴻⵙⵙⴽⴰⵏⴰⵢⴻⵏ ⴷⴰⴽⴽⴻⵏ « ⵍⴰ ⵢⴻⵜⵜⵡⴰⴽⴰⵔ ⵡⴰⴽⴰⵍ ⵏ ⵍⵇⵓⴷⵙ ⵙ ⵓⵖⴰⵡⴰⵙ, ⴰⵎ ⵡⴰⴽⴽⴻⵏ ⴰⵢ ⵍⴰ ⵢⴻⵜⵜⵡⴰⴽⴽⴰⵙ ⵉ ⵢⵉⵎⴰⵡⵍⴰⵏ-ⵏⵏⴻⵙ ⴰⴽⴽⴻⵏ ⴰⴷ ⵜⵜⵡⴰⴱⵓⵏ ⴷⴻⴳ-ⵙ ⵢⵉⵙⴻⵏⴼⴰⵔⴻⵏ » ⵉ ⵍⴼⴰⵢⴷⴰ ⵏ ⵜⵓⴹⴹⴼⴰ ⵜⵉⵙⵕⴰⵢⵉⵍⵉⵜ. ⴷⵖⴰ ⵢⴻⵏⵏⴰ-ⴷ, ⴷⴻⴳ ⵜⴻⵎⵙⴰⵍⵜ-ⴰ, ⴷⴰⴽⴽⴻⵏ ⴷⴻⴳ ⴽⵔⴰⴹ (3) ⵏ ⵡⴰⵢⵢⵓⵔⴻⵏ, ⴷⴻⴳ 2013, ⵜⵜⵓⵏⴻⴼⴽⴻⵏ 1680 ⵏ ⵜⵜⴻⵙⵔⵉⵃⴰⵜ ⵏ ⵍⴻⴱⵏⵉ ⵉ ⵢⵉⵙⵕⴰⵢⵉⵍⵉⵢⴻⵏ ⴷⴻⴳ ⵡⴰⴽⴰⵍ ⴰⵄⵕⴰⴱ, ⴷⴻⴳ ⵡⴰⴽⵓⴷ ⴰⵢⴷⴻⴳ ⴰⵍⴰ 6 ⵏ ⵜⵜⴻⵙⵔⵉⵃⴰⵜ ⴰⵢ ⵢⴻⵜⵜⵓⵏⴻⴼⴽⴻⵏ ⵉ ⵢⵉⴼⴰⵍⴻⵙⵟⵉⵏⵉⵢⴻⵏ.