ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⴰⴼⵔⴰⵇ ⵏ ⵜⵏⴻⵣⴷⵓⵖⵜ ⵉ ⵡⵓⴳⴰⵔ ⵏ 2.300 ⵏ ⵜⵡⴰⵛⵓⵍⵉⵏ ⴷⴻⴳ ⵜⵡⵉⵍⴰⵢⵜ ⵏ ⵍⴷⵣⴰⵢⴻⵔ (ⴰⵡⴰⵍⵉ)

ⵍⴷⵣⴰⵢⴻⵔ ⵜⴰⵎⴰⵏⴻƔⵜ – ⵙ ⵓⵊⴻⵎⵎⴰⵍ, 2313 ⵏ ⵜⵡⴰⵛⵓⵍⵉⵏ ⴰⵢ ⵉⵣⴻⴷⵖⴻⵏ ⴷⴻⴳ 52 ⵏ ⵢⵉⵎⵓⴽⴰⵏ ⵏ ⵜⵏⴻⵣⴷⵓⵖⵜ ⵉⵅⵓⵚⵚⴻⵏ, ⴰⴷ ⴰⵙⴻⵏ-ⵜⵜⵓⵏⴻⴼⴽⴻⵏ ⵢⵉⵅⵅⴰⵎⴻⵏ ⵉⵎⴰⵢⵏⵓⵜⴻⵏ ⴰⵙⵙ ⵏ ⵜⵜⵍⴰⵜⴰ ⴰⵢ ⴷ-ⵢⴻⵜⵜⴻⴷⴷⵓⵏ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴰⵙⵙ ⵏ ⵍⵃⴻⴷⴷ ⵓⵡⴰⵍⵉ ⵏ ⵍⴷⵣⴰⵢⴻⵔ, ⴰⴱⴷⴻⵍⴽⴰⴷⴻⵔ ⵣⵧⵓⴽⵀ, ⴷⴻⴳ ⵢⵉⵡⴻⵏ ⵏ ⵓⵙⴰⵔⴰⴳ ⵏ ⵜⵖⴻⵎⵙⴰ.

ⵜⵉⵡⴰⵛⵓⵍⵉⵏ ⴰⵢ ⵜⴻⵔⵣⴰ ⵜⴻⵎⵙⴰⵍⵜ ⵣⴻⴷⵖⴻⵏⵜ ⴷⴻⴳ 34 ⵏ ⵜⵖⵉⵡⴰⵏⵉⵏ ⵏ ⵜⵡⵉⵍⴰⵢⵜ ⵢⴻⵔⵏⴰ 2000 ⵙⴻⴳ-ⵙⴻⵏⵜ ⴰⴷ ⴷ-ⵙⴼⴰⵢⴷⵉⵏⵜ ⵙⴻⴳ ⵜⴻⵎⵀⴻⵍⵜ ⵜⵉⵙ 18 ⵏ ⵓⴼⵔⴰⵇ ⵏ ⵜⵏⴻⵣⴷⵓⵖⵜ, ⵎⴰ ⴷ 313 ⵙⴻⴳ-ⵙⴻⵏⵜ ⴰⴷ ⴷ-ⵙⴼⴰⵢⴷⵉⵏⵜ ⵙⴻⴳ ⵜⵏⴻⵣⴷⵓⵖⵉⵏ ⵜⵉⵏⴰⴳⴷⵓⴷⵉⵏ ⵏ ⵍⴻⴽⵔⴰ.

ⵙ ⵓⵊⴻⵎⵎⴰⵍ, 13.800 ⵏ ⵢⵉⵎⴷⴰⵏⴻⵏ ⴰⵔⴰ ⵉⵃⴰⵣ ⵛⵛⵖⴻⵍ-ⴰ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵡⴰⵍⵉ, ⵢⴻⵔⵏⴰ 792 ⵙⴻⴳ ⵜⵡⴰⵛⵓⵍⵉⵏ-ⴰ ⵍⵍⴰⵏ ⵣⴻⴷⵖⴻⵏ ⴷⴻⴳ ⵢⵉⵎⵓⴽⴰⵏ ⴰⵢ ⵙⵙⴻⴼⵔⴰⵏ ⴰⴷ ⵜⴻⵏ-ⵙⵇⴻⴷⵛⴻⵏ ⵉ ⵢⵉⵙⴻⵏⴼⴰⵔⴻⵏ ⵉⵏⴰⴳⴷⵓⴷⴻⵏ.

475 ⵏ ⵜⵡⴰⵛⵓⵍⵉⵏ ⵍⵍⴰⵏⵜ ⵣⴻⴷⵖⴻⵏⵜ ⴷⴻⴳ ⵢⵉⴱⴻⵕⵕⴰⴽⴻⵏ, ⵎⴰ ⴷ 335 ⵏⵉⴹⴻⵏ ⵍⵍⴰⵏⵜ ⵣⴻⴷⵖⴻⵏⵜ ⴷⴻⴳ ⵢⵉⴷⴻⵔⴱⵓⵣⴻⵏ ⴷⴻⴳ ⴱⴰⴱ ⵣⵣⴻⵡⵡⴰⵕ, ⵍⵎⴰⴷⴰⵏⴻⵢⵢⴰ, ⵍⵎⵓⵕⴰⴷⴻⵢⵢⴰ, ⵍⴷⵣⴰⵢⴻⵔ ⵜⴰⵍⴻⵎⵎⴰⵙⵜ ⴷ ⵙⵉⴷⵉ ⵎⵃⴻⵎⵎⴻⴷ.

ⵙⴻⴳ ⵜⴰⵎⴰ ⵏⵉⴹⴻⵏ, ⵍⵍⴰⵏⵜ ⴷⴰⵖ 382 ⵏ ⵜⵡⴰⵛⵓⵍⵉⵏ ⴰⵢ ⵍⵍⴰⵏⵜ ⵣⴻⴷⵖⴻⵏⵜ ⴷⴻⴳ ⵚⵚⴷⵓⵃⴰⵜ ⵏ ⵢⵉⵣⵓⴷⴰⵖ ⵏⴻⵖ ⴷⴻⴳ ⵢⵉⵣⵓⴷⴰⵖ ⴰⵢ ⵢⴻⵍⵍⴰⵏ ⵖⴻⴼ ⵙⵙⴻⴱⴱⴰ ⴰⴽⴽⴻⵏ ⴰⴷ ⴷ-ⵖⵍⵉⵏ.

ⵜⵉⵖⵉⵡⴰⵏⵉⵏ ⵏ ⴱⵓⵕⵊ ⵍⴱⴻⵃⵔⵉ, ⴱⴰⵛ ⵊⴻⵕⵕⴰⵃ, ⵎⴰⵇⴰⵔⴻⵢⵢⴰ ⴷ ⵡⴰⴷ ⵙⴻⵎⵎⴰⵕ ⵜⴻⵔⵣⴰ-ⵜⴻⵏⵜ ⴷⴰⵖ ⵜⴻⵎⵙⴰⵍⵜ ⵏ ⵓⴼⵔⴰⵇ ⵏ ⵜⵏⴻⵣⴷⵓⵖⵜ.

ⴰⵡⴰⵍⵉ ⵢⴻⵏⵏⴰ-ⴷ ⴷⴰⴽⴽⴻⵏ ⵜⴰⴷⴰⵢⵕⴰ ⵏ ⵙⵉⴷⵉ ⵎⵃⴻⵎⵎⴻⴷ ⴷ ⵏⴻⵜⵜⴰⵜ ⴰⵢ ⴷ-ⵢⴻⵙⴼⴰⵢⴷⵉⵏ ⴰⵟⴰⵙ ⴰⴽⴽ ⵙⴻⴳ ⵜⴻⵎⵀⴻⵍⵜ-ⴰ ⵏ ⵓⴼⵔⴰⵇ ⵏ ⵜⵏⴻⵣⴷⵓⵖⵜ, ⵉⵎⵉ ⴰⵢ ⵍⵍⴰⵏⵜ ⴷⵉⵏ 600 ⵏ ⵜⵡⴰⵛⵓⵍⵉⵏ ⵓⵎⵉ ⵜⴻⵜⵜⵓⵏⴻⴼⴽ ⵜⵏⴻⵣⴷⵓⵖⵜ. ⵜⵉⵡⴰⵛⵓⵍⵉⵏ ⵏ ⵜⴷⴰⵢⵕⴰ-ⴰ ⴰⴷ ⵜⴻⵏⵜ-ⴰⵡⵉⵏ ⵖⴻⵔ 12 ⵏ ⵢⵉⵖⴰⵔⴰⵎⴻⵏ ⴳⴰⵔ-ⴰⵙⴻⵏ 5 ⵜⵜⵡⴰⴱⵏⴰⵏ ⴷ ⵉⵎⴰⵢⵏⵓⵜⴻⵏ ⴰⴽⴽ, ⴰⵎ ⵡⵉⴷ ⴰⵢ ⴷ-ⵢⴻⵣⴳⴰⵏ ⴷⴻⴳ ⴷⴰⵕ ⵍⴱⵉⴹⴰ, ⴱⵓⵕⵊ ⵍⴱⴻⵃⵔⵉ, ⵙⵡⵉⴷⴰⵏⴻⵢⵢⴰ ⴷ ⴱⴻⵔⵔⴰⵇⵉ.

ⵜⴰⵡⵉⵍⴰⵢⵜ ⴰⴷ ⵜⵜ-ⵉⴷ-ⵉⵚⴰⵃ ⵙ ⵡⴰⵢⴰ ⵡⴰⴽⴰⵍ ⵏ 2,6 ⵏ ⵢⵉⵇⴻⵟⵟⴰⵔⴻⵏ ⵎⵉ ⴰⵔⴰ ⴳⵉⵊⵊⴻⵏⵜ ⵜⵡⴰⵛⵓⵍⵉⵏ-ⴰ.

ⴰⵡⴰⵍⵉ ⵢⴻⵏⵏⴰ-ⴷ ⴷⴰⴽⴽⴻⵏ « ⵢⴻⵣⵎⴻⵔ ⵍⵃⴰⵍ ⴰⴷ ⴷ-ⵉⵍⵉⵏⵜ ⵜⴻⵎⵀⴰⵍ ⵏⵉⴹⴻⵏ ⵓⵇⴱⴻⵍ ⵔⴻⵎⴹⴰⵏ ⵉ ⵓⴼⵔⴰⵇ ⵏ ⵜⵏⴻⵣⴷⵓⵖⵜ ⵖⴻⴼ ⵜⵡⴰⵛⵓⵍⵉⵏ ⴰⵢ ⵉⵣⴻⴷⵖⴻⵏ ⵉⴱⴻⵕⵕⴰⴽⴻⵏ ⵏ ⵕⴻⵎⵍⵉ ⴷⴻⴳ ⵙⵙⴻⵎⵎⴰⵕ, ⴷ ⵓⵖⴻⵔⵔⴰⴱⵓ ⵢⴻⵔⵔⵥⴻⵏ ⴷⴻⴳ ⵓⴳⵎⵓⴹ ⵏ ⵍⴷⵣⴰⵢⴻⵔ ⵜⴰⵎⴰⵏⴻⵖⵜ ».

ⴰⴽⴽⴻⵏ ⴰⴷ ⵉⵄⴻⴷⴷⵉ ⵛⵛⵖⴻⵍ ⵏ ⵓⵙⴳⵉⵊⵊⵉ ⴰⴽⴽⴻⵏ ⵉⵡⴰⵜⴰ ⴰⵙⵙ ⵏ ⵜⵜⵍⴰⵜⴰ, 8.300 ⵏ ⵢⵉⵅⴻⴷⴷⴰⵎⴻⵏ ⴰⵢ ⴷ-ⵢⴻⵜⵜⵡⴰⵙⵡⴻⵊⴷⴻⵏ, ⵏⵏⵉⴳ ⵢⵉⵎⴻⵥⵍⴰ ⵏ ⵜⵖⴻⵍⵍⵉⵙⵜ ⴷ ⵜⵜⴰⵡⵉⵍⴰⵜ ⵏⵉⴹⴻⵏ, 4000 ⵏ ⵢⵉⴽⴰⵎⵢⵓⵏⴻⵏ ⴷ 100 ⵏ ⵢⵉⵙⴰⴽⴰⵍⴻⵏ.

ⵙⴻⴳ ⵢⵉⴷⵉⵙ ⵏⵉⴹⴻⵏ, ⵎⴻⴷⴷⴻⵏ ⵙⵙⴻⵔⵙⴻⵏ 5.272 ⵏ ⵢⵉⵛⵛⴻⵜⴽⵉⵢⴻⵏ ⵎⵉ ⵜⵜⵡⴰⴽⴽⵙⴻⵏ ⵙⴻⴳ ⵓⴼⵔⴰⵇ ⵏ ⵜⵏⴻⵣⴷⵓⵖⵜ, ⵢⴻⵔⵏⴰ 284 ⵏ ⵜⵡⴰⵛⵓⵍⵉⵏ ⵢⴻⵜⵜⵓⵏⴻⴼⴽ-ⴰⵙⴻⵏⵜ ⵍⵃⴻⵇⵇ ⴷⴻⴳ ⵡⴰⴽⵓⴷ ⴰⵢⴷⴻⴳ 4.779 ⵏ ⵢⵉⵛⵛⴻⵜⴽⵉⵢⴻⵏ ⴰⵢ ⵢⴻⵜⵜⵡⴰⴳⵉⵏ ⵢⴻⵔⵏⴰ ⵉⴽⴰⵔⴰⵎⴻⵏ-ⵏⵙⴻⵏ ⵎⴰⵣⴰⵍ ⵍⴰ ⴷ-ⵙⵙⵓⴽⴽⵓⵢⴻⵏ ⴼⴻⵍⵍ-ⴰⵙⴻⵏ ⵜⵉⵟ.

ⵜⴰⵡⵉⵍⴰⵢⵜ ⵜⴻⵙⵙⴻⵔⵙ 525 ⵏ ⵢⵉⵛⵛⴻⵜⴽⵉⵢⴻⵏ ⵎⴳⴰⵍ ⵡⵉⴷ ⴰⵢ ⴷ-ⵢⴻⵙⴼⴰⵢⴷⵉⵏ ⵙⴻⴳ ⵜⵏⴻⵣⴷⵓⵖⵉⵏ ⴷⴻⴳ ⵜⴻⵎⵀⴰⵍ ⵉⵄⴻⴷⴷⴰⵏ ⵏ ⵓⴼⵔⴰⵇ ⵖⴻⴼ ⵜⵓⴼⴼⵖⵉⵡⵉⵏ ⴰⵢ ⴼⴼⵖⴻⵏ ⵉ ⵓⴱⵔⵉⴷ ⴷ ⵓⵙⵙⴻⵇⴷⴻⵛ ⵏ ⵍⴻⴽⵡⴰⵖⴻⴹ ⵏ ⵜⴽⴻⵍⵍⴰⵅ, ⵢⴻⵔⵏⴰ 15 ⵏ ⵜⵡⴰⵛⵓⵍⵉⵏ ⴰⵢ ⵢⴻⵜⵜⵡⴰⵥⵥⵄⴻⵏ ⵢⴰⴳⵉ ⵙⴻⴳ ⵢⵉⵅⵅⴰⵎⴻⵏ ⴰⵢ ⵡⵡⵉⵏ ⵙ ⵜⴽⴻⵍⵍⴰⵅ-ⴰ.

ⵛⵛⵕⴻⵄ ⵢⴻⵃⴽⴻⵎ-ⴷ ⴷⴰⵖ ⵙ ⵍⵃⴻⴱⵙ ⴷ ⵍⴻⵅⴹⴻⵢⵢⴰⵜ ⵖⴻⴼ 51 ⵏ ⵎⴻⴷⴷⴻⵏ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵡⴰⵍⵉ.

ⵎⴰⵙⵙ ⵣⵧⵓⴽⵀ ⵢⴻⵏⵏⴰ-ⴷ ⴷⴰⵖ ⴷⴰⴽⴽⴻⵏ ⵜⵜⵓⵏⴻⴼⴽⴻⵏ ⵢⵉⵣⵓⴷⴰⵖ ⵉ ⵜⵡⴰⵛⵓⵍⵉⵏ ⵏ ⵢⵉⵎⴻⵥⵍⴰ ⵏ ⵜⵖⴻⵍⵍⵉⵙⵜ ⴰⵢ ⴷ-ⵢⴻⵙⴼⴰⵢⴷⵉⵏ ⵙⴻⴳ ⵢⵉⵎⵓⴽⴰⵏ ⵏ ⵓⵃⵔⴰⵣ ⵏ ⵜⵖⴻⵍⵍⵉⵙⵜ.

ⵜⵉⵎⵀⴰⵍ ⵏ ⵓⴼⵔⴰⵇ ⵏ ⵜⵏⴻⵣⴷⵓⵖⵜ ⴷⴻⴳ ⵍⴷⵣⴰⵢⴻⵔ ⵜⴰⵎⴰⵏⴻⵖⵜ ⴱⴷⴰⵏⵜ-ⴷ ⴷⴻⴳ ⵢⵓⵏⵢⵓ ⵏ 2013 ⵢⴻⵔⵏⴰ ⵃⵓⵣⴰⵏⵜ 20.373 ⵏ ⵜⵡⴰⵛⵓⵍⵉⵏ, ⵎⴻⵃⵙⵓⴱ 122.000 ⵏ ⵢⵉⵎⴷⴰⵏⴻⵏ.