ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⴰⵊⵉⵏⵉⵕⴰⵍ ⴰⵎⴰⵊⵓⵕ ⵀⴰⵎⴻⵍ ⵉⵇⴻⴷⴷⴻⵎ-ⴷ ⴷⴻⴳ ⵇⴰⵟⴰⵔ ⵜⵜⴻⵊⵕⵉⴱⴰ ⵏ ⵜⴻⵎⵙⵓⵍⵜⴰ ⵏ ⵍⴷⵣⴰⵢⴻⵔ ⴷⴻⴳ ⵢⵉⵎⴻⵏⵖⵉ ⵎⴳⴰⵍ ⵜⴻⵊⵔⵉⵎⵜ
ⵍⴷⵣⴰⵢⴻⵔ ⵜⴰⵎⴰⵏⴻⵖⵜ – ⴰⵏⴻⵎⵀⴰⵍ ⴰⵎⴰⵜⵓ ⵏ ⵜⵖⴻⵍⵍⵉⵙⵜ ⵜⴰⵖⴻⵍⵏⴰⵡⵜ, ⴰⵊⵉⵏⵉⵕⴰⵍ ⴰⵎⴰⵊⵓⵕ ⴰⴱⴷⴻⵍⴳⵀⴰⵏⵉ ⵀⴰⵎⴻⵍ, ⵉⵇⴻⴷⴷⴻⵎ-ⴷ ⴰⵙⵙ ⵏ ⵍⴻⵜⵏⵉⵢⴻⵏ ⴷⴻⴳ ⵇⴰⵟⴰⵔ ⵜⵜⴻⵊⵕⵉⴱⴰ ⵏ ⵜⴻⵎⵙⵓⵍⵜⴰ ⵜⴰⴷⵣⴰⵢⵔⵉⵜ ⴷⴻⴳ ⵓⵃⵔⴰⵣ ⵏ ⵜⵖⴻⵍⵍⵉⵙⵜ ⴷ ⵢⵉⵎⴻⵏⵖⵉ ⵎⴳⴰⵍ ⵜⴻⵊⵔⵉⵎⵜ ⵙ ⵡⴰⴽⴽ ⵍⴻⵚⵏⴰⴼ-ⵏⵏⴻⵙ.
ⴰⵊⵉⵏⵉⵕⴰⵍ ⴰⵎⴰⵊⵓⵕ ⵀⴰⵎⴻⵍ ⴰⵢ ⵉⴳⴰⵏ ⵜⵉⵔⵣⵉ ⵏ ⵓⵅⴻⴷⴷⵉⵎ ⵖⴻⴼ ⵇⴰⵟⴰⵔ ⵉⵇⴻⴷⴷⴻⵎ-ⴷ « ⵜⵜⴻⵊⵕⵉⴱⴰ ⵜⵓⵔⴱⵉⵃⵜ ⵏ ⵜⴻⵎⵙⵓⵍⵜⴰ ⵜⴰⴷⵣⴰⵢⵔⵉⵜ ⴰⵢ ⵢⴻⵍⵍⴰⵏ ⴷⴰⵖ ⴷ ⵜⴰⵎⴻⵣⵡⴰⵔⵓⵜ ⵙⴻⴳ ⵚⵚⴻⵏⴼ-ⴰ ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⴰⵃⵔⴰⵣ ⵏ ⵜⵖⴻⵍⵍⵉⵙⵜ (ⵍⴰⵎⴰⵏ) ⴷ ⵢⵉⵎⴻⵏⵖⵉ ⵎⴳⴰⵍ ⵜⴻⵊⵔⵉⵎⵜ ⵙ ⵡⴰⴽⴽ ⵍⴻⵚⵏⴰⴼ-ⵏⵏⴻⵙ, ⴳⴰⵔ-ⴰⵙⴻⵏ ⵓⵍⴰ ⴷ ⵢⵉⵎⴻⵏⵖⵉ ⵎⴳⴰⵍ ⵔⵔⴻⴱⵔⴰⴱ, ⵜⴰⵊⵔⵉⵎⵜ ⵉⵣⴻⴳⵔⴻⵏ ⵉ ⵜⵍⵉⵙⴰ ⴷ ⵜⴻⵊⵔⵉⵎⵜ ⵙ ⵉⵏⵜⴻⵔⵏⴻⵜ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵍⵖⵓ ⵏ ⵜⵎⴻⵀⵍⴰ ⵜⴰⵎⴰⵜⵓⵜ ⵏ ⵜⵖⴻⵍⵍⵉⵙⵜ ⵜⴰⵖⴻⵍⵏⴰⵡⵜ.
ⵙⴻⴳ ⵢⵉⴷⵉⵙ ⵏⵉⴹⴻⵏ, ⴰⵏⴻⵎⵀⴰⵍ ⵢⴻⵙⵎⴻⴽⵜⵉ-ⴷ ⵙ ⵜⵜⴻⵊⵕⵉⴱⴰ ⵜⵓⵔⴱⵉⵃⵜ ⵏ ⵜⴻⵎⵙⵓⵍⵜⴰ ⵜⴰⴷⵣⴰⵢⵔⵉⵜ ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⵜⵉⵎⵙⴰⵍ ⴰⵢ ⵢⴻⵇⵇⵏⴻⵏ ⵖⴻⵔ ⵜⴻⵊⵔⵉⵎⵜ ⵙ ⵡⴰⴽⴽ ⵍⴻⵚⵏⴰⴼ-ⵏⵏⴻⵙ, ⵍⴰⴷⵖⴰ ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⵜⴰⴷⵀⴻⵍⵜ ⵜⴰⵍⵓⵊⵉⵙⵜⵉⵜ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⵜⴻⵖⴱⴰⵍⵓⵜ-ⴰ.
ⵎⴰⵙⵙ ⵀⴰⵎⴻⵍ ⵢⴻⵔⵣⴰ ⵙⴰⴽⴽⵉⵏ ⵖⴻⴼ ⵜⵉⴳⴳⴻⵜ ⵏ ⵜⵖⴻⵍⵍⵉⵙⵜ ⵜⴰⴳⴻⵏⵙⵉⵜ ⵏ ⵍⴰⴽⵀⵧⵓⵢⴰ ⴰⵏⴷⴰ ⴰⵢ ⵢⴻⵎⵍⴰⵍ ⴷ ⵢⵉⵎⴹⴻⴱⴱⴻⵔ ⵏ ⵜⵉⴳⴳⴻⵜ-ⴰ ⵢⴻⵔⵏⴰ ⵙⴼⴻⵀⵎⴻⵏ-ⴰⵙ-ⴷ ⴰⵎⴻⴽ ⴰⵢ ⵜⵅⴻⴷⴷⴻⵎ ⵙ ⵓⵃⴷⴰⵕ ⵏ ⵢⵉⵎⴹⴻⴱⴱⵔⴻⵏ ⵏ ⵜⴻⵎⵀⴰⵍ ⵜⵓⵣⵣⵉⴳⵉⵏ.
ⴰⵊⵉⵏⵉⵕⴰⵍ ⴰⵎⴰⵊⵓⵕ ⵀⴰⵎⴻⵍ ⵢⴻⵙⵍⴰ ⵉ ⵢⵉⵏⴻⵙⴽⵉⵏⴻⵏ ⴰⵢ ⴰⵙ-ⴷ-ⴳⴰⵏ ⵖⴻⴼ ⵍⴻⵛⵖⴰⵍ ⵏ ⵜⵉⴳⴳⴻⵜ-ⴰ, ⴷ ⵍⴻⵛⵖⴰⵍ ⴰⵢ ⵢⴻⵇⵇⵏⴻⵏ ⵖⴻⵔ ⵓⵃⵓⴷⴷⵓ ⵏ ⵎⴻⴷⴷⴻⵏ ⴷ ⵡⴰⵢⵍⴰ ⵎⴳⴰⵍ ⵢⵉⵅⴻⴷⴷⵉⵎⴻⵏ ⵉⵔⴻⴱⵔⴰⴱⴻⵏ, ⴷ ⵓⵃⵔⴰⵣ ⵏ ⵜⵖⴻⵍⵍⵉⵙⵜ ⵜⴰⴳⴻⵏⵙⵉⵜ (ⵏ ⴷⴰⵅⴻⵍ), ⴷ ⵓⵃⴰⵕⴻⴱ ⵏ ⵜⵔⵓⵥⵉ ⴷ ⵓⵙⵙⴻⴼⵙⴻⴷ.
ⴰⵏⴻⵎⵀⴰⵍ ⴰⵎⴰⵜⵓ ⵏ ⵜⵖⴻⵍⵍⵉⵙⵜ ⵜⴰⵖⴻⵍⵏⴰⵡⵜ ⵢⴻⵃⴷⴻⵕ ⴷⴰⵖ ⵉ ⵓⵇⴻⴷⴷⴻⵎ ⵏ ⵜⵜⴻⴽⵏⵉⵢⵉⵏ ⵏ ⵜⴻⵎⵀⴰⵍ ⵜⵓⵣⵣⵉⴳⵉⵏ ⵏ ⵢⵉⴼⴻⵔⴷⵉⵙⴻⵏ ⵏ ⵜⵖⴻⵍⵍⵉⵙⵜ ⵜⴰⴳⴻⵏⵙⵉⵜ ⵏ ⵜⵉⴳⴳⵜⵉⵏ-ⴰ. ⵉⴷⵉⵙ ⴰⴷⵣⴰⵢⵔⵉ ⴷ ⵢⵉⴷⵉⵙ ⴰⵇⴰⵟⴰⵔⵉ ⵎⴱⴰⴷⴷⴰⵍⴻⵏ ⵉⵣⵓⵎⴰⵍ-ⵏⵙⴻⵏ, ⵢⴻⵔⵏⴰ ⵏⵏⴰⵏ-ⴷ ⴷⴰⴽⴽⴻⵏ ⵜⴰ ⴷ ⵜⴰⴳⵏⵉⵜ ⵉ ⵓⵙⵎⴰⵍ ⵏ ⵡⴰⵙⵙⴰⵖⴻⵏ ⵓⵛⵔⵉⴽⴻⵏ, ⵍⴰⴷⵖⴰ ⴷⴻⴳ ⵓⵏⵔⴰⵔ ⵏ ⵜⵖⴻⵍⵍⵉⵙⵜ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵍⵖⵓ-ⵏⵏⵉ.
ⵉ ⵓⵙⵎⴻⴽⵜⵉ, ⴰⵊⵉⵏⵉⵕⴰⵍ ⴰⵎⴰⵊⵓⵕ ⵀⴰⵎⴻⵍ ⵉⴳⴰ ⵜⵉⵔⵣⵉ ⵏ ⵓⵅⴻⴷⴷⵉⵎ ⴷⴻⴳ ⵓⵡⴰⵏⴰⴽ ⵏ ⵇⴰⵟⴰⵔ ⵢⴻⵔⵏⴰ ⵢⴻⵡⵡⵉ-ⴷ ⵢⵉⴷ-ⵙ ⵜⴰⵎⴰⴳⵍⴰ ⵜⴰⵎⴻⵇⵔⴰⵏⵜ ⵏ ⵜⵎⴻⵀⵍⴰ ⵜⴰⵎⴰⵜⵓⵜ ⵏ ⵜⵖⴻⵍⵍⵉⵙⵜ ⵜⴰⵖⴻⵍⵏⴰⵡⵜ, ⵙ ⵓⵏⴻⵄⵔⵓⴹ ⵏ ⵓⵎⵜⵉ-ⵏⵏⴻⵙ ⴰⵇⴰⵟⴰⵔⵉ, ⴰⵊⵉⵏⵉⵕⴰⵍ ⴰⵎⴰⵊⵓⵕ ⵙⴰⴰⴷ ⴱⴻⵏ ⵊⴰⵙⵙⴻⵎ ⴰⵍ ⴽⵀⴰⵍⵉⴼⵉ.
