ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⴰⵚⴰⴹⵓⴼ ⵏ ⵡⴰⵔⵔⴰⵣ ⵓⵙⴻⵍⵡⴰⵢ ⵏ ⵜⴻⴳⴷⵓⴷⴰ ⵏ ⵓⵏⴻⵖⵎⴰⵙ ⴰⵎⴻⵀⵍⴰⵏ ⵢⴻⴼⴼⴻⵖ-ⴷ ⴷⴻⴳ ⵡⴻⵖⵎⵉⵙ ⵓⵏⵚⵉⴱ

ⵍⴻⵣⵣⴰⵢⴻⵔ – ⵢⴻⴼⴼⴻⵖ-ⴷ ⵓⵚⴰⴹⵓⴼ ⵏ ⵡⴻⵙⵏⵓⵍⴼⵓ ⵏ ⵡⴰⵔⵔⴰⵣ ⵓⵙⴻⵍⵡⴰⵢ ⵏ ⵜⴻⴳⴷⵓⴷⴰ ⵏ ⵓⵏⴻⵖⵎⴰⵙ ⴰⵎⴻⵀⵍⴰⵏ ⴷⴻⴳ ⵡⴻⵖⵎⵉⵙ ⵓⵏⵚⵉⴱ ⵓⵟⵟⵓⵏ ⵓ°28 ⵏ 27 ⵎⴰⵢⵓ 2015, ⴰⵏⴷⴰ ⴷ-ⴱⴻⴳⴳⵏⴻⵏ ⵉⵍⵓⴳⴰⵏ ⵏ ⵡⴻⴼⵔⴰⵏ. "ⴰⵔⵔⴰⵣ ⵢⴻⵔⵣⴰ, ⴰⵏⴻⵔⵏⵉ ⴷ ⵓⵏⴻⴳⵎⵓ ⵏ ⵡⴻⵙⵏⵓⵍⴼⵓ ⴷⴻⴳ ⵓⴳⴻⵔⵔⵓⵊ ⴰⵖⴰⵎⵙⴰⵏ, ⵙ ⵜⵉⴽⵛⵉ ⵏ ⵡⴰⵔⵔⴰⵣ ⵉ ⵍⴻⵇⴷⵉⵛ ⴰⵖⴰⵎⵙⴰⵏ ⵢⵓⴼⵔⴰⵔⴻⵏ ⴰⵎⴰ ⵢⴻⵜⵜⵡⴰⵅⴷⴻⵎ ⵙⵖⵓⵔ ⵢⵉⵡⴻⵏ ⵉⵎⴰⵏ-ⵉⵙ ⵏⴻⵖ ⴷ ⵜⴰⵔⴱⴰⵄⵜ ⵙⵖⵓⵔ ⵉⵏⴻⵖⵎⴰⵙⴻⵏ ⵉⵎⴰⵀⴰⵍⴻⵏ",ⵉⴷ-ⵢⴻⴷⴷⴰ ⴷⴻⴳ ⵓⵚⴰⴹⵓⴼ.

ⴰⵔⵔⴰⵣ ⵢⴻⵜⵜⵓⵏⴻⴼⴽ ⴷⵉ ⵅⴻⵎⵙⴰ ⵏ ⵜⴰⴳⴳⴰⵢⵉⵏ ⵏ ⵜⵖⴰⵎⵙⴰ: ⵉⵙⴰⵍⵍⵉ ⵢⴻⵜⵜⵡⴰⵔⵓⵏ, ⵢⴻⵜⵜⵡⴻⵥⵕⴰⵏ, ⵢⴻⵜⵜⵡⴻⵙⵍⴰⵏ, ⵉⵙⴰⵍⵍⵉ ⵏ ⵉⴷⵓⴳⴰ ⵏ ⵉⵏⵜⴻⵔⵏⴻⵜ ⴰⴽⴽ ⴷ ⵡⵓⵏⵓⵖⴻⵏ. ⴰⵔⵔⴰⵣ-ⴰⴳⵉ ⴰⴷ ⴷ-ⵢⵉⵍⵉ ⵙ ⵜⵉⴽⵛⵉ ⵏ ⵓⴳⴻⵔⴷⴰⵙ ⵏ ⵜⵓⴽⵍⴰⵍⵉⵜ ⴰⴽⴽ ⴷ ⵡⴰⵣⴰⵍ ⵏ ⵢⴻⴷⵔⵉⵎⴻⵏ ⴰⵏⴷⴰ ⵍⵇⵉⵎⴰ ⵜⴻⵜⵜⵡⴰⵃⴱⴻⵙ ⵉ ⵢⴰⵍ ⵜⴰⴳⴳⴰⵢⵜ.

ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⴽⵓⵥ (4) ⵏ ⵜⴰⴳⴳⴰⵢⵉⵏ ⵜⵉⵎⴻⵣⵡⵓⵔⴰ, ⵍⵇⴰⵏⵓⵏ ⵢⴻⵜⵜⴱⴻⴳⴳⵉⵏ-ⴷ ⴱⴻⵍⵍⵉ ⴰⵎⴻⵣⵡⴰⵔⵓ ⴷ-ⵢⵓⴼⵔⴰⵔⴻⵏ ⴰⴷ ⵢⴰⵡⵉ ⵍⵇⵉⵎⴰ (1) ⵓⵎⴻⵍⵢⵓⵏ ⴷⴰ, ⵡⵉⵙ ⵙⵉⵏ ⴰⴷ ⵢⴰⵡⵉ 500.000 ⵏ ⴷⴰ ⵎⴰ ⴷ ⵡⵉⵙ 3 ⴰⴷ ⵢⴻⵙⵙⵉⵡⴻⴹ 300.000 ⴷⴰ. ⵎⴰ ⴷ ⵜⴰⴳⴳⴰⵢⵜ ⵜⵉⵙ 5, ⵍⵇⵉⵎⴰ ⴰⴷ ⵜⴰⵡⴻⴹ 100.000 ⴷⴰ ⴰⴷ ⵜⴻⵜⵜⵓⵏⴻⴼⴽ ⵉ ⵜⴻⵡⵍⴰⴼⵉⵏ ⵢⵓⴼⵔⴰⵔⴻⵏ, ⵓⵏⵓⵖⴻⵏ ⴷ ⵜⴽⴰⵔⵉⴽⴰⵜⵓⵔⵜ ⵏ ⵜⵖⴰⵎⵙⴰ. ⴰⵚⴰⴹⵓⴼ ⵢⴻⵜⵜⴱⴻⴳⴳⵉⵏ-ⴷ ⴱⴻⵍⵍⵉ ⵉⵎⴼⴻⵔⵏⴻⵏ ⴷ ⵉⵎⵓⵏⴻⵏ, ⴷ ⵉⵎⴷⴰⵏⴻⵏ ⵢⴻⵜⵜⵡⴰⵙⵏⴻⵏ ⴷⵉ ⵜⵖⴰⵎⵙⴰ ⵢⴻⵜⵜⵡⴰⵔⵓⵏ, ⵉⵏⵜⴻⵔⵏⴻⵜ, ⵔⵔⴰⴷⵢⵓ ⵏⴻⵖ ⵜⵉⵍⵉⵥⵕⵉ.