ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵢⴻⵏⵇⴻⵙ ⵡⴰⴵⴰⵡ ⵏ ⵓⴽⴻⴼⴼⴰⵢ ⴷ ⵙⵙⴽⴻⵕ ⵙⴻⴳ ⵜⵎⵓⵔⴰ ⵏ ⵓⵣⵖⴰⵔ ⴷⴻⴳ 5 ⵏ ⵡⴰⵢⵢⵓⵔⴻⵏ ⵉⵎⴻⵣⵡⵓⵔⴰ ⵏ ⵓⵙⴻⴳⴳⴰⵙ-ⴰ

ⵍⴻⵣⵣⴰⵢⴻⵔ ⵜⴰⵎⴰⵏⴻƔⵜ – ⵜⴰⴼⴰⵜⵓⵕⵜ ⵏ ⵡⴰⴵⴰⵡ ⵏ ⵢⵉⴼⴰⵔⵉⵙⴻⵏ ⵏ ⵓⴽⴻⴼⴼⴰⵢ (ⴰⵖⴻⴱⴱⴰⵔ ⵏ ⵓⴽⴻⴼⴼⴰⵢ, ⵍⵉⴷⴰⵎ ⴰⵢ ⴷ-ⵢⴻⵜⵜⵡⴰⵙⵙⵓⴷⴷⵎⴻⵏ ⵙⴻⴳ ⵓⴽⴻⴼⴼⴰⵢ ⴰⵎ ⵡⵓⴷⵉ ⴷ ⵓⴼⵔⵉⵔ) ⴷ ⵙⵙⴽⴻⵕ (ⵙⵙⴽⴻⵕ ⵏ ⵓⴱⵉⵟⵔⴰⴱ, ⵙⵙⴽⴻⵕ ⵏ ⵜⵖⴰⵏⵉⵎⵜ, ⴰⵙⵉⵔⵓ ⵏ ⵓⵍⴰⴽⵜⵓⵣ ⴷ ⵓⵍⴰⴽⵜⵓⵣ ⴰⵇⵓⵔⴰⵏ) ⵜⴻⵏⵇⴻⵙ ⴷⴻⴳ 5 ⵏ ⵡⴰⵢⵢⵓⵔⴻⵏ ⵉⵎⴻⵣⵡⵓⵔⴰ ⵏ ⵓⵙⴻⴳⴳⴰⵙ ⵏ 2015. ⵙ ⵡⴰⵢⴰ, ⴰⴵⴰⵡ ⵏ ⵢⵉⴼⴰⵔⵉⵙⴻⵏ ⵏ ⵓⴽⴻⴼⴼⴰⵢ ⵢⴻⵙⵇⴰⵎ-ⴷ 519,06 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⴷⵓⵍⴰⵕⴻⵏ ⴷⴻⴳ 5 ⵏ ⵡⴰⵢⵢⵓⵔⴻⵏ ⵉⵎⴻⵣⵡⵓⵔⴰ ⵏ ⵓⵙⴻⴳⴳⴰⵙ-ⴰ, ⵢⵉⵍⵉ ⴰⵙⴻⴳⴳⴰⵙ ⵢⴻⵣⵔⵉⵏ, ⵜⵜⵡⴰⴵⵡⴻⵏ-ⴷ 840,86 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⴷⵓⵍⴰⵕⴻⵏ ⵙⴻⴳ ⵢⵉⴼⴰⵔⵉⵙⴻⵏ-ⴰ ⴷⴻⴳ 5 ⵏ ⵡⴰⵢⵢⵓⵔⴻⵏ ⵉⵎⴻⵣⵡⵓⵔⴰ, ⵢⴻⵔⵏⴰ ⵢⴻⵏⵇⴻⵙ ⵡⴰⴵⴰⵡ ⵏ ⵢⵉⴼⴰⵔⵉⵙⴻⵏ-ⴰ ⵙ 38,27% ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵡⴰⵎⵎⴰⵙ ⴰⵖⴻⵍⵏⴰⵡ ⵏ ⵜⵙⴻⵏⵙⴻⵍⴽⵉⵎⵜ ⴷ ⵜⴰⴷⴷⴰⴷⴰⵏⵉⵏ ⵏ ⵜⴻⴷⵡⴰⵏⵜ (ⵛⵏⵉⵙ) ⵉ ⵜⵏⴻⴳⴳⴰ ⵏ ⵢⵉⵙⴰⵍⴰⵏ ⵏ ⵍⴻⵣⵣⴰⵢⴻⵔ. ⴷ ⴰⵛⵓ ⴽⴰⵏ, ⵓⵍⴰ ⵎⴰ ⵜⴰⴼⴰⵜⵓⵕⵜ ⵜⴻⵏⵇⴻⵙ, ⵜⴰⵙⵎⴻⴽⵜⴰ ⵏ ⵢⵉⴼⴰⵔⵉⵙⴻⵏ ⵏ ⵓⴽⴻⴼⴼⴰⵢ ⴰⵢ ⴷ-ⵢⴻⵜⵜⵡⴰⴵⵡⴻⵏ ⵜⴻⵔⵏⴰ ⵙ 172.940 ⵏ ⵢⵉⵟⵓⵏⴻⵏ ⴳⴰⵔ ⵢⴻⵏⵏⴰⵢⴻⵔ ⴷ ⵎⴰⵢⵓ ⵢⴻⵣⵔⵉⵏ, ⵢⵉⵍⵉ, ⴰⵙⴻⴳⴳⴰⵙ ⵢⴻⵣⵔⵉⵏ, ⵜⵜⵡⴰⴵⵡⴻⵏ-ⴷ 165.567 ⵏ ⵢⵉⵟⵓⵏⴻⵏ ⴷⴻⴳ ⵜⴰⵍⵍⵉⵜ-ⵏⵏⵉ. ⵙ ⵡⴰⵢⴰ, ⵜⴰⵙⵎⴻⴽⵜⴰ ⵏ ⵡⴰⴵⴰⵡ ⵜⴻⵔⵏⴰ ⵙ 4,45%. ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⵙⵙⴽⴻⵕ, ⵍⴻⵣⵣⴰⵢⴻⵔ ⵜⵓⴵⴻⵡ-ⴷ 365,7 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⴷⵓⵍⴰⵕⴻⵏ ⴷⴻⴳ 5 ⵏ ⵡⴰⵢⵢⵓⵔⴻⵏ ⵉⵎⴻⵣⵡⵓⵔⴰ ⵏ 2015. ⵎⴰ ⴰⵙⴻⴳⴳⴰⵙ ⵢⴻⵣⵔⵉⵏ, ⵜⵓⴵⴻⵡ-ⴷ 403,18 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⴷⵓⵍⴰⵕⴻⵏ ⴷⴻⴳ ⵜⴰⵍⵍⵉⵜ-ⵏⵏⵉ. ⵙ ⵡⴰⵢⴰ, ⵜⴰⴼⴰⵜⵓⵕⵜ ⵏ ⵙⵙⴽⴻⵕ ⵜⴻⵏⵇⴻⵙ ⵙ 9,3% ⵖⴻⴼ ⵍⴻⵃⵙⴰⴱ ⵏ ⵢⵉⵍⵉⵏⴷⵉ. ⵎⴰ ⴷ ⵜⴰⵙⵎⴻⴽⵜⴰ ⵏ ⵙⵙⴽⴻⵕ ⴰⵢ ⴷ-ⵢⴻⵜⵜⵡⴰⴵⵡⴻⵏ, ⵜⴻⵏⵇⴻⵙ ⵓⵍⴰ ⴷ ⵏⴻⵜⵜⴰⵜ, ⵉⵎⵉ ⴰⵙⴻⴳⴳⴰⵙ-ⴰ, ⵜⵜⵡⴰⴵⵡⴻⵏ-ⴷ 847.145 ⵏ ⵢⵉⵟⵓⵏⴻⵏ, ⵢⵉⵍⵉ ⴰⵙⴻⴳⴳⴰⵙ ⵢⴻⵣⵔⵉⵏ ⵜⵜⵡⴰⴵⵡⴻⵏ-ⴷ 874.035 ⵏ ⵢⵉⵟⵓⵏⴻⵏ ⴷⴻⴳ ⵙⴻⵎⵎⵓⵙ ⵏ ⵡⴰⵢⵢⵓⵔⴻⵏ ⵉⵎⴻⵣⵡⵓⵔⴰ ⵏ ⵓⵙⴻⴳⴳⴰⵙ. ⵙ ⵡⴰⵢⴰ, ⵜⴻⵏⵇⴻⵙ ⵜⴻⵙⵎⴻⴽⵜⴰ ⵙ 3,07%. ⴷⴻⴳ 2014, ⴰⴵⴰⵡ ⵏ ⵢⵉⴼⴰⵔⵉⵙⴻⵏ ⵏ ⵓⴽⴻⴼⴼⴰⵢ ⵢⵓⵡⴻⴹ ⵖⴻⵔ 1,9 ⴷ ⴰⵎⴻⵍⵢⴰⵕ ⵏ ⵢⵉⴷⵓⵍⴰⵕⴻⵏ, ⵎⴰ ⴷ ⵡⵉⵏ ⵏ ⵙⵙⴽⴻⵕ ⵢⵓⵡⴻⴹ ⵖⴻⵔ 861,05 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⴷⵓⵍⴰⵕⴻⵏ. ⴷⴻⴳ 5 ⵏ ⵡⴰⵢⵢⵓⵔⴻⵏ ⵉⵎⴻⵣⵡⵓⵔⴰ ⵏ 2015, ⴰⵢⴻⵏ ⴰⵢ ⴷ-ⵜⵓⴵⴻⵡ ⵍⴻⵣⵣⴰⵢⴻⵔ ⴷ ⵉⴼⴰⵔⵉⵙⴻⵏ ⵏ ⵜⵓⵞⵞⵉⵜ ⵢⵓⵡⴻⴹ ⵖⴻⵔ 19,23% ⵙⴻⴳ ⵓⵊⴻⵎⵎⴰⵍ ⵏ ⵡⴰⵢⴻⵏ ⴰⴽⴽ ⴰⵢ ⴷ-ⵜⵓⴵⴻⵡ ⵙⴻⴳ ⵓⵣⵖⴰⵔ, ⵢⴻⵔⵏⴰ ⵜⴰⴼⴰⵜⵓⵕⵜ ⵏ ⵡⴰⵢⴰ ⵜⵓⵡⴻⴹ ⵖⴻⵔ 4,3 ⵏ ⵢⵉⵎⴻⵍⵢⴰⵕⴻⵏ ⵏ ⵢⵉⴷⵓⵍⴰⵕⴻⵏ, ⵢⵉⵍⵉ ⴰⵙⴻⴳⴳⴰⵙ ⵢⴻⵣⵔⵉⵏ, ⵍⴻⵣⵣⴰⵢⴻⵔ ⵜⵓⴵⴻⵡ-ⴷ 4,7 ⵏ ⵢⵉⵎⴻⵍⵢⴰⵕⴻⵏ ⵏ ⵢⵉⴷⵓⵍⴰⵕⴻⵏ ⵏ ⵜⵓⵞⵞⵉⵜ. ⵙ ⵡⴰⵢⴰ, ⵜⴰⴼⴰⵜⵓⵕⵜ ⵜⴰⵎⴰⵜⵓⵜ ⵏ ⵜⵓⵞⵞⵉⵜ ⵜⴻⵏⵇⴻⵙ-ⴷ ⵙ 8,65%. ⴰⴵⴰⵡ, ⵙ ⵓⵎⴰⵜⴰ, ⵢⴻⵏⵇⴻⵙ ⵙ 10,22% ⴳⴰⵔ ⵢⴻⵏⵏⴰⵢⴻⵔ ⴷ ⵎⴰⵢⵓ ⵏ 2015, ⵢⴻⵔⵏⴰ ⵢⵓⵡⴻⴹ ⵖⴻⵔ 22,33 ⵏ ⵢⵉⵎⴻⵍⵢⴰⵕⴻⵏ ⵏ ⵢⵉⴷⵓⵍⴰⵕⴻⵏ.