ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵍⴻⵣⵣⴰⵢⴻⵔ ⵜⵡⴻⵜ-ⴷ ⵙ ⵍⴵⴻⵀⴷ ⴷⴻⴳ ⵜⵅⴰⵣⴰⴱⵉⵢⵉⵏ ⵜⵉⵔⴻⴱⵔⴰⴱⵉⵏ ⴰⵢ ⴷ-ⵢⴻⵍⵍⴰⵏ ⴷⴻⴳ ⵏⵉⵊⵉⵔⵢⴰ
ⵍⴻⵣⵣⴰⵢⴻⵔ – ⵍⴻⵣⵣⴰⵢⴻⵔ ⵜⵡⴻⵜ-ⴷ ⵙ ⵍⴵⴻⵀⴷ ⴷⴻⴳ ⵜⵅⴰⵣⴰⴱⵉⵢⵉⵏ-ⵏⵏⵉ ⴰⵢ ⵜⴳⴰ ⴷⴻⴳ ⵜⴳⴰⵔⴰ ⵏ ⴷⴷⵓⵕⵜ ⵜⴻⴳⵔⴰⵡⵜ ⵜⴰⵔⴻⴱⵔⴰⴱⵜ ⵏ « ⴱⵧⴽⵧ ⵀⴰⵔⴰⵎ » ⴷⴻⴳ ⵡⴰⵛⵃⴰⵍ ⵏ ⵜⵓⴷⴷⴰⵔ ⵏ ⵓⵡⴰⵏⴰⴽ ⵏ ⴱⵧⵔⵏⵧ, ⴷⴻⴳ ⵓⴳⴰⴼⴰ-ⴰⴳⵎⵓⴹⴰⵏ ⵏ ⵏⵉⵊⵉⵔⵢⴰ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵏⴻⵟⵟⴰⵇ ⵏ ⵓⵖⵍⵉⴼ ⵏ ⵜⵖⴰⵡⵙⵉⵡⵉⵏ ⵏ ⵓⵣⵖⴰⵔ, ⴰⴱⴷⴻⵍⴰⵣⵉⵣ ⴱⴻⵏⴰⵍⵉ-ⵛⵀⴻⵔⵉⴼ. « ⵏⴻⵙⵙⵉⵥⵉⵔ ⵙ ⵍⴵⴻⵀⴷ ⵜⵉⵅⴰⵣⴰⴱⵉⵢⵉⵏ-ⴰ ⵜⵉⵎⴻⵍⵖⵓⵏⵉⵏ ⴰⵢ ⴷ-ⵢⴻⵍⵍⴰⵏ ⴷⴻⴳ ⵡⴰⵛⵃⴰⵍ ⵏ ⵜⵓⴷⴷⴰⵔ ⴷⴻⴳ ⵓⵡⴰⵏⴰⴽ ⵏ ⴱⵧⵔⵏⵧ, ⴷⴻⴳ ⵓⴳⴰⴼⴰ-ⴰⴳⵎⵓⴹⴰⵏ ⵏ ⵏⵉⵊⵉⵔⵢⴰ ⵎⴳⴰⵍ ⵍⵎⵓⵎⵏⵉⵏ, ⵜⵉⵍⴰⵡⵉⵏ ⴷ ⵢⵉⴳⴻⵔⴷⴰⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵎⴰⵙⵙ ⴱⴻⵏⴰⵍⵉ-ⵛⵀⴻⵔⵉⴼ ⴷⴻⴳ ⵢⵉⵡⴻⵜ ⵏ ⵜⵙⴻⵖⵔⵓⵜ ⴰⵢ ⴷ-ⵉⴳⴰ ⵉ ⵜⵏⴻⴳⴳⴰ ⵏ ⵢⵉⵙⴰⵍⴰⵏ ⵏ ⵍⴻⵣⵣⴰⵢⴻⵔ. « ⵜⵉⵎⴻⵔⵡⵉⵏ-ⵏⵏⵉ ⵏ ⵜⴻⵖⵜⴰⵙ ⵜⵉⵍⴻⵎⵔⵉⵢⵉⵏ ⴰⵢ ⵢⴻⵖⵍⵉⵙ ⵙ ⵔⵔⵚⴰⵚ ⴰⵏⴻⴹⵍⵉⴱ ⵏ ⵢⵉⵔⴻⴱⵔⴰⴱⴻⵏ ⵔⵏⴰⵏⵜ ⵖⴻⵔ ⵜⴻⵖⵜⴰⵙ ⵏⵉⴹⴻⵏ ⴰⵢ ⵜⴻⵏⵖⴰ ⴷⴻⴳ ⵡⴰⵢⵢⵓⵔⴻⵏ-ⴰ ⵉⵏⴻⴳⴳⵓⵔⴰ ⵜⴻⴳⵔⴰⵡⵜ-ⴰ ⵢⴻⴼⴼⵓⴷⴻⵏ ⵉⴷⴰⵎⵎⴻⵏ », ⵖⴻⴼ ⵡⴰⴽⴽⴻⵏ ⴰⵢ ⵢⴻⵙⵃⴰⵙⵙⴻⴼ. « ⵏⴻⵜⵜⵡⴻⴽⴽⵉⴷ-ⴷ ⵜⴰⵎⵙⴻⵙⵜⵍⴻⵍⵜ-ⵏⵏⴻⵖ ⵖⴻⵔ ⵢⵉⴷⵉⵙ ⵏ ⵓⵏⴰⴱⴰⴹ ⵏ ⵏⵉⵊⵉⵔⵢⴰ ⴷ ⵜⵡⴰⵛⵓⵍⵉⵏ ⵏ ⵜⴻⵖⵜⴰⵙ, ⵢⴻⵔⵏⴰ ⵏⴻⴳⴳⴰⵔ-ⴷ ⵜⵉⵖⵔⵉ ⴰⴽⴽⴻⵏ ⴰⴷ ⵡⵍⵉⵡⵍⴻⵏⵜ ⴰⴽⴽ ⵜⵣⴻⵎⵎⴰⵔ ⴷⴻⴳ ⵏⵉⵊⵉⵔⵢⴰ ⴷ ⵜⵎⵓⵔⴰ ⵜⵉⵏⴰⵔⴰⴳⵉⵏ (ⵜⵉⵊⵉⵔⴰⵜⵉⵏ) ⴰⴽⴽⴻⵏ ⴰⴷ ⵃⴻⴱⵙⴻⵏⵜ ⵙ ⵜⵖⴰⵡⵍⴰ ⵛⵛⵖⴻⵍ ⵓⵛⵎⵉⵜ ⵏ ⴱⵧⴽⵧ ⵀⴰⵔⴰⵎ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵏⴻⵟⵟⴰⵇ. « ⵏⴻⵜⵜⵡⴰⵙⵙⴻⵇⵏⴻⵄ ⴷ ⴰⴽⴽⴻⵏ ⴰⵄⴻⵡⵡⴻⵍ ⵏ ⵢⵉⴷⵓⴱⴰ ⵏ ⵏⵉⵊⵉⵔⵢⴰ ⴷ ⵜⵉⴳⵉⵏ ⴰⵢ ⵢⵓⴳⵉ ⵓⴳⴷⵓⴷ ⵔⵔⴻⴱⵔⴰⴱ ⴷ ⴰⵢⴻⵏ ⴰⵔⴰ ⵢⴻⵙⵙⵉⵡⴹⴻⵏ ⴰⴷ ⵢⴻⵃⴱⴻⵙ ⴰⵅⴻⵚⵚⴰⵔ-ⴰ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵉⵡⴻⴽⴽⴻⴷ.
