ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵜⵉⴷⵢⴰⵏⵉⵏ ⵏ ⵜⵖⴻⵔⴷⴰⵢⵜ: ⵜⵓⵇⵇⵍⴰ ⵏ ⵍⵄⴰⴼⵢⴰ ⴷⴻⴼⴼⵉⵔ ⵛⵛⵡⴰⵍ-ⵏⵏⵉ ⴰⵎⴻⵇⵔⴰⵏ
ⵜⴰⵖⴻⵔⴷⴰⵢⵜ – ⵜⴻⵇⵇⴻⵍ-ⴷ ⵍⵄⴰⴼⵢⴰ ⴰⵙⵙ ⵏ ⵙⵙⴻⴱⵜ ⴷⴻⴳ ⵜⵡⵉⵍⴰⵢⵜ ⵏ ⵜⵖⴻⵔⴷⴰⵢⵜ ⵙⴷⴻⴼⴼⵉⵔ ⵎⴰ ⵍⵍⴰⵏⵜ-ⴷ ⵜⴻⴷⵢⴰⵏⵉⵏ-ⵏⵏⵉ ⵢⴻⵙⵙⴻⵃⵣⴰⵏⴻⵏ ⴰⵢ ⵢⴻⴳⵍⴰⵏ ⵙ 22 ⵏ ⵜⵎⴻⴷⴷⵓⵔⵉⵏ ⴷⴻⴳ ⴱⴻⵔⵔⴻⵢⵢⴰⵏ, ⴳⴻⵕⵕⴰⵕⴰ ⴷ ⵢⵉⵖⵣⴻⵔ ⵏ ⵎⵥⴰⴱ.
ⵉⵖⵣⴻⵔ ⵏ ⵎⵥⴰⴱ ⵢⴻⵇⵇⴻⵍ, ⵉⵀⵉ, ⵖⴻⵔ ⵜⵎⴻⴷⴷⵓⵔⵜ-ⵏⵏⴻⵙ ⵏ ⵎⴻⵏⵡⴰⵍⴰ ⴰⵙⵙ ⵏ ⵙⵙⴻⴱⵜ, ⵢⴻⵔⵏⴰ ⵍⵖⴰⵛⵉ ⵍⵍⴰⵏ ⵜⵜⵎⴻⵊⵎⵓⵊⴻⵏ ⴷⴻⴳ ⵢⵉⵣⴻⵏⵇⴰⵏ-ⵏⵏⴻⵙ, ⵙⴷⴻⴼⴼⵉⵔ ⵎⴰ ⵔⴻⵥⵎⴻⵏⵜ ⵜⵃⵓⵏⴰ ⵢⴻⵔⵏⴰ ⵜⴻⵇⵇⴻⵍ-ⴷ ⵜⵉⴷⴷⵉⵜ ⵏ ⵜⴽⴻⵕⵕⵓⵙⵉⵏ ⴷⴻⴳ ⵢⵉⴱⵔⵉⴷⴻⵏ, ⵙⴷⴻⴼⴼⵉⵔ ⵎⴰ ⵅⵍⴰⵏ ⵢⵉⵣⴻⵏⵇⴰⵏ ⴷⴻⴳ ⵡⵓⵙⵙⴰⵏ ⵢⴻⵣⵔⵉⵏ.
ⵖⴻⴼ ⵍⴻⵃⵙⴰⴱ ⵏ ⵢⵉⴳⴻⵏⵙⴰⵙⴻⵏ ⵏ ⵜⴻⵎⵚⵓⴽⵉⵡⵉⵏ ⵜⵉⵏⵎⴻⵜⵜⵉⵢⵉⵏ ⵢⴻⵎⴳⴻⵔⵔⴰⴷⴻⵏ ⵏ ⵜⴻⵎⵏⴰⴹⵜ-ⴰ, ⵜⴰⴳⵏⵉⵜ ⵏ ⵜⵖⴻⵍⵍⵉⵙⵜ (ⵍⴰⵎⴰⵏ) ⵜⴳⴻⵔⵔⴻⵣ ⴰⵣⴻⴽⴽⴰ-ⵏⵏⵉ ⵏ ⵡⴰⵙⵎⵉ ⴰⵢ ⴷ-ⵜⴻⵔⵣⴰ ⵜⵎⴰⴳⵍⴰ-ⵏⵏⵉ ⴰⵢ ⴷ-ⵢⴻⵡⵡⵉ ⵓⵏⴻⵖⵍⴰⴼ ⴰⵎⴻⵏⵣⵉ, ⴰⴱⴷⴻⵍⵎⴰⵍⴻⴽ ⵙⴻⵍⵍⴰⵍ.
ⴽⵔⴰ ⵏ ⵡⵓⴼⵔⵉⵏⴻⵏ ⵓⵎⴰⵔⴻⵏ (ⴼⴻⵕⵃⴻⵏ) ⵉⵎⵉ ⵜⴰⴳⵏⵉⵜ ⵜⵚⴻⴳⴳⴻⵎ-ⴷ « ⵇⵔⵉⴱ » ⴰⵎ ⵣⵉⴽ. « ⵜⴰⵖⴻⵍⵍⵉⵙⵜ ⵍⴰ ⵜⵍⴻⵀⵀⵓ ⵙ ⵜⵖⴰⵡⵍⴰ, ⵓⴳⴰⵔ ⵏ ⵡⴰⴽⴽⴻⵏ ⵏⴻⴹⵎⴻⵄ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵏⵏⴰⵏ ⵉ ⵜⵏⴻⴳⴳⴰ ⵏ ⵢⵉⵙⴰⵍⴰⵏ ⵏ ⵍⴻⵣⵣⴰⵢⴻⵔ.
« ⵏⴻⵔⵔⴰ ⵜⴰⵊⵎⵉⵍⵜ ⵢⴻⵔⵏⴰ ⵏⴻⵙⵏⴻⵎⵎⵉⵔ ⴰⵙⴻⵍⵡⴰⵢ ⵏ ⵜⴻⴳⴷⵓⴷⴰ ⵖⴻⴼ ⵢⵉⵖⵜⴰⵙⴻⵏ-ⵏⵏⴻⵙ ⵓⴵⵀⵉⴷⴻⵏ, ⴷ ⵡⵉⴷ ⴰⵢ ⵢⴻⴷⴷⴻⵎ ⴷⴻⴳ ⵜⴻⴳⵏⵉⵜ ⴷ ⵜⴰⵡⴻⵄⵕⴰⵏⵜ ⴰⴽⴽⴻⵏ ⴰⴷ ⵉⴼⴰⴽ ⵓⴱⴻⴹⴹⵓ-ⴰ ⴰⵢ ⵢⴻⴳⴳⵣⴻⵏ ⵜⴰⴷⵓⴽⵍⵉ ⵜⴰⵖⴻⵍⵏⴰⵡⵜ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵏⵏⴰⵏ, ⵙⴻⴳ ⵢⵉⴷⵉⵙ-ⵏⵙⴻⵏ, ⵢⵉⵎⴻⵣⴷⴰⵖⴻⵏ ⵏ ⵜⵖⴻⵔⴷⴰⵢⵜ.
ⴰⵙⵙ ⵏ ⵍⴵⴻⵎⵄⴰ, ⴳⵔⴻⵏ-ⴷ ⵜⵉⵖⵔⵉ ⵉ ⵍⵄⴰⴼⵢⴰ ⴷ ⵜⵓⴵⴵⵉⵜ ⵏ ⵡⴰⴽⴽ ⵍⴻⵚⵏⴰⴼ ⵏ ⴽⴰⵕⵓⵀ ⴷⴻⴳ ⵜⵎⴻⵙⴳⵉⴷⵉⵡⵉⵏ ⵏ ⵜⵡⵉⵍⴰⵢⵜ. ⵍⵉⵎⴰⵎⴰⵜ ⵙⵙⴰⵡⵍⴻⵏ-ⴷ, ⴷⴻⴳ ⵍⵅⴻⴹⴱⴰⵜ-ⵏⵙⴻⵏ, ⵖⴻⴼ ⵓⵀⴻⴷⴷⴻⵏ, ⴰⵎⵙⴻⴼⵀⴰⵎ ⴷ ⵓⵎⵙⵓⵖⴰⵍ ⴰⴽⴽⴻⵏ ⴰⵢ ⴷ-ⵉⵡⴻⵚⵚⴰ ⵍⵉⵙⵍⴰⵎ.
« ⴰⵇⵍ-ⴰⵖ ⴰⴽⴽ ⴷ ⵉⵏⵙⴻⵍⵎⴻⵏ, ⵢⴻⵙⵙⴻⴼⴽ ⴰⴷ ⵏⴻⴷⴷⵓⴽⴽⴻⵍ ⵢⴻⵔⵏⴰ ⴰⴷ ⵏⴻⵎⵙⴻⴼⵀⴰⵎ ⵖⴻⴼ ⵡⴰⵣⴰⵍⴻⵏ ⵏ ⴷⴷⵉⵏ-ⵏⵏⴻⵖ ⴰⵢ ⵢⴻⴼⴽⴰⵏ ⴰⵣⴰⵍ ⵉ ⵜⵖⴻⵍⵍⵉⵙⵜ (ⵍⴰⵎⴰⵏ) ⵏ ⵡⴰⵢⵍⴰ ⴷ ⵢⵉⵎⴷⴰⵏⴻⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵍⵉⵎⴰⵎ ⵏ ⵓⴳⵎⴰⵎ ⵏ ⵜⵏⴻⵢⵢⴻⵜ ⵍⵎⴻⵅⵣⴻⵏ.
ⴷⴻⴳ ⵜⴻⵎⴷⵉⵏⵉⵏ ⵏ ⴳⴻⵕⵕⴰⵕⴰ ⴷ ⴱⴻⵔⵔⴻⵢⵢⴰⵏ ⴷⴻⴳ ⵎⴰⵣⴰⵍ ⵍⴰⵜⴻⵕ ⵏ ⵜⴻⴷⵢⴰⵏⵉⵏ-ⵏⵏⵉ ⵉⵇⴻⵔⵔⵃⴻⵏ, ⵉⵎⴻⵣⴷⴰⵖⴻⵏ ⴱⴷⴰⵏ ⵢⴰⴳⵉ ⵍⴰ ⵜⵜⵅⴻⵎⵎⵉⵎⴻⵏ ⵖⴻⴼ ⵓⵣⴻⴽⴽⴰ « ⵉⵛⴻⴱⵃⴻⵏ ⵓⴳⴰⵔ », ⵢⴻⵔⵏⴰ ⴱⴷⴰⵏ ⵍⴰ ⴷ-ⵜⵜⵀⴻⵢⵢⵉⵏ ⴰⵄⴰⵡⴻⴷ ⵏ ⵍⴻⴱⵏⵉ ⵏ ⵡⴰⵢⴻⵏ ⴰⵢ ⵉⴷⴻⵔⵎⴻⵏ ⴷⴻⴳ ⵜⴻⵎⴷⵉⵏⵉⵏ-ⵏⵙⴻⵏ ⵙ ⵍⴻⵎⵄⴰⵡⵏⴰ ⵏ ⵢⵉⴷⵓⴱⴰ ⵉⵏⴰⴳⴷⵓⴷⴻⵏ.
ⵜⴰⵎⴹⴻⵍⵜ ⵏ ⵡⵉⴷ ⴰⵢ ⵢⴻⵎⵎⵓⵜⴻⵏ ⵙⴻⴳ ⵜⴻⴷⵢⴰⵏⵉⵏ ⴰⵢ ⴷ-ⵢⴻⵍⵍⴰⵏ ⴷⴻⴳ ⵜⴻⵎⴷⵉⵏⵉⵏ-ⴰ ⵜⴻⵍⵍⴰ-ⴷ ⴷⴻⴳ ⵍⵄⴰⴼⵢⴰ, ⵖⴻⴼ ⵡⴰⴽⴽⴻⵏ ⴰⵢ ⵏⵡⴰⵍⴰ.
ⵓⵔ ⴷ-ⵜⴻⵍⵍⵉ ⴰⵔⴰ ⴰⴽⴽ ⴽⵔⴰ ⵏ ⵜⴻⴷⵢⴰⵏⵜ ⵏ ⴷⵉⵔⵉ ⵙⴻⴳ ⵡⴰⵙⵙ ⵏ ⵍⴻⵅⵎⵉⵙ ⵜⴰⵎⴻⴷⴷⵉⵜ ⴷⴻⴳ ⵜⴻⵎⵏⴰⴹⵜ ⵏ ⵜⵖⴻⵔⴷⴰⵢⵜ ⴷⴻⴳ ⴰⵢ ⴳⴰⵏ ⵢⵉⵎⵙⵓⵍⵜⴰ ⵜⴰⴱⴰⴳⵓⵙⵜ ⵏ ⵜⵖⴻⵍⵍⵉⵙⵜ ⴷ ⵜⴰⵎⴻⵇⵔⴰⵏⵜ, ⵢⴻⵔⵏⴰ ⵜⵜⵄⴰⵡⴰⵏⴻⵏ-ⵜⴻⵏ ⴷⴻⴳ ⵡⴰⵢⴰ ⵢⵉⵖⴰⵍⵍⴻⵏ ⵏ ⵜⴻⵎⵙⴻⵜⵍⴰ ⵜⴰⵖⴻⵍⵏⴰⵡⵜ ⴰⵢ ⵢⴻⵍⵍⴰⵏ ⴷⴻⴳ ⵡⴰⴽⴽ ⵉⵣⴻⵏⵇⴰⵏ ⴷ ⵢⵉⴳⵎⴰⵏⴻⵏ ⵉⵎⴻⵇⵔⴰⵏⴻⵏ ⵏ ⵢⵉⵖⵣⴻⵔ ⵏ ⵎⵥⴰⴱ.
ⴰⴼⵔⴰⵇ ⵏ ⵢⵉⵖⴰⵍⵍⴻⵏ ⵏ ⵜⵖⴻⵍⵍⵉⵙⵜ ⴷⴻⴳ ⵓⵏⵔⴰⵔ ⴷ ⵜⵓⴹⴹⴼⴰ ⵏ 40 ⵏ ⵢⵉⵎⴷⴰⵏⴻⵏ ⴷⴻⴳ ⵛⵉⴽⴽⴻⵏ ⵜⵜⴻⴽⴽⴰⵏ ⴷⴻⴳ ⵜⴻⴷⵢⴰⵏⵉⵏ-ⵏⵏⵉ ⵜⵓⵇⵔⵉⵃⵉⵏ ⴷ ⴰⵢⴻⵏ ⴰⵢ ⵢⴻⵜⵜⴻⴽⴽⴰⵏ ⴷⴻⴳ ⵜⵓⵇⵇⵍⴰ ⵏ ⵍⵄⴰⴼⵢⴰ ⴷ ⵓⵄⴰⵡⴻⴷ ⵏ ⵓⵔⵥⴰⵎ ⵏ ⵓⵎⵓⵔ ⴰⵎⴻⵇⵔⴰⵏ ⵙⴻⴳ ⵜⵃⵓⵏⴰ ⴷⴻⴳ ⵜⴻⵎⵏⴰⴹⵜ-ⴰ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵏⵡⴰⵍⴰ.
ⴰⵏⴻⵖⵍⴰⴼ ⴰⵎⴻⵏⵣⵓ, ⴰⴱⴷⴻⵍⵎⴰⵍⴻⴽ ⵙⴻⵍⵍⴰⵍ, ⵢⴻⴷⴷⴰ ⴰⵙⵙ ⵏ ⵍⴻⵅⵎⵉⵙ ⵖⴻⵔ ⵜⵡⵉⵍⴰⵢⵜ ⵏ ⵜⵖⴻⵔⴷⴰⵢⵜ ⴰⵏⴷⴰ ⴰⵢ ⵢⴻⵎⵍⴰⵍ ⴷ ⵓⵎⵓⵔ ⴰⵎⴻⵇⵔⴰⵏ ⵙⴻⴳ ⵢⵉⴳⴻⵏⵙⴰⵙⴻⵏ ⴰⵢ ⴷ-ⵢⴻⵍⵀⴰⵏ ⵙ ⵢⵉⵔⵉⵔⵉ ⵏ ⵓⵔⴽⴰⴷ ⴷ ⵍⵄⴰⴼⵢⴰ ⴷⴻⴳ ⵜⴻⵎⵏⴰⴹⵜ-ⴰ ⵙ ⵓⵇⴰⴷⴻⵔ ⵏ ⵍⴻⵡⵚⴰⵢⴰⵜ ⵏ ⵓⵙⴻⵍⵡⴰⵢ ⵏ ⵜⴻⴳⴷⵓⴷⴰ.
ⵎⴰⵙⵙ ⵙⴻⵍⵍⴰⵍ ⵉⵡⴻⴽⴽⴻⴷ-ⴷ ⵉ ⵢⵉⴳⴻⵏⵙⴰⵙⴻⵏ ⵏ ⵜⵎⴻⵜⵜⵉ ⵏ ⵜⴻⵎⵏⴰⴹⵜ-ⴰ ⴷ ⴰⴽⴽⴻⵏ ⴰⵡⴰⵏⴰⴽ (ⴷⴷⵓⵍⴰ) ⵉⵄⴻⵡⵡⴻⵍ ⴰⴽⴽⴻⵏ ⴰⴷ ⵢⴻⴳ ⴰⵢⴻⵏ ⵉⵡⴰⵜⴰⵏ ⵉ ⵜⵓⵇⵇⵍⴰ ⵍⵄⴰⴼⵢⴰ ⴷ ⵓⵎⵙⴻⴼⵀⴰⵎ ⴳⴰⵔ ⵎⴻⴷⴷⴻⵏ ⴷⴻⴳ ⵜⵡⵉⵍⴰⵢⵜ ⵏ ⵜⵖⴻⵔⴷⴰⵢⵜ.
