ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵜⵉⵖⵉⵏ ⵏ ⵜⵏⴻⵣⴷⵓⵖⵜ ⵜⴰⵏⵎⴻⵜⵜⵉⵜ: ⴰⴷ ⴷ-ⵢⴻⴼⴼⴻⵖ ⵍⵇⴰⵏⵓⵏ ⴰⵔⴰ ⵢⴻⵙⵙⵉⴼⴻⵙⵙⴻⵏ ⵜⵉⵖⵉⵏ

ⵍⴻⵣⵣⴰⵢⴻⵔ – ⴰⴷ ⴷ-ⵢⴻⴼⴼⴻⵖ, ⵙⴻⴳ-ⴰ ⵖⴻⴼ ⵙⵏⴰⵜ ⵏ ⵍⴻⴷⵡⴰⵕ, ⵢⵉⵡⴻⵏ ⵏ ⵍⵇⴰⵏⵓⵏ ⴰⵔⴰ ⵢⴻⵙⵙⵉⴼⴻⵙⵙⴻⵏ ⵜⵉⵙⴻⴽⴽⵉⵔⵉⵏ ⵜⵉⴷⴻⴱⵍⴰⵏⵉⵏ ⵉ ⵍⵎⴻⵏⴷ ⵏ ⵜⵉⵖⵉⵏ ⵏ ⵜⵏⴻⵣⴷⵓⵖⵉⵏ ⵜⵉⵏⵎⴻⵜⵜⵉⵢⵉⵏ ⵢⴻⵍⵍⴰⵏ ⵡⴰⵢⵍⴰ ⵏ ⵓⵡⴰⵏⴰⴽ (ⴷⴷⵓⵍⴰ) ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴰⵙⵙ ⵏ ⵍⴻⵅⵎⵉⵙ ⴷⴻⴳ ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ ⵓⵏⴻⵖⵍⴰⴼ ⵏ ⵜⵏⴻⵣⴷⵓⵖⵜ ⴷ ⵓⵀⴻⵢⵢⵉ ⵏ ⵜⴻⵎⴷⵉⵏⵜ, ⴰⴱⴷⴻⵍⵎⴰⴷⵊⵉⴷ ⵜⴻⴱⴱⵧⵓⵏⴻ. « ⵜⴰⵎⵀⴻⵍⵜ ⵏ ⵓⵙⵙⴻⵏⵣⵉ ⵏ ⵜⵏⴻⵣⴷⵓⵖⵜ ⵜⴰⵏⵎⴻⵜⵜⵉⵜ ⵢⴻⵍⵍⴰⵏ ⴷ ⴰⵢⵍⴰ ⵏ ⵓⵡⴰⵏⴰⴽ ⵜⴻⴱⴷⴰ-ⴷ ⴷⴻⴳ 2004. ⵙⴻⴳ ⴳⴰⵔ 600.000 ⵏ ⵜⵏⴻⵣⴷⵓⵖⵉⵏ ⴰⵢ ⴷ-ⵢⴻⵔⵙⴻⵏ ⵖⴻⵔ ⵓⵙⵙⴻⵏⵣⵉ, ⴰⵍⴰ 120.000 ⴰⵢ ⵢⴻⵏⵣⴰⵏ ⴰⵔ ⴰⵙⵙ-ⴰ. ⵙ ⵡⴰⵢⴰ, ⴰⴷ ⴷ-ⵢⴻⴼⴼⴻⵖ ⵍⵇⴰⵏⵓⵏ ⴰⵔⴰ ⵉⵙⴻⵔⵔⵃⴻⵏ ⵜⴰⴳⵏⵉⵜ-ⴰ ⵉⵙⴻⴱⴽⴻⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵎⴰⵙⵙ ⵜⴻⴱⴱⵧⵓⵏⴻ ⴷⴻⴳ ⵢⵉⵡⴻⵜ ⵏ ⵜⴻⵔⵣⵉⵏ ⵏ ⵓⵙⵙⴻⴼⵇⴻⴷ ⵏ ⵢⵉⵙⴻⵏⴼⴰⵔⴻⵏ ⵏ ⵍⴻⴱⵏⵉ ⵏ ⵜⵏⴻⵣⴷⵓⵖⵓⵜ ⴷⴻⴳ ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ.

ⴷⴻⴳ ⵟⵓⴱⴻⵔ ⵏ 2014 ⴰⵢ ⴷ-ⵉⵅⴻⴱⴱⴻⵔ ⵢⴰⴳⵉ ⵎⴰⵙⵙ ⵜⴻⴱⴱⵧⵓⵏⴻ ⴷⴻⴳ ⵓⴳⵔⴰⵡ ⴰⵖⴻⵔⴼⴰⵏ ⴰⵖⴻⵍⵏⴰⵡ ⴷ ⴰⴽⴽⴻⵏ ⵍⵇⴰⵏⵓⵏ-ⴰ ⴰⴷ ⴷ-ⵢⴻⵜⵜⵡⴰⵅⴷⴻⵎ. « ⵍⵇⴰⵏⵓⵏ-ⴰ ⵢⴻⵜⵜⵡⴰⵇⴱⴻⵍ ⵉⴹⴻⵍⵍⵉ (ⵍⴰⵕⴻⴱⵄⴰ) ⴷⴻⴳ ⵓⵙⴻⵇⵇⴰⵎⵓ ⵏ ⵓⵏⴰⴱⴰⴹ, ⵢⴻⵔⵏⴰ ⴰⵜⴰⵏ ⵉⵎⵉⵔ-ⴰ ⴷⴻⴳ ⵜⵏⴰⵔⵉⵜ (ⵍⴱⵉⵔⵓ) ⵏ ⵓⵏⴻⵖⵍⴰⴼ ⴰⵎⴻⵏⵣⵓ ⴰⴽⴽⴻⵏ ⴰⴷ ⵢⴻⵜⵜⵡⴰⵙⵜⴻⵏⵢⵉ. ⴰⴷ ⴷ-ⵢⴻⴼⴼⴻⵖ ⴷⴻⴳ ⵓⵖⵎⵉⵙ ⵓⵏⵚⵉⴱ ⵙⴻⴳ-ⴰ ⵖⴻⴼ ⵙⵏⴰⵜ ⵏ ⵍⴻⴷⵡⴰⵕ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ.

« ⵎⵉ ⴰⵔⴰ ⵢⴻⵜⵜⵡⴰⵙⵙⴻⴼⵄⴻⵍ ⵍⵇⴰⵏⵓⵏ-ⴰ, ⴰⵎⴷⴰⵏ ⴰⵢ ⵢⴻⴱⵖⴰⵏ ⴰⴷ ⴷ-ⵢⴰⵖ ⵜⴰⵏⴻⵣⴷⵓⵖⵜ ⵢⴻⵣⵎⴻⵔ ⴰⴷ ⵢⴻⵙⵙⵓⵜⴻⵔ ⵙⵔⵉⴷ ⵉ ⵧⵒⴳⵉ (ⵜⴰⵏⴰⵔⵉⵜ ⵏ ⵓⵙⵎⴰⵍ ⴷ ⵓⵙⵙⴻⴼⵔⴻⴽ ⴰⵚⵓⴽⴰⵏ). ⵧⵒⴳⵉ ⴰⴷ ⵜⵇⴻⵢⵢⴻⵎ ⵜⴰⵏⴻⵣⴷⵓⵖⵜ-ⵏⵏⵉ ⴰⵇⴻⵢⵢⴻⵎ ⴰⵎⴻⵣⵡⴰⵔⵓ ⵙⴰⴽⴽⴻⵏ ⴰⴷ ⵜⴻⴼⴽ ⵉⴽⴰⵔⴰⵎⴻⵏ ⵖⴻⵔ ⵢⵉⵎⴻⵥⵍⴰ ⵏ ⵡⴰⴽⴰⵍ ⴰⴽⴽⴻⵏ ⴰⴷ ⵇⴻⵢⵢⵎⴻⵏ ⴰⵅⵅⴰⵎ-ⵏⵏⵉ ⴰⵇⴻⵢⵢⴻⵎ ⴰⵏⴻⴳⴳⴰⵔⵓ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵙⵙⴻⴼⵀⴻⵎ.

ⵎⴰⵙⵙ ⵜⴻⴱⴱⵧⵓⵏⴻ ⵉⴳⴻⵔ-ⴷ ⵜⵉⵖⵔⵉ ⵉ ⵢⵉⵖⴻⵔⵎⴰⵏⴻⵏ ⴰⵢ ⵢⴻⴱⵖⴰⵏ ⴰⴷ ⴷ-ⴰⵖⴻⵏ ⵉⵅⵅⴰⵎⴻⵏ-ⵏⵙⴻⵏ ⴰⴽⴽⴻⵏ « ⴰⴷ ⴼⴰⵕⵙⴻⵏ ⵜⴰⴳⵏⵉⵜ-ⴰ » ⵓⵇⴱⴻⵍ ⵜⴳⴰⵔⴰ ⵏ ⴷⵓⵊⴻⵎⴱⴻⵕ 2015, ⴰⵛⴽⵓ ⵜⴰⵎⵀⴻⵍⵜ-ⴰ (ⴰⵢ ⴷ-ⵢⴻⵍⵍⴰⵏ ⵢⴰⴳⵉ ⵙⵏⴰⵜ ⵏ ⵜⵉⴽⴽⴰⵍ) ⵓⵔ ⴷ-ⵜⴻⵜⵜⵡⴰⵄⴰⵡⴰⴷ ⴰⵔⴰ ⴷⴻⴼⴼⵉⵔ ⵜⴰⵍⵍⵉⵜ-ⴰ.

ⴰⵏⴻⵖⵍⴰⴼ ⵏ ⵜⵏⴻⵣⴷⵓⵖⵜ ⵉⵄⴰⵡⴻⴷ ⵢⴻⵙⴷⵓⵇⵇⴻⵙ-ⴷ ⵜⴰⵎⵀⴻⵍⵜ ⵏ ⵓⵙⵙⴻⵏⵣⵉ ⵏ ⵜⵏⴻⵣⴷⵓⵖⵉⵏ ⵏ ⵧⵒⴳⵉ ⴷⴻⴳ 2013, ⴷ ⵜⴰⵎⵀⴻⵍⵜ ⴰⵢ ⴷ-ⵢⴻⴱⴷⴰⵏ ⵢⴰⴳⵉ ⴷⴻⴳ 2004 ⵢⴻⵔⵏⴰ ⴷ ⵜⵉⵏ ⴰⵢ ⵢⴻⴵⴵⴰⵏ ⵉⴽⴻⵔⵔⴰⵢⴻⵏ ⵏ ⵜⵏⴻⵣⴷⵓⵖⵉⵏ-ⴰ ⴰⴷ ⴷ-ⴰⵖⴻⵏ ⵜⵉⵏⴻⵣⴷⵓⵖⵉⵏ-ⵏⵙⴻⵏ, ⵢⴻⵔⵏⴰ ⵜⴰⵎⵀⴻⵍⵜ-ⴰ ⵜⴻⵜⵜⴰⴵⴰ ⴰⴽⴻⵔⵔⴰⵢ ⴰⴷ ⴷ-ⵢⴰⵖ ⴰⵅⵅⴰⵎ ⵙ ⵔⵔⵅⴰ ⵢⴻⵔⵏⴰ ⴰⴷ ⵉⵅⴻⵍⵍⴻⵚ ⵙ ⵍⵖⴻⵔⴹ-ⵏⵏⴻⵙ.

ⴰⵎⴹⴰⵏ ⵏ ⵜⵏⴻⵣⴷⵓⵖⵉⵏ ⴰⵢ ⵢⴻⵔⵣⴰ ⵡⴰⵢⴰ ⵢⵓⵡⴻⴹ ⵖⴻⵔ ⵡⴰⵣⴰⵍ ⵏ 571.000, ⵢⴻⵔⵏⴰ ⴰⴷ ⵜⴻⵏ-ⵢⴻⵙⵙⴻⵏⵣ ⵓⵡⴰⵏⴰⴽ ⵙ ⵙⵙⵓⵎⴰ ⵔⵅⵉⵙⴻⵏ ⵎⵍⵉⵃ.