ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵉⴽⴻⵎⵎⴻⵍ ⵓⵏⵇⴰⵙ ⵏ ⵡⴰⴵⴰⵡ ⵏ ⵢⵉⵙⴰⴼⴰⵔⴻⵏ ⴷⴻⴳ ⵓⵣⴳⴻⵏ ⴰⵎⴻⵣⵡⴰⵔⵓ ⵏ 2015

ⵍⴻⵣⵣⴰⵢⴻⵔ – ⵜⴰⴼⴰⵜⵓⵕⵜ ⵏ ⵢⵉⵙⴰⴼⴰⵔⴻⵏ ⵜⴻⵏⵇⴻⵙ-ⴷ ⵖⴻⵔ 842,124 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⴷⵓⵍⴰⵕⴻⵏ ⴷⴻⴳ ⵓⵣⴳⴻⵏ ⴰⵎⴻⵣⵡⴰⵔⵓ ⵏ 2015, ⵢⵉⵍⵉ ⴰⵙⴻⴳⴳⴰⵙ ⵢⴻⵣⵔⵉⵏ ⴷⴻⴳ ⵜⴰⵍⵍⵉⵜ-ⵏⵏⵉ, ⵍⴷⵣⴰⵢⴻⵔ ⵜⵓⴵⴻⵡ-ⴷ 1,2 ⴷ ⴰⵎⴻⵍⵢⴰⵕ ⵏ ⵢⵉⴷⵓⵍⴰⵕⴻⵏ.ⵙ ⵡⴰⵢⴰ, ⴰⴵⴰⵡ ⵏ ⵢⵉⵙⴰⴼⴰⵔⴻⵏ ⵢⴻⵏⵇⴻⵙ-ⴷ ⵙ 30,05% ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⵜⴻⴷⵡⴰⵏⵜ ⵜⴰⴷⵣⴰⵢⵔⵉⵜ ⵉ ⵜⵏⴻⴳⴳⴰ ⵏ ⵢⵉⵙⴰⵍⴰⵏ ⵏ ⵍⴷⵣⴰⵢⴻⵔ.

ⵓⵍⴰ ⴷ ⵜⴰⵙⵎⴻⴽⵜⴰ ⵏ ⵢⵉⵙⴰⴼⴰⵔⴻⵏ ⴰⵢ ⴷ-ⵢⴻⵜⵜⵡⴰⴵⵡⴻⵏ ⵜⴻⵏⵇⴻⵙ, ⵉⵎⵉ 13.434 ⵏ ⵢⵉⵟⵓⵏⴻⵏ ⴰⵢ ⴷ-ⵢⴻⵜⵜⵡⴰⴵⵡⴻⵏ ⴷⴻⴳ 6 ⵏ ⵡⴰⵢⵢⵓⵔⴻⵏ ⵉⵎⴻⵣⵡⵓⵔⴰ ⵏ ⵓⵙⴻⴳⴳⴰⵙ-ⴰ, ⵢⵉⵍⵉ ⴷⴻⴳ ⵜⴰⵍⵍⵉⵜ-ⴰ ⵏ ⵓⵙⴻⴳⴳⴰⵙ ⵢⴻⵣⵔⵉⵏ ⵜⵜⵡⴰⴵⵡⴻⵏ-ⴷ 13.958 ⵏ ⵢⵉⵟⵓⵏⴻⵏ (ⴷ ⴰⵏⵇⴰⵙ ⵏ 3,75%) ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵡⴰⵎⵎⴰⵙ ⴰⵖⴻⵍⵏⴰⵡ ⵏ ⵜⵙⴻⵏⵙⴻⵍⴽⵉⵎⵜ ⴷ ⵜⴰⴷⴷⴰⴷⴰⵏⵉⵏ ⵏ ⵜⴻⴷⵡⴰⵏⵜ (ⵛⵏⵉⵛ).

ⴰⵏⵇⴰⵙ-ⴰ ⵏ ⵡⴰⴵⴰⵡ ⵢⴻⴱⴷⴰ-ⴷ ⵙⴻⴳ ⵜⴰⵣⵡⴰⵔⴰ ⵏ ⵓⵙⴻⴳⴳⴰⵙ-ⴰ, ⵢⴻⵔⵏⴰ ⵢⴻⵔⵣⴰ ⴰⴽⴽ ⵍⴻⵚⵏⴰⴼ ⵏ ⵢⵉⵙⴰⴼⴰⵔⴻⵏ, ⵍⴰⴷⵖⴰ ⵉⵙⴰⴼⴰⵔⴻⵏ ⵏ ⵓⴷⴰⵡⵉ ⵏ ⵢⵉⵎⴷⴰⵏⴻⵏ (95% ⵙⴻⴳ ⵢⵉⵙⴰⴼⴰⵔⴻⵏ ⴰⵢ ⴷ-ⵢⴻⵜⵜⵡⴰⴵⴰⵡⴻⵏ).

ⵜⴰⴼⴰⵜⵓⵕⵜ ⵏ ⵢⵉⵙⴰⴼⴰⵔⴻⵏ ⵏ ⵢⵉⵎⴷⴰⵏⴻⵏ ⵜⴻⵙⵇⴰⵎ-ⴷ 799,33 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⴷⵓⵍⴰⵕⴻⵏ (12.280 ⵏ ⵢⵉⵟⵓⵏⴻⵏ) ⵢⵉⵍⵉ ⵉⵍⵉⵏⴷⵉ ⴷⴻⴳ ⵜⴰⵍⵍⵉⵜ-ⵏⵏⵉ, ⵜⴻⵙⵇⴰⵎ-ⴷ ⵜⴼⴰⵜⵓⵕⵜ 1,15 ⴷ ⴰⵎⴻⵍⵢⴰⵕ ⵏ ⵢⵉⴷⵓⵍⴰⵕⴻⵏ (13.061 ⵏ ⵢⵉⵟⵓⵏⴻⵏ) (ⴷ ⴰⵏⵇⴰⵙ ⵏ 31%).

ⵉⴼⴰⵔⵉⵙⴻⵏ ⵉⵣⵓⵏⵙⴰⴼⵔⴰⵏⴻⵏ ⵙⵇⴰⵎⴻⵏ-ⴷ ⴰⵙⴻⴳⴳⴰⵙ-ⴰ 27,81 ⵏ ⵢⵉⵎⴻⵍⵢⵓⵏⴻⵏ ⵢⵉⵍⵉ ⴷⴻⴳ ⵓⵣⴳⴻⵏ ⴰⵎⴻⵣⵡⴰⵔⵓ ⵏ ⵢⵉⵍⵉⵏⴷⵉ ⵙⵇⴰⵎⴻⵏ-ⴷ 33,47 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⴷⵓⵍⴰⵕⴻⵏ, ⴷⵖⴰ ⵏⴻⵇⵙⴻⵏ-ⴷ ⵙ 17%.

ⵎⴰ ⴷ ⵉⵙⴰⴼⴰⵔⴻⵏ ⵏ ⵢⵉⵖⴻⵔⵙⵉⵡⴻⵏ ⵜⴻⵏⵇⴻⵙ-ⴷ ⵜⴼⴰⵜⵓⵕⵜ-ⵏⵙⴻⵏ ⵖⴻⵔ 14,97 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⴷⵓⵍⴰⵕⴻⵏ ⵢⵉⵍⵉ ⵉⵍⵉⵏⴷⵉ, ⴷⴻⴳ ⵜⴰⵍⵍⵉⵜ-ⵏⵏⵉ, ⵙⵇⴰⵎⴻⵏ-ⴷ 15,29 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⴷⵓⵍⴰⵕⴻⵏ (ⴷ ⴰⵏⴷⴰⵇ ⵏ 2,09%).

ⵉ ⵓⵙⵎⴻⴽⵜⵉ, ⵜⴰⴼⴰⵜⵓⵕⵜ ⵏ ⵢⵉⵙⴰⴼⴰⵔⴻⵏ ⵜⴻⵙⵇⴰⵎ-ⴷ 2,6 ⵏ ⵢⵉⵎⴻⵍⵢⴰⵕⴻⵏ ⵏ ⵢⵉⴷⵓⵍⴰⵕⴻⵏ ⴷⴻⴳ 2014 ⵢⴻⵔⵏⴰ ⵜⴻⵔⵏⴰ 10,44% ⵖⴻⴼ ⵍⴻⵃⵙⴰⴱ ⵏ 2013.