ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⴼⴰⵍⴻⵙⵟⵉⵏ: ⵉⵙⵕⴰⵢⵉⵍⵉⵢⴻⵏ ⴱⵖⴰⵏ ⴰⴷ ⴷ-ⴱⵔⵓⵏ ⵉ ⵢⵉⵡⴻⵏ ⵏ ⵓⵎⴻⵃⴱⵓⵙ ⵍⴻⵎⵎⴻⵔ ⴰⴷ ⵉⴼⴰⴽ ⴰⵙⵓⵏⴷⴻⴷ-ⵏⵏⴻⵙ ⵏ ⵍⴰⵥ
ⵔⴰⵎⴰⵍⵍⴰⵀ (ⴼⴰⵍⴻⵙⵟⵉⵏ) – ⵜⴰⵙⴻⵇⵇⴰⵎⵓⵜ ⵏ ⵢⵉⵎⴻⵃⴱⴰⵙ ⵉⴼⴰⵍⴻⵙⵟⵉⵏⵉⵢⴻⵏ ⵜⴻⵏⵏⴰ-ⴷ ⴰⵙⵙ ⵏ ⵍⴰⵕⴻⴱⵄⴰ ⴷ ⴰⴽⴽⴻⵏ ⵛⵛⵕⴻⵄ ⴰⵄⵍⴰⵢⴰⵏ ⵉⵙⵕⴰⵢⵉⵍⵉ ⵢⴻⵙⵙⵓⵎⴻⵔ-ⴷ ⴰⴷ ⴷ-ⵢⴻⴱⵔⵓ ⵉ ⵓⵎⴻⵃⴱⵓⵙ ⴰⴼⴰⵍⴻⵙⵟⵉⵏⵉ ⵎⵧⵀⴰⵎⴻⴷ ⴰⵍⵍⴰⵏ ⵍⴻⵎⵎⴻⵔ ⴰⴷ ⵢⴻⵇⴱⴻⵍ ⴰⴷ ⵢⴻⵃⴱⴻⵙ ⴰⵙⵓⵏⴷⴻⴷ-ⵏⵏⴻⵙ ⵏ ⵍⴰⵥ. ⵎⴰ ⵢⴻⵍⵍⴰ ⵓⵍⴰⵛ « ⴰⵎⵙⴻⴼⵀⴰⵎ » ⵖⴻⴼ ⵡⴰⵢⴰ, ⴰⵏⴰⴱⴰⴹ ⵉⵙⵕⴰⵢⵉⵍⵉ ⵢⴻⵣⵎⴻⵔ ⴰⴷ ⵢⴻⵙⵙⴻⵞⵞ ⵎⴰⵙⵙ ⴰⵍⵍⴰⵏ ⴱⴻⵙⵙⵉⴼ, ⵢⴻⵔⵏⴰ ⵙ ⵡⴰⵢⴰ, ⴰⴷ ⵢⴻⵙⵙⴻⴼⵄⴻⵍ ⵉ ⵜⵉⴽⴽⴻⵍⵜ ⵜⴰⵎⴻⵣⵡⴰⵔⵓⵜ ⵢⵉⵡⴻⵏ ⵏ ⵍⵇⴰⵏⵓⵏ ⴰⵢ ⵢⴻⵜⵜⵡⴰⵙⵄⴻⴷⴷⴰⵏ ⴷⴻⴳ ⵜⴳⴰⵔⴰ ⵏ ⵢⵓⵍⵢⵓ ⴰⴽⴽⴻⵏ ⴰⴷ ⴼⵔⵓⵏⵜ ⵜⴻⴳⵏⴰⵜⵉⵏ ⴰⵎ ⵜⵉ. ⴰⵏⴰⴱⴰⴹ ⵉⵙⵕⴰⵢⵉⵍⵉ ⵢⴻⵙⵙⵓⵎⴻⵔ-ⴷ ⴰⵙⵙ ⵏ ⵍⴻⵜⵏⵉⵢⴻⵏ ⴰⴷ ⴷ-ⵢⴻⴱⵔⵓ ⵉ ⵎⴰⵙⵙ ⴰⵍⵍⴰⵏ ⵍⴻⵎⵎⴻⵔ ⴰⴷ ⵢⴻⵇⴱⴻⵍ ⴰⴷ ⵢⴻⵜⵜⵡⴰⵏⴼⵓ ⵙⴻⴳ ⵜⵎⵓⵔⵜ-ⵏⵏⴻⵙ 4 ⵏ ⵢⵉⵙⴻⴳⴳⴰⵙⴻⵏ. ⵉⴱⵓⴳⴰⵟⵓⵜⴻⵏ-ⵏⵏⴻⵙ ⵓⴳⵉⵏ ⴰⵢⴰ ⴷⴻⴳ ⵜⴻⴳⵏⵉⵜ ⴷⴻⴳ ⵢⴻⵍⵍⴰ ⴰⵍⵍⴰⵏ ⵎⴰⵣⴰⵍ-ⵉⵜ ⴷⴻⴳ ⵍⴽⵓⵎⴰ, ⵢⴻⵔⵏⴰ ⵎⵉ ⴷ-ⵢⵓⴽⵉ, ⵓⵍⴰ ⴷ ⵏⴻⵜⵜⴰ ⵢⵓⴳⵉ ⴰⵢⴰ. ⵎⴰⵙⵙ ⴰⵍⵍⴰⵏ ⴷ ⴰⴱⵓⴳⴰⵟⵓ ⵏ 31 ⵏ ⵢⵉⵙⴻⴳⴳⴰⵙⴻⵏ, ⵢⴻⵣⴷⴻⵖ ⴷⴻⴳ ⵏⴰⴱⵍⵓⵙ, ⴷⴻⴳ ⵓⴳⴰⴼⴰ ⵏ ⵓⴳⴻⵎⵎⴰⴹ ⵓⵜⵔⵉⵎ ⵢⴻⵜⵜⵡⴰⴹⴹⴼⴻⵏ, ⵢⴻⵔⵏⴰ ⵜⴰⵍⵓⴼⵜ-ⵏⵏⴻⵙ ⵜⴻⵊⴱⴻⴷ-ⴷ ⵍⵡⴻⵍⵀⴰ ⵏ ⵡⴰⴽⴽ ⵉⴼⴰⵍⴻⵙⵟⵉⵏⵉⵢⴻⵏ. ⴰⵍⵍⴰⵏ ⵢⴻⵖⵍⵉ ⴷⴻⴳ ⵍⴽⵓⵎⴰ ⴷⴷⵓⵕⵜ ⵢⴻⵣⵔⵉⵏ, ⵢⴻⵔⵏⴰ ⵎⵉ ⴷ-ⵢⵓⴽⵉ ⴰⵙⵙ ⵏ ⵜⵜⵍⴰⵜⴰ, ⵢⴻⴼⴽⴰ ⵉ ⵉⵙⵕⴰⵢⵉⵍ 24 ⵏ ⵜⵙⴰⵄⵜⵉⵏ ⴰⴽⴽⴻⵏ ⴰⴷ ⴰⵙ-ⴼⵔⵓⵏ ⵜⴰⵍⵓⴼⵜ-ⵏⵏⴻⵙ, ⵎⴰ ⵓⵍⴰⵛ, ⴰⴷ ⵢⴰⴳⵉ ⴰⴷ ⵉⵙⴻⵡ ⵓⵍⴰ ⴷ ⴰⵎⴰⵏ. ⵙ ⵡⴰⵢⴰ, ⴰⵎⴻⵃⴱⵓⵙ-ⴰ ⴰⵢ ⵢⴻⵄⵢⴰⵏ ⵎⵍⵉⵃ, ⵢⴻⵣⵎⴻⵔ ⴰⴷ ⵢⴰⵡⴻⴹ ⵖⴻⵔ ⵜⵎⴻⵜⵜⴰⵏⵜ.
ⴰⵙⵙ ⵏ 3 ⵡⴻⵎⴱⴻⵕ ⴷ ⴰⵣⴻⵎⵣ ⴷⴻⴳ ⴰⵔⴰ ⵉⴼⴰⴽ ⵓⵃⴱⴰⵙ ⴰⴷⴻⴱⵍⴰⵏ ⵏ ⵎⵧⵀⴰⵎⵎⴻⴷ ⴰⵍⵍⴰⵏ. ⴰⴱⵓⴳⴰⵟⵓ-ⴰ ⵢⴻⵍⵍⴰ ⵢⴻⴽⴽⴰⵜ ⵎⴳⴰⵍ ⴰⵃⴱⴰⵙ-ⴰ ⴰⴷⴻⴱⵍⴰⵏ ⴰⵎⴻⵙⴱⴰⵟⵍⵉ, ⵢⴻⵔⵏⴰ ⵖⴻⴼ ⵡⴰⵢⴰ ⴰⵢ ⵢⴻⵜⵜⵡⴰⵃⴱⴻⵙ ⵏⴻⵜⵜⴰ ⵙ ⵜⵉⵎⵎⴰⴷ-ⵏⵏⴻⵙ ⴷⴻⴳ ⵡⴻⵎⴱⴻⵕ ⵏ 2014. ⴰⵙⵙ ⵏ 18 ⵢⵓⵏⵢⵓ, ⵢⴻⴱⴷⴰ ⴰⵙⵓⵏⴷⴻⴷ-ⵏⵏⴻⵙ ⵏ ⵍⴰⵥ. ⴰⵃⴱⴰⵙ ⴰⴷⴻⴱⵍⴰⵏ ⴷ ⵡⵉⵏ ⴷⴻⴳ ⵉⴷⵓⴱⴰ ⵉⵙⵕⴰⵢⵉⵍⵉⵢⴻⵏ ⵜⵜⴰⴹⴹⴰⴼⴻⵏ ⴰⵎⴷⴰⵏ ⴰⵎⴻⵛⴽⵓⴽ ⵡⴰⵔ ⵎⴰ ⵏⵏⴰⵏ-ⴰⵙ ⴷ ⴰⵛⵓ ⵏ ⴷⴷⴻⵏⴱ ⴰⵢ ⵉⴳⴰ, ⵢⴻⵔⵏⴰ ⴰⵃⴱⴰⵙ-ⴰ ⵢⴻⵙⵄⴰ 6 ⵏ ⵡⴰⵢⵢⵓⵔⴻⵏ, ⵎⴰⵛⴰ ⵜⴰⵍⵍⵉⵜ-ⵏⵏⴻⵙ ⵜⴻⵜⵜⵡⴰⵄⴰⵡⴰⴷ ⵡⴰⵔ ⵜⵉⵍⵉⵙⴰ. ⵉⴼⴰⵍⴻⵙⵟⵉⵏⵉⵢⴻⵏ ⵓⴳⵉⵏ ⴰⵃⴱⴰⵙ-ⴰ ⴰⴷⴻⴱⵍⴰⵏ ⵉⵎⵉ ⴰⵢ ⴷ-ⵢⴻⵍⵍⴰ ⵎⴳⴰⵍ ⵢⵉⵣⴻⵔⴼⴰⵏ ⵏ ⵍⵍⵙⴰⵙ ⵢⴻⵔⵏⴰ ⴰⵃⴱⴰⵙ-ⴰ ⴷ ⵢⵉⵡⴻⵜ ⵙⴻⴳ ⵜⵖⴰⵡⵙⵉⵡⵉⵏ ⵜⵉⵎⴻⵇⵔⴰⵏⵉⵏ ⴰⵢⵖⴻⴼ ⴷ-ⵜⵜⵛⴻⵜⴽⵉⵏ. ⴷⴻⴼⴼⵉⵔ ⵜⵓⵎⵎⵖⵉⵡⵉⵏ ⵜⵉⵏⴻⴳⴳⵓⵔⴰ ⵏ ⵉⵙⵕⴰⵢⵉⵍ, 340 ⵏ ⵢⵉⴼⴰⵍⴻⵙⵟⵉⵏⵉⵢⴻⵏ ⴰⵢ ⵢⴻⵜⵜⵡⴰⴹⴹⴼⴻⵏ ⴷⴻⴳ ⵓⵃⴱⴰⵙ ⴰⴷⴻⴱⵍⴰⵏ, ⵖⴻⴼ ⵍⴻⵃⵙⴰⴱ ⵏ ⵢⵉⵎⴻⵥⵍⴰ (ⵙⵙⵔⴰⴱⴻⵙ) ⵏ ⵍⴻⵃⴱⴰⵙ ⵉⵙⵕⴰⵢⵉⵍⵉⵢⴻⵏ. ⴰⵟⴰⵙ ⵏ ⵢⵉⵎⴻⵃⴱⴰⵙ ⵉⴼⴰⵍⴻⵙⵟⵉⵏⵉⵢⴻⵏ ⴰⵢ ⵉⴳⴰⵏ ⴰⵙⵓⵏⴷⴻⴷ ⵏ ⵍⴰⵥ ⵖⴻⴼ ⵙⵙⴻⴱⴱⴰ-ⴰ. ⵉ ⵓⵙⵎⴻⴽⵜⵉ, ⵜⴰⴳⵏⵉⵜ ⴰⵜⵜⴰⵏ ⵖⴻⴼ ⵙⵙⴻⴱⴱⴰ ⴽⴰⵏ ⴰⵢ ⵜⴻⵍⵍⴰ ⴷⴻⴳ ⴼⴰⵍⴻⵙⵟⵉⵏ ⴷⴻⴼⴼⵉⵔ ⵎⴰ ⵢⴻⵎⵎⵓⵜ ⵢⵉⵡⴻⵏ ⵏ ⵓⵍⵓⴼⴰⵏ ⴰⴼⴰⵍⴻⵙⵟⵉⵏⵉ ⴷ ⴱⴰⴱⴰ-ⵙ ⴷⴻⴳ ⵢⵉⵡⴻⵜ ⵏ ⵜⵓⵎⵎⵖⴰ ⴰⵢ ⴳⴰⵏ ⵢⵉⵎⵀⴰⵔⵙⴻⵏ ⵉⵙⵕⴰⵢⵉⵍⵉⵢⴻⵏ ⴷⴻⴳ 31 ⵢⵓⵍⵢⵓ.
