ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⴰⵏⵇⴰⵙ ⵏ ⵙⵙⵓⵎⴰ ⵏ ⵓⵒⵉⵜⵕⵓⵍ: ⵓⵔ ⵃⴻⴱⴱⵙⴻⵏ ⴰⵔⴰ ⵢⵉⵙⴻⵏⴼⴰⵔⴻⵏ ⵏ ⵓⵃⵔⵉⵛ ⵏ ⵜⴻⵥⵡⴻⵔⵜ

ⴱⵓⵎⴻⵔⴷⴰⵙ – ⴰⵖⵍⵉⴼ ⵏ ⵜⴻⵥⵡⴻⵔⵜ, ⵙⴰⵍⴰⵀ ⴽⵀⴻⴱⵔⵉ, ⵢⴻⵏⵏⴰ-ⴷ ⴰⵙⵙ ⵏ ⵍⴻⵅⵎⵉⵙ ⴷⴰⴽⴽⴻⵏ ⵉⵙⴻⵏⴼⴰⵔⴻⵏ ⴰⵢ ⵢⴻⵇⵇⵏⴻⵏ ⵖⴻⵔ ⵓⵃⵔⵉⵛ-ⵏⵏⴻⵙ ⵓⵔ ⵃⴻⴱⴱⵙⴻⵏ ⴰⵔⴰ ⵖⴻⴼ ⵍⴵⴰⵍ ⵏ ⵓⵏⵇⴰⵙ ⵏ ⵙⵙⵓⵎⴰ ⵏ ⵓⵒⵉⵜⵕⵓⵍ, ⴰⵎ ⵡⴰⴽⴽⴻⵏ ⴰⵢ ⴷ-ⵢⴻⵔⵏⴰ ⴷⴰⴽⴽⴻⵏ ⵍⵎⴻⴵⵀⵓⴷ ⴰⵢ ⵍⴰ ⴷ-ⵢⴻⵜⵜⵉⵍⵉⵏ ⵉ ⵓⵙⵙⵉⵡⴻⴹ ⵏ ⵜⴻⵥⵡⴻⵔⵜ (ⵜⵔⵉⵙⵉⵜⵉ ⴷ ⵍⴳⴰⵣ) ⵉ ⵎⴻⴷⴷⴻⵏ ⴰⴷ ⵉⴽⴻⵎⵎⴻⵍ.

« ⵡⴰ (ⵜⴰⵥⵡⴻⵔⵜ) ⴷ ⴰⵃⵔⵉⵛ ⴰⵙⵓⴷⴷⵙⴰⵏ ⴰⵢ ⵢⴻⵙⵄⴰⵏ ⴰⵣⴰⵍ ⴷⴻⴳ ⵜⵎⴻⴷⴷⵓⵔⵜ ⵏ ⵎⴻⴷⴷⴻⵏ ⵢⴻⵔⵏⴰ ⵓⵔ ⵉⵃⴻⴱⴱⴻⵙ ⴰⵔⴰ. ⵏⴻⵎⴳⴰⵍ, ⴰⵇⵍ-ⴰⵖ ⵍⴰ ⵏⵄⴻⵔⵔⴻⴹ ⴰⴷ ⵏⴻⵙⵏⴻⴼⵍⵉ ⵉⵙⴻⵏⴼⴰⵔⴻⵏ ⴰⵢ ⵢⴻⵙⵙⴻⴼⴽⴻⵏ ⴰⴽⴽⴻⵏ ⴰⴷ ⵜⵇⴰⴱⴻⵍ ⴰⵙⵙⵓⵜⴻⵔ ⴰⵢ ⵍⴰ ⵉⵔⴻⵏⵏⵓⵏ ⵙⵖⵓⵔ ⵢⵉⵎⴻⵣⴷⴰⵖⴻⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵎⴰⵙⵙ ⴽⵀⴻⴱⵔⵉ ⵉ ⵢⵉⵏⴻⵖⵎⴰⵙⴻⵏ ⴷⴻⴳ ⵜⴳⴰⵔⴰ ⵏ ⵢⵉⵡⴻⵜ ⵏ ⵜⴻⵔⵣⵉ ⵏ ⵓⵙⵙⴻⴼⵇⴻⴷ ⵏ ⵜⴷⵓⵎⵚⵓⴽⵉⵡⵉⵏ ⵏ ⵜⴻⵥⵡⴻⵔⵜ ⴷⴻⴳ ⵜⵡⵉⵍⴰⵢⵜ ⵏ ⴱⵓⵎⴻⵔⴷⴰⵙ.

ⴷⵉⵎⴰ ⴷⴻⴳ ⵜⴻⵎⵙⴰⵍⵜ-ⴰ, ⵢⴻⵏⵏⴰ-ⴷ ⵓⵏⴻⵖⵍⴰⴼ ⴷⴰⴽⴽⴻⵏ ⵜⴰⴳⵔⴰⵡⵜ ⵏ ⵙⵧⵏⴻⵍⴳⴰⵣ ⵜⵜⵓⵏⴻⴼⴽⴻⵏ-ⴰⵙ-ⴷ ⵢⵉⴷⵔⵉⵎⴻⵏ ⴷ ⵉⵎⴻⵇⵔⴰⵏⴻⵏ ⴰⴽⴽⴻⵏ ⴰⴷ ⴷ-ⵜⴻⵙⵙⴻⴱⴷⴻⴷ ⵜⵉⵣⴻⵎⵎⴰⵔ ⴰⵢ ⵢⴻⵙⵙⴻⴼⴽⴻⵏ ⵏ ⵜⵔⵉⵙⵉⵜⵉ ⴷ ⵍⴳⴰⵣ ⵉ ⵓⵇⴰⴱⴻⵍ ⵏ ⵡⴰⵢⴻⵏ ⵃⵡⴰⴵⴻⵏ ⵢⵉⵎⴻⵣⴷⴰⵖⴻⵏ ⴷⴻⴳ ⵓⵃⵔⵉⵛ-ⴰ.

« ⵜⴰⴳⵔⴰⵡⵜ ⵏ ⵙⵧⵏⴻⵍⴳⴰⵣ ⵜⴻⵜⵜⵓⵏⴻⴼⴽ-ⴰⵙ ⵜⵊⴻⵍⵍⴰⴱⵜ ⵏ 2.200 ⵏ ⵢⵉⵎⴻⵍⵢⴰⵕⴻⵏ ⵏ ⵢⵉⴷⵉⵏⴰⵕⴻⵏ ⴰⴽⴽⴻⵏ ⴰⴷ ⴱⵏⵓⵏ ⵜⵉⵣⴻⵎⵎⴰⵔ ⴰⵢ ⵢⴻⵙⵙⴻⴼⴽⴻⵏ ⵉ ⵍⵎⴻⵏⴷ ⵏ ⵓⴼⴰⵔⴻⵙ, ⴰⵙⵙⵉⵡⴻⴹ ⴷ ⵓⴼⵔⴰⵇ ⵏ ⵜⵔⵉⵙⵉⵜⵉ ⴷ ⵍⴳⴰⵣ ⵉ ⵓⵇⴰⴱⴻⵍ ⵏ ⵓⵙⵙⵓⵜⴻⵔ ⴰⵖⴻⵍⵏⴰⵡ ⴷⴻⴳ ⵓⵏⵔⴰⵔ-ⴰ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵎⴰⵙⵙ ⴽⵀⴻⴱⵔⵉ.

« ⴰⵀⵉⵍ (ⵏ ⵜⵓⵇⵇⵏⴰ ⵖⴻⵔ ⵜⵔⵉⵙⵉⵜⵉ ⴷ ⵍⴳⴰⵣ) ⵎⴰⵣⴰⵍ ⵍⴰ ⵢⴻⵜⵜⴽⴻⵎⵎⵉⵍ, ⵢⴻⵔⵏⴰ ⵜⵉⵔⵣⵉⵡⵉⵏ-ⵏⵏⴻⵖ ⵖⴻⴼ ⵜⵡⵉⵍⴰⵢⵉⵏ ⵜⵜⴰⴵⴵⴰⵏⵜ-ⴰⵖ ⴰⴷ ⵏⵥⴻⵔ ⴷ ⴰⵛⵓ-ⵜⴻⵏ ⵡⵓⴳⵓⵔⴻⵏ ⵢⴻⵍⵍⴰⵏ (ⴷⴻⴳ ⵓⵏⵔⴰⵔ) », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ.

ⵏⵏⵉⴳ ⵡⴰⵢⴰ, ⵢⴻⵏⵏⴰ-ⴷ ⴷⴰⴽⴽⴻⵏ ⴽⵔⴰ ⵏ ⵢⵉⵎⴻⵣⴷⴰⵖⴻⵏ ⵓⵔ ⴱⵖⵉⵏ ⴰⵔⴰ ⴰⴷ ⴰⵙⴻⵏ-ⵙⵄⴻⴷⴷⵉⵏ ⵜⵜⴰⵡⵉⵍⴰⵜ ⵏ ⵓⵙⵙⵉⵡⴻⴹ ⵏ ⵜⴻⵥⵡⴻⵔⵜ (ⵜⵔⵉⵙⵉⵜⵉ ⴷ ⵍⴳⴰⵣ) ⵖⴻⴼ ⵡⴰⵢⵍⴰ-ⵏⵙⴻⵏ ⵢⴻⵔⵏⴰ ⴰⵢⴰ ⴷ ⴰⵄⴻⵡⵡⵉⵇ ⴰⵢ ⵎⴰⵣⴰⵍ ⵢⴻⵙⵙⴻⵡⵄⴰⵕ ⵜⵉⴷⴷⵉⵜ ⵏ ⵢⵉⵙⴻⵏⴼⴰⵔⴻⵏ ⴰⵢ ⵡⴻⵔⵄⴰⴷ ⴼⵓⴽⴻⵏ.

« ⵏⴳⴻⵔ ⵜⴰⵎⴰⵡⵜ ⴷⴰⴽⴽⴻⵏ ⵍⵍⴰⵏ ⴽⵔⴰ ⵏ ⵢⵉⵄⴻⵡⵡⵉⵇⴻⵏ ⴰⵢ ⵉⵃⴻⴱⵙⴻⵏ ⵜⵉⴷⴷⵉⵜ ⵏ ⵢⵉⵙⴻⵏⴼⴰⵔⴻⵏ ⴷⴻⴳ ⴽⵔⴰ ⵏ ⵜⵡⵉⵍⴰⵢⵉⵏ. ⴰⵎⵓⵔ ⴰⵎⴻⵇⵔⴰⵏ ⵙⴻⴳ ⵢⵉⵄⴻⵡⵡⵉⵇⴻⵏ-ⴰ ⴷ ⵡⵉⴷ ⵢⴻⵔⵣⴰⵏ ⵜⴰⴳⴰⵢⵜ ⵏ ⵢⵉⵎⴻⵣⴷⴰⵖⴻⵏ (ⴰⴽⴽⴻⵏ ⴰⴷ ⵄⴻⴷⴷⵉⵏ ⵜⵜⴰⵡⵉⵍⴰⵜ ⵖⴻⴼ ⵡⴰⵢⵍⴰ-ⵏⵙⴻⵏ », ⵖⴻⴼ ⵡⴰⴽⴽⴻⵏ ⴰⵢ ⵢⴻⵙⵃⴰⵙⵙⴻⴼ ⵓⵏⴻⵖⵍⴰⴼ.

ⵡⵉ ⴷ « ⵉⵖⴻⵔⵎⴰⵏⴻⵏ ⴰⵢ ⵢⴻⵙⵄⴰⵏ ⵜⵔⵉⵙⵉⵜⵉ ⴷ ⵍⴳⴰⵣ ⵎⴰⵛⴰ ⵓⵔ ⴵⴵⵉⵏ ⴰⵔⴰ ⵉⵖⴻⵔⵎⴰⵏⴻⵏ ⵏⵉⴹⴻⵏ ⵢⴻⵍⵍⴰⵏ ⴰⵎ ⵏⵉⵜⵏⵉ ⴰⴷ ⴷ-ⵙⴼⴰⵢⴷⵉⵏ ⵙⴻⴳ ⵜⴻⵥⵡⴻⵔⵜ, ⵢⴻⵔⵏⴰ ⴰⵢⴰ ⵎⴰⵛⵉ ⴷ ⵚⵚⵡⴰⴱ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ.

ⵉ ⴼⴻⵔⵔⵓ ⵏ ⵜⴻⵎⵙⴰⵍⵜ-ⴰ, ⵎⴰⵙⵙ ⴽⵀⴻⴱⵔⵉ ⵢⴻⵏⵏⴰ-ⴷ ⴷⴰⴽⴽⴻⵏ ⴰⵖⵍⵉⴼ-ⵏⵏⴻⵙ ⵍⴰ ⵉⵅⴻⴷⴷⴻⵎ ⵙ ⵓⵎⵄⴰⵡⴻⵏ ⵏ ⵢⵉⴷⵓⴱⴰ ⵉⴷⵉⴳⴰⵏⴻⵏ ⵏ ⵜⵡⵉⵍⴰⵢⵉⵏ ⴰⵢ ⵜⴻⵔⵣⴰ ⵜⴻⵎⵙⴰⵍⵜ.

« ⵍⴰ ⵏⵅⴻⴷⴷⴻⵎ ⴷ ⵢⵉⴷⵓⴱⴰ ⵉⴷⵉⴳⴰⵏⴻⵏ, ⵍⴰⴷⵖⴰ ⴷ ⵢⵉⵡⴰⵍⵉⵢⴻⵏ ⵏ ⵜⵡⵉⵍⴰⵢⵉⵏ ⴰⵢ ⵜⴻⵔⵣⴰ ⵜⴻⵎⵙⴰⵍⵜ ⴰⴽⴽⴻⵏ ⴰⴷ ⴽⴽⵙⴻⵏ ⴰⴽⴽ ⵉⵄⴻⵡⵡⵉⵇⴻⵏ ⵓⵔ ⵜⴻⵔⵔⵉ ⴰⵔⴰ ⵜⵎⴰⵔⴰ ⴰⴷ ⵉⵍⵉⵏ, ⵉⵎⵉ ⵡⵉ ⴷ ⵉⵄⴻⵡⵡⵉⵇⴻⵏ ⴰⵢ ⵉⵔⴻⴳⵍⴻⵏ ⴰⴱⵔⵉⴷ ⵉ ⵢⵉⵙⴻⵏⴼⴰⵔⴻⵏ ⵢⴻⵔⵏⴰ ⵣⴻⵎⵔⴻⵏ ⴰⴷ ⴷ-ⴳⵍⵓⵏ, ⴰⵣⴻⴽⴽⴰ, ⵙ ⵡⵓⴳⵓⵔ ⵏ ⵍⴻⵅⵚⴰⵚ ⵏ ⵓⵙⵙⵉⵡⴻⴹ (ⵏ ⵜⴻⵥⵡⴻⵔⵜ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ. ⴷⴻⴳ ⵜⴻⵔⵣⵉ-ⵏⵏⴻⵙ ⵖⴻⴼ ⴱⵓⵎⴻⵔⴷⴰⵙ, ⵢⴻⴷⴷⴰ ⵓⵏⴻⵖⵍⴰⴼ ⵏ ⵜⴻⵥⵡⴻⵔⵜ ⵖⴻⵔ ⵜⴻⵖⵙⴻⵔⵜ ⵏ ⵓⵙⵙⵉⵥⴻⴷ ⵏ ⵡⴰⵎⴰⵏ ⵏ ⵢⵉⵍⴻⵍ ⵏ ⵢⵉⵖⴻⴼ ⵏ ⵊⴻⵏⵏⴰⴷ (ⵛⴰⵒ ⴷⵊⵉⵏⴻⵜ) ⴰⵢ ⵉⴱⴻⵄⴷⴻⵏ 20 ⵏ ⵢⵉⴽⵉⵍⵓⵎⵉⵜⵔⴻⵏ ⵖⴻⴼ ⵜⴻⵎⴷⵉⵏⵜ ⵏ ⴱⵓⵎⴻⵔⴷⴰⵙ, ⴰⵎ ⵡⴰⴽⴽⴻⵏ ⴰⵢ ⴷ-ⵢⴻⵥⵔⴰ ⴰⵛⴰⵏⵟⵉ ⵏ ⵜⴻⵖⵙⴻⵔⵜ ⵜⴰⵎⴰⵢⵏⵓⵜ ⵏ ⵜⵔⵉⵙⵉⵜⵉ ⴰⵢ ⴷ-ⵢⴻⵣⴳⴰⵏ ⴷⴻⴳ ⵢⵉⵖⴻⴼ ⵏ ⵊⴻⵏⵏⴰⴷ.

ⴰⵙⵎⵉ ⴰⵔⴰ ⵜⴻⵔⵥⴻⵎ ⵜⴻⵖⵙⴻⵔⵜ-ⴰ ⴷⴻⴳ 2017, ⵙⵧⵏⴻⵍⴳⴰⵣ ⵜⴻⵏⵏⴰ-ⴷ ⴷⴰⴽⴽⴻⵏ ⴰⴷ ⵜⴻⵇⵇⴻⵍ ⴰⴷ ⴷ-ⵜⴻⵜⵜⴰⴽⴼ 1.131,1 ⵏ ⵢⵉⵎⵉⴳⴰⵡⴰⵟⴻⵏ ⵏ ⵜⵔⵉⵙⵉⵜⵉ ⵙ ⵜⴰⵍⵍⵓⵙⵜ ⵢⵓⴷⴷⵙⴻⵏ (ⵍⴳⴰⵣ ⴷ ⵢⵉⵔⴰⴳⴳⴻⵏ).

ⵜⴰⵍⵍⵓⵙⵜ-ⴰ ⴷ ⵜⵉⵏ ⴰⵢ ⴷ-ⵢⴻⵜⵜⴰⴽⴼⴻⵏ ⵜⵔⵉⵙⵉⵜⵉ ⵙ ⵓⵛⵓⵃⵃⵓ ⵉ 54% ⵙⴻⴳ ⵍⴳⴰⵣ ⴰⵢ ⵢⴻⵜⵜⵡⴰⵙⵙⴻⵅⴷⴰⵎⴻⵏ ⴷⴻⴳ-ⵙ, ⵖⴻⴼ ⵡⴰⴽⴽⴻⵏ ⴰⵢ ⴰⵖ-ⴷ-ⵙⴼⴻⵀⵎⴻⵏ.