ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⴼⴰⴱⵉⵓⵙ ⵢⴻⵔⵔⴰ ⵜⴰⵊⵎⵉⵍⵜ ⵉ ⵍⴻⵣⵣⴰⵢⴻⵔ ⵖⴻⴼ ⵓⵜⵜⴻⴽⴽⵉ-ⵏⵏⴻⵙ ⴷⴻⴳ ⴼⴻⵔⵔⵓ ⵏ ⵜⴰⵍⵓⴼⵜ ⵏ ⵎⴰⵍⵉ

ⵒⴰⵔⵉⵙ – ⴰⵏⴻⵖⵍⴰⴼ ⴰⴼⵕⴻⵏⵙⵉⵙ ⵏ ⵜⵖⴰⵡⵙⵉⵡⵉⵏ ⵏ ⵓⵣⵖⴰⵔ, ⵍⴰⵓⵔⴻⵏⵜ ⴼⴰⴱⵉⵓⵙ, ⵢⴻⵔⵔⴰ ⵜⴰⵊⵎⵉⵍⵜ ⴰⵙⵙ ⵏ ⵍⵃⴻⴷⴷ ⵉ ⵍⴻⵣⵣⴰⵢⴻⵔ ⵉⵎⵉ ⴰⵢ ⵜⵓⵔⴰⵔ ⴷⴷⵓⵕ ⴷ ⵓⵥⵡⵉⵔ ⴷⴻⴳ ⵜⴻⴱⴷⴰⵎⵎⴰⵙⵜ-ⵏⵏⴻⵙ ⵉ ⵓⵙⵙⵉⵡⴻⴹ ⵖⴻⵔ ⵓⵎⵜⴰⵡⴰ ⵏ ⵜⴰⵍⵡⵉⵜ ⴷ ⵓⵎⵙⵓⵖⴰⵍ ⴷⴻⴳ ⵎⴰⵍⵉ.

ⴷⴻⴳ ⵎⴰⵍⵉ, « ⵏⴻⴱⴷⴻⴷ ⵖⴻⵔ ⵢⵉⴷⵉⵙ ⵏ ⵍⵎⴻⴵⵀⵓⴷ ⵉ ⵍⵎⴻⵏⴷ ⵏ ⵜⴰⵍⵡⵉⵜ ⴳⴰⵔ ⵓⵏⴰⴱⴰⴹ ⴷ ⵜⴻⴳⵔⴰⵡⵉⵏ ⵏ ⵓⴳⴰⴼⴰ, ⴷ ⵍⵎⴻⴵⵀⵓⴷ ⴰⵢ ⵢⴻⵙⵙⴰⵡⴹⴻⵏ, ⵙ ⵥⵥⵡⴰⵔⴰ ⵏ ⵜⴻⴱⴷⴰⵎⵎⴰⵙⵜ ⵜⴰⴷⵣⴰⵢⵔⵉⵜ, ⵖⴻⵔ ⵓⵎⵜⴰⵡⴰ ⵏ ⵢⵓⵍⵢⵓ 2015 », ⵖⴻⴼ ⵡⴰⴽⴽⴻⵏ ⴰⵢ ⴷ-ⵉⵡⴻⴽⴽⴻⴷ ⴼⴰⴱⵉⵓⵙ ⴷⴻⴳ ⵢⵉⵡⴻⵏ ⵏ ⵢⵉⵏⴰⵡ ⴰⵢ ⴷ-ⵢⴻⵖⵔⴰ ⵉ ⵍⵎⴻⵏⴷ ⵏ ⵓⵅⵜⴰⵎ ⵏ ⴷⴷⵓⵕⵜ ⵏ ⵢⵉⵏⵎⵓⵀⴰⵍ.

ⴰⵏⴻⵖⵍⴰⴼ ⴰⴼⵕⴻⵏⵙⵉⵙ ⵏ ⵜⵖⴰⵡⵙⵉⵡⵉⵏ ⵏ ⵓⵣⵖⴰⵔ ⵢⴻⵛⴽⴻⵕ-ⴷ ⵢⴰⴳⵉ ⴰⵎⵜⴰⵡⴰ ⵏ ⵜⴰⵍⵡⵉⵜ ⴷ ⵓⵎⵙⵓⵖⴰⵍ ⴷⴻⴳ ⵎⴰⵍⵉ ⴰⵢ ⵜⴻⵙⵜⴻⵏⵢⴰ ⴰⵙⵙ ⵏ 20 ⵢⵓⵏⵢⵓ ⵜⵙⴻⵎⵢⵓⴷⴷⴻⵙⵜ ⵏ ⵢⵉⵎⵓⵙⵙⴰ ⵏ ⵓⵣⴰⵡⴰⴷ (ⵛⵎⴰ) ⴷⴻⴳ ⴱⴰⵎⴰⴽⵧ, ⴰⵎ ⵡⴰⴽⴽⴻⵏ ⴰⵢ « ⵉⵀⴻⵏⵏⴰ » ⵜⴰⴱⴷⴰⵎⵎⴰⵙⵜ ⵜⴰⴷⵣⴰⵢⵔⵉⵜ ⴷⴻⴳ ⵓⴽⴰⵍⴰ-ⵏⵏⵉ ⵏ ⵍⴻⵎⵛⴰⵡⵕⴰⵜ.

« ⵔⵔⵉⵖ ⵜⴰⵊⵎⵉⵍⵜ ⵉ ⵓⵄⴻⵡⵡⴻⵍ ⵏ ⵡⴰⴽⴽ ⵉⴷⵉⵙⴰⵏ ⵉⵎⴰⵍⵉⵢⴻⵏ ⵉ ⵍⵎⴻⵏⴷ ⵏ ⵓⵎⵙⵓⵖⴰⵍ ⴷ ⵓⵄⴰⵡⴻⴷ ⵏ ⵍⴻⴱⵏⵉ ⵏ ⵜⵎⵓⵔⵜ. ⴰⴷ ⵄⴰⵡⴷⴻⵖ ⴰⴷ ⵀⴻⵏⵏⵉⵖ ⴷⴰⵖ ⵜⴰⴱⴷⴰⵎⵎⴰⵙⵜ ⵜⴰⴷⵣⴰⵢⵔⵉⵜ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴷⴻⴳ ⵓⵙⵎⴻⵍ ⵓⵏⵚⵉⴱ ⵏ ⵓⵖⵍⵉⴼ ⵏ ⵜⵖⴰⵡⵙⵉⵡⵉⵏ ⵏ ⵓⵣⵖⴰⵔ ⴰⴽⴽⴻⵏ ⴽⴰⵏ ⴰⵢ ⵢⴻⵜⵜⵡⴰⵙⵜⴻⵏⵢⴰ ⵓⵎⵜⴰⵡⴰ-ⴰ.

ⵜⴰⵙⴻⵎⵢⵓⴷⴷⴻⵙⵜ ⵏ ⵢⵉⵎⵓⵙⵙⴰ ⵏ ⵓⵣⴰⵡⴰⴷ ⵓⵔ ⵜⴻⵙⵜⴻⵏⵢⴰ ⴰⵔⴰ ⴰⵎⵜⴰⵡⴰ-ⵏⵏⵉ ⵏ ⵜⴰⵍⵡⵉⵜ ⵏ ⵓⵎⵙⵓⵖⴰⵍ ⴷⴻⴳ ⵎⴰⵍⵉ ⴰⵔⵎⵉ ⴷ ⴰⵙⵙ ⵏ 20 ⵢⵓⵏⵢⵓ 2015, ⵎⴰ ⴷ ⴰⵏⴰⴱⴰⴹ ⴰⵎⴰⵍⵉ ⴷ ⵜⴻⴳⵔⴰⵡⵉⵏ ⵜⵉⵎⵙⴻⵍⵍⵃⵉⵏ ⵏ ⵜⵖⴻⵔⵖⴻⵔⵜ ⴷ ⵜⴻⵖⵍⴰⵎⵜ ⵏ ⵜⴻⴱⴷⴰⵎⵎⴰⵙⵜ ⵜⴰⴳⵔⴰⵖⵍⴰⵏⵜ ⴰⵢ ⵜⴻⵏⵀⴻⵕ ⵍⴻⵣⵣⴰⵢⴻⵔ ⵙⵜⴻⵏⵢⴰⵏ ⵢⴰⴳⵉ ⴰⵎⵜⴰⵡⴰ-ⴰ ⴰⵙⵙ ⵏ 15 ⵎⴰⵢⵓ.

ⴰⵙⵙ ⵏ 5 ⵢⵓⵏⵢⵓ, ⵔⵏⴰⵏ ⵙⵜⴻⵏⵢⴰⵏ ⵢⵉⴷⵉⵙⴰⵏ ⴰⵢ ⵢⴻⵜⵜⴻⴽⴽⴰⵏ ⴷⴻⴳ ⵍⴻⵎⵛⴰⵡⵕⴰⵜ ⵢⵉⵡⴻⵏ ⵏ ⵓⵕⴰⴱⵓⵍ ⵏ ⵜⴻⴳⵔⴰⵢⵉⵏ ⵏ ⵍⴻⵎⵛⴰⵡⵕⴰⵜ ⵖⴻⴼ ⵓⵙⵙⴻⴼⵄⴻⵍ ⵏ ⵓⵎⵜⴰⵡⴰ ⵏ ⵜⴰⵍⵡⵉⵜ ⴷ ⵓⵎⵙⵓⵖⴰⵍ ⴷⴻⴳ ⵎⴰⵍⵉ ⴷ ⵢⵉⵡⴻⵜ ⵏ ⵜⴻⴼⵜⴰⵔⵜ ⵖⴻⴼ ⵢⵉⵃⴻⵣⵣⵉⴱⴻⵏ ⵏ ⵜⵖⴻⵍⵍⵉⵙⵜ (ⵍⴰⵎⴰⵏ) ⴷⴻⴳ ⵓⴳⴰⴼⴰ ⵏ ⵎⴰⵍⵉ.

ⴰⴽⴽⴻⵏ ⴽⴰⵏ ⴰⵢ ⴷ-ⴱⴷⴰⵏⵜ ⵍⴻⵎⵛⴰⵡⵕⴰⵜ ⵜⵉⵎⴻⵣⵡⵓⵔⴰ (ⵓⵔ ⵢⴻⵍⵍⵉⵏ ⴷ ⵜⵓⵏⵚⵉⴱⵉⵏ) ⴳⴰⵔ ⵓⵏⴰⴱⴰⴹ ⴰⵎⴰⵍⵉ ⴷ ⵢⵉⵎⵓⵙⵙⴰ ⵉⵎⵙⴻⵍⵍⵃⴻⵏ ⵉ ⵓⵀⴻⵢⵢⵉ ⵏ ⵜⵖⴻⵔⵖⴻⵔⵜ ⵜⵓⵛⵔⵉⴽⵜ ⵏ ⵢⵉⵙⵙⵓⵜⵔⴻⵏ, ⴼⵕⴰⵏⵙⴰ ⵜⴻⴱⴷⴻⴷ ⵖⴻⵔ ⵢⵉⴷⵉⵙ ⵏ ⵍⴻⵎⵛⴰⵡⵕⴰⵜ-ⴰ ⵢⴻⵔⵏⴰ ⵜⴻⵙⵙⴻⴱⵖⴻⵙ-ⵉⵜⴻⵏⵜ.

ⵎⴰⵙⵙ ⴼⴰⴱⵉⵓⵙ ⵢⴻⵔⵔⴰ, ⵉ ⵍⵎⴻⵏⴷ ⵏ ⵡⴰⵢⴰ, ⵜⴰⵊⵎⵉⵍⵜ ⵉ ⵍⴻⵣⵣⴰⵢⴻⵔ ⴰⵢ ⵢⴻⵙⵙⴰⵡⴹⴻⵏ ⴰⴷ ⵜⴻⵙⵙⴻⵇⵏⴻⵄ ⴰⴽⴽ ⵉⴷⵉⵙⴰⵏ ⵉⵎⴰⵍⵉⵢⴻⵏ ⴰⴷ ⵡⴻⵎⵎⵕⴻⵏ, ⵙⴰⴽⴽⵉⵏ ⴰⴷ ⵙⵜⴻⵏⵢⵉⵏ ⴰⵎⵜⴰⵡⴰ-ⵏⵏⵉ.

« ⵔⵔⵉⵖ ⵜⴰⵊⵎⵉⵍⵜ ⵉ ⵍⴻⵣⵣⴰⵢⴻⵔ ⵖⴻⴼ ⵜⴻⴱⴷⴰⵎⵎⴰⵙⵜ-ⵏⵏⴻⵙ ⴰⵢ ⴷ-ⵢⴻⵡⵡⵉⵏ ⵍⴼⴰⵢⴷⴰ, ⴷ ⵜⵉⵏ ⴰⵢⵢⴻⵙ ⵜⴻⵙⴷⵓⴽⴽⴻⵍ ⴰⴽⴽ ⵉⴷⵉⵙⴰⵏ ⴰⴽⴽⴻⵏ ⴰⴷ ⵎⵙⴻⴼⵀⴰⵎⴻⵏ ⵖⴻⴼ ⵢⵉⵡⴻⵏ ⵏ ⵓⵎⵜⴰⵡⴰ ⴰⵢ ⵢⴻⴹⴹⴼⴻⵏ ⵜⴰⵍⴻⵎⵎⴰⵙⵜ ⵢⴻⵔⵏⴰ ⵢⴻⵍⵍⴰ-ⴷ ⵉ ⵏⵏⴼⴻⵄ ⵏ ⵜⵎⵓⵔⵜ (ⵏ ⵎⴰⵍⵉ) ⴷ ⵜⴻⵎⵏⴰⴹⵜ ⴰⵢ ⴷ-ⵢⴻⵣⵣⵉⵏ ⴼⴻⵍⵍ-ⴰⵙ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴷⴻⴳ ⵜⴻⵣⵡⴰⵔⴰ ⵏ ⵎⴻⵖⵔⴻⵙ ⵢⴻⵣⵔⵉⵏ, ⴷⴻⴳ ⵡⵓⵙⵙⴰⵏ-ⵏⵏⵉ ⴰⵢⴷⴻⴳ ⴰⵙⴻⵍⵡⴰⵢ ⴷ ⵓⵏⴰⴱⴰⴹ ⵏ ⵎⴰⵍⵉ ⵏⵏⴰⵏ-ⴷ ⴷ ⴰⴽⴽⴻⵏ ⵍⵍⴰⵏ ⵍⴰ ⵜⵜⴻⴷⴷⵓⵏ ⴰⴷ ⵡⴻⵎⵎⵕⴻⵏ ⴰⵎⵜⴰⵡⴰ-ⵏⵏⵉ ⵏ ⵜⴰⵍⵡⵉⵜ ⴷ ⵓⵎⵙⵓⵖⴰⵍ.