ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵜⴻⴱⴱⵧⵓⵏ: ⴰⵏⴻⵡⵡⴻⵄ ⴷⴻⴳ ⵍⴻⵚⵏⴰⴼ ⵏ ⵜⵏⴻⵣⴷⵓⵖⵉⵏ ⵢⴻⵙⵙⴰⴼⵙⴻⵙ ⵜⴰⵄⴽⴻⵎⵜ ⵏ ⵓⵙⵙⵓⵜⴻⵔ

ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – ⴰⵏⴻⵡⵡⴻⵄ ⴷⴻⴳ ⵍⴻⵚⵏⴰⴼ ⵏ ⵜⵏⴻⵣⴷⵓⵖⵜ (ⴰⴰⴷⵍ, ⵍⵒⵒ, ⴰⵜⴳ.) ⴷ ⴰⵢⴻⵏ ⴰⵢ ⵢⴻⴵⴵⴰⵏ ⴰⵙⵙⵓⵜⴻⵔ ⵏ ⵜⵏⴻⵣⴷⵓⵖⵜ ⴷⴻⴳ ⵍⴻⵣⵣⴰⵢⴻⵔ ⴰⴷ ⵢⵉⴼⵙⵓⵙ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴰⵙⵙ ⵏ ⵙⵙⴻⴱⵜ ⵓⵏⴻⵖⵍⴰⴼ ⵏ ⵜⵏⴻⵣⴷⵓⵖⵜ ⴷ ⵜⴻⵎⴷⵉⵏⵜ, ⴰⴱⴷⴻⵍⵎⴰⴷⵊⵉⴷ ⵜⴻⴱⴱⵧⵓⵏ.

ⴰⵀⵉⵍ (ⵍⴱⴻⵕⵏⴰⵎⴻⴵ) ⵏ ⵜⵏⴻⵣⴷⵓⵖⵜ ⵢⴻⵍⵍⴰⵏ ⴰⵙⵙ-ⴰ ⵓⵍⴰⵛ ⵡⵉⵏ ⴰⵢ ⵜ-ⵉⵛⵓⴱⴰⵏ, ⵢⴻⵔⵏⴰ « ⵉⵃⵓⵣⴰ-ⴷ ⴰⴽⴽ ⵉⵙⵡⵉⵔⴻⵏ ⵏ ⵜⵎⴻⵜⵜⵉ », ⴷⵖⴰ ⵖⴻⴼ ⵡⴰⵢⴰ ⴰⵢ ⴷ-ⵢⴻⵍⵍⴰ ⵍⴻⴱⵏⵉ ⵏ ⵜⵏⴻⵣⴷⵓⵖⵜ ⴰⵔⴰ ⴷ-ⵉⴽⴰⴼⵉⵏ ⵉ ⵢⴰⵍ ⵢⵉⵡⴻⵏ ⵙⴻⴳ ⵢⵉⵃⵔⵉⵛⴻⵏ ⵏ ⵜⵎⴻⵜⵜⵉ ⴰⵢ ⵍⴰ ⵢⴻⵙⵙⵓⵜⵓⵔⴻⵏ ⵜⴰⵏⴻⵣⴷⵓⵖⵜ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵎⴰⵙⵙ ⵜⴻⴱⴱⵧⵓⵏ ⴷⴻⴳ ⵢⵉⵡⴻⵜ ⵏ ⵜⴷⵉⵡⴻⵏⵏⵉⵜ ⴰⵢ ⵉⴳⴰ ⴷ ⵜⵏⴻⴳⴳⴰ ⵏ ⵢⵉⵙⴰⵍⴰⵏ ⵏ ⵍⴻⵣⵣⴰⵢⴻⵔ.

« ⵓⵍⴰⵛ ⴰⵃⵔⵉⵛ (ⵏ ⵜⵎⴻⵜⵜⵉ) ⵓⵔ ⴷ-ⵉⵃⵓⵣⴰ ⴰⵔⴰ ⵡⴰⵀⵉⵍ-ⴰ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵏⴻⵖⵍⴰⴼ, ⴰⵎ ⵡⴰⴽⴽⴻⵏ ⴰⵢ ⴷ-ⵢⴻⵙⵎⴻⴽⵜⵉ ⴷ ⴰⴽⴽⴻⵏ ⴰⵀⵉⵍ ⴰⵇⴱⵓⵔ ⵢⴻⵍⵍⴰ ⵢⴻⵍⵀⴰ-ⴷ ⴽⴰⵏ ⵙ ⵢⵉⵡⴻⵏ ⵏ ⵚⵚⴻⵏⴼ ⵏ ⵜⵏⴻⵣⴷⵓⵖⵜ, ⵢⴻⵔⵏⴰ ⵜⴰ ⴷ ⵜⴰⵏⴻⵣⴷⵓⵖⵜ ⵜⴰⵏⵎⴻⵜⵜⵉⵜ (ⵉⴵⵜⵉⵎⴰⵄⵉ).

ⵎⴰⵙⵙ ⵜⴻⴱⴱⵧⵓⵏ ⵢⴻⵏⵏⴰ-ⴷ ⴷ ⴰⴽⴽⴻⵏ ⵉⵙⴻⵏⴼⴰⵔⴻⵏ ⵏ ⵜⵏⴻⵣⴷⵓⵖⵜ ⴰⵢ ⵜⴻⵎⵎⴻⵕⴽⴰ ⴷⴷⵓⵍⴰ ⴰⴽⴽⴻⵏ ⴰⴷ ⵜⴻⵏ-ⵜⴻⴱⵏⵓ, ⵓⵔ ⵜⴻⵏ-ⵢⴻⵜⵜⵃⴰⵣ ⴰⵔⴰ ⵓⵏⵇⴰⵙ ⵏ ⵙⵙⵓⵎⴰ ⵏ ⵓⵒⵉⵜⵕⵓⵍ ⵢⴻⵔⵏⴰ ⴷⴷⵓⵍⴰ ⴰⴷ ⵜⴽⴻⵎⵎⴻⵍ ⴰⴷ ⵜⵅⴻⴷⴷⴻⵎ ⵉ ⵍⵎⴻⵏⴷ ⵏ ⵡⴰⵢⴰ.

ⴰⵏⴻⵖⵍⴰⴼ ⵏ ⵜⵏⴻⵣⴷⵓⵖⵜ ⵢⴻⴱⴷⴻⵔ-ⴷ ⴷⴰⵖ ⴰⵡⴰⵍ ⵏ ⵓⵙⴻⵍⵡⴰⵢ ⵏ ⵜⴻⴳⴷⵓⴷⴰ ⴰⵢ ⴷ-ⵢⴻⵏⵏⴰⵏ ⴷ ⴰⴽⴽⴻⵏ ⵍⵎⴻⴵⵀⵓⴷ ⴰⵢ ⵍⴰ ⵜⴻⵜⵜⴻⴳ ⴷⴷⵓⵍⴰ ⴷⴻⴳ ⵓⵃⵔⵉⵛ ⵏ ⵜⵏⴻⵣⴷⵓⵖⵜ « ⴰⴷ ⵉⴽⴻⵎⵎⴻⵍ ⵢⴻⵔⵏⴰ ⵓⵔ ⵉⵃⴻⴱⴱⴻⵙ ⴰⵔⴰ, ⴰⵎ ⵡⴰⴽⴽⴻⵏ ⵓⵔ ⵜ-ⵜⴻⵜⵜⵃⴰⵣ ⴰⵔⴰ ⵙⵙⵓⵎⴰ ⵏ ⵓⵒⵉⵜⵕⵓⵍ », ⴰⵎ ⵡⴰⴽⴽⴻⵏ ⴰⵢ ⴷ-ⵢⴻⵔⵏⴰ ⵎⴰⵙⵙ ⵜⴻⴱⴱⵧⵓⵏ ⴷ ⴰⴽⴽⴻⵏ ⵍⴻⵣⵣⴰⵢⴻⵔ ⵓⵔ ⵢⴻⵜⵜⵄⴰⵡⴰⴷ ⴰⵔⴰ ⴰⴷ ⴷ-ⵢⴻⴹⵔⵓ ⴷⴻⴳ-ⵙ ⵡⴰⵢⴻⵏ ⴰⵢ ⴷ-ⵢⴻⵍⵍⴰⵏ ⴷⴻⴳ 1991, ⴰⵙⵎⵉ ⴷⴷⵓⵍⴰ ⵜⴻⵔⵔⴰ-ⵜⵜ ⵜⵎⴰⵔⴰ ⴰⴷ ⵜⴻⵃⴱⴻⵙ ⴰⴽⴽ ⵉⵙⴻⵏⴼⴰⵔⴻⵏ ⵏ ⵍⴻⴱⵏⵉ ⵏ ⵜⵏⴻⵣⴷⵓⵖⵜ ⵖⴻⴼ ⵍⴵⴰⵍ ⵏ ⵜⴰⵍⵓⴼⵜ ⵏ ⵍⴻⵅⵚⴰⵚ ⵏ ⵢⵉⴷⵔⵉⵎⴻⵏ ⴰⵢ ⴷ-ⵢⴻⴱⴷⴰⵏ ⵙⴻⴳ ⵡⴰⵙⵎⵉ ⴰⵢ ⵢⴻⵖⵍⵉ ⵓⵒⵉⵜⵕⵓⵍ ⴷⴻⴳ 1986.

ⵖⴻⴼ ⵍⴻⵃⵙⴰⴱ ⵏ ⵎⴰⵙⵙ ⵜⴻⴱⴱⵧⵓⵏ, ⴷ ⴰⴱⴻⴷⴷⴻⵍ ⴰⵢ ⴷ-ⵢⴻⵍⵍⴰⵏ ⴷⴻⴳ ⵜⴷⴰⵎⵙⴰ ⵏ ⵜⵎⵓⵔⵜ ⴰⵢ ⵢⴻⵙⵙⴰⵡⴹⴻⵏ ⴰⴽⴽⴻⵏ ⵜⵉⴽⴻⴱⴱⴰⵏⵉⵢⵉⵏ ⵜⵓⵙⵍⵉⴳⵉⵏ (ⵍⴻⵒⵔⵉⵠⵉ) ⴰⴷ ⴹⴹⴼⴻⵏⵜ ⴰⵙⵙ-ⴰ 56% ⵙⴻⴳ ⵢⵉⵙⴻⵏⴼⴰⵔⴻⵏ ⵏ ⵍⴻⴱⵏⵉ ⵏ ⵜⵏⴻⵣⴷⵓⵖⵜ, ⵢⴻⵔⵏⴰ ⴷⴷⵓⵍⴰ ⵜⴻⵍⴽⴰ-ⴷ ⴰⵍⴰ ⵙ 8% ⵙⴻⴳ ⵍⴻⴱⵏⵉ ⵏ ⵜⵏⴻⵣⴷⵓⵖⵉⵏ.

ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⵍⴻⵅⵚⴰⵚ ⵏ ⵢⵉⵅⴻⴷⴷⴰⵎⴻⵏ ⴷⴻⴳ ⵓⵃⵔⵉⵛ ⵏ ⵍⴻⴱⵏⵉ ⵏ ⵜⴻⵏⵣⴷⵓⵖⵜ ⴷ ⵍⴻⴱⵏⵉ ⵙ ⵓⵎⴰⵜⴰ, ⵢⴻⵙⵃⴰⵙⵙⴻⴼ ⵎⴰⵙⵙ ⵜⴻⴱⴱⵧⵓⵏ ⵉⵎⵉ « ⵉⵍⴻⵎⵥⵉⵢⴻⵏ ⵇⵇⵍⴻⵏ ⵓⵔ ⵃⴻⵎⵎⵍⴻⵏ ⴰⵔⴰ ⴰⴷ ⵅⴻⴷⵎⴻⵏ ⴷⴻⴳ ⵍⴻⴱⵏⵉ ⴰⵢⴷⴻⴳ ⵢⴻⵙⵙⴻⴼⴽ ⴰⴷ ⴼⴽⴻⵏ ⵍⴻⵄⵜⴰⴱ ⵉ ⵢⵉⵎⴰⵏ-ⵏⵙⴻⵏ », ⴰⵎ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴷ ⴰⴽⴽⴻⵏ ⵜⵉⴼⵔⴰⵜ ⵏ ⵡⵓⴳⵓⵔ-ⴰ ⵏⴻⵜⵜⴰ ⴷ ⴰⵙⵙⴻⵇⴷⴻⵛ ⵏ ⵜⵜⴰⵡⵉⵍⴰⵜ ⵉⵎⴰⵢⵏⵓⵜⴻⵏ ⵏ ⵓⵅⴻⴷⴷⵉⵎ (ⵜⵉⵎⴰⵛⵉⵏⵉⵏ), ⴰⵎ ⵡⴰⴽⴽⴻⵏ ⴰⵢ ⵢⴻⵙⵙⴻⴼⴽ ⴰⴷ ⴳⴻⵏ ⵉⴼⴰⴷⴷⴻⵏ ⵉ ⵢⵉⵍⴻⵎⵥⵉⵢⴻⵏ ⴰⴽⴽⴻⵏ ⴰⴷ ⵍⴻⵎⴷⴻⵏ ⵚⵚⴻⵏⵄⴰ ⵢⴻⵔⵏⴰ ⴰⴷ ⵏⴰⴷⵉⵏ ⴰⵅⴻⴷⴷⵉⵎ ⴷⴻⴳ ⵢⵉⵃⵔⵉⵛⴻⵏ ⵏ ⵓⵙⵙⴻⴼⵇⴻⴷ ⴷ ⵓⴹⴼⴰⵔ ⵏ ⵢⵉⵙⴻⵏⴼⴰⵔⴻⵏ ⵉⵎⴻⵇⵔⴰⵏⴻⵏ.

ⴷⵖⴰ ⵢⴻⵙⵎⴻⴽⵜⵉ-ⴷ, ⵉ ⵍⵎⴻⵏⴷ ⵏ ⵡⴰⵢⴰ, ⵙ ⵍⴻⵄⵇⴻⴷ ⴰⵢ ⵢⴻⵙⵜⴻⵏⵢⴰ ⵓⵖⵍⵉⴼ ⵏ ⵜⵏⴻⵣⴷⵓⵖⵜ ⴷ ⵓⵖⵍⵉⴼ ⵏ ⵓⵙⵙⴻⵍⵎⴻⴷ ⵏ ⵚⵚⴻⵏⵄⴰⵜ ⴷⴻⴳ 2013 ⵉ ⵍⵎⴻⵏⴷ ⵏ ⵓⵙⵙⴻⵍⵎⴻⴷ ⵏ ⵚⵚⴻⵏⵄⴰ ⵉ 72.000 ⵏ ⵢⵉⵍⴻⵎⵥⵉⵢⴻⵏ ⴷⴻⴳ ⵚⵚⴻⵏⵄⴰⵜ-ⴰ, ⴳⴰⵔ-ⴰⵙⴻⵏ 42.000 ⵏ ⵢⵉⵍⴻⵎⵥⵉⵢⴻⵏ ⴰⵢ ⵢⴻⵖⵔⴰⵏ ⴷⴻⴳ 2014.

ⴰⵙⵓⵔⵉⴼ ⴰⵎ ⵡⴰ ⴰⴷ ⴷ-ⵢⴻⴳ ⴰⵟⴰⵙ ⵏ ⵢⵉⵎⵓⴽⴰⵏ ⵏ ⵓⵅⴻⴷⴷⵉⵎ ⵢⴻⵔⵏⴰ ⴰⴷ ⵢⴻⴵⴵ ⴰⵃⵔⵉⵛ ⵏ ⵍⴻⴱⵏⵉ ⵏ ⵜⵏⴻⵣⴷⵓⵖⵜ ⴰⴷ ⵢⴻⵇⵇⴻⵍ ⴷ ⵜⵜⴰⵡⵉⵍ ⴰⵎⴻⵇⵔⴰⵏ ⵉ ⵓⵙⵙⴻⵅⴷⴻⵎ ⵏ ⵎⴻⴷⴷⴻⵏ ⴷⴻⴳ ⵍⴻⵣⵣⴰⵢⴻⵔ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵏⴻⵖⵍⴰⴼ.

ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⴰⵙⴻⵏⴼⴰⵔ ⵏ ⵓⵏⴰⴱⴰⴹ (ⵍⵃⵓⴽⵓⵎⴰ) ⵉ ⵍⵎⴻⵏⴷ ⵏ ⵍⴻⴱⵏⵉ ⵏ ⵍⵍⵓⵣⵉⵏⴰⵜ ⴰⵔⴰ ⴷ-ⵢⴻⵜⵜⴳⴻⵏ ⵜⵉⵚⴼⵉⵃⵉⵏ ⵏ ⵓⴱⵉⵟⵓⵏ ⴰⵢⵢⴻⵙ ⴰⵔⴰ ⵜⵜⵡⴰⴱⵏⵓⵏⵜ ⵜⵏⴻⵣⴷⵓⵖⵉⵏ, ⵎⴰⵙⵙ ⵜⴻⴱⴱⵧⵓⵏ ⵢⴻⵏⵏⴰ-ⴷ ⴷ ⴰⴽⴽⴻⵏ ⴰⵏⴰⴱⴰⴹ ⵉⵀⴻⵢⵢⴰ-ⴷ ⵢⴰⴳⵉ « ⵓⵎⵓⵖ ⴰⵡⴻⵣⵍⴰⵏ » ⵏ ⵢⵉⵙⵎⴰⵡⴻⵏ ⵏ ⵜⴽⴻⴱⴱⴰⵏⵉⵢⵉⵏ ⵜⵉⴷⵣⴰⵢⵔⵉⵢⵉⵏ ⴷ ⵜⴱⴻⵕⵕⴰⵏⵉⵢⵉ ⴰⵢ ⵉⵅⴻⴷⴷⵎⴻⵏ ⴷⴻⴳ ⵓⵃⵔⵉⵛ-ⴰ ⵢⴻⵔⵏⴰ ⴰⴷ ⵜⵜⴻⴽⴽⵉⵏⵜ ⴷⴻⴳ ⵓⵙⴻⵏⴼⴰⵔ-ⴰ, ⴰⵎ ⵡⴰⴽⴽⴻⵏ ⴰⵢ ⴷ-ⵢⴻⵔⵏⴰ ⴷ ⴰⴽⴽⴻⵏ ⵉⵙⵎⴰⵡⴻⵏ ⵏ ⵜⴽⴻⴱⴱⴰⵏⵉⵢⵉⵏ-ⴰ ⴰⴷ ⴷ-ⵜⵜⵡⴰⴽⴻⵛⴼⴻⵏ ⴷⴻⴳ ⵜⴳⴰⵔⴰ ⵏ ⵡⴰⵢⵢⵓⵔ-ⴰ.