ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⴰⵙⵙⴻⵇⴷⴻⵛ ⵏ ⵢⵉⵙⴻⴵⵀⴰⴷⴻⵏ: 229 ⵏ ⵢⵉⵎⴰⵔⵉⵔⴻⵏ ⴰⵢ ⵢⴻⵜⵜⵡⴰⵙⴼⴻⵇⴷⴻⵏ
ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – 229 ⵏ ⵢⵉⵎⴰⵔⵉⵔⴻⵏ ⵏ ⵜⵛⵉⵔⵜ ⵏ ⵓⴹⴰⵔ ⴰⵢ ⵢⴻⵜⵜⵡⴰⵙⴼⴻⵇⴻⵏ ⵙⴻⴳ ⵡⴰⵙⵎⵉ ⴰⵢ ⴷ-ⵜⴻⴱⴷⴰ ⵜⵙⴻⵎⵀⵓⵢⵜ-ⴰ (ⵎⴰⵡⵙⵉⵎ) ⵖⴻⴼ ⵓⵙⵙⴻⵇⴷⴻⵛ ⵏ ⵢⵉⵙⴻⴵⵀⴰⴷⴻⵏ, ⵢⴻⵔⵏⴰ ⴱⴰⵏⴻⵏ-ⴷ 14 ⵏ ⵢⵉⵎⴰⵔⵉⵔⴻⵏ ⴰⵢⴷⴻⴳ ⵢⴻⵍⵍⴰ ⵛⵛⴻⴽ ⵢⴻⵔⵏⴰ ⵢⴻⵜⵜⴽⴻⵎⵎⵉⵍ ⴼⴻⵍⵍ-ⴰⵙⴻⵏ ⵓⵃⵜⴰⵛ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⴰⵙⵙ ⵏ ⵍⴰⵕⴻⴱⵄⴰ ⵜⴼⵉⴷⵉⵕⴰⵍⵉⵜ ⵜⴷⵣⴰⵢⵔⵉⵜ ⵏ ⵜⵛⵉⵔⵜ ⵏ ⵓⴹⴰⵔ.
« ⴳⴰⵔ 229 ⵏ ⵢⵉⵎⴰⵔⵉⵔⴻⵏ ⴰⵢ ⵢⴻⵜⵜⵡⴰⵙⴼⴻⵇⴷⴻⵏ, 2 ⵏ ⵢⵉⵎⴰⵔⵉⵔⴻⵏ ⴰⵢ ⴷ-ⵢⴻⵜⵜⵡⴰⴽⴻⵛⴼⴻⵏ ⵙⵇⴻⴷⵛⴻⵏ ⵉⵙⴻⴵⵀⴰⴷⴻⵏ, 14 ⴱⴰⵏⴻⵏ-ⴷ ⴼⴼⵖⴻⵏ ⵉ ⵍⴻⵄⵡⴰⵢⴻⴷ ⵢⴻⵔⵏⴰ ⵎⴰⵣⴰⵍ ⴰⴷ ⵉⴽⴻⵎⵎⴻⵍ ⵓⵙⵙⴻⴼⵇⴻⴷ-ⵏⵙⴻⵏ ⴷⴻⴳ ⵢⵉⵏⴻⴳⵎⵉ (ⵎⴰⵅⴱⴰⵔ) ⵏ ⴰⵎⴰ ⴰⴽⴽⴻⵏ ⴰⴷ ⵥⵔⴻⵏ ⵎⴰ ⵢⴻⵍⵍⴰ ⴰⵢⴻⵏ ⴰⵢ ⴷ-ⵓⴼⴰⵏ ⴷⴻⴳ ⵢⵉⴷⴰⵎⵎⴻⵏ-ⵏⵙⴻⵏ ⵢⵓⵙⴰ-ⴷ ⵙⴻⴳ ⵜⴼⴻⴽⴽⴰ-ⵏⵙⴻⵏ ⵏⴻⵖ ⵙⴻⴳ ⵜⵖⴰⵡⵙⴰ ⵜⴰⴱⴻⵕⵕⴰⵏⵉⵜ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⵜⴼⵉⴷⵉⵕⴰⵍⵉⵜ.
ⴰⵍⴻⵎⵎⴰⵙ ⴰⵎⴻⵏⵟⴰⴳ ⵏ ⵓⵙⵎ ⵍⴻⵣⵣⴰⵢⴻⵔ, ⵢⵧⵓⵙⵙⴻⴼ ⴱⴻⵍⴰⵉⵍⵉ, ⴷ ⵓⵍⴻⵎⵎⴰⵙ ⴰⵎⵃⴰⴷⴷⵉ ⵏ ⵔⵛ ⵍⴰⵕⴻⴱⵄⴰ, ⵔⴰⴼⵉⴽ ⴱⵧⵓⵙⵙⴰⵉⴷ, ⵓⴼⴰⵏ-ⵜⴻⵏ ⵙⵇⴻⴷⵛⴻⵏ ⵉⵙⴻⴵⵀⴰⴷⴻⵏ ⵢⴻⵔⵏⴰ ⵜⵜⵡⴰⵄⴰⵇⴱⴻⵏ ⵙ 4 ⵏ ⵢⵉⵙⴻⴳⴳⴰⵙⴻⵏ ⵏ ⵓⵃⴱⴰⵙ ⵏ ⵡⵓⵔⴰⵔ.
ⵙⴻⴳ ⵢⵉⴷⵉⵙ ⵏⵉⴹⴻⵏ, ⵜⴰⵙⴻⵇⵇⴰⵎⵓⵜ ⵜⴰⵙⵏⴰⵊⵢⴰⵏⵜ (ⵟⵉⴱⴱⵉⵢⵢⴰ) ⵏ ⵜⴼⵉⴷⵉⵕⴰⵍⵉⵜ ⴰⴷ ⵜⴻⴳ ⴰⵙⵙ ⵏ ⵍⴻⵜⵏⵉⵢⴻⵏ 19 ⵜⵓⴱⴻⵕ 2015 ⵢⵉⵡⴻⵏ ⵏ ⵓⵙⴰⵔⴰⴳ ⵖⴻⴼ ⵓⵙⵙⴻⴼⵇⴻⴷ ⵏ ⵓⵙⵙⴻⵇⴷⴻⵛ ⵏ ⵢⵉⵙⴻⴵⵀⴰⴷⴻⵏ ⴷⴻⴳ ⵡⴰⵎⵎⴰⵙ ⴰⵜⴻⴽⵏⵉ ⴰⵖⴻⵍⵏⴰⵡ ⵏ ⵜⴼⵉⴷⵉⵕⴰⵍⵉⵜ ⴷⴻⴳ ⵙⵉⴷⵉ ⵎⵓⵙⴰ, ⵢⴻⵔⵏⴰ ⴰⴷ ⵃⴻⴷⵕⴻⵏ ⴷⴻⴳ ⵓⵙⴰⵔⴰⴳ-ⴰ ⵢⵉⵎⵙⵓⵊⵊⵉⵢⴻⵏ ⴷ ⵢⵉⵏⴻⴷⴱⴰⵍⴻⵏ (ⵉⴷⴰⵔⵉⵢⵢⵉⵏ) ⵏ ⵜⴻⵖⵍⴰⵎⵉⵏ ⵏ ⵜⴻⵎⵖⵓⵏⵜ 1ⵓⵜ ⴷ ⵜⴻⵎⵖⵓⵏⵜ ⵜⵉⵙ 2.
ⴷⴰⵖ, ⵜⴰⵏⴰⵔⵉⵜ (ⵎⴰⴽⵜⴰⴱ) ⵜⴰⴼⵉⴷⵉⵕⴰⵍⵉⵜ ⵜⵡⴻⵚⵚⴰ-ⴷ, ⴷⴻⴳ ⵜⴻⵎⵍⵉⵍⵉⵜ-ⵏⵏⴻⵙ ⵜⴰⵏⴻⴳⴳⴰⵔⵓⵜ, ⴰⴷ ⴷ-ⵜⵜⵡⴻⴳ ⵜⵃⴻⵎⵍⴰ ⵏ ⵓⵙⵃⵓⵍⴼⵓ ⵏ ⵡⵉⴷ ⴰⵢ ⵉⵅⴻⴷⴷⵎⴻⵏ ⴷⴻⴳ ⵓⵃⵔⵉⵛ ⵏ ⵜⵛⵉⵔⵜ ⵏ ⵓⴹⴰⵔ ⴰⴽⴽⴻⵏ ⴰⴷ ⵃⴰⵕⴱⴻⵏ ⴰⵙⵙⴻⵇⴷⴻⵛ ⵏ ⵢⵉⵙⴻⴵⵀⴰⴷⴻⵏ.
