ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵜⴻⴱⴱⵓⵏ ⵉⴳⴻⵔ-ⴷ ⵜⵉⵖⵔⵉ ⵉ ⵢⵉⵛⴻⵏⵡⴰⵜⴻⵏ ⴰⴷ ⵙⵙⴻⴼⵜⵉⵏ ⴷⴻⴳ ⵍⵎⴰⵡⴰⴷⴷ ⵏ ⵍⴻⴱⵏⵉ ⴷⴻⴳ ⵍⴻⵣⵣⴰⵢⴻⵔ
ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – ⴰⴱⴷⴻⵍⵎⴰⴷⵊⵉⴷ ⵜⴻⴱⴱⵧⵓⵏⴻ, ⴰⵏⴻⵖⵍⴰⴼ ⵏ ⵜⵏⴻⵣⴷⵓⵖⵜ ⴷ ⵜⴻⵎⴷⵉⵏⵜ, ⵉⴳⴻⵔ-ⴷ ⵜⵉⵖⵔⵉ, ⴰⵙⵙ ⵏ ⵙⵙⴻⴱⵜ ⴷⴻⴳ ⵍⴷⵣⴰⵢⴻⵔ, ⵉ ⵜⴽⴻⴱⴱⴰⵏⵉⵢⵉⵏ ⵜⵉⵛⵉⵏⵡⴰⵜⵉⵏ ⴰⴽⴽⴻⵏ ⴰⴷ ⴷ-ⵔⵔⴻⵏⵜ ⵍⵡⴻⵍⵀⴰ-ⵏⵙⴻⵏⵜ ⵖⴻⵔ ⵢⵉⵙⴻⵏⴼⴰⵔⴻⵏ ⵓⵛⵔⵉⴽⴻⵏ ⴷ ⵜⴽⴻⴱⴱⴰⵏⵉⵢⵉⵏ ⵜⵉⴷⵣⴰⵢⵔⵉⵢⵉⵏ ⴰⴷ ⴷ-ⵉⵅⴻⴷⴷⵎⴻⵏ ⵜⵉⵏⴻⴳⵡⴰ (ⵎⴰⵡⴰⴷⴷ) ⵏ ⵍⴻⴱⵏⵉ.
ⴷⴻⴳ ⵢⵉⵡⴻⵜ ⵏ ⵜⴻⵎⵍⵉⵍⵉⵜ ⵏ ⵓⵎⴰⵀⵉⵍ ⴷ ⵓⵙⴻⵍⵡⴰⵢ ⵏ ⵓⵙⴻⵇⵇⴰⵎⵓ ⴰⵛⵉⵏⵡⴰⵜ ⵏ ⵓⵙⵎⴰⵍ (ⵜⴰⵔⵇⵉⵢⴰ) ⵏ ⵓⵎⵄⴰⵡⴻⵏ ⴰⵏⵥⵓⵍ-ⴰⵏⵥⵓⵍ, ⵎⴰⵙⵙ ⵍⵓ ⵅⵉⵏ ⵀⵓⴰ, ⵉⵄⴰⵡⴻⴷ ⵉⵡⴻⴽⴽⴻⴷ-ⴷ ⵓⵏⴻⵖⵍⴰⴼ ⴷⴰⴽⴽⴻⵏ ⵍⴷⵣⴰⵢⴻⵔ ⵜⴻⴹⴼⴻⵔ ⵜⴰⵙⴻⵔⵜⵉⵜ ⵏ ⵓⵙⵙⴻⵏⵇⴻⵙ ⵏ ⵡⴰⴵⴰⵡ ⵏ ⵙⵙⴻⵍⵄⴰ ⵙⴻⴳ ⵓⵣⵖⴰⵔ, ⵢⴻⵔⵏⴰ ⵜⴻⴽⴽⴰⵜ ⴰⴽⴽⴻⵏ ⴰⴷ ⵜⴻⴱⵏⵓ ⵜⵉⵏⴻⵣⴷⵓⵖⵉⵏ ⴰⵢⴷⴻⴳ 90% ⵙⴻⴳ ⵜⵏⴻⴳⵡⴰ ⵏ ⵍⴻⴱⵏⵉ ⵜⵜⵡⴰⵅⴻⴷⵎⴻⵏⵜ-ⴷ ⴷⴻⴳ ⵍⴷⵣⴰⵢⴻⵔ.
« ⵜⴰⵙⴻⵔⵜⵉⵜ-ⴰ ⵜⴰⵎⴰⵢⵏⵓⵜ ⵏ ⵍⴷⵣⴰⵢⴻⵔ ⵓⵔ ⵜⴻⴽⴽⵉⵙ ⴰⵔⴰ ⵉ ⵜⴽⴻⴱⴱⴰⵏⵉⵢⵉⵏ ⵜⵉⵛⵉⵏⵡⴰⵜⵉⵏ ⴰⴷ ⴳⴻⵏⵜ ⵉⵙⴻⵏⴼⴰⵔⴻⵏ ⵓⵛⵔⵉⴽⴻⵏ ⴷ ⵢⵉⴷⵣⴰⵢⵔⵉⵢⴻⵏ ⴰⴽⴽⴻⵏ ⴰⴷ ⴷ-ⵙⴼⴰⵢⴷⵉⵏⵜ ⵜⴽⴻⴱⴱⴰⵏⵉⵢⵉⵏ ⵜⵉⴷⵣⴰⵢⵔⵉⵢⵉⵏ ⵙⴻⴳ ⵜⵎⵓⵙⵙⵏⵉ ⴰⵢ ⵙⵄⴰⵏⵜ ⵜⵛⵉⵏⵡⴰⵜⵉⵏ ⴷⴻⴳ ⵓⵃⵔⵉⵛ ⵏ ⵍⴻⴱⵏⵉ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ.
ⴷⵖⴰ, ⴷⴻⴳ ⵜⴻⴳⵏⵉⵜ-ⴰ, ⵉⵡⴻⴽⴽⴻⴷ-ⴷ ⵎⴰⵙⵙ ⵜⴻⴱⴱⵧⵓⵏⴻ ⴷⴰⴽⴽⴻⵏ ⵍⴷⵣⴰⵢⴻⵔ ⵓⵔ ⵜⴻⵜⵜⴻⵃⵡⵉⴵⵉ ⴰⵔⴰ ⴰⴷ ⴷ-ⵜⴰⴵⴻⵡ ⴰⵙⵉⵎⴰⵏ ⵙⴻⴳ ⵓⵣⴳⴻⵏ ⵡⵉⵙ ⵙⵉⵏ ⵏ 2016 ⴷ ⴰⵙⴰⵡⴻⵏ, ⴰⵎ ⵡⴰⴽⴽⴻⵏ ⵓⵔ ⵜⴻⵜⵜⵓⵖⴰⵍ ⴰⵔⴰ ⴰⴷ ⴷ-ⵜⴰⴵⴻⵡ ⵓⵣⵣⴰⵍ ⵏ ⵍⴻⴱⵏⵉ ⵙⴻⴳ ⵓⵙⴻⴳⴳⴰⵙ ⴰⵢ ⴷ-ⵢⴻⵜⵜⴻⴷⵓⵏ ⴷ ⴰⵙⴰⵡⴻⵏ.
ⵢⴻⵙⵙⴰⵔⴻⵎ ⴷⴰⵖ, ⵎⴰⵙⵙ ⵜⴻⴱⴱⵧⵓⵏⴻ, ⴰⴷ ⴷ-ⵜⴻⵏⵏⵓⵍⴼⵓ ⵜⴻⵎⴳⵓⵔⵉ (ⵚⵚⵉⵏⴰⵄⴰ) ⵏ ⵜⵉⴷⴻⵜ ⵏ ⵍⴻⴱⵏⵉ ⵏ ⵜⵏⴻⵣⴷⵓⵖⵜ ⵢⴻⵔⵏⴰ ⵜⴰⵎⴳⵓⵔⵉ-ⴰ ⴰⴷ ⵜⴻⵙⵙⴻⵇⴷⴻⵛ ⵜⵜⴰⵡⵉⵍⴰⵜ ⵉⵎⴰⵢⵏⵓⵜⴻⵏ, ⴰⵎ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴷⴰⴽⴽⴻⵏ ⵉⵙⵡⵉ-ⴰ ⵣⴻⵎⵔⴻⵏⵜ ⴰⴷ ⵜⵜⴻⴽⴽⵉⵏⵜ ⴷⴻⴳ-ⵙ ⵜⴽⴻⴱⴱⴰⵏⵉⵢⵉⵏ ⵜⵉⵛⵉⵏⵡⴰⵜⵉⵏ ⵙ ⵓⵙⵙⵉⵍⴻⵖ (ⵜⴰⴽⵡⵉⵏ) ⵏ ⵢⵉⵅⴻⴷⴷⴰⵎⴻⵏ ⵉⵣⵣⴰⵢⵔⵉⵢⴻⵏ.