ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵢⴻⵎⵍⴰⵍ ⵙⴻⵍⵍⴰⵍ ⵉⵎⵉⵏⵉⴳⴻⵏ ⵉⴷⵣⴰⵢⵔⵉⵢⴻⵏ ⴷⴻⴳ ⵓⵣⵖⴰⵔ
ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – ⵢⴻⵎⵍⴰⵍ ⵓⵏⴻⵖⵍⴰⴼ ⴰⵎⴻⵏⵣⵓ, ⴰⴱⴷⴻⵍⵎⴰⵍⴻⴽ ⵙⴻⵍⵍⴰⵍ, ⴰⵙⵙ ⵏ ⵙⵙⴻⴱⵜ ⵢⵉⵡⴻⵜ ⵏ ⵜⵎⴰⴳⵍⴰ (ⵡⴰⴼⴷ) ⵏ ⵡⵓⴼⵔⵉⵏⴻⵏ ⴷ ⵡⵉⴷ ⵢⴻⵙⵙⴰⵡⴰⵍⴻⵏ ⵙ ⵢⵉⵙⴻⵎ ⵏ ⵢⵉⵎⵉⵏⵉⴳⴻⵏ ⵉⴷⵣⴰⵢⵔⵉⵢⴻⵏ ⴰⵢ ⵢⴻⵍⵍⴰⵏ ⴷⴻⴳ ⵓⵣⵖⴰⵔ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵢⵉⵡⴻⵏ ⵏ ⵍⴱⴰⵢⴰⵏ ⵏ ⵢⵉⵎⴻⵥⵍⴰ (ⵎⴰⵚⴰⵍⵉⵃ) ⵏ ⵓⵏⴻⵖⵍⴰⴼ ⴰⵎⴻⵏⵣⵓ.
ⴷⴻⴳ ⵓⵎⵢⴰⴳⴻⵔ-ⴰ, « ⵙⵙⴰⵡⵍⴻⵏ-ⴷ ⴽⵔⴰ ⵏ ⵢⵉⵙⴻⵍⵡⴰⵢⴻⵏ ⵏ ⵜⵉⴷⴷⵓⴽⵍⵉⵡⵉⵏ ⵖⴻⴼ ⵢⵉⵖⴻⴱⵍⴰⵏ-ⵏⵙⴻⵏ ⴷ ⵡⴰⵎⴻⴽ ⴰⵢ ⵍⴰ ⵜⵜⴻⴷⴷⵓⵏⵜ ⵜⵖⴰⵡⵙⵉⵡⵉⵏ ⵏ ⵢⵉⵎⵉⵏⵉⴳⴻⵏ ⵉⴷⵣⴰⵢⵔⵉⵢⴻⵏ ⵢⴻⵍⵍⴰⵏ ⴷⴻⴳ ⵓⵣⵖⴰⵔ. ⵉⴱⴰⵏ-ⴷ ⴷⴰⵖ ⴷ ⴰⴽⴽⴻⵏ ⵉⴷⵣⴰⵢⵔⵉⵢⴻⵏ ⴰⵢ ⵉⵣⴻⴷⵖⴻⵏ ⴷⴻⴳ ⵓⵣⵖⴰⵔ ⵓⴽⵉⵏ ⵎⵍⵉⵃ ⵙ ⵢⵉⵣⴻⵔⴼⴰⵏ ⴷ ⵍⵡⴰⵊⴻⴱ-ⵏⵙⴻⵏ ⴰⵎⴰ ⴷⴻⴳ ⵜⵎⵓⵔⵜ ⴰⵢⴷⴻⴳ ⴷⴷⵔⴻⵏ, ⴰⵎⴰ ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⵜⴰⵎⵓⵔⵜ-ⵏⵙⴻⵏ, ⴰⵎ ⵡⴰⴽⴽⴻⵏ ⴰⵢ ⴱⵖⴰⵏ ⴰⴷ ⵜⵜⴻⴽⴽⵉⵏ ⴷⴻⴳ ⵓⵙⵏⴻⴼⵍⵉ (ⵜⴰⵏⵎⵉⵢⴰ) ⵏ ⵜⵎⵓⵔⵜ-ⵏⵙⴻⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵍⴱⴰⵢⴰⵏ-ⴰ.
« ⴷⴻⴳ ⵜⵉⵏⴰⵡⵜ-ⵏⵏⴻⵙ (ⴽⴰⵍⵉⵎⴰ), ⵢⴻⵔⵏⴰ ⴷⴻⴼⴼⵉⵔ ⵎⴰ ⵢⴻⵔⵔⴰ ⵜⴰⵊⵎⵉⵍⵜ ⵉ ⵓⵜⵜⴻⴽⴽⵉ ⴰⵢ ⵍⴰ ⵉⵔⴻⵏⵏⵓⵏ ⵏ ⵢⵉⵎⵉⵏⵉⴳⴻⵏ ⴷⴻⴳ ⵓⵙⵙⴻⵍⵀⵓ ⵏ ⵓⵎⵛⵉⵡⴻⵕ ⵏ ⵍⴻⵣⵣⴰⵢⴻⵔ ⴷ ⵜⵎⵓⵔⴰ ⴰⵢⴷⴻⴳ ⴷⴷⵔⴻⵏ, ⵢⴻⵏⵏⴰ-ⴷ ⵓⵏⴻⵖⵍⴰⴼ ⴰⵎⴻⵏⵣⵓ ⴷ ⴰⴽⴽⴻⵏ ⵍⴻⵣⵣⴰⵢⴻⵔ ⵍⴰ ⵜⵅⴻⴷⴷⴻⵎ ⴰⴽⴽⴻⵏ ⴰⴷ ⵜⴻⵙⵙⴻⵍⵀⵓ ⴰⵙⵙⴰⵖⴻⵏ ⴷ ⵜⵎⵓⵔⴰ-ⴰ ⴷ ⵓⵎⴱⴰⴷⴷⴻⵍ ⴰⴷ ⴷ-ⵢⴻⴽⴽⴻⵏ ⵙⴻⴳ-ⵙⴻⵏ ⵉ ⵍⵎⴻⵏⴷ ⵏ ⵓⵙⵙⴻⵍⵀⵓ ⵏ ⵜⵓⴷⴻⵔⵜ ⵏ ⵢⵉⵎⵉⵏⵉⴳⴻⵏ ⵉⴷⵣⴰⵢⵔⵉⵢⴻⵏ ⴷⴻⴳ ⵡⴰⴽⴽ ⵉⵃⵔⵉⵛⴻⵏ ».
ⵉⵡⴻⴽⴽⴻⴷ-ⴷ ⴷⴰⵖ ⵓⵏⴻⵖⵍⴰⴼ ⴰⵎⴻⵏⵣⵓ ⴷ ⴰⴽⴽⴻⵏ ⵍⴻⵣⵣⴰⵢⴻⵔ « ⴰⴷ ⵜⴽⴻⵎⵎⴻⵍ ⴰⴷ ⴷ-ⵜⴻⵜⵜⴰⴷⴷⴰⵎ ⵉⵃⴻⵣⵣⵉⴱⴻⵏ ⵉ ⵓⵙⵙⴻⵍⵀⵓ ⵏ ⵜⴻⴳⵏⵉⵜ ⵏ ⵢⵉⵎⵉⵏⵉⴳⴻⵏ ⴷⴻⴳ ⵓⵣⵖⴰⵔ ⴷ ⵓⵙⵙⴻⵍⵀⵓ ⵏ ⵓⵎⵎⴰⴳⴻⵔ-ⵏⵙⴻⵏ ⴷⴻⴳ ⵍⴻⵣⵣⴰⵢⴻⵔ ».
ⵢⴻⵍⵍⴰ-ⴷ ⵓⵎⵎⴰⴳⴻⵔ-ⴰ ⵙ ⵓⵃⴷⴰⵕ ⵏ ⵢⵉⵎⴰⵙⵍⴰⴹⴻⵏ (ⴰⵄⴹⴰ’) ⵏ ⵓⵏⴰⴱⴰⴹ, ⵉⵎⴰⵣⴰⵏⴻⵏ ⴰⵢ ⴷ-ⵢⴻⵜⵜⴳⴻⵏⵙⵉⵙⴻⵏ ⵉⵎⵉⵏⵉⴳⴻⵏ ⴷⴻⴳ ⵓⵣⵖⴰⵔ ⴷ ⵢⵉⵎⴹⴻⴱⴱⵔⴻⵏ ⵏ ⴽⵔⴰ ⵏ ⵡⵓⴷⵓⵙⴻⵏ ⵉⵏⴰⴳⴷⵓⴷⴻⵏ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵔⵏⴰ ⵍⴱⴰⵢⴰⵏ-ⴰ.
