ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⴰⴱⵔⵉⴷ ⴰⵎⴰⵣⵣⴰⵍ ⴰⴳⵎⵓⴹ-ⴰⵜⴰⵔⴰⵎ: ⴰⴽⴽ ⵉⵃⵔⵉⵛⴻⵏ ⴰⴷ ⵔⴻⵥⵎⴻⵏ ⴷⴻⴳ ⴷⵓⵊⴻⵎⴱⴻⵕ

ⵜⵓⴱⵉⵔⴻⵜ – ⵢⴻⵏⵏⴰ-ⴷ ⵓⵏⴻⵖⵍⴰⴼ ⵏ ⵢⵉⵎⴰⵀⵉⵍⴻⵏ ⵉⵏⴰⴳⴷⵓⴷⴻⵏ (ⴰⵛⵖⴰⵍ ⵄⵓⵎⵓⵎⵉⵢⵢⴰ), ⴰⴱⴷⴻⵍⴽⴰⴷⴻⵔ ⵧⵓⴰⵍⵉ, ⴰⵙⵙ ⵏ ⵙⵙⴻⴱⵜ ⴷⴻⴳ ⵜⵓⴱⵉⵔⴻⵜ, ⴷ ⴰⴽⴽⴻⵏ ⴰⴽⴽ ⵉⵃⵔⵉⵛⴻⵏ ⵏ ⵓⴱⵔⵉⴷ ⴰⵎⴰⵣⵣⴰⵍ ⴰⴳⵎⵓⴹ-ⴰⵜⴰⵔⴰⵎ ⴰⴷ ⵔⴻⵥⵎⴻⵏ ⵉ ⵜⵉⴷⴷⵉⵜ « ⵙⴻⴳ-ⴰ ⵖⴻⵔ ⵜⴳⴰⵔⴰ ⵏ ⴷⵓⵊⴻⵎⴱⴻⵕ ⴰⵢ ⴷ-ⵢⴻⵜⵜⴻⴷⴷⵓⵏ », ⵎⴻⵏⵖⵉⵔ ⵜⴰⵎⵏⴰⴹⵜ-ⵏⵏⵉ ⴰⵢⴷⴻⴳ ⴷ-ⵉⵡⴻⵜ ⵓⵙⵢⴰⵅ ⴷⴻⴳ ⴷⵊⴻⴱⴰⵀⵉⴰ (ⵜⵓⴱⵉⵔⴻⵜ) ⴰⵏⴷⴰ ⴰⵢ ⵎⴰⵣⴰⵍ ⵍⴰ ⵢⴻⵜⵜⴽⴻⵎⵎⵉⵍ ⵓⵅⴻⴷⴷⵉⵎ ⵏ ⵓⵙⵙⴻⴵⵀⴻⴷ ⴷ ⵓⵙⵙⴻⵔⴽⴻⴷ ⵏ ⵡⴰⴽⴰⵍ.

« ⴰⴱⵔⵉⴷ ⴰⵎⴰⵣⵣⴰⵍ ⴰⴷ ⵢⴻⵔⵥⴻⵎ ⵉ ⵜⵉⴷⴷⵉⵜ ⴷⴻⴳ ⵜⴳⴰⵔⴰ ⵏ ⴷⵓⵊⴻⵎⴱⴻⵕ, ⵉⵎⵉ ⴰⴷ ⴼⴰⴽⴻⵏ ⵢⵉⵅⴻⴷⴷⵉⵎⴻⵏ ⴷⴻⴳ ⵢⵉⵃⵔⵉⵛⴻⵏ ⵢⴻⵎⴳⴻⵔⵔⴰⴷⴻⵏ ⵏ ⵓⴳⵎⵓⴹ (ⵛⵛⴻⵔⵇ), ⵜⴰⵍⴻⵎⵎⴰⵙⵜ ⴷ ⵓⵜⴰⵔⴰⵎ (ⵍⵖⴻⵔⴱ) ⵙⴻⴳ-ⴰ ⵖⴻⴼ ⴽⵔⴰ ⵏ ⵍⴻⴷⵡⴰⵕ, ⵎⴻⵏⵖⵉⵔ ⴰⵛⴰⵏⵟⵉ ⵏ ⴷⵊⴻⴱⴰⵀⵉⴰ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵙⵙⴻⴼⵀⴻⵎ ⵓⵏⴻⵖⵍⴰⴼ ⴷⴻⴳ ⵢⵉⵊⵉⴼⴻⵕ ⵏ ⵜⴻⵔⵣⵉ-ⵏⵏⴻⵙ ⵏ ⵓⵎⴰⵀⵉⵍ ⵖⴻⴼ ⵜⵡⵉⵍⴰⵢⵜ ⵏ ⵜⵓⴱⵉⵔⴻⵜ.

ⴰⵃⵔⵉⵛ ⵏ ⴷⵊⴻⴱⴰⵀⵉⴰ ⵖⴻⵣⵣⵉⴼ 5 ⵏ ⵢⵉⴽⵉⵍⵓⵎⵉⵜⵔⴻⵏ ⵢⴻⵔⵏⴰ ⴷ ⵜⴰⵎⵏⴰⴹⵜ ⴰⵢⴷⴻⴳ ⵢⴻⵜⵜⵙⴻⵢⵢⵉⵅ ⵡⴰⴽⴰⵍ. ⴰⵛⴰⵏⵟⵉ ⵏ ⵜⴻⵎⵏⴰⴹⵜ-ⴰ ⵍⵀⴰⵏⵜ-ⴷ ⵢⵉⴷ-ⵙ ⴽⵔⴰ ⵏ ⵜⴽⴻⴱⴱⴰⵏⵉⵢⵉⵏ ⴰⴽⴽⴻⵏ ⴰⴷ ⴱⵏⵓⵏⵜ « ⵜⵉⵍⴻⴳⴳⵉⵢⵉⵏ (ⴵⵓⵙⵓⵔ) ⵢⴻⵜⵜⵡⴰⵎⴻⴹⵍⴻⵏ ⵢⴻⵔⵏⴰ ⴰⴷ ⵥⵥⵓⵏⵜ 1200 ⵏ ⵜⴳⵓⵙⴰ ⴰⴽⴽⴻⵏ ⴰⴷ ⵙⴵⴻⵀⴷⴻⵏⵜ ⵢⴻⵔⵏⴰ ⴰⴷ ⵙⵔⴻⴽⴷⴻⵏⵜ ⴰⴽⴰⵍ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵏⴻⵖⵍⴰⴼ ⴰⵢ ⵢⴻⵙⴼⴻⵇⴷⴻⵏ ⵉⵎⴰⵀⵉⵍⴻⵏ ⵏ ⵓⵚⴻⴳⴳⴻⵎ ⵏ ⵓⵃⵔⵉⵛ-ⴰ ⵢⴻⵇⵇⵏⴻⵏ ⵜⵓⴱⵉⵔⴻⵜ ⵖⴻⵔ ⵍⴰⴽⵀⴷⴰⵔⵉⴰ (33 ⵏ ⵢⵉⴽⵉⵍⵓⵎⵉⵜⵔⴻⵏ).

ⵉ ⵓⵅⴷⴰⵎ ⵏ ⵜⴳⵓⵙⴰ-ⴰ ⴷ ⵓⵙⵙⴻⵔⴽⴻⴷ ⵏ ⵡⴰⴽⴰⵍ ⵏ ⵜⴻⵎⵏⴰⴹⵜ-ⴰ, ⵢⴻⵏⵏⴰ-ⴷ ⵓⵏⴻⵖⵍⴰⴼ ⴷ ⴰⴽⴽⴻⵏ ⵢⴻⵙⵙⴻⴼⴽ « ⴰⴷ ⵢⴻⴳⴳⴻⵜ ⵓⵅⴻⴷⴷⵉⵎ ⵢⴻⵔⵏⴰ ⴰⴷ ⵢⴻⵜⵜⵡⴰⵙⵙⴻⵇⴷⴻⵛ ⴰⴽⴽ ⵜⵜⴰⵡⵉⵍ ⴰⵢ ⵢⴻⵙⵙⴻⴼⴽⴻⵏ ⵉ ⵍⵎⴻⵏⴷ ⵏ ⵓⵙⵙⴻⵡⵊⴻⴷ ⵏ ⵓⵙⴻⵏⴼⴰⵔ-ⴰ ⵙⴻⴳ-ⴰ ⵖⴻⵔ ⵢⵓⵏⵢⵓ ⵏ 2016 ».

ⴷⴻⴳ ⵓⵛⴰⵏⵟⵉ-ⵏⵏⵉ (ⴰⵚⴻⴳⴳⴻⵎ ⵏ 33 ⵏ ⵢⵉⴽⵉⵍⵓⵎⵉⵜⵔⴻⵏ) ⴰⵢ ⴷ-ⵢⴻⴱⴷⴰⵏ ⴷⴻⴳ ⵎⴰⵢⵓ ⵏ 2013, ⵎⴰⵙⵙ ⵧⵓⴰⵍⵉ ⵉⴳⴻⵔ-ⴷ ⵜⵉⵖⵔⵉ ⵉ ⵜⴽⴻⴱⴱⴰⵏⵉⵢⵉⵏ ⵏ ⵍⴻⴱⵏⵉ, ⵜⵉⵏⴰⵔⵉⵢⵉⵏ ⵏ ⵜⴻⵣⵔⴰⵡⵜ (ⵎⴰⴽⴰⵜⵉⴱ ⴷⵉⵔⴰⵙⴰ) ⴷ ⵢⵉⴷⵓⴱⴰ ⵉⴷⵉⴳⴰⵏⴻⵏ ⴰⴽⴽⴻⵏ « ⴰⴷ ⵙⵙⵓⴳⴳⵜⴻⵏ ⵍⵎⴻⴵⵀⵓⴷ ⵢⴻⵔⵏⴰ ⵎⵄⴰⵡⴰⵏⴻⵏ ⴰⴽⴽⴻⵏ ⵉⴼⴰⵣ. »