ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵢⴻⵏⵇⴻⵙ ⵡⴰⴵⴰⵡ ⵏ ⵢⵉⵙⴰⴼⴰⵔⴻⵏ ⴷⴻⴳ 9 ⵏ ⵡⴰⵢⵢⵓⵔⴻⵏ ⵉⵎⴻⵣⵡⵓⵔⴰ ⵏ 2015

ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – ⵢⴻⵏⵇⴻⵙ ⵡⴰⴵⴰⵡ ⵏ ⵢⵉⵙⴰⴼⴰⵔⴻⵏ ⵙ 1,37 ⴷ ⴰⵎⴻⵍⵢⴰⵕ ⵏ ⵢⵉⴷⵓⵍⴰⵕⴻⵏ ⴷⴻⴳ 9 ⵏ ⵡⴰⵢⵢⵓⵔⴻⵏ ⵉⵎⴻⵣⵡⵓⵔⴰ ⵏ 2015 ⵎⴰ ⵏⵇⵓⵔⴻⵏ ⴰⵢⴰ ⵖⴻⵔ ⵢⵉⵍⵉⵏⴷⵉ (9 ⵏ ⵡⴰⵢⵢⵓⵔⴻⵏ ⵉⵎⴻⵣⵡⵓⵔⴰ ⵏ 2014) ⴰⵢⴷⴻⴳ ⴷ-ⵜⵜⵡⴰⴵⵡⴻⵏ 1,82 ⴷ ⴰⵎⴻⵍⵢⴰⵕ ⵏ ⵢⵉⴷⵓⵍⴰⵕⴻⵏ ⵏ ⵢⵉⵙⴰⴼⴰⵔⴻⵏ. ⵙ ⵡⴰⵢⴰ, ⵢⴻⵏⵇⴻⵙ ⵡⴰⴵⴰⵡ ⵏ ⵢⵉⵙⴰⴼⴰⵔⴻⵏ ⵙ 24,7% ⵖⴻⴼ ⵍⴻⵃⵙⴰⴱ ⵏ ⵢⵉⵍⵉⵏⴷⵉ ⴷⴻⴳ ⵜⴰⵍⵍⵉⵜ-ⵏⵏⵉ, ⵖⴻⴼ ⵡⴰⴽⴽⴻⵏ ⴰⵢ ⴰⵖ-ⴷ-ⵜⴻⵏⵏⴰ ⵜⴻⴷⵡⴰⵏⵜ ⵜⴰⴷⵣⴰⵢⵔⵉⵜ.

ⵎⴰ ⴷ ⵜⴰⵙⵎⴻⴽⵜⴰ (ⴽⴰⵎⵎⵉⵢⵢⴰ) ⴰⵢ ⴷ-ⵢⴻⵜⵜⵡⴰⴵⵡⴻⵏ, ⵓⵍⴰ ⴷ ⵏⴻⵜⵜⴰⵜ ⵜⴻⵏⵇⴻⵙ ⴷⴻⴳ 9 ⵏ ⵡⴰⵢⵢⵓⵔⴻⵏ ⵉⵎⴻⵣⵡⵓⵔⴰ ⵏ ⵓⵙⴻⴳⴳⴰⵙ-ⴰ, ⵉⵎⵉ ⴰⵢ ⵜⴻⵡⵡⴻⴹ ⵖⴻⵔ 19.061 ⵏ ⵢⵉⵟⵓⵏⴻⵏ, ⵢⵉⵍⵉ ⵉⵍⵉⵏⴷ ⴷⴻⴳ ⵜⴰⵍⵍⵉⵜ-ⵏⵏⵉ ⵜⵜⵡⴰⴵⵡⴻⵏ-ⴷ 22.184 ⵏ ⵢⵉⵟⵓⵏⴻⵏ (ⴷ ⴰⵏⵇⴰⵙ ⵏ 14,07%), ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵡⴰⵎⵎⴰⵙ ⴰⵖⴻⵍⵏⴰⵡ ⵏ ⵜⵙⴻⵏⵙⴻⵍⴽⵉⵎⵜ ⴷ ⵜⴰⴷⴷⴰⴷⴰⵏⵉⵏ ⵏ ⵜⴻⴷⵡⴰⵏⵜ (ⵛⵏⵉⵙ).

ⴰⵏⵇⴰⵙ ⵏ ⵡⴰⵣⴰⵍ ⵏ ⵡⴰⴵⴰⵡ ⵢⴻⴱⴷⴰ-ⴷ ⵙⴻⴳ ⵜⴻⵣⵡⴰⵔⴰ ⵏ ⵓⵙⴻⴳⴳⴰⵙ-ⴰ, ⵢⴻⵔⵏⴰ ⵢⴻⵔⵣⴰ ⴰⴽⴽ ⵍⴻⵚⵏⴰⴼ ⵏ ⵢⵉⵙⴰⴼⴰⵔⴻⵏ ⴷ ⵢⵉⴼⴰⵔⵉⵙⴻⵏ (ⵎⴰⵏⵜⵓⴵⴰⵜ) ⵏ ⵓⴷⴰⵡⵉ, ⵎⴰⵛⴰ ⴰⵏⵇⴰⵙ ⵏ ⵜⴻⵙⵎⴻⴽⵜⴰ ⵏ ⵢⵉⵙⴰⴼⴰⵔⴻⵏ ⵢⴻⵔⵣⴰ-ⴷ ⴽⴰⵏ ⵉⵙⴰⴼⴰⵔⴻⵏ ⵏ ⵢⵉⵎⴷⴰⵏⴻⵏ, ⵢⵉⵍⵉ ⵉⵙⴰⴼⴰⵔⴻⵏ ⵏ ⵢⵉⵖⴻⵔⵙⵉⵡⴻⵏ ⵜⴻⵔⵏⴰ ⵜⴻⵙⵎⴻⴽⵜⴰ ⵏ ⵡⴰⴵⴰⵡ-ⵏⵙⴻⵏ.

ⵜⴰⴼⴰⵜⵓⵕⵜ ⵏ ⵢⵉⵙⴰⴼⴰⵔⴻⵏ ⵏ ⵢⵉⵎⴷⴰⵏⴻⵏ ⵜⴻⵙⵇⴰⵎ-ⴷ 95% ⵙⴻⴳ ⵡⴰⵣⴰⵍ ⵏ ⵡⴰⴽⴽ ⵉⵙⴰⴼⴰⵔⴻⵏ ⴰⵢ ⴷ-ⵢⴻⵜⵜⵡⴰⴵⵡⴻⵏ, ⵢⴻⵔⵏⴰ ⵜⴻⵡⵡⴻⴹ ⵖⴻⵔ 1,31 ⴷ ⴰⵎⴻⵍⵢⴰⵕ ⵏ ⵢⵉⴷⵓⵍⴰⵕⴻⵏ, ⵢⵉⵍⵉ ⵉⵍⵉⵏⴷⵉ ⴷⴻⴳ ⵜⴰⵍⵍⵉⵜ-ⵏⵏⵉ, ⵜⴻⵙⵇⴰⵎ-ⴷ 1,75 ⴷ ⴰⵎⴻⵍⵢⴰⵕ ⵏ ⵢⵉⴷⵓⵍⴰⵕⴻⵏ (ⴷ ⴰⵏⵇⴰⵙ ⵏ 25,27%), ⵎⴰ ⴷ ⵜⴰⵙⵎⴻⴽⵜⴰ-ⵏⵙⴻⵏ ⴰⵙⴻⴳⴳⴰⵙ-ⴰ ⵜⴻⵏⵇⴻⵙ-ⴷ ⵖⴻⵔ 17.390 ⵏ ⵢⵉⵟⵓⵏⴻⵏ ⵢⵉⵍⵉ ⵉⵍⵉⵏⴷⵉ, ⵜⵜⵡⴰⴵⵡⴻⵏ-ⴷ 20.867 ⵏ ⵢⵉⵟⵓⵏⴻⵏ (ⴷ ⴰⵏⵇⴰⵙ ⵏ 16,7%).

ⵉⴼⴰⵔⵉⵙⴻⵏ ⴰⵣⵓⵏⵙⴰⴼⵔⴰⵏⴻⵏ (ⵛⵉⴱⵀⵚⴰⵢⴷⴰⵍⵉⵢⵢⴰ) ⵙⵇⴰⵎⴻⵏ-ⴷ 45,94 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⴷⵓⵍⴰⵕⴻⵏ (1.180 ⵏ ⵢⵉⵟⵓⵏⴻⵏ), ⵢⵉⵍⵉ ⴰⵙⴻⴳⴳⴰⵙ ⵢⴻⵣⵔⵉⵏ, ⴷⴻⴳ ⵜⴰⵍⵍⵉⵜ-ⵏⵏⵉ, ⵙⵇⴰⵎⴻⵏ-ⴷ 52,37 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⴷⵓⵍⴰⵕⴻⵏ (931 ⵏ ⵢⵉⵟⵓⵏⴻⵏ). ⵙ ⵡⴰⵢⴰ, ⴰⵣⴰⵍ-ⵏⵙⴻⵏ ⵢⴻⵏⵇⴻⵙ-ⴷ ⵙ 12,27%, ⵎⴰⵛⴰ ⵜⴰⵙⵎⴻⴽⵜⴰ-ⵏⵙⴻⵏ ⵜⴻⵔⵏⴰ ⵙ 26,74%.

ⵎⴰ ⴷ ⵉⵙⴰⴼⴰⵔⴻⵏ ⵏ ⵢⵉⵖⴻⵔⵙⵉⵡⴻⵏ, ⵜⴻⵡⵡⴻⴹ ⵜⴼⴰⵜⵓⵕⵜ-ⵏⵙⴻⵏ ⵖⴻⵔ 20,39 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⴷⵓⵍⴰⵕⴻⵏ (490,96 ⵏ ⵢⵉⵟⵓⵏⴻⵏ), ⵢⵉⵍⵉ ⵉⵍⵉⵏⴷⵉ ⵙⵇⴰⵎⴻⵏ-ⴷ 22,49 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⴷⵓⵍⴰⵕⴻⵏ (385,64 ⵏ ⵢⵉⵟⵓⵏⴻⵏ). ⵙ ⵡⴰⵢⴰ, ⴰⵣⴰⵍ ⵏ ⵡⴰⴵⴰⵡ-ⵏⵙⴻⵏ ⵢⴻⵏⵇⴻⵙ ⵙ 9,34%, ⵎⴰ ⴷ ⵜⴰⵙⵎⴻⴽⵜⴰ-ⵏⵙⴻⵏ ⵜⴻⵔⵏⴰ ⵙ ⵡⵓⴳⴰⵔ ⵏ 27%. ⴷⴻⴳ ⵛⵜⴻⵎⴱⴻⵕ ⵢⴻⵣⵔⵉⵏ, ⵍⴻⵣⵣⴰⵢⴻⵔ ⵓⵔ ⴷ-ⵜⵓⴵⵉⵡ ⴰⵔⴰ ⴰⴽⴽ ⵉⵙⴰⴼⴰⵔⴻⵏ ⵏ ⵢⵉⵖⴻⵔⵙⵉⵡⴻⵏ.