ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵍⴻⴱⵏⵉ ⵏ ⵢⵉⴱⵔⵉⴷⴻⵏ: ⴰⵙⵙⴻⴱⴷⴻⴷ ⵏ ⵜⴽⴻⴱⴱⴰⵏⵉⵜ ⵜⴰⴷⵣⴰⵢⵔⵉⵜ-ⵜⴰⵟⴰⵍⵢⴰⵏⵉⵜ ⵉ ⵓⵅⴷⴰⵎ ⵏ ⵜⵜⴰⵡⵉⵍ ⴷⴻⴳ 2017
ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – ⵜⴰⴽⴻⴱⴱⴰⵏⵉⵜ ⵏ ⵙⴰⵒⵜⴰ-ⵜⴻⵏⵙⴰ ⴰⴷ ⵉⵅⴻⴷⴷⵎⴻⵏ ⵜⵜⴰⵡⵉⵍⴰⵜ ⵏ ⵍⴻⴱⵏⵉ ⵏ ⵢⵉⴱⵔⵉⴷⴻⵏ ⴰⴷ ⵜⴻⴱⴷⵓ ⴰⵅⴻⴷⴷⵉⵎ ⴷⴻⴳ ⵜⴻⵣⵡⴰⵔⴰ ⵏ 2017, ⵖⴻⴼ ⵡⴰⴽⴽⴻⵏ ⴰⵢ ⴰⵖ-ⴷ-ⵢⴻⵏⵏⴰ ⵓⵙⴻⵍⵡⴰⵢ-ⴰⵏⴻⵎⵀⴰⵍ ⴰⵎⴰⵜⵓ ⵏ ⵜⴽⴻⴱⴱⴰⵏⵉⵜ ⵏ ⵜⵍⴻⴳⴳⵉⵢⵉⵏ (ⴵⵓⵙⵓⵔ) ⵏ ⵙⴰⵒⵜⴰ, ⵔⴰⵛⵀⵉⴷ ⴱⴰⵢⴰⵙⵍⵉ.
ⵜⴰⴽⴻⴱⴱⴰⵏⵉⵜ-ⴰ ⵜⵓⵅⵍⵉⴹⵜ ⵜⴻⵏⵏⵓⵍⴼⴰ-ⴷ ⵙ ⵢⵉⵡⴻⵏ ⵏ ⵓⵒⵔⵓⵟⵓⴽⵓⵍ ⵏ ⵓⵎⵙⴻⴼⵀⴰⵎ ⴰⵢ ⵢⴻⵜⵜⵡⴰⵙⵜⴻⵏⵢⴰⵏ ⴷⴻⴳ ⵏⵡⴻⵎⴱⴻⵕ ⵢⴻⵣⵔⵉⵏ ⴷⴻⴳ ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ ⴳⴰⵔ ⵙⴰⵒⵜⴰ ⴷ ⵜⴽⴻⴱⴱⴰⵏⵉⵜ ⵜⴰⵟⴰⵍⵢⴰⵏⵉⵜ ⵏ ⵜⴻⵏⵙⴰⵛⵛⵉⴰⵉ.
ⵜⴰⴽⴻⴱⴱⴰⵏⵉⵜ ⵏ ⵙⴰⵒⵜⴰ-ⵜⴻⵏⵙⴰ ⵜⴻⵜⵜⴻⴷⴷⵓ ⵙ ⵍⵇⴰⵏⵓⵏ ⵏ ⵍⴻⵣⵣⴰⵢⴻⵔ ⵢⴻⵔⵏⴰ ⵜⴻⵏⵏⵓⵍⴼⴰ-ⴷ ⵙ ⵓⵇⴰⴷⴻⵔ ⵏ ⵓⵍⵓⴳⴻⵏ ⵏ 51/49% ⴰⵢ ⵢⴻⵙⵙⴻⴼⴽⴻⵏ ⴰⴷ ⵢⴻⵜⵜⵡⴰⵇⴰⴷⴻⵔ ⴷⴻⴳ ⵜⴻⵎⵙⴰⵍⵜ ⵏ ⵓⵙⵙⴻⴼⵜⵉ ⵏ ⵜⴽⴻⴱⴱⴰⵏⵉⵢⵉⵏ ⵜⵉⴱⴻⵕⵕⴰⵏⵉⵢⵉⵏ ⴷⴻⴳ ⵍⴻⵣⵣⴰⵢⴻⵔ. ⵙⴰⵒⵜⴰ-ⵜⴻⵏⵙⴰ ⴰⴷ ⵜⵓⵖⴰⵍ ⴰⴷ ⴷ-ⵜⵅⴻⴷⴷⴻⵎ ⵜⵜⴰⵡⵉⵍⴰⵜ ⴰⵢ ⵃⵡⴰⴵⴻⵏ ⴷⴻⴳ ⵍⴻⴱⵏⵉ ⵏ ⵢⵉⴱⵔⵉⴷⴻⵏ ⴷ ⵜⵍⴻⴳⴳⵉⵢⵉⵏ.
ⵍⵍⵓⵣⵉⵏ ⵏ ⵜⴽⴻⴱⴱⴰⵏⵉⵜ-ⴰ ⴰⴷ ⵜⵉⵍⵉ ⴷⴻⴳ ⵍⴻⵣⵣⴰⵢⴻⵔ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵢⵉⵎⴹⴻⴱⴱⴻⵔ-ⴰ, ⵢⴻⵔⵏⴰ ⵜⵜⴰⵡⵉⵍⴰⵜ ⴰⴷ ⴷ-ⵢⴻⵜⵜⵡⴰⵅⴷⴰⵎⴻⵏ ⴷⴻⴳ-ⵙ ⴰⴷ ⵜⵜⴻⴽⴽⵉⵏ ⴷⴻⴳ ⵓⵙⵙⴻⵏⵇⴻⵙ ⵏ ⵡⴰⴵⴰⵡ ⵏ ⵙⵙⴻⵍⵄⴰ ⵙⴻⴳ ⵓⵣⵖⴰⵔ, ⴳⴰⵔ-ⴰⵙⴻⵏⵜ ⵜⵉⵖⴰⵡⵙⵉⵡⵉⵏ ⴰⵢ ⵙⵙⴻⵇⴷⴰⵛⴻⵏ ⴷⴻⴳ ⵓⵚⴻⴳⴳⴻⵎ ⵏ ⵜⵍⴻⴳⴳⵉⵢⵉⵏ.
« ⴷⴻⴳ ⵓⵙⴻⴳⴳⴰⵙ ⵏ 2016, ⴰⴷ ⵏⴻⴳ ⵜⴰⵣⵔⴰⵡⵜ (ⴷⵉⵔⴰⵙⴰ) ⵜⴰⵜⴻⴽⵏⵉⵜ ⵏ ⵓⵙⴻⵏⴼⴰⵔ-ⴰ ⵢⴻⵔⵏⴰ ⴰⴷ ⵏⴻⴱⵏⵓ ⵍⵍⵓⵣⵉⵏ-ⵏⵏⵉ ⴷⴻⴳ ⵡⴰⴽⴰⵍ ⵢⴻⵍⵍⴰⵏ ⴷ ⴰⵢⵍⴰ ⵏ ⵜⴽⴻⴱⴱⴰⵏⵉⵜ-ⵏⵏⴻⵖ ⴷⴻⴳ ⵜⴻⵎⵏⴰⴹⵜ ⵏ ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ. ⵙⴰⴽⴽⵉⵏ, ⵍⴰ ⵏⴻⵙⵙⴻⴼⵔⴰⵢ ⴰⴷ ⵜⴻⴱⴷⵓ ⵍⵍⵓⵣⵉⵏ-ⴰ ⴰⵅⴻⴷⴷⵉⵎ ⴷⴻⴳ ⵜⴻⵣⵡⴰⵔⴰ ⵏ 2017 », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵙⵙⴻⴼⵀⴻⵎ ⵎⴰⵙⵙ ⴱⴰⵢⴰⵙⵍⵉ.
ⴷⴻⴳ ⵓⵙⴻⵏⴼⴰⵔ-ⴰ, ⴰⴷ ⴷ-ⵢⵉⵍⵉ ⵓⵙⵙⴻⵍⵎⴻⴷ ⵏ ⵜⴻⵙⵏⴰⵜⵡⵉⵍⵜ (ⵜⵉⴽⵏⵓⵍⵓⴵⵢⴰ) ⵉ ⵢⵉⴷⵣⴰⵢⵔⵉⵢⴻⵏ ⵢⴻⵔⵏⴰ ⵜⵉⵛⵛⵓⵔⴽⴰ-ⴰ ⴰⴷ ⴷ-ⵍⴻⵎⴷⴻⵏ ⴷⴻⴳ-ⵙ ⵢⵉⴷⵣⴰⵢⵔⵉⵢⴻⵏ ⴰⵎⴻⴽ ⴰⴷ ⴷ-ⵅⴻⴷⴷⵎⴻⵏ ⵜⵜⴰⵡⵉⵍⴰⵜ ⵢⴻⵔⵣⴰⵏ ⵉⴱⵔⵉⴷⴻⵏ ⴷ ⵜⵍⴻⴳⴳⵉⵢⵉⵏ ⴷ ⵓⵙⵙⵉⵣⴷⴻⴳ ⵏ ⵢⵉⴱⵔⵉⴷⴻⵏ.
