ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⴰⵟⴰⵙ ⵏ ⵢⵉⴷⵍⵉⵙⴻⵏ ⵉⵖⵓⵔⴱⵉⵣⴻⵏ ⵉⵎⴰⵢⵏⵓⵜⴻⵏ ⴰⴷ ⴷ-ⵢⴻⵜⵜⵡⴰⵙⵡⴻⵊⴷⴻⵏ ⵉ ⵓⵙⴻⴳⴳⴰⵙ ⴰⵢ ⴷ-ⵢⴻⵜⵜⴻⴷⴷⵓⵏ

ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – ⵜⴻⵏⵏⴰ-ⴷ ⵜⵏⴻⵖⵍⴰⴼⵜ ⵏ ⵓⵙⵙⴻⴳⵎⵉ ⴰⵖⴻⵍⵏⴰⵡ, ⵏⵧⵓⵔⵉⴰ ⴱⴻⵏⴳⵀⴻⴱⵔⵉⵜ, ⴰⵙⵙ ⵏ ⵍⴰⵕⴻⴱⵄⴰ ⴷⴻⴳ ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ ⴷ ⴰⴽⴽⴻⵏ ⴰⵟⴰⵙ ⵏ ⵢⵉⴷⵍⵉⵙⴻⵏ ⵉⵖⵓⵔⴱⵉⵣⴻⵏ ⵉⵎⴰⵢⵏⵓⵜⴻⵏ ⵏ ⵓⵙⵡⵉⵔ ⴰⵎⴻⵏⵣⵓ ⴷ ⵓⵍⴻⵎⵎⴰⵙ ⴰⵢ ⵉⵍⵉⵏ ⵡⴻⵊⴷⴻⵏ ⵉ ⵓⵙⴻⴳⴳⴰⵙ ⴰⵖⵓⵔⴱⵉⵣ ⵏ 2016-2017.

« ⵙⵉⵏ ⵏ ⵢⵉⴷⵍⵉⵙⴻⵏ ⵉ ⵓⵙⴻⴳⴳⴰⵙ ⴰⵎⴻⵣⵡⴰⵔⵓ ⵏ ⵓⵙⵡⵉⵔ ⴰⵎⴻⵏⵣⵓ ⴷ ⵙⵉⵏ ⵏ ⵢⵉⴷⵍⵉⵙⴻⵏ ⵏⵉⴹⴻⵏ ⵉ ⵓⵙⴻⴳⴳⴰⵙ ⵡⵉⵙ ⵙⵉⵏ ⴷⴻⴳ ⵜⴻⵏⴳⵉⵡⵉⵏ (ⵎⴰⵡⴰⴷ) ⵏ ⵜⵓⵙⵙⵏⵉⵡⵉⵏ ⵜⵉⵙⵏⴰⵜⵡⵉⵍⴰⵏⵉⵏ (ⵜⵉⴽⵏⵓⵍⵓⴵⵉⵢⵢⴰ) ⴷ ⵜⵓⵙⵙⵏⴰ, ⴰⵙⵙⴻⴳⵎⵉ ⵉⵏⴻⵙⵍⴻⵎ ⴷ ⵓⵖⴰⵔⵉⵎ ⴰⴷ ⵉⵍⵉⵏ ⵡⴻⵊⴷⴻⵏ ⵙⴻⴳ ⵓⵙⴻⴳⴳⴰⵙ ⴰⵖⵓⵔⴱⵉⵣ ⴰⵢ ⴷ-ⵢⴻⵜⵜⴻⴷⴷⵓⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⵎⴰⵙⵙⴰ ⴱⴻⵏⴳⵀⴻⴱⵔⵉⵜ.

ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⵉⴷⵍⵉⵙⴻⵏ ⵏ ⵜⵙⴻⴽⵍⵉⵡⵉⵏ ⴷ ⵜⵓⵜⵍⴰⵢⵉⵏ, ⵜⴻⵏⵏⴰ-ⴷ ⵜⵏⴻⵖⵍⴰⴼⵜ ⴷ ⴰⴽⴽⴻⵏ ⵢⴻⵙⵙⴻⴼⴽ ⴰⴷ ⵙⵙⵉⴷⴼⴻⵏ ⴷⴻⴳ-ⵙⴻⵏ ⵜⵉⵖⴰⵡⵙⵉⵡⵉⵏ ⵢⴻⵇⵇⵏⴻⵏ ⵖⴻⵔ ⵍⴻⵣⵣⴰⵢⴻⵔ ⵢⴻⵔⵏⴰ ⴰⴷ ⵢⵉⵍⵉ ⵡⴰⵢⴰ ⴷⴻⴳ ⵡⴰⴽⴽ ⵉⵙⵡⵉⵔⴻⵏ, ⴰⵎ ⵡⴰⴽⴽⴻⵏ ⴰⵢ ⴷ-ⵜⵡⴻⴽⴽⴻⴷ ⴷ ⴰⴽⴽⴻⵏ ⵜⴻⵍⵍⴰ ⵜⵙⴻⵇⵇⴰⵎⵓⵜ ⵜⵓⵛⵔⵉⴽⵜ ⴳⴰⵔ ⵢⵉⵖⵍⵉⴼⴻⵏ ⵏ ⵓⵙⵙⴻⴳⵎⵉ ⴷ ⵢⵉⴷⵍⴻⵙ ⴰⵢ ⴷ-ⵢⴻⵍⵀⴰⵏ ⵙ ⵓⴼⵔⴰⵏ ⵏ ⵜⵓⴽⴽⵉⵙⵉⵏ ⵙⴻⴳ ⵢⵉⵅⴻⴷⴷⵉⵎⴻⵏ ⵉⵙⴻⴽⵍⴰⵏⴻⵏ ⵏ ⵢⵉⵎⵓⵔⴰ ⵉⴷⵣⴰⵢⵔⵉⵢⴻⵏ ⵢⵓⵔⴰⵏ ⵙ ⵜⴰⵄⵕⴰⴱⵜ, ⵙ ⵜⵎⴰⵣⵉⵖⵜ ⴷ ⵜⴻⴼⵕⴻⵏⵙⵉⵙⵜ.

ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⵉⴽⴰⵢⴰⴷⴻⵏ ⵏ ⵍⴱⴰⴽ ⴰⴷ ⴷ-ⵢⴻⵖⵍⵉⵏ, ⴰⵙⴻⴳⴳⴰⵙ-ⴰ, ⴷ ⵡⴰⵢⵢⵓⵔ ⵏ ⵔⴻⵎⴹⴰⵏ, ⵜⴻⵏⵏⴰ-ⴷ ⵜⵏⴻⵖⵍⴰⴼⵜ ⴷ ⴰⴽⴽⴻⵏ ⴰⵣⴻⵎⵣ (ⵜⴰⵔⵉⵅ) ⵏ ⵢⵉⴽⴰⵢⴰⴷⴻⵏ-ⴰ ⵓⵔ ⵢⴻⵜⵜⴱⴻⴷⴷⵉⵍ ⴰⵔⴰ.

ⴰⵀⵉⵍ ⵏ ⵢⵉⴽⴰⵢⴰⴷⴻⵏ ⵢⴻⵜⵜⵡⴰⵀⴻⵢⵢⴰ-ⴷ ⵖⴻⴼ ⵍⴻⵃⵙⴰⴱ ⵏ ⵜⵣⴻⵎⵎⴰⵔ ⵏ ⵢⵉⵖⴻⵔⴱⴰⵣⴻⵏ ⴰⴽⴽⴻⵏ ⴰⴷ ⴷ-ⵍⵀⵓⵏ ⵢⴻⵔⵏⴰ ⴰⴷ ⵙⴼⴻⵄⵍⴻⵏ ⴰⵀⵉⵍ-ⴰ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⵡⴻⴽⴽⴻⴷ ⵎⴰⵙⵙⴰ ⴱⴻⵏⴳⵀⴻⴱⵔⵉⵜ.

ⴰⵎⴰⵢⵏⵓ ⴷⴻⴳ ⵍⴱⴰⴽ ⵏ 2016 ⵏⴻⵜⵜⴰ ⴷ ⵜⵓⴽⴽⵙⴰ ⵏ ⵢⵉⴽⴰⵢⴰⴷⴻⵏ ⵏ ⵡⴰⴷⴷⴰⵍ ⵉ ⵢⵉⵏⴻⵍⵎⴰⴷⴻⵏ ⵢⴻⵍⵍⴰⵏ ⴷⴻⴳ ⵓⵖⴻⵔⴱⴰⵣ. ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⴰⵙⵙⴻⵣⵎⴻⵍ (ⵜⴰⵏⵇⵉⵟ) ⵏ ⵍⴱⴰⴽ, ⴰⴷ ⴷ-ⵢⴻⴷⴷⵓ ⴷⴻⴳ ⵍⴻⵃⵙⴰⴱ-ⵏⵏⴻⵙ ⴷⴰⵖ ⵓⵇⴻⵢⵢⴻⵎ ⵏ ⵢⵉⴽⴰⵢⴰⴷⴻⵏ ⵏ ⵓⵙⴻⴳⴳⴰⵙ ⴰⵖⵓⵔⴱⵉⵣ, ⵢⴻⵔⵏⴰ ⵜⴻⵏⵏⴰ-ⴷ ⵎⴰⵙⵙⴰ ⴱⴻⵏⴳⵀⴻⴱⵔⵉⵜ ⴷ ⴰⴽⴽⴻⵏ ⴷ ⵉⵎⴰⵡⵍⴰⵏ ⵏ ⵢⵉⴱⴰⵍⵎⵓⴷⴻⵏ ⴰⵢ ⴷ-ⵢⴻⵙⵙⵓⵜⵔⴻⵏ ⴰⵢⴰ.

ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⵉⵎⴰⵣⵡⴰⵔⴻⵏ (ⵎⵓⵔⴰⵛⵛⴰⵃⵉⵏ) ⵉⵍⴻⵍⵍⵉⵢⴻⵏ, ⵜⴻⵏⵏⴰ-ⴷ ⵜⵏⴻⵖⵍⴰⴼⵜ ⴷ ⴰⴽⴽⴻⵏ ⴰⴽⴰⵢⴰⴷ-ⵏⵙⴻⵏ ⵏ ⵡⴰⴷⴷⴰⵍ ⴰⴷ ⴷ-ⵢⵉⵍⵉ ⴷⴻⴳ ⵢⵉⵎⵓⵔⴰⵙ.

ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⵜⴻⵏⵏⴰ-ⴷ ⵜⵏⴻⵖⵍⴰⴼⵜ ⴷ ⴰⴽⴽⴻⵏ « ⴰⵖⵍⵉⴼ ⵍⴰ ⵉⵅⴻⴷⴷⴻⵎ ⴰⴽⴽⴻⵏ ⴰⴷ ⵢⴻⵙⵙⵉⵡⴻⴹ ⵖⴻⵔ ⵢⵉⵙⵡⵉ ⵏ ⵓⵙⵙⴻⵍⵎⴻⴷ ⵓⵃⵜⵉⵎ ⵏ ⵜⵓⵜⵍⴰⵢⵜ-ⴰ. » « ⵜⴰⵎⴰⵣⵉⵖⵜ ⵍⴰ ⵜⴻⵜⵜⵡⴰⵙⵙⴻⵍⵎⴰⴷ ⴷⴻⴳ 21 ⵏ ⵜⵡⵉⵍⴰⵢⵉⵏ ⴷⴻⴳ 2015 ⴷⴻⴳ ⵡⴰⴽⵓⴷ ⴰⵢⴷⴻⴳ ⴷⴻⴳ 2014, ⵜⴻⵍⵍⴰ ⵜⴻⵜⵜⵡⴰⵙⵙⴻⵍⵎⴰⴷ ⴰⵍⴰ ⴷⴻⴳ 11 ⵏ ⵜⵡⵉⵍⴰⵢⵉⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ.