ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⴰⵖⴻⵍⵍⴻⵜ ⵢⴻⴼⴼⵖⴻⵏ ⵉ ⵍⵇⴰⵏⵓⵏ ⵉ ⵍⵖⴻⵍⵍⴰⵜ ⵏ ⵓⵏⴻⵥⵔⵓⴼ ⵓⵜⵔⵉⵎ: ⵢⴻⴱⵟⴻⵍ ⵓⵎⵜⴰⵡⴰ ⴳⴰⵔ ⵜⵓⵕⵓⴼⵜ ⴷ ⵎⴻⵕⵕⵓⴽ

ⴱⵔⵓⵅⴻⵍⵍⴻⵙ – ⵢⴻⵃⴽⴻⵎ-ⴷ ⵛⵛⵕⴻⵄ ⵏ ⵜⴷⵓⴽⵍⵉ ⵜⵓⵕⵓⴼⵉⵜ ⴰⵙⵙ ⵏ ⵍⴻⵅⵎⵉⵙ ⵙ ⵓⴱⵟⴰⵍ ⵡⴰⵔ ⵍⴻⵄⴹⵉⵍ ⵏ ⵓⵎⵜⴰⵡⴰ (ⵉⵜⵜⵉⴼⴰⵇ) ⵏ ⵜⵜⵊⴰⵕⴰ ⵜⵉⵍⴻⵍⵍⵉⵜ ⵏ ⵢⵉⴼⴰⵔⵉⵙⴻⵏ ⵏ ⵜⴼⴻⵍⵍⴰⵃⵜ ⴷ ⵢⵉⵙⴻⵍⵎⴰⵏ ⴳⴰⵔ ⵜⴷⵓⴽⵍⵉ ⵜⵓⵕⵓⴼⵉⵜ ⴷ ⵎⴻⵕⵕⵓⴽ ⴰⵢ ⵢⴻⵜⵜⵡⴰⵙⵜⴻⵏⵢⴰⵏ ⴷⴻⴳ ⵎⴻⵖⵔⴻⵙ ⵏ 2012.

« ⴰⵖⵜⴰⵙ (ⵇⴰⵔⴰⵔ) 2012/497/ⵓⴻ ⵏ ⵓⵙⴻⵇⵇⴰⵎⵓ (ⵓⵕⵓⴼⵉ) ⵏ 8 ⵎⴻⵖⵔⴻⵙ 2012 ⵢⴻⵔⵣⴰⵏ ⴰⵙⵜⴻⵏⵢⵉ ⵏ ⵓⵎⵜⴰⵡⴰ ⵙ ⵓⵎⴱⴰⴷⴷⴻⵍ ⵏ ⵜⴻⴱⵕⴰⵜⵉⵏ ⴳⴰⵔ ⵜⴷⵓⴽⵍⵉ ⵜⵓⵕⵓⴼⵉⵜ ⴷ ⵜⴳⴻⵍⴷⴰ ⵏ ⵎⴻⵕⵕⵓⴽ ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⵉⵃⴻⵣⵣⵉⴱⴻⵏ ⵏ ⵓⵙⵍⴻⵍⵍⴻⵎ ⴰⵎⵢⴰⵖ ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⵉⴼⴰⵔⵉⵙⴻⵏ (ⵎⴰⵏⵜⵓⴵⴰⵜ) ⵏ ⵜⴼⴻⵍⵍⴰⵃⵜ ⵢⴻⵜⵜⵡⴰⵀⴻⵢⵢⴰⵏ, ⵉⵙⴻⵍⵎⴰⵏ ⴷ ⵢⵉⴼⴰⵔⵉⵙⴻⵏ ⵏ ⵚⵚⵢⴰⴷⴰ ⵏ ⵢⵉⵍⴻⵍ, ⴰⵢ ⴷ-ⵢⵓⵖⴰⵍⴻⵏ ⴷⴻⴳ ⵢⵉⵎⵓⴽⴰⵏ ⵏ ⵢⵉⵒⵔⵓⵟⵓⴽⵓⵍⴻⵏ 1, 2 ⴷ 3 ⴷ ⵜⴻⵎⵔⵓⵣⵉⵏ-ⵏⵙⴻⵏ ⴷ ⵢⵉⴱⴻⴷⴷⵉⵍⴻⵏ ⵏ ⵓⵎⵜⴰⵡⴰ ⵓⵕⵓⴼⵉ-ⴰⴳⵔⴰⴽⴰⵍⴰⵏ ⴰⵢ ⴷ-ⵢⴻⵙⴱⴻⴷⴷⴻⵏ ⵜⵉⵛⵛⵓⵔⴽⴰ ⴳⴰⵔ ⵜⴻⵎⵖⵉⵡⴰⵏⵉⵏ ⵜⵓⵕⵓⴼⵉⵢⵉⵏ ⴷ ⵢⵉⵡⴰⵏⴰⴽⴻⵏ-ⵏⵙⴻⵏ ⵉⵎⴰⵙⵍⴰⴹⴻⵏ, ⵙⴻⴳ ⵢⵉⴷⵉⵙ, ⴷ ⵜⴳⴻⵍⴷⴰ ⵏ ⵎⴻⵕⵕⵓⴽ, ⵙⴻⴳ ⵢⵉⴷⵉⵙ ⵏⵉⴹⴻⵏ, ⵢⴻⵜⵜⵡⴰⴱⵟⴻⵍ ⵉⵎⵉ ⴰⵢ ⴷ-ⵢⴻⴷⴷⴰ ⴷⴻⴳ ⵓⵎⵜⴰⵡⴰ-ⴰ ⵡⴰⴽⴰⵍ ⵏ ⵓⵏⴻⵥⵔⵓⴼ ⵓⵜⵔⵉⵎ (ⵢⴻⵜⵜⵡⴰⴹⴹⴼⴻⵏ) », ⵖⴻⴼ ⴰⴽⴽⴻⵏ ⴰⵢ ⴷ-ⵢⴻⴷⴷⴰ ⴷⴻⴳ ⵍⴻⵃⴽⴻⵎ ⵏ ⵛⵛⵕⴻⵄ ⴰⵢ ⴷ-ⵢⴻⴼⴼⵖⴻⵏ ⴰⵙⵙ ⵏ ⵍⴻⵅⵎⵉⵙ 10 ⴷⵓⵊⴻⵎⴱⴻⵕ 2015.

ⵖⴻⴼ ⵍⴻⵃⵙⴰⴱ ⵏ ⵍⴻⵃⴽⴻⵎ-ⴰ, ⵛⵛⵕⴻⵄ ⵏ ⵜⴷⵓⴽⵍⵉ ⵜⵓⵕⵓⴼⵉⵜ ⵢⴻⵜⵜⵡⴰⵍⵉ ⴷ ⴰⴽⴽⴻⵏ ⵜⴰⴷⵓⴽⵍⵉ ⵜⵓⵕⵓⴼⵉⵜ ⵓⵔ ⵜⴻⵙⵙⴻⴼⵇⴻⴷ ⴰⵔⴰ ⵎⴰ ⵢⴻⵍⵍⴰ ⵍⵖⴻⵍⵍⴰⵜ ⵜⵉⴳⴰⵎⴰⵏⵉⵏ ⵏ ⵓⵏⴻⵥⵔⵓⴼ ⵓⵜⵔⵉⵎ ⵢⴻⵍⵍⴰⵏ ⴷⴷⴰⵡ ⵜⵓⴹⴹⴼⴰ ⵜⴰⵎⴻⵕⵕⵓⴽⵉⵜ ⴰⴷ ⴷ-ⵙⴼⴰⵢⴷⵉⵏ ⵙⴻⴳ-ⵙⴻⵏⵜ ⵢⵉⵎⴻⵣⴷⴰⵖⴻⵏ ⵉⵚⴻⵃⵔⴰⵡⵉⵢⴻⵏ.

ⵉⵎⴻⵣⴷⴰⵖⴻⵏ ⵏ ⵓⵏⴻⵥⵔⵓⴼ ⵓⵜⵔⵉⵎ ⵓⵔ ⵜⵜⵡⴰⵛⴰⵡⵕⴻⵏ ⴰⵔⴰ ⵖⴻⴼ ⵓⵎⵜⴰⵡⴰ-ⴰ, ⵢⴻⵔⵏⴰ ⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⵏⵏⴰⵏ-ⴷ ⴷ ⴰⴽⴽⴻⵏ ⵓⵔ ⵢⴻⵙⵙⴻⴼⴽ ⴰⵔⴰ ⴰⴷ ⴷ-ⵉⵍⵉⵏ ⵍⴻⵛⵖⴰⵍ ⴰⵎ ⵡⵉ ⴷⴻⴳ ⵡⴰⴽⴰⵍ ⴰⵚⴻⵃⵔⴰⵡⵉ ⵡⴰⵔ ⵎⴰ ⵇⴻⴱⵍⴻⵏ ⵢⵉⵎⴻⵣⴷⴰⵖⴻⵏ ⵉⵚⴻⵃⵔⴰⵡⵉⵢⴻⵏ.

ⴰⵛⵃⴰⵍ ⴷ ⵜⵉⴽⴽⴻⵍⵜ ⴰⵢ ⴷ-ⵏⵏⴰⵏ ⵢⴰⴳⵉ ⵢⵉⵎⵏⴰⴷⵉⵢⴻⵏ ⴷⴻⴳ ⵍⵇⴰⵏⵓⵏ ⴰⴳⵔⴰⵖⵍⴰⵏ ⴷ ⴰⴽⴽⴻⵏ ⵜⴰⴷⵓⴽⵍⵉ ⵜⵓⵕⵓⴼⵉⵜ ⵜⴻⵔⴽⴻⴹ ⵍⵇⴰⵏⵓⵏ ⴰⴳⵔⴰⵖⵍⴰⵏ ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⴰⵏⴻⵥⵔⵓⴼ ⵓⵜⵔⵉⵎ ⵉⵎⵉ ⴰⵢ ⵜⴳⴰ ⴰⵎⵜⴰⵡⴰ-ⴰ.

ⴰⴷⵓⵎⴰⵔⵓ ⴰⵎⴰⵜⵓ ⴰⵇⴱⵓⵔ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⴷ-ⵢⴻⵍⵀⴰⵏ ⴷ ⵜⴻⵎⵙⴰⵍ ⵏ ⵍⵇⴰⵏⵓⵏ, ⵀⴰⵏⵙ ⵛⵧⵔⴻⵍⵍ, ⵢⴻⵏⵏⴰ-ⴷ, ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⴰⵎⵜⴰⵡⴰ ⵏ ⵚⵚⵢⴰⴷⴰ ⵏ ⵢⵉⵙⴻⵍⵎⴰⵏ ⴳⴰⵔ ⵜⴷⵓⴽⵍⵉ ⵜⵓⵕⵓⴼⵉⵜ ⴷ ⵎⴻⵕⵕⵓⴽ ⴷ ⴰⴽⴽⴻⵏ « ⵉⴱⴰⵏ ⵚⵚⴻⵏⴼ-ⴰ ⵏ ⵢⵉⵎⵜⴰⵡⴰⵢⴻⵏ, ⵓⵔ ⵢⴻⵙⵙⴻⵎⴳⴻⵔⵔⴰⴷⴻⵏ ⴰⵔⴰ ⴳⴰⵔ ⵡⴰⵎⴰⵏ ⵏ ⵓⵏⴻⵥⵔⵓⴼ ⵓⵜⵔⵉⵎ ⴷ ⵡⵉⴷ ⵏ ⵎⴻⵕⵕⵓⴽ, ⵢⴻⵔⴽⴻⴹ ⵍⵇⴰⵏⵓⵏ ⴰⴳⵔⴰⵖⵍⴰⵏ ».