ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵜⵉⵖⵔⵉ ⵏ ⵢⵉⵎⴰⵣⴰⵏⴻⵏ ⵉⴱⵉⵍⵊⵉⴽⵉⵢⴻⵏ ⵉ ⵉ ⵓⵃⴱⴰⵙ ⵏ ⵓⵙⵙⴻⵏⵣⵉ ⵏ ⵙⵙⴻⵍⵄⴰ ⵏ ⵓⵏⴻⵥⵔⵓⴼ ⵓⵜⵔⵉⵎ ⵢⴻⵜⵜⵡⴰⵟⵟⴼⴻⵏ
ⴱⵔⵓⵅⴻⵍⵍⴻⵙ – ⵔⴼⴰⵏ ⴽⵔⴰ ⵏ ⵢⵉⵎⴰⵣⴰⵏⴻⵏ (ⵏⵓⵡⵡⴰⴱ) ⵉⴱⵉⵍⵊⵉⴽⵉⵢⴻⵏ ⵖⴻⴼ ⵜⴷⵓⴽⵍⵉ ⵜⵓⵕⵓⴼⵉⵜ ⴰⵢ ⵉⵖⴻⵜⵙⴻⵏ ⴰⴷ ⵜⴻⵔⵥ ⵍⴻⵃⴽⴻⵎ ⵏ ⵛⵛⵕⴻⵄ ⵏ ⵜⴷⵓⴽⵍⵉ ⵜⵓⵕⵓⴼⵉⵜ ⴰⵢ ⵉⴱⴻⵟⵍⴻⵏ, ⵓⵙⵙⴰⵏ-ⴰ ⴰⵢ ⵢⴻⵣⵔⵉⵏ, ⴰⵎⵜⴰⵡⴰ (ⵉⵜⵜⵉⴼⴰⵇ) ⵏ ⵜⴼⴻⵍⵍⴰⵃⵜ ⴳⴰⵔ ⵜⴷⵓⴽⵍⵉ ⵜⵓⵕⵓⴼⵉⵜ ⴷ ⵎⴻⵕⵕⵓⴽ (ⵢⴻⵜⵜⵡⴰⵙⵜⴻⵏⵢⴰⵏ ⴷⴻⴳ ⵎⴻⵖⵔⴻⵙ ⵏ 2012), ⵢⴻⵔⴳⴰ ⴳⵔⴻⵏ-ⴷ ⵜⵉⵖⵔⵉ ⵉ ⵓⵏⴰⴱⴰⴹ ⴰⴱⵉⵍⵊⵉⴽⵉ ⴰⴽⴽⴻⵏ ⴰⴷ ⵢⴻⴳⴷⴻⵍ ⴰⵙⵙⴻⵏⵣⵉ ⵏ ⵙⵙⴻⵍⵄⴰⵜ ⴰⵢ ⴷ-ⵢⴻⵜⵜⴰⵙⴻⵏ ⵙⴻⴳ ⵢⵉⴽⴰⵍⴻⵏ ⵢⴻⵜⵜⵡⴰⴹⴹⴼⴻⵏ ⵏ ⵓⵏⴻⵥⵔⵓⴼ ⵓⵜⵔⵉⵎ ⴰⵎⴰ ⴷⴻⴳ ⵙⵙⵓⵇ ⵏ ⴱⵉⵍⵊⵉⴽ, ⴰⵎⴰ ⴷⴻⴳ ⵜⴷⵓⴽⵍⵉ ⵜⵓⵕⵓⴼⵉⵜ.
« ⵏⴻⵙⵃⵉⵙⵙⵉⴼ ⵉⵎⵉ ⵜⴰⴷⵓⴽⵍⵉ ⵜⵓⵕⵓⴼⵉⵜ ⵜⴻⵔⵥⴰ ⵛⵛⵕⴻⵄ. ⴰⵅⴷⴰⵎ ⵏ ⵙⵙⴻⵍⵄⴰ ⴷⴻⴳ ⵡⴰⴽⴰⵍ ⵢⴻⵜⵜⵡⴰⴹⴹⴼⴻⵏ ⵓⵔ ⵢⴻⵍⵍⵉ ⴰⵔⴰ ⴷ ⵜⴰⵖⴰⵡⵙⴰ ⵢⴻⴼⴼⵖⴻⵏ ⵉ ⵓⴱⵔⵉⴷ, ⵡⴰⵏⴰⴳ ⵛⵛⵕⴻⵄ ⵢⴻⵏⵏⴰ-ⴷ ⴷ ⴰⴽⴽⴻⵏ ⴰⵢⴰ ⵢⴻⴼⴼⴻⵖ ⵉ ⵍⵇⴰⵏⵓⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵎⴰⵣⴰⵏ ⴱⴻⵏⵧⵉⵜ ⵀⴻⵍⵍⵉⵏⴳⵙ ⵏ ⵜⴻⴳⵔⴰⵡⵜ ⴻⵛⵧⵍⵧ-ⴳⵔⵧⴻⵏ ⴷⴻⴳ ⵢⵉⵡⴻⵏ ⵏ ⵓⵙⴽⴰⵙⵉ ⴷⴻⴳ ⵓⵎⵏⵉ (ⴱⴰⵔⵍⴰⵎⴰⵏ) ⴰⴱⵉⵍⵊⵉⴽⵉ ⵖⴻⴼ ⵓⴱⵟⴰⵍ ⵏ ⵓⵎⵜⴰⵡⴰ-ⴰ ⴰⵢⵖⴻⴼ ⵢⴻⵍⵍⴰ ⵓⵎⵊⴰⴷⴻⵍ.
« ⵢⴻⵣⵎⴻⵔ ⵍⵃⴰⵍ, ⴰⵀⴰⵜ, ⴰⴷ ⵏⴻⵙⵄⵓ ⴽⵔⴰ ⵏ ⵍⵍⵙⴰⵙ ⵏ ⵍⵇⴰⵏⵓⵏ ⵏⴻⵖ ⴰⴷ ⵏⴻⴳⴷⴻⵍ (ⵏⴰⵎⵏⴰⵄ) ⴰⵙⵙⴻⵏⵣⵉ ⵏ ⵙⵙⴻⵍⵄⴰⵜ-ⴰ ⴷⴻⴳ ⵜⵎⵓⵔⵜ-ⵏⵏⴻⵖ ⴷ ⵜⴷⵓⴽⵍⵉ ⵜⵓⵕⵓⴼⵉⵜ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ, ⴰⵎ ⵡⴰⴽⴽⴻⵏ ⴰⵢ ⴷ-ⵉⵡⴻⴽⴽⴻⴷ ⴷ ⴰⴽⴽⴻⵏ ⵢⴻⵙⵙⴻⴼⴽ ⴰⵙⵙⴰⵖⴻⵏ (ⵄⴰⵍⴰⵇⴰⵜ) ⴳⴰⵔ ⵜⴷⵓⴽⵍⵉ ⵜⵓⵕⵓⴼⵉⵜ ⴷ ⵎⴻⵕⵕⵓⴽ ⴰⴷ ⵉⵍⵉⵏ ⴷ ⴱⵏⴰⵏ ⵖⴻⴼ ⵍⵍⵙⴰⵙ ⵏ ⵜⴻⵣⴷⴻⴳ. « ⵎⴰⵛⴰ ⵢⴻⵜⵜⴱⴰⵏ-ⴷ ⴷ ⴰⴽⴽⴻⵏ ⵎⴰⵛⵉ ⴰⴽⴽⴰ ⴰⵢ ⵢⴻⵍⵍⴰ ⵍⵃⴰⵍ ⵖⴻⴼ ⵍⴻⵃⵙⴰⴱ ⵏ ⵛⵛⵕⴻⵄ ⵏ ⵜⴷⵓⴽⵍⵉ ⵜⵓⵕⵓⴼⵉⵜ ».
ⵛⵛⵕⴻⵄ ⵏ ⵜⴷⵓⴽⵍⵉ ⵜⵓⵕⵓⴼⵉⵜ ⵢⴻⵃⴽⴻⵎ-ⴷ, ⴰⵙⵙ ⵏ 10 ⴷⵓⵊⴻⵎⴱⴻⵕ ⵢⴻⵣⵔⵉⵏ, ⵖⴻⴼ ⵓⴱⵟⴰⵍ ⵡⴰⵔ ⵍⴻⵄⴹⵉⵍ ⵏ ⵓⵎⵜⴰⵡⴰ ⵏ ⵓⵙⵍⴻⵍⵍⵉ ⵏ ⵜⵜⵊⴰⵕⴰ ⵏ ⵙⵙⴻⵍⵄⴰ ⵏ ⵜⴼⴻⵍⵍⴰⵃⵜ ⴳⴰⵔ ⵎⴻⵕⵕⵓⴽ ⴷ ⵜⴷⵓⴽⵍⵉ ⵜⵓⵕⵓⴼⵉⵜ ⵉⵎⵉ ⴰⵎⵜⴰⵡⴰ-ⴰ ⵉⵃⵓⵣⴰ-ⴷ ⵓⵍⴰ ⴷ ⴰⴽⴰⵍ ⵢⴻⵜⵜⵡⴰⴹⴹⴼⴻⵏ ⵏ ⵓⵏⴻⵥⵔⵓⴼ ⵓⵜⵔⵉⵎ.
ⵛⵛⵕⴻⵄ ⵏ ⵜⴷⵓⴽⵍⵉ ⵜⵓⵕⵓⴼⵉⵜ ⵢⴻⵏⵏⴰ-ⴷ ⴷⴰⵖ, ⴷⴻⴳ ⵍⴻⵃⴽⴻⵎ-ⵏⵏⴻⵙ, ⴷ ⴰⴽⴽⴻⵏ ⴰⵙⴻⵇⵇⴰⵎⵓ ⵏ ⵜⴷⵓⴽⵍⵉ ⵜⵓⵕⵓⴼⵉⵜ ⵓⵔ ⵉⴳⵉ ⴰⵔⴰ ⵍⵡⴰⵊⴻⴱ-ⵏⵏⴻⵙ ⵢⴻⵔⵏⴰ ⵓⵔ ⵢⴻⵙⵙⴻⴼⵇⴻⴷ ⴰⵔⴰ ⵎⴰ ⵢⴻⵍⵍⴰ ⵜⵉⴱⵓⵖⴰⵔ ⵜⵉⴳⴰⵎⴰⵏⵉⵏ (ⵜⴰⵔⴰⵡⴰⵜ ⵟⴰⴱⵉⵄⵉⵢⵢⴰ) ⵏ ⵓⵏⴻⵥⵔⵓⴼ ⵓⵜⵔⵉⵎ ⵙⵜⴻⵏⴼⵄⴻⵏ ⵙⴻⴳ-ⵙⴻⵏⵜ ⵢⵉⵎⴻⵣⴷⴰⵖⴻⵏ ⵏ ⵡⴰⴽⴰⵍ-ⴰ.
