ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵜⵚⴻⵔⵔⴻⴼ ⵍⴻⵣⵣⴰⵢⴻⵔ 5 ⵏ ⵢⵉⵎⴻⵍⵢⴰⵕⴻⵏ ⵏ ⵢⵉⴷⵓⵍⴰⵕⴻⵏ ⵖⴻⴼ ⵓⵙⵙⵉⵣⴷⴻⴳ ⵏ ⵡⴰⵎⴰⵏ ⵙⴻⴳ 2000 ⵖⴻⵔ 2013

ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ - ⵜⴻⵙⵙⴻⴼⵜⵉ ⵍⴻⵣⵣⴰⵢⴻⵔ 450 ⵏ ⵢⵉⵎⴻⵍⵢⴰⵕⴻⵏ ⵏ ⵢⵉⴷⵉⵏⴰⵕⴻⵏ ⴷⴻ ⵍⴻⴱⵏⵉ ⵏ ⵢⵉⵙⴻⵏⴼⴰⵔⴻⵏ ⵏ ⵓⵖⵔⴰⵎ ⴷ ⵓⵙⵙⵉⵣⴷⴻⴳ ⵏ ⵡⴰⵎⴰⵏ ⴳⴰⵔ 2000 ⴷ 2013, ⵢⴻⵔⵏⴰ ⵍⴰ ⵜⴻⵙⵙⴰⵔⴰⵎ ⴰⴷ ⵜⴻⵙⵙⵉⵡⴻⴹ ⵙⴻⴳ-ⴰ ⵖⴻⵔ 2030 ⵖⴻⵔ ⵜⴻⴳⵏⵉⵜ ⴰⵢⴷⴻⴳ ⵓⵔ ⵜⴻⵜⵜⵣⴻⵍⵍⵉ ⴰⵔⴰ ⴰⴽⴽ ⴰⵎⴰⵏ ⵢⵓⵎⵙⴻⵏ ⵖⴻⵔ ⵓⴳⴰⵎⴰ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴰⵙⵙ ⵏ ⵍⴻⵜⵏⵉⵢⴻⵏ ⵓⵖⵍⵉⴼ ⵏ ⵜⴻⵖⴱⵓⵍⴰ (ⵎⴰⵡⴰⵔⵉⴷ) ⵏ ⵡⴰⵎⴰⵏ ⴷ ⵜⵡⴻⵏⵏⴰⴹⵜ.

ⵉⴷⵔⵉⵎⴻⵏ ⴰⵢ ⴷ-ⵢⴻⵜⵜⵡⴰⵃⴰⵣⴻⵏ ⵉ ⵓⵖⵔⴰⵎ ⴷ ⵓⵙⵙⵉⵣⴷⴻⴳ ⵏ ⵡⴰⵎⴰⵏ ⵡⵡⴹⴻⵏ ⵖⴻⵔ 450 ⵏ ⵢⵉⵎⴻⵍⵢⴰⵕⴻⵏ ⵏ ⵢⵉⴷⵉⵏⴰⵕⴻⵏ ⴳⴰⵔ 2000 ⴷ 2013, ⵖⴻⴼ ⵍⴻⵃⵙⴰⴱ ⵏ ⵢⵉⵡⴻⵏ ⵏ ⵍⴽⴰⵖⴻⴹ ⵏ ⵓⵣⴻⵏⵣⵉⵖ ⴰⵖⴻⵍⵏⴰⵡ ⵏ ⵓⵙⵏⴻⴼⵍⵉ ⵏ ⵓⵙⵙⵉⵣⴷⴻⴳ (ⵙⵏⴷⴰ) ⴰⵢ ⴷ-ⵢⴻⵜⵜⵓⵏⴻⴼⴽⴻⵏ ⵉ ⵜⵖⴻⵎⵙⴰ ⴷⴻⴳ ⵢⵉⵡⴻⵏ ⵏ ⵡⴰⵙⵙ ⴰⵜⴻⴽⵏⵉ ⵖⴻⴼ ⵓⴽⴻⵎⵎⴻⵍ ⵏ ⵜⴻⵣⵔⴰⵡⵜ-ⴰ (ⴷⵉⵔⴰⵙⴰ) ⵢⴻⵔⵣⴰⵏ ⴰⵣⴻⵏⵣⵉⵖ (ⵎⵓⵅⴰⵟⵟⴰⵟ) ⴰⵢ ⵍⴰ ⴷ-ⵢⴻⵜⵜⵉⵍⵉⵏ ⵙ ⵓⵎⵄⴰⵡⴻⵏ ⴷ ⵜⴷⵓⴽⵍⵉ ⵜⵓⵕⵓⴼⵉⵜ (ⴻⴰⵓ ⵉⵉ).

ⵉⵙⵙⴻⴼⵜⵉⵢⴻⵏ-ⴰ ⵙⵙⴻⴷⴷⴰⵏ ⵎⵍⵉⵃ ⵖⴻⵔ ⵙⴷⴰⵜ ⵜⵓⵇⵇⵏⴰ ⵏ ⵢⵉⵎⴻⵣⴷⴰⵖⴻⵏ ⵖⴻⵔ ⵢⵉⵥⴻⴹⵡⴰⵏ ⵏ ⵓⵖⵔⴰⵎ ⴷ ⵓⵙⵙⵉⵣⴷⴻⴳ ⵏ ⵡⴰⵎⴰⵏ, ⵢⴻⵔⵏⴰ ⵢⴻⵡⵡⴻⴹ ⵡⴰⵢⴰ ⵖⴻⵔ 94% ⴷⴻⴳ ⵜⴻⵎⵏⴰⴹⵉⵏ ⵜⵉⵎⴷⵉⵏⴰⵏⵉⵏ ⴷ 80% ⴷⴻⴳ ⵜⴻⵎⵏⴰⴹⵉⵏ ⵏ ⵓⴳⴰⵎⴰ.

ⵍⴻⵣⵣⴰⵢⴻⵔ ⵜⴻⵙⵄⴰ, ⵉⵎⵉⵔ-ⴰ, 171 ⵏ ⵜⴻⵖⵙⴰⵔ (ⵎⴰⵃⴰⵟⵟⴰⵜ) ⵏ ⵓⵙⵙⵉⵣⴷⴻⴳ ⵏ ⵡⴰⵎⴰⵏ ⵢⵓⵎⵙⴻⵏ ⵢⴻⵔⵏⴰ ⵙⵄⴰⵏⵜ ⵜⴰⵣⵎⴻⵔⵜ ⵏ ⵓⵊⴻⵎⵎⴰⵍ ⵏ 900 ⵏ ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⵎⵉⵜⵔⴻⵏ ⵉⴳⴰⵙⴰⵙⴻⵏ (ⵎ3), ⵢⵉⵍⵉ ⴷⴻⴳ 2000, ⵜⴻⵍⵍⴰ ⵜⴻⵙⵄⴰ ⴰⵍⴰ 10 ⵏ ⵜⴻⵖⵙⴰⵔ.

« ⵓⵙⵙⵉⵙⴻⵏ-ⴰ (ⵎⴰⴵⵀⵓⴷⴰⵜ) ⴵⴵⴰⵏ ⵜⴰⵎⵓⵔⵜ ⴰⴷ ⵜⴻⵙⵙⴻⵎⵖⴻⵔ ⵜⵉⵣⴻⵎⵎⴰⵔ-ⵏⵏⴻⵙ ⵏ ⵓⵙⵙⵉⵣⴷⴻⴳ ⵏ ⵡⴰⵎⴰⵏ. ⴷⴻⴳ 2000, ⵜⴻⵍⵍⴰ ⵜⴻⵙⵄⴰ ⵜⴰⵣⵎⴻⵔⵜ ⵏ ⵓⵖⵔⴰⵎ ⵏ ⵡⴰⵎⴰⵏ ⵢⵓⵎⵙⴻⵏ ⵉ 1,3 ⴷ ⴰⵎⴻⵍⵢⵓⵏ ⵏ ⵢⵉⵎⴻⵣⴷⴰⵖⴻⵏ, ⵎⴰⵛⴰ ⴷⴻⴳ 2013, ⵜⴻⵡⵡⴻⴹ ⴰⴷ ⵜⴻⵙⵄⵓ ⵜⴰⵣⵎⴻⵔⵜ ⵏ ⵓⵖⵔⴰⵎ ⵏ ⵡⴰⵎⴰⵏ ⵉ 12,4 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⵎⴻⵣⴷⴰⵖⴻⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵍⴽⴰⵖⴻⴹ-ⴰ ⴰⵢ ⴷ-ⵉⵀⴻⵢⵢⴰ ⵓⵖⵍⵉⴼ ⴷ ⵜⴷⵓⴽⵍⵉ ⵜⵓⵕⵓⴼⵉⵜ.

ⴷ ⴰⵛⵓ ⴽⴰⵏ, ⴰⵖⵔⴰⵎ ⴷ ⵓⵙⵙⵉⵣⴷⴻⴳ ⵏ ⵡⴰⵎⴰⵏ ⵎⴰⵣⴰⵍ-ⵉⵜ ⴷ ⴰⵛⵔⵉⵔⵔⴻⵡ ⴰⵎⴻⵇⵔⴰⵏ ⴰⵢ ⵢⴻⵙⵙⴻⴼⴽ ⴰⴷ ⵜ-ⵜⵇⴰⴱⴻⵍ ⵍⴻⵣⵣⴰⵢⴻⵔ ⴷⴻⴳ 15 ⵏ ⵢⵉⵙⴻⴳⴳⴰⵙⴻⵏ ⴰⵢ ⴷ-ⵢⴻⵜⵜⴻⴷⴷⵓⵏ ⵙ ⵜⵓⵇⵇⵏⴰ ⵏ ⵡⴰⴽⴽ ⵉⵎⴻⵣⴷⴰⵖⴻⵏ ⵏ ⵜⵎⵓⵔⵜ ⵖⴻⵔ ⵓⵥⴻⴹⴹⴰ ⵏ ⵓⵖⵔⴰⵎ ⵏ ⵡⴰⵎⴰⵏ ⴷ ⵡⵉⵏ ⵏ ⵓⵙⵙⵉⵣⴷⴻⴳ, ⵢⴻⵔⵏⴰ ⴰⵔⵎⴰ ⴷ ⴰⵙⵙ-ⵏⵏⵉ ⴰⴷ ⵜⴻⵙⵙⵉⵡⴻⴹ ⵍⴻⵣⵣⴰⵢⴻⵔ ⵖⴻⵔ ⵢⵉⵙⵡⵉ ⵡⵉⵙ 6 ⵏ ⵓⵙⵏⴻⴼⵍⵉ (ⵜⴰⵏⵎⵉⵢⴰ) ⴰⴷⵓⵎⴰⵏ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⵉ 2030 ⵢⴻⵔⵣⴰⵏ ⵜⵓⵇⵇⵏⴰ ⵏ ⵡⴰⴽⴽ ⵉⵎⴻⵣⴷⴰⵖⴻⵏ ⵖⴻⵔ ⵓⵥⴻⴹⴹⴰ ⵏ ⵡⴰⵎⴰⵏ ⵏ ⵜⵉⵙⵙⵉⵜ ⴷ ⵡⵉⵏ ⵏ ⵓⵖⵔⴰⵎ ⵏ ⵡⴰⵎⴰⵏ ⵢⵓⵎⵙⴻⵏ.