ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵉⵃⴻⵣⵣⵉⴱⴻⵏ ⴷ ⵉⵎⴻⵇⵔⴰⵏⴻⵏ ⵉ ⵓⵔⴳⴰⵍ ⵏ ⵓⴱⵔⵉⴷ ⵉ ⵢⵉⵔⴻⴱⵔⴰⴱⴻⵏ ⴰⵢ ⴷ-ⵢⴻⵜⵜⴰⵙⴻⵏ ⵖⴻⵔ ⵜⴻⴼⵔⵉⵇⵜ
ⵡⴻⵀⵕⴰⵏ – ⵢⴻⵏⵏⴰ-ⴷ ⵢⵉⵎⵡⴻⴽⴽⴻⵍ ⵉ ⵜⴰⵍⵡⵉⵜ ⴷ ⵜⵖⴻⵍⵍⵉⵙⵜ ⴷⴻⴳ ⵜⴷⵓⴽⵍⵉ ⵜⴰⴼⵔⵉⵇⵉⵜ, ⵙⵎⴰⵉⵍ ⵛⵀⴻⵔⴳⵓⵉ, ⴰⵙⵙ ⵏ ⵍⴻⵜⵏⵉⵢⴻⵏ ⴷⴻⴳ ⵡⴻⵀⵕⴰⵏ ⴷ ⴰⴽⴽⴻⵏ ⵜⵜⵡⴰⴷⴷⵎⴻⵏ ⵢⵉⵃⴻⵣⵣⵉⴱⴻⵏ ⴷ ⵉⵎⴻⵇⵔⴰⵏⴻⵏ ⵉ ⵓⵔⴳⴰⵍ ⵏ ⵓⴱⵔⵉⴷ ⵉ ⵡⵓⵖⴰⵍ ⵏ ⵢⵉⵔⴻⴱⵔⴰⴱⴻⵏ ⵖⴻⵔ ⵜⵎⵓⵔⴰ-ⵏⵙⴻⵏ ⵜⵉⵏⴻⵚⵍⵉⵢⵉⵏ.
« ⵜⵉⵎⵓⵔⴰ ⵏ ⵜⴻⴼⵔⵉⵇⵜ, ⵍⴰⴷⵖⴰ ⵜⵉⴷ ⴰⵢⵙⴻⴳ ⵇⴻⵍⵄⴻⵏ ⵢⵉⴵⵉⵀⴰⴷⵉⵢⴻⵏ, ⴷⴷⵎⴻⵏⵜ ⵉⵃⴻⵣⵣⵉⴱⴻⵏ ⴷ ⵉⵎⴻⵇⵔⴰⵏⴻⵏ ⵉ ⵓⵔⴳⴰⵍ ⵏ ⵓⴱⵔⵉⴷ ⵉ ⵢⵉⵔⴻⴱⵔⴰⴱⴻⵏ-ⴰ ⴰⵢ ⵢⴻⴱⵖⴰⵏ ⴰⴷ ⴷ-ⵓⵖⴰⵍⴻⵏ ⵖⴻⵔ ⵜⵎⵓⵔⴰ-ⵏⵙⴻⵏ ⵜⵉⵏⴻⵚⵍⵉⵢⵉⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵉⵡⴻⴽⴽⴻⴷ ⵎⴰⵙⵙ ⵛⵀⴻⵔⴳⵓⵉ ⴷⴻⴳ ⵢⵉⵡⴻⵜ ⵏ ⵜⵙⴻⵖⵔⵓⵜ (ⵜⴰⵚⵔⵉⵃ) ⵉ ⵜⵏⴻⴳⴳⴰ ⵏ ⵢⵉⵙⴰⵍⴰⵏ ⵏ ⵍⴻⵣⵣⴰⵢⴻⵔ ⴷⴻⴳ ⵢⵉⵊⵉⴼⴻⵕ ⵏ ⵓⵙⴰⵔⴰⴳ ⵡⵉⵙ 3 ⵏ ⵓⵙⵡⵉⵔ ⵓⵏⵏⵉⴳ ⵖⴻⴼ ⵜⴰⵍⵡⵉⵜ ⴷ ⵜⵖⴻⵍⵍⵉⵙⵜ ⴷⴻⴳ ⵜⴻⴼⵔⵉⵇⵜ.
ⵉⵃⴻⵣⵣⵉⴱⴻⵏ-ⴰ ⴷⴷⵎⴻⵏⵜ-ⵜⴻⵏ ⵜⵎⵓⵔⴰ ⵜⵉⴼⵔⵉⵇⵉⵢⵉⵏ ⴷⴻⴳ ⵓⴽⴰⵜⴰⵔ (ⵉⵟⴰⵔ) ⵏ ⵓⵎⵄⴰⵡⴻⵏ ⵏ ⵜⴷⵓⴽⵍⵉ ⵜⴰⴼⵔⵉⵇⵉⵜ ⵍⴰⴷⵖⴰ ⵉⵎⵉ ⴰⵢ ⴷ-ⵜⴻⵍⵍⴰ ⵜⵓⴳⴷⵉ ⵙⴻⴳ ⵡⵓⵖⴰⵍ ⵏ ⵢⵉⴵⵉⵀⴰⴷⵉⵢⴻⵏ ⵖⴻⵔ ⵜⴻⴼⵔⵉⵇⵜ ⴷⴻⴼⴼⵉⵔ ⵜⴻⴷⵢⴰⵏⵉⵏ-ⴰ ⵜⵉⵏⴻⴳⴳⵓⵔⴰ ⴰⵢ ⵍⴰ ⴷ-ⵢⴻⵜⵜⵉⵍⵉⵏ ⴷⴻⴳ ⵓⴳⵎⵓⴹ (ⵛⵛⴻⵔⵇ) ⴰⵍⴻⵎⵎⴰⵙ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵉⵡⴻⴽⴽⴻⴷ.
ⴷⵖⴰ ⴷⴻⴳ ⵜⴻⵎⵙⴰⵍⵜ-ⴰ, ⵢⴻⵏⵏⴰ-ⴷ ⵎⴰⵙⵙ ⵛⵀⴻⵔⴳⵓⵉ ⴷ ⴰⴽⴽⴻⵏ ⴰⴽⴰⵍⴰ (ⵎⴰⵙⴰⵔ) ⵏ ⴵⵉⴱⵓⵜⵉ ⵢⴻⵙⵄⴰ ⴰⵣⴰⵍ, ⵢⴻⵔⵏⴰ ⴰⴽⴰⵍⴰ-ⴰ ⴷ ⵜⵜⴰⵡⵉⵍ ⵏⵉⴹⴻⵏ ⴰⴷ ⵜⴻⵙⵙⴻⵇⴷⴻⵛ ⵜⴻⴼⵔⵉⵇⵜ ⴷⴻⴳ ⵓⵏⵔⴰⵔ ⵏ ⵓⵎⵄⴰⵡⴻⵏ ⴰⵖⴻⵍⵍⵉⵙⴰⵏ (ⴰⵎⵏⵉ) ⴷ ⵓⵎⴱⴰⴷⴷⴻⵍ ⵏ ⵡⵓⵎⵍⴰⵏ (ⵉⵙⵜⵉⵅⴱⴰⵔⴰⵜ) ⵖⴻⴼ ⵡⴰⵢⴻⵏ ⴰⵢ ⵢⴻⵙⵙⴻⴼⴽⴻⵏ ⴰⴷ ⵢⴻⵜⵜⵡⴻⴳ ⴷⴻⴳ ⵜⴻⴼⵔⵉⵇⵜ ⵉ ⵓⴹⵎⴰⵏ ⵏ ⵜⵖⴻⵍⵍⵉⵙⵜ.
« ⵜⵜⴰⵡⵉⵍ-ⴰ ⴰⵢ ⵢⴻⵔⵣⴰⵏ ⵜⵉⵎⵓⵔⴰ ⵏ ⵓⴳⵎⵓⴹ ⵏ ⵜⴻⴼⵔⵉⵇⵜ ⴷ ⵢⵉⵡⴻⵏ ⵙⴻⴳ ⵜⵜⴰⵡⵉⵍⴰⵜ ⵢⴻⵙⵄⴰⵏ ⴰⵣⴰⵍ ⵉ ⵓⵔⴳⴰⵍ ⵏ ⵓⴱⵔⵉⴷ ⵉ ⵜⵓⴳⴳⵣⵉⵡⵉⵏ (ⵜⴰⵀⴷⵉⴷⴰⵜ) ⵏ ⵡⵓⵖⴰⵍ ⵏ ⵢⵉⴵⵉⵀⴰⴷⵉⵢⴻⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵉⵡⴻⴽⴽⴻⴷ.
