ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵢⴻⵏⵇⴻⵙ ⵡⴰⴵⴰⵡ ⵏ ⵙⵙⴽⴻⵕ ⵙ 20% ⴷⴻⴳ 11 ⵏ ⵡⴰⵢⵢⵓⵔⴻⵏ

ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – ⵢⴻⵏⵇⴻⵙ ⵡⴰⴵⴰⵡ ⵏ ⵙⵙⴽⴻⵕ ⵙ ⵡⵓⴳⴰⵔ ⵏ 20% ⴷⴻⴳ ⵙⵙⵓⵎⴰ ⴷ 6% ⴷⴻⴳ ⵜⴻⵙⵎⴻⴽⵜⴰ (ⴽⴰⵎⵎⵉⵢⵢⴰ) ⴷⴻⴳ 11 ⵏ ⵡⴰⵢⵢⵓⵔⴻⵏ ⵉⵎⴻⵣⵡⵓⵔⴰ ⵏ ⵓⵙⴻⴳⴳⴰⵙ ⵏ 2015 ⵎⴰ ⵏⵇⵓⵔⴻⵏ ⵜⴰⵍⵍⵉⵜ-ⴰ ⵖⴻⵔ ⵢⵉⵍⵉⵏⴷⵉ (2014) ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⵜⴻⴷⵡⴰⵏⵜ ⵉ ⵜⵏⴻⴳⴳⴰ ⵏ ⵢⵉⵙⴰⵍⴰⵏ ⵏ ⵍⴻⵣⵣⴰⵢⴻⵔ.

ⵙⴻⴳ ⵢⴻⵏⵏⴰⵢⴻⵔ ⵖⴻⵔ ⵜⴳⴰⵔⴰ ⵏ ⵏⵡⴻⵎⴱⴻⵕ, ⵢⴻⵏⵇⴻⵙ ⵡⴰⴵⴰⵡ ⵏ ⵙⵙⴽⴻⵕ (ⵏ ⵓⴱⵉⵟⵔⴰⴱ, ⴰⵖⴰⵏⵉⵎ ⵏ ⵙⵙⴽⴻⵕ, ⴰⵙⵉⵔⵓ ⵏ ⵓⵍⴰⴽⵟⵓⵣ ⴷ ⵓⵍⴰⴽⵟⵓⵣ ⴰⵇⵓⵔⴰⵏ) ⵖⴻⵔ 654,68 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⴷⵓⵍⴰⵕⴻⵏ, ⵢⵉⵍⵉ ⴷⴻⴳ ⵜⴰⵍⵍⵉⵜ-ⵏⵏⵉ ⴷⴻⴳ 2014, ⵢⴻⵙⵇⴰⵎ-ⴷ ⵡⴰⴵⴰⵡ ⵏ ⵙⵙⴽⴻⵕ 825,15 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⴷⵓⵍⴰⵕⴻⵏ (ⴷ ⴰⵏⵇⴰⵙ ⵙ 20,66%), ⵖⴻⴼ ⵍⴻⵃⵙⴰⴱ ⵏ ⵡⴰⵎⵎⴰⵙ ⴰⵖⴻⵍⵏⴰⵡ ⵏ ⵜⵙⴻⵏⵙⴻⵍⴽⵉⵎⵜ ⴷ ⵜⴰⴷⴷⴰⴷⴰⵏⵉⵏ ⵏ ⵜⴻⴷⵡⴰⵏⵜ (ⵛⵏⵉⵙ).

ⵜⴰⵙⵎⴻⴽⵜⴰ ⵏ ⵡⴰⴵⴰⵡ ⵏ ⵙⵙⴽⴻⵕ ⵜⴻⵏⵇⴻⵙ-ⴷ ⵖⴻⵔ 1,71 ⴷ ⴰⵎⴻⵍⵢⵓⵏ ⵏ ⵢⵉⵟⵓⵏⴻⵏ, ⵢⵉⵍⵉ ⴷⴻⴳ 2014, ⵜⴰⵙⵎⴻⴽⵜⴰ-ⴰ ⵜⴻⵡⵡⴻⴹ ⵖⴻⵔ 1,83 ⴷ ⴰⵎⴻⵍⵢⵓⵏ ⵏ ⵢⵉⵟⵓⵏⴻⵏ (ⴷ ⴰⵏⵇⴰⵙ ⵙ 6,62%).

ⵜⴰⴼⴰⵜⵓⵕⵜ-ⴰ ⵜⴻⵏⵇⴻⵙ-ⴷ ⵖⴻⴼ ⵍⴵⴰⵍ ⵏ ⵓⵏⵇⴰⵙ ⵏ ⵙⵙⵓⵎⴰ ⵏ ⵙⵙⴽⴻⵕ ⴰⵣⵓⴱⴰⵖ ⴷ ⵙⵙⴽⴻⵕ ⴰⵎⴻⵍⵍⴰⵍ ⴷⴻⴳ ⵙⵙⵓⵇ ⴰⵎⴰⴹⵍⴰⵏ ⵖⴻⴼ ⵍⴵⴰⵍ ⵏ ⵓⵖⴻⵍⵍⵓⵢ ⴷⴻⴳ ⵙⵙⵓⵎⴰ ⵏ ⵓⵇⴰⵔⵉⴹ (ⵄⵓⵎⵍⴰ) ⴰⴱⵔⵉⵣⵉⵍⵉ ⵖⴻⴼ ⵍⴻⵃⵙⴰⴱ ⵏ ⵓⴷⵓⵍⴰⵕ ⴰⵎⴰⵔⵉⴽⴰⵏⵉ ⴷ ⵍⵖⴻⵍⵍⴰ ⵢⴻⵍⵀⴰⵏ ⵏ ⵓⵖⴰⵏⵉⵎ ⵏ ⵙⵙⴽⴻⵕ.

ⴱⵔⵉⵣⵉⵍ ⴷ ⵏⴻⵜⵜⴰⵜ ⴰⵢ ⴷ ⵜⴰⵏⴼⴰⵔⴰⵙⵜ (ⵎⵓⵏⵜⵉⴵⴰ) ⵜⴰⵎⴻⵣⵡⴰⵔⵓⵜ ⴰⴽⴽ ⵏ ⵙⵙⴽⴻⵕ ⴷⴻⴳ ⵓⵎⴰⴹⴰⵍ ⵢⴻⵔⵏⴰ ⵍⴰ ⵜⴻⵙⵙⴻⴼⵔⴰⵢ ⴰⴷ ⵜⴻⵙⵙⵉⵡⴻⴹ ⵖⴻⵔ ⵍⵖⴻⵍⵍⴰ ⵏ 604 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⵟⵓⵏⴻⵏ ⵏ ⵙⵙⴽⴻⵕ ⵉ ⵓⵙⴻⴳⴳⴰⵙ-ⴰ ⵏ 2015-2016, ⴷ ⵍⵖⴻⵍⵍⴰ ⴰⴷ ⵉⵍⵉⵏ ⴷ ⴰⴽⵍⵉⵙ (ⵔⴰⵇⵎ ⵇⵉⵢⴰⵙⵉ). 80% ⵙⴻⴳ ⵙⵙⴽⴻⵕ ⵏ ⵓⵎⴰⴹⴰⵍ ⵢⴻⵜⵜⴻⴽⴽ-ⴷ ⵙⴻⴳ ⵓⵖⴰⵏⵉⵎ ⵏ ⵙⵙⴽⴻⵕ.

ⴰⵢⴻⵏ ⴰⵢ ⵢⴻⵙⵏⴻⵇⵙⴻⵏ ⴷⴰⵖ ⵙⵙⵓⵎⴰ ⵏ ⵙⵙⴽⴻⵕ ⴷⴻⴳ ⵓⵎⴰⴹⴰⵍ ⴷ ⴰⴼⴰⵔⴻⵙ (ⵉⵏⵜⴰⴵ) ⵏ ⵙⵙⴽⴻⵕ ⴷⴻⴳ ⵍⵀⴻⵏⴷ ⴰⵢ ⵢⵓⵖⴰⵍⴻⵏ ⴷ ⵜⴰⵏⴼⴰⵔⴰⵙⵜ ⵜⵉⵙ ⵙⵏⴰⵜ ⵜⴰⵎⴻⵇⵔⴰⵏⵜ ⴰⴽⴽ ⴷⴻⴳ ⵓⵎⴰⴹⴰⵍ, ⵢⴻⵔⵏⴰ ⵍⴰ ⵜⴻⵙⵙⴻⴼⵔⴰⵢ ⴰⴷ ⵜⴻⵃⴱⴻⵙ ⴰⴵⴰⵡ ⵏ ⵙⵙⴽⴻⵕ ⴷⴻⴳ 2016.