ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵎⴰⵍⵉ: ⵢⴻⵜⵜⵡⴰⵙⵜⴻⵏⵢⴰ ⵓⵎⵜⴰⵡⴰ ⵙ ⵡⴰⵣⴰⵍ-ⵏⵏⴻⵙ ⴷⴻⴳ 2015
ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – ⵜⴰⵎⵓⵔⵜ ⵏ ⵎⴰⵍⵉ ⴰⵢ ⵉⵣⴻⴷⵔⴻⵏ, ⵙⴻⴳ 2012, ⴷⴻⴳ ⵜⴻⴳⵏⵉⵜ ⵏ ⵛⵛⵡⴰⵍ ⴰⵎⴻⵇⵔⴰⵏ, ⵜⴻⴼⵔⴰ ⵜⴰⵍⵓⴼⵜ-ⵏⵏⴻⵙ ⴷⴻⴳ 2015 ⵙ ⵓⵙⵜⴻⵏⵢⵉ ⵏ ⵓⵎⵜⴰⵡⴰ (ⵉⵜⵜⵉⴼⴰⵇ) ⵏ ⵓⵎⵙⵓⵖⴰⵍ ⴷ ⵜⴰⵍⵡⵉⵜ ⵉ ⵍⵎⴻⵏⴷ ⵏ ⵓⵙⵙⴻⵏⵙⵉ ⵏ ⵜⵎⴻⵙ ⴰⵢ ⵢⴻⵙⵡⴰⵖⴻⵏ ⴰⴳⴰⴼⴰ (ⵛⴰⵎⴰⵍ) ⵏ ⵜⵎⵓⵔⵜ-ⴰ.
ⴷⴻⴼⴼⵉⵔ ⵇⵔⵉⴱ ⴰⵙⴻⴳⴳⴰⵙ ⵏ ⵍⴻⵎⵛⴰⵡⵕⴰⵜ ⴳⴰⵔ ⵢⵉⵎⴰⵍⵉⵢⴻⵏ ⴷⴷⴰⵡ ⵍⴻⵄⵏⴰⵢⴰ ⴷ ⵜⴻⴱⴷⴰⵎⵎⴰⵙⵜ ⵜⴰⴳⵔⴰⵖⵍⴰⵏⵜ ⴰⵢⴷⴻⴳ ⵜⴻⵜⵜⴻⴽⴽⴰ ⵍⴻⵣⵣⴰⵢⴻⵔ ⴷ ⵜⵉⵎⴹⴻⴱⴱⴻⵔⵜ, ⵙⵙⴰⵡⴹⴻⵏ ⵢⵉⴷⵉⵙⴰⵏ ⵉⵎⴰⵍⵉⵢⴻⵏ ⵢⴻⵎⵅⴰⵚⴰⵎⴻⵏ ⴰⴷ ⵎⵙⴻⴼⵀⴰⵎⴻⵏ ⴷⴻⴳ ⵢⵓⵏⵢⵓ ⵏ 2015 ⵖⴻⴼ ⵓⵙⵜⴻⵏⵢⵉ ⵏ ⵓⵎⵜⴰⵡⴰ ⵏ ⵜⴰⵍⵡⵉⵜ, ⴷ ⴰⵎⵜⴰⵡⴰ ⴰⵢ ⵍⴰ ⵢⴻⵜⵜⵡⴰⵙⵙⴻⴼⵄⴰⵍⴻⵏ ⴷⴷⴰⵡ ⵍⴻⵄⵏⴰⵢⴰ ⵏ ⵓⵙⴻⵇⵇⴰⵎⵓ ⵏ ⵓⴹⴼⴰⵔ ⴰⵢⴷⴻⴳ ⴷ ⵍⴻⵣⵣⴰⵢⴻⵔ ⴰⵢ ⴷ ⵜⴰⵙⴻⵍⵡⴰⵢⵜ.
ⴳⴰⵔ ⵎⴻⵖⵔⴻⵙ ⴷ ⵢⴻⴱⵔⵉⵔ ⵏ 2012, ⴹⴹⴼⴻⵏⵜ ⵜⴻⴳⵔⴰⵡⵉⵏ ⵜⵉⵙⴻⵔⵜⵉⵢⵉⵏ-ⵜⵉⵙⴻⵔⴷⴰⵙⴰⵏⵉⵏ ⴷ ⵜⴻⴳⵔⴰⵡⵉⵏ ⵜⵉⵔⴻⴱⵔⴰⴱⵉⵏ ⵜⵉⵎⵏⴰⴹⵉⵏ ⴷ ⵜⵉⵎⴻⵇⵔⴰⵏⵉⵏ ⵏ ⵓⴳⴰⴼⴰ ⵏ ⵎⴰⵍⵉ, ⵙⴰⴽⴽⵉⵏ, ⴷⴻⴳ ⵢⴻⵏⵏⴰⵢⴻⵔ ⵏ 2013, ⵜⴻⵍⵍⴰ-ⴷ ⵜⴳⴻⵔⵎⴰⵏⵜ (ⵜⴰⴷⴰⵅⵅⵓⵍ) ⵜⴰⵙⴻⵔⴷⴰⵙⵉⵜ ⵜⴰⴳⵔⴰⵖⵍⴰⵏⵜ ⴰⵢ ⵜⴻⵏⵜ-ⵢⴻⵥⵥⵄⴻⵏ ⵙⴻⴳ ⵜⴻⵎⵏⴰⴹⵜ-ⴰ.
ⴰⵎⵜⴰⵡⴰ-ⴰ ⵢⴻⵍⵍⴰ-ⴷ ⴷ ⴰⵙⵓⵔⵉⴼ ⵙ ⵡⴰⵣⴰⵍ-ⵏⵏⴻⵙ ⵉ ⵍⵎⴻⵏⴷ ⵏ ⵢⵉⵔⵉⵔⵉ ⵏ ⵜⴰⵍⵡⵉⵜ ⴷ ⵓⵎⵙⵓⵖⴰⵍ ⴰⴷⵓⵎⴰⵏ ⴳⴰⵔ ⵢⵉⵍⴰⵎⵍⵉⵢⴻⵏ, ⵢⴻⵔⵏⴰ ⵢⴻⵙⵜⴻⵏⵢⴰ-ⵜ ⴰⵙⵙ ⵏ 15 ⵎⴰⵢⵓ ⵓⵏⴰⴱⴰⴹ (ⵃⵓⴽⵓⵎⴰ) ⴰⵎⴰⵍⵉ ⵖⴻⵔ ⵢⵉⴷⵉⵙ ⵏ ⵢⵉⵎⵓⵙⵙⴰ ⵉⵙⴻⵔⵜⵉⵢⴻⵏ-ⵉⵙⴻⵔⴷⴰⵙⴰⵏⴻⵏ ⵏ ⵓⴳⴰⴼⴰ ⵏ ⵎⴰⵍⵉ ⴰⵢ ⵢⴻⵜⵜⴻⴽⴽⴰⵏ ⴷⴻⴳ « ⵜⵖⴻⵔⵖⴻⵔⵜ ⵏ ⵍⴻⵣⵣⴰⵢⴻⵔ », ⴰⵎ ⵡⴰⴽⴽⴻⵏ ⴰⵢ ⵜ-ⵙⵜⴻⵏⵢⴰⵏ ⴷⴰⵖ ⵢⵉⴷⵉⵙⴰⵏ ⴰⵢ ⵢⴻⵜⵜⴻⴽⴽⴰⵏ ⴷⴻⴳ ⵜⴻⵖⵍⴰⵎⵜ ⵏ ⵜⴻⴱⴷⴰⵎⵎⴰⵙⵜ (ⵡⴰⵙⴰⵟⴰ) ⵜⴰⴳⵔⴰⵖⵍⴰⵏⵜ, ⵎⴰ ⴷ ⵜⴰⵙⴻⵎⵢⵓⴷⴷⴻⵙⵜ ⵏ ⵢⵉⵎⵓⵙⵙⴰ ⵏ ⵓⵣⴰⵡⴰⴷ ⵜⴽⴻⵎⵎⴻⵍ ⵜⴻⵙⵜⴻⵏⵢⴰ-ⵜ ⴰⵙⵙ ⵏ 20 ⵢⵓⵏⵢⵓ.
ⴰⵎⵜⴰⵡⴰ-ⴰ ⵢⴻⴱⴷⴻⵔ-ⴷ ⴰⵎⴻⴽ ⴰⴷ ⵜⴻⴼⵔⵓ ⵜⴰⵍⵓⴼⵜ ⵏ ⵎⴰⵍⵉ ⵙⴻⴳ ⵡⴰⴽⴽ ⵉⴷⵉⵙⴰⵏ, ⵢⴻⵔⵏⴰ ⴷⴷⴰⵏⵜ-ⴷ ⴷⴻⴳ-ⵙ ⵜⵙⴻⵎⵎⴻⵙⴽⴰⵍ (ⵉⵚⵍⴰⵃⴰⵜ) ⵢⴻⵔⵣⴰⵏ ⵜⴰⵙⴻⵔⵜⵉⵜ ⴷ ⵜⵙⵓⴷⴰ (ⵎⵓ’ⴰⵙⵙⴰⵙⴰⵜ) ⵏ ⵜⵎⵓⵔⵜ-ⴰ, ⵜⴰⵎⵃⴰⴷⴷⵉⵜ ⴷ ⵜⵖⴻⵍⵍⵉⵙⵜ-ⵏⵏⴻⵙ. ⵢⴻⴷⴷⴰ-ⴷ ⴷⴰⵖ, ⴷⴻⴳ ⵓⵎⵜⴰⵡⴰ-ⴰ, ⵡⴰⵢⴻⵏ ⴰⵢ ⵢⴻⵙⵙⴻⴼⴽⴻⵏ ⴰⴷ ⵢⴻⵜⵜⵡⴻⴳ ⵙⴻⴳ ⵢⵉⴷⵉⵙ ⵏ ⵓⵄⴰⵡⴻⵏ ⵏ ⵢⵉⵎⴻⵣⴷⴰⵖⴻⵏ ⵉⵅⵓⵚⵚⴻⵏ ⵏ ⵜⴻⵎⵏⴰⴹⵉⵏ-ⴰ, ⴷ ⵓⵙⵙⴻⵍⵀⵓ ⵏ ⵜⴻⴳⵏⵉⵜ-ⵏⵙⴻⵏ ⵜⴰⴷⴰⵎⵙⴰⵏⵜ, ⵜⴰⵏⵎⴻⵜⵜⵉⵜ, ⵜⵉⵖⴰⵡⵙⵉⵡⵉⵏ ⵢⴻⵇⵇⵏⴻⵏ ⵖⴻⵔ ⵜⴻⵖⴷⴻⵎⵜ ⴷ ⵓⵎⵙⵓⵖⴰⵍ ⴳⴰⵔ ⵢⵉⵎⴰⵍⵉⵢⴻⵏ.
