ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵜⴰⵍⵓⴼⵜ ⵏ ⵓⵏⴻⵥⵔⵓⴼ ⵓⵜⵔⵉⵎ ⴷ ⵜⴰⵎⵙⴰⵍⵜ ⵏ ⵜⵓⴽⴽⵙⴰ ⵏ ⵓⵙⵙⴻⵀⵔⴻⵙ

ⴱⵔⵓⵅⴻⵍⵍⴻⵙ – ⵡⴻⴽⴽⴷⴻⵏ-ⴷ ⴽⵔⴰ ⵏ ⵢⵉⵎⴰⵣⴰⵏⴻⵏ (ⵏⵓⵡⵡⴰⴱ) ⵓⵕⵓⴼⵉⵢⴻⵏ ⴷ ⴰⴽⴽⴻⵏ ⵜⴰⵍⵓⴼⵜ ⵏ ⵓⵏⴻⵥⵔⵓⴼ ⵓⵜⵔⵉⵎ ⴷ « ⵜⴰⵎⵙⴰⵍⵜ ⵏ ⵜⵓⴽⴽⵙⴰ ⵏ ⵓⵙⵙⴻⵀⵔⴻⵙ (ⵉⵙⵜⵉⵄⵎⴰⵔ) », ⵢⴻⵔⵏⴰ ⵢⴻⵙⵙⴻⴼⴽ ⴰⴷ ⵜⴻⴼⵔⵓ ⵙ ⵓⵇⴰⴷⴻⵔ ⵏ ⵍⵇⴰⵏⵓⵏ ⴰⴳⵔⴰⵖⵍⴰⵏ ⴰⵢ ⵢⴻⴼⴽⴰⵏ ⴰⵣⵔⴻⴼ ⵉ ⵓⵖⵔⴻⴼ ⴰⵚⴻⵃⵔⴰⵡⵉ ⴰⴽⴽⴻⵏ ⴰⴷ ⵜⵜ-ⵉⴷ-ⵢⴻⴼⵔⵓ ⵖⴻⴼ ⵓⵣⴻⴽⴽⴰ-ⵏⵏⴻⵙ, ⵢⴻⵔⵏⴰ ⵄⴰⵡⴷⴻⵏ ⵡⴻⴽⴽⴷⴻⵏ-ⴷ ⴷ ⴰⴽⴽⴻⵏ ⵢⴻⵙⵙⴻⴼⴽ ⴰⴷ ⴰⵙ-ⵢⴻⵜⵜⵓⵏⴻⴼⴽ ⵓⵣⵔⴻⴼ ⵉ ⵜⵓⵖⴷⴰⴹⵜ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⵉ ⵓⵙⵙⵓⴷⴷⴻⵙ ⵏ ⵜⵙⴻⴼⵔⴰⵏⵜ ⴷⴻⴳ ⵓⵏⴻⵥⵔⵓⴼ ⵓⵜⵔⵉⵎ (ⵎⵉⵏⵓⵔⵙⵧ) ⴰⴽⴽⴻⵏ ⴰⴷ ⴷ-ⵜⴻⵍⵀⵓ ⵓⵍⴰ ⵙ ⵜⵄⴻⵙⵙⴰⵙⵜ ⵏ ⵢⵉⵣⴻⵔⴼⴰⵏ ⵏ ⵓⵎⴷⴰⵏ.

ⴷⴻⴳ ⵢⵉⵡⴻⵏ ⵏ ⵓⵙⵙⵓⵎⴻⵔ (ⵎⵓⵇⵜⴰⵔⴰⵃ) ⵏ ⵜⵏⴻⵖⵜⵓⵙⵜ (ⵇⴰⵔⴰⵔ) ⴰⵢ ⵢⴻⵔⵙⴻⵏ ⵖⴻⵔ ⵓⵎⵏⵉ ⵓⵕⵓⴼⵉ, ⵡⴻⴽⴽⴷⴻⵏ-ⴷ ⴽⵔⴰ ⵏ ⵢⵉⵎⴰⵣⴰⵏⴻⵏ ⵓⵕⵓⴼⵉⵢⴻⵏ ⵏ ⵓⵣⴻⵍⵎⴰⴹ ⴰⴷⵓⴽⵍⴰⵏ ⵓⵕⵓⴼⵉ/ⴰⵣⴻⵍⵎⴰⴹ ⴰⵣⴻⴳⵣⴰⵡ ⴰⴳⴰⴼⴰⵏ (ⴳⵓⴻ/ⵏⴳⵍ) ⴷ ⴰⴽⴽⴻⵏ « ⵜⴰⵍⵓⴼⵜ ⵏ ⵓⵏⴻⵥⵔⵓⴼ ⵓⵜⵔⵉⵎ ⴷ ⵜⴰⵎⵙⴰⵍⵜ ⵏ ⵜⵓⴽⴽⵙⴰ ⵏ ⵓⵙⵙⴻⵀⵔⴻⵙ ».

« ⵖⴻⴼ ⵍⴻⵃⵙⴰⴱ ⵏ ⵍⵇⴰⵏⵓⵏ ⴰⴳⵔⴰⵖⵍⴰⵏ, ⵜⴰⴳⴻⵍⴷⴰ ⵏ ⵎⴻⵕⵕⵓⴽ ⵓⵔ ⵜⴻⵙⵄⵉ ⴰⵔⴰ ⴰⴽⴽ ⴽⵔⴰ ⵏ ⵜⵏⴰⵢⴰ (ⵙⵉⵢⴰⴷⴰ) ⵖⴻⴼ ⵓⵏⴻⵥⵔⵓⴼ ⵓⵜⵔⵉⵎ ⵢⴻⵔⵏⴰ ⵎⴻⵕⵕⵓⴽ ⵜⴻⵜⵜⵡⴰⵃⵙⴻⴱ ⴷ ⵜⴰⵏⴻⵣⵎⴰⵔⵜ (ⵇⵓⵡⵡⴰ) ⵢⴻⴹⴹⴼⴻⵏ ⴰⴽⴰⵍ ⵏ ⵜⵎⵓⵔⵜ-ⴰ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵡⴻⴽⴽⴷⴻⵏ ⵢⵉⵎⴰⵣⴰⵏⴻⵏ-ⴰ, ⵢⴻⵔⵏⴰ ⵙⵃⴰⵙⵙⴼⴻⵏ ⵉⵎⵉ ⵜⴰⵎⵙⴰⵍⵜ ⵏ ⵓⵏⴻⵥⵔⵓⴼ ⵓⵜⵔⵉⵎ ⵓⵔ ⴷ-ⵜⴻⴷⴷⵉ ⴰⵔⴰ ⴷⴻⴳ ⵡⴰⵀⵉⵍ ⵏ ⵜⴻⵎⵍⵉⵍⵉⵢⵉⵏ ⵏ 2016 ⵏ ⵓⵙⴻⵇⵇⴰⵎⵓ ⵏ ⵢⵉⵣⴻⵔⴼⴰⵏ ⵏ ⵓⵎⴷⴰⵏ.

ⵉ ⵍⵎⴻⵏⴷ ⵏ ⵡⴰⵢⴰ, ⵡⴻⴽⴽⴷⴻⵏ-ⴷ ⴷ ⴰⴽⴽⴻⵏ ⵢⴻⵙⵙⴻⴼⴽ ⴰⴷ ⴷ-ⵜⵉⵍⵉ ⵜⵄⴻⵙⵙⴰⵙⵜ ⵜⴰⴳⵔⴰⵖⵍⴰⵏⵜ ⵖⴻⴼ ⵜⴻⴳⵏⵉⵜ ⵏ ⵢⵉⵣⴻⵔⴼⴰⵏ ⵏ ⵓⵎⴷⴰⵏ ⴷⴻⴳ ⵓⵏⴻⵥⵔⵓⴼ ⵓⵜⵔⵉⵎ, ⴰⵎ ⵡⴰⴽⴽⴻⵏ ⴰⵢ ⵄⴰⵡⴷⴻⵏ ⵡⴻⴽⴽⴷⴻⵏ-ⴷ ⴷ ⴰⴽⴽⴻⵏ ⴰⵖⵔⴻⴼ ⴰⵚⴻⵃⵔⴰⵡⵉ ⵢⴻⵙⵄⴰ ⴰⵣⵔⴻⴼ ⵉ ⵓⴳⴳⵓⵛⵛⴻⵍⵎⴰⵏ (ⵜⴰⵇⵔⵉⵔ ⴰⵍ-ⵎⴰⵚⵉⵔ), ⵢⴻⵔⵏⴰ « ⵢⴻⵙⵙⴻⴼⴽ ⴰⴷ ⴷ-ⵢⵉⵍⵉ ⵡⴰⵢⴰ ⵙ ⵜⵙⴻⴼⵔⴰⵏⵜ ⵜⴰⵎⴻⴳⴷⴰⵢⵜ (ⴷⵉⵎⵓⵇⵔⴰⵟⵉⵢⵢⴰ) ⵙ ⵓⵇⴰⴷⴻⵔ ⵏ ⵜⵏⴻⵖⵜⵓⵙⵉⵏ 34/37 ⴷ 35/19 ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ».

ⵙ ⵡⴰⵢⴰ, ⴳⵔⴻⵏ-ⴷ ⵢⵉⵎⴰⵣⴰⵏⴻⵏ-ⴰ ⵜⵉⵖⵔⵉ ⵉ ⵎⴻⵕⵕⵓⴽ ⴷ ⵜⴻⵔⵏⵉ ⵏ ⵒⵧⵍⵉⵙⴰⵔⵉⵧ ⴰⴽⴽⴻⵏ ⴰⴷ ⵓⵖⴰⵍⴻⵏ ⵖⴻⵔ ⵍⴻⵎⵛⴰⵡⵕⴰⵜ ⵉ ⴼⴻⵔⵔⵓ ⵏ ⵜⴰⵍⵓⴼⵜ-ⴰ ⵙ ⵜⵉⴼⵔⴰⵜ ⵏ ⵜⴰⵍⵡⵉⵜ ⴰⴷ ⵉⴷⵓⵎⴻⵏ.

ⵡⵜⴻⵏ-ⴷ ⵢⵉⵎⴰⵣⴰⵏⴻⵏ-ⴰ ⴷⴻⴳ ⵢⵉⵔⴽⴰⴹⴻⵏ « ⴰⵢ ⵢⴻⵣⴳⴰⵏ ⵜⵜⵉⵍⵉⵏ-ⴷ » ⴷⴻⴳ ⵓⵏⵔⴰⵔ ⵏ ⵢⵉⵣⴻⵔⴼⴰⵏ ⵏ ⵓⵎⴷⴰⵏ ⴷⴻⴳ ⵓⵏⴻⵥⵔⵓⴼ ⵓⵜⵔⵉⵎ, ⵢⴻⵔⵏⴰ ⴳⵔⴻⵏ-ⴷ ⵜⵉⵖⵔⵉ, ⴷⴻⴳ ⵓⵙⵙⵓⵎⴻⵔ ⵏ ⵜⵏⴻⵖⵜⵓⵙⵜ-ⵏⵙⴻⵏ, ⵉ ⵓⵃⵓⴷⴷⵓ ⵏ ⵢⵉⵣⴻⵔⴼⴰⵏ ⵏ ⵍⵍⵙⴰⵙ ⵏ ⵓⵖⵔⴻⴼ ⵏ ⵓⵏⴻⵥⵔⵓⴼ ⵓⵜⵔⵉⵎ, ⴷⵖⴰ, ⴳⴰⵔ ⵢⵉⵣⴻⵔⴼⴰⵏ ⴰⵢ ⵢⴻⵙⵙⴻⴼⴽⴻⵏ ⴰⴷ ⵜⵜⵡⴰⵃⴻⵔⵣⴻⵏ ⵢⴻⵍⵍⴰ ⵓⵣⵔⴻⴼ ⵏ ⵜⵍⴻⵍⵍⵉ ⵏ ⵜⵉⴷⴷⵓⴽⵍⴰ, ⵡⵉⵏ ⵏ ⵜⵉⵍⴻⵍⵍⵉ ⵏ ⵡⴰⵡⴰⵍ ⴷ ⵡⵉⵏ ⵏ ⵜⵍⴻⵍⵍⵉ ⵏ ⵜⵎⴻⵙⴱⴰⵏⵉⵜ.

ⴷⴻⴳ ⵜⵏⴻⵖⵜⵓⵙⵜ-ⴰ, ⵙⵙⵓⵜⵔⴻⵏ ⵢⵉⵎⴰⵣⴰⵏⴻⵏ-ⴰ ⴰⴷ ⴷ-ⵙⴻⵔⵔⵃⴻⵏ « ⵡⴰⵔ ⵍⴻⵄⴹⵉⵍ » ⵉ ⵡⴰⴽⴽ ⵉⵎⴻⵃⴱⴰⵙ ⵉⵙⴻⵔⵜⵉⵢⴻⵏ ⵉⵚⴻⵃⵔⴰⵡⵉⵢⴻⵏ, ⵍⴰⴷⵖⴰ ⵡⵉⴷ ⵢⴻⵜⵜⴻⴽⴽⴰⵏ ⴷⴻⴳ ⵜⴻⴳⵔⴰⵡⵜ ⵏ ⴳⴷⴻⵉⵎ ⵉⵣⵉⴽ ⴰⵢⵖⴻⴼ ⵢⴻⵜⵜⵡⴰⵃⴽⴻⵎ ⵙ ⵍⵃⴻⴱⵙ ⴷⴻⴳ ⵛⵛⵕⴻⵄ ⴰⵙⴻⵔⴷⴰⵙⵉ ⴰⵎⴻⵕⵕⵓⴽⵉ.