ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵜⴰⵇⴱⵓⵛⵜ ⵏ ⵍⴻⵣⵣⴰⵢⴻⵔ (ⵜⵉⵙ 8 ⴷ ⵜⵉⵙ 4 ⵏ ⵜⵏⴻⴳⴳⴰⵔⵓⵜ): ⵓⵍⴰⵛ ⵜⵉⵎⵍⵉⵍⵉⵢⵉⵏ ⴷⴻⴳ ⵢⵙⴰⵔⵉⵔⴻⵏ ⵏ ⴷⴷⴰⵡ 8.000 ⵏ ⵢⵉⵎⵓⴽⴰⵏ

ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ (20 ⵢⴻⵏⵏⴰⵢⴻⵔ 2016) – ⵢⴻⵏⵏⴰ-ⴷ ⵓⵙⴻⵍⵡⴰⵢ ⵏ ⵜⵙⴻⵇⵇⴰⵎⵓⵜ ⵏ ⵓⵙⵙⵓⴷⴷⴻⵙ (ⵜⴰⵏⴹⵉⵎ) ⵏ ⵜⴻⵇⴱⵓⵛⵜ ⵏ ⵍⴻⵣⵣⴰⵢⴻⵔ ⵏ ⵜⵛⵉⵔⵜ ⵏ ⵓⴹⴰⵔ, ⴰⵍⵉ ⵎⴰⵍⴻⴽ, ⴷ ⴰⴽⴽⴻⵏ ⵉⵙⴰⵔⵉⵔⴻⵏ (ⵎⴰⵍⴰⵄⵉⴱ) ⵏ ⴷⴷⴰⵡ 8.000 ⵏ ⵢⵉⵎⵓⴽⴰⵏ ⵓⵔ ⴷ-ⵜⵜⵉⵍⵉⵏⵜ ⴰⵔⴰ ⴷⴻⴳ-ⵙⴻⵏ ⵜⵉⵎⵍⵉⵍⵉⵢⵉⵏ ⵏ ⵜⵉⵙ 8 ⴷ ⵜⵉⵙ 4 ⵏ ⵜⵏⴻⴳⴳⴰⵔⵓⵜ. ⵉ ⵓⵙⵎⴻⴽⵜⵉ, ⵜⴰⵙⵖⴰⵔⵜ ⵏ ⵜⴻⵎⵍⵉⵍⵉⵢⵉⵏ-ⴰ ⵜⴻⵍⵍⴰ-ⴷ ⴰⵙⵙ ⵏ ⵍⴰⵕⴻⴱⵄⴰ ⵜⴰⵎⴻⴷⴷⵉⵜ ⴷⴻⴳ ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ.

« ⵎⴰ ⵢⴻⵍⵍⴰ ⴷⴻⴳ ⵜⵓⵣⵣⵢⵉⵡⵉⵏ ⵢⴻⵣⵔⵉⵏ (ⵜⵉⵙ 32 ⴷ ⵜⵉⵙ 16 ⵏ ⵜⵏⴻⴳⴳⴰⵔⵓⵜ) ⵏⴻⵙⵙⴰⴼⵙⴻⵙ ⵛⵡⵉⵟ ⵜⵉⵖⴰⵡⵙⵉⵡⵉⵏ, ⵙⴻⴳ ⵜⵉⵙ 8 ⵏ ⵜⵏⴻⴳⴳⴰⵔⵓⵜ ⴷ ⴰⵙⴰⵡⴻⵏ, ⵓⵔ ⵢⴻⵜⵜⵡⴰⵇⴱⴰⵍ ⴰⵔⴰ ⴰⴷ ⴷ-ⵉⵍⵉⵏⵜ ⵜⴻⵎⵍⵉⵍⵉⵢⵉⵏ (ⵏ ⵜⴻⵇⴱⵓⵛⵜ ⵏ ⵍⴻⵣⵣⴰⵢⴻⵔ) ⴷⴻⴳ ⵢⵉⵙⴰⵔⵉⵔⴻⵏ ⵏ ⴷⴷⴰⵡ 8.000 ⵏ ⵢⵉⵎⵓⴽⴰⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵎⴰⵍⴻⴽ ⴷⴻⴳ ⵢⵉⵊⵉⴼⴻⵕ ⵏ ⵜⴻⵙⵖⴰⵔⵜ ⵏ ⵜⵉⵙ 8 ⵏ ⵜⵏⴻⴳⴳⴰⵔⵓⵜ ⵉ 2015-2016.

ⵢⴻⵏⵏⴰ-ⴷ ⵓⵙⴻⵍⵡⴰⵢ ⵏ ⵜⵙⴻⵇⵇⴰⵎⵓⵜ ⵏ ⵓⵙⵙⵓⴷⴷⴻⵙ ⵏ ⵜⴻⵇⴱⵓⵛⵜ ⵏ ⵍⴻⵣⵣⴰⵢⴻⵔ ⵏ ⵜⵛⵉⵔⵜ ⵏ ⵓⴹⴰⵔ ⴷ ⴰⴽⴽⴻⵏ ⵉⵙⴰⵔⵉⵔⴻⵏ ⴰⵢⴷⴻⴳ ⴰⴷ ⴷ-ⵉⵍⵉⵏⵜ ⵜⴻⵎⵍⵉⵍⵉⵢⵉⵏ ⵏ ⵜⵉⵙ 8 ⴷ ⵜⵉⵙ 4 ⵏ ⵜⵏⴻⴳⴳⴰⵔⵓⵜ ⴰⴷ ⴷ-ⵜⵜⵡⴰⵙⴻⵎⵎⵉⵏ ⴰⵙⵙ ⵏ ⵍⵃⴻⴷⴷ, ⵢⴻⵔⵏⴰ ⵢⴻⵙⵎⴻⴽⵜⵉ-ⴷ ⴷ ⴰⴽⴽⴻⵏ ⵜⵉⵖⵍⴰⵎⵉⵏ ⵜⵉⵏⴻⴱⴳⵉⵡⵉⵏ ⴰⴷ ⵙⵄⵓⵏⵜ ⴰⵣⵔⴻⴼ ⵏ « 10% ⵙⴻⴳ ⵢⵉⵎⵓⴽⴰⵏ ⵏ ⵓⵙⴰⵔⵉⵔ » ⵉ ⵢⵉⵎⴼⴻⵕⵕⴵⴻⵏ-ⵏⵙⴻⵏⵜ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵍⵇⴰⵏⵓⵏ ⵏ ⵜⴼⵉⴷⵉⵕⴰⵍⵉⵜ.

« ⴰⴷ ⴷ-ⵏⴻⵙⵙⴻⵎⵍⵉⵍ ⵜⵉⴳⵏⴰⵜⵉⵏ ⵉⴳⴻⵔⵔⵣⴻⵏ ⴰⴽⴽ ⴰⴽⴽⴻⵏ ⴰⴷ ⴽⴻⵎⵎⵍⴻⵏⵜ ⵜⴻⵎⵍⵉⵍⵉⵢⵉⵏ ⵏ ⵜⴻⵇⴱⵓⵛⵜ ⵏ ⵍⴻⵣⵣⴰⵢⴻⵔ ⴰⵔⵎⴰ ⴷ ⵜⴰⵏⴻⴳⴳⴰⵔⵓⵜ. ⵏⴻⴷⴷⴻⵎ ⴰⴽⴽ ⵉⵃⴻⵣⵣⵉⴱⴻⵏ ⴰⵢ ⵢⴻⵏⵏⵓⵎⵎⴻⵏ ⵜⵜⵡⴰⴷⴷⴰⵎⴻⵏ ⵉ ⵜⴻⵇⴱⵓⵛⵜ ⵏ ⵍⴻⵣⵣⴰⵢⴻⵔ ⵢⴻⵔⵏⴰ ⴰⴷ ⵏⴻⵙⵙⴻⵃⴱⵉⴱⴻⵔ ⴰⴽⴽⴻⵏ ⵜⵉⵎⵍⵉⵍⵉⵢⵉⵏ ⴰⴷ ⴷ-ⵉⵍⵉⵏⵜ ⵙ ⵓⵇⴰⴷⴻⵔ ⵓⵎⵎⵉⴷ ⵏ ⵡⴰⴽⴽ ⵉⴷⵉⵙⴰⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴰⵍⵉ ⵎⴰⵍⴻⴽ.

ⵜⵉⵎⵍⵉⵍⵉⵢⵉⵏ ⵏ ⵜⵉⵙ 8 ⵏ ⵜⵏⴻⴳⴳⴰⵔⵓⵜ ⴰⴷ ⴷ-ⵉⵍⵉⵏⵜ ⴳⴰⵔ 19 ⴷ 20 ⴼⵓⵕⴰⵕ, ⵢⴻⵔⵏⴰ ⵢⴻⵣⵎⴻⵔ ⵍⵃⴰⵍ ⴰⴷ ⴷ-ⵙⵙⵉⵥⴻⵏ ⵢⵉⵡⴻⵜ ⵏ ⵜⴻⵎⵍⵉⵍⵉⵜ ⵖⴻⵔ 18 ⴼⵓⵕⴰⵕ, ⵎⴰ ⴷ ⵜⵉⵎⵍⵉⵍⵉⵢⵉⵏ ⵏ ⵜⵉⵙ 4 ⵏ ⵜⵏⴻⴳⴳⴰⵔⵓⵜ ⴰⴷ ⴷ-ⵉⵍⵉⵏⵜ ⵓⵙⵙⴰⵏ ⵏ 4 ⴷ 5 ⵎⴻⵖⵔⴻⵙ ⴰⵢ ⴷ-ⵢⴻⵜⵜⴻⴷⴷⵓⵏ.