ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵜⴰⴱⴰⵜⴻⵏⵜ: ⴰⴽⴰⵎⵢⵓⵏ ⴰⵎⴻⵣⵡⴰⵔⵓ ⵏ ⵀⵢⵓⵏⴷⴰⵉ ⴰⴷ ⴷ-ⵢⴻⴼⴼⴻⵖ ⴷⴻⴳ ⵢⴻⴱⵔⵉⵔ

ⵜⴰⴱⴰⵜⴻⵏⵜ – ⵢⴻⵏⵏⴰ-ⴷ ⵓⵏⴻⵎⵀⴰⵍ ⵏ ⵜⴻⵙⵏⵓⵍⵣⵓⵣⵜ (ⵜⴰⵙⵡⵉⵇ) ⵏ ⴳⵍⵧⴱⴰⵍ ⵎⵧⵜⵧⵔⵙ ⵉⵏⴷⵓⵙⵜⵔⵉⴻⵙ, ⵢⴰⵀⵉⴰ ⴰⵉⵜ ⴰⵍⵉ, ⴰⵙⵙ ⵏ ⵍⴻⵅⵎⵉⵙ, ⴷ ⴰⴽⴽⴻⵏ ⴰⴽⴰⵎⵢⵓⵏ ⴰⵎⴻⵣⵡⴰⵔⵓ ⵏ ⵀⵢⵓⵏⴷⴰⵉ ⴰⴷ ⴷ-ⵢⴻⴼⴼⴻⵖ, « ⵎⴰ ⴰⵟⴰⵙ, ⴷⴻⴳ ⵢⴻⴱⵔⵉⵔ ».

ⴰⴷ ⴷ-ⵢⵉⵍⵉ ⵡⴰⵢⴰ ⴷⴻⴳ ⵍⵍⵓⵣⵉⵏ ⵏ ⴳⵍⵧⴱⴰⵍ ⵎⵧⵜⵧⵔⵙ ⵉⵏⴷⵓⵙⵜⵔⵉⴻⵙ ⵏ ⵜⴱⴰⵜⴻⵏⵜ, ⵢⴻⵔⵏⴰ ⵙ ⵜⵉⵛⵛⵓⵔⴽⴰ ⴳⴰⵔ ⵜⴻⵕⵎⵉⵙⵜ-ⴰ ⴷ ⵢⵉⵡⴻⵏ ⵏ ⵢⵉⵎⵙⴻⴼⵜⵉ ⵓⵙⵍⵉⴳ ⴰⴷⵣⴰⵢⵔⵉ. ⵍⵍⵓⵣⵉⵏ-ⴰ ⴰⴷ ⵜⵓⵖⴰⵍ « ⴰⴷ ⵜⴻⵜⵜⵕⴻⴽⴽⵉⴱ ⴰⴽⴽ ⵍⴻⵚⵏⴰⴼ ⵏ ⵢⵉⴽⴰⵎⵢⵓⵏⴻⵏ ⵏ ⵀⵢⵓⵏⴷⴰⵉ, ⴰⵎ ⵡⴰⴽⴽⴻⵏ ⴰⴷ ⵜⴻⵜⵜⵕⴻⴽⴽⵉⴱ ⵉⵙⴰⴽⴰⵍⴻⵏ (ⵃⴰⴼⵉⵍⴰⵜ) ⵏ ⵜⴻⵎⴷⵉⵏⵜ ⴷ ⵡⵉⴷ ⵏ ⵓⵎⴻⵙⵏⵉ ⴳⴰⵔ ⵜⴻⵎⴷⵉⵏⵉⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ.

ⴷⴻⴳ ⵜⴰⵣⵡⴰⵔⴰ, ⵍⵍⵓⵣⵉⵏ-ⴰ ⴰⴷ ⵜⴻⵜⵜⵕⴻⴽⴽⵉⴱ ⵜⵉⵛⴻⵇⵇⵓⴼⵉⵏ ⴰⵢ ⴷ-ⵢⴻⵜⵜⵡⴰⴵⵡⴻⵏ ⵙⴻⴳ ⵓⵣⵖⴰⵔ, ⵎⴰⵛⴰ « ⴰⴷ ⵜⵓⵖⴰⵍ ⴰⴷ ⵜⴻⵜⵜⵡⴻⴽⴽⵉⵍ, ⵛⵡⵉⵟ, ⵛⵡⵉⵟ, ⵍⴻⵛⵖⴰⵍ-ⵏⵏⴻⵙ, ⵙⴻⴳ-ⴰ ⵖⴻⴼ 5 ⵏ ⵢⵉⵙⴻⴳⴳⴰⵙⴻⵏ, ⵉ ⵜⴻⵕⵎⵉⵙⵉⵏ (ⵛⴰⵔⵉⴽⴰⵜ) ⵜⵉⴷⵣⴰⵢⵔⵉⵢⵉⵏ, ⴰⵔⵎⴰ ⵜⴻⵡⵡⴻⴹ ⵖⴻⵔ ⵓⴼⵎⵉⴹⵉ ⵏ ⵓⵏⵏⵓⵎⵎⴻⴷ ⵏ 40% », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴰⵉⵜ ⴰⵍⵉ.

ⵍⵍⵓⵣⵉⵏ-ⴰ ⴰⴷ ⴷ-ⵜⵉⵍⵉ ⵙ ⵓⵙⵙⴻⴼⵜⵉ ⵏ ⵡⵓⴳⴰⵔ ⵏ 7 ⵏ ⵢⵉⵎⴻⵍⵢⴰⵕⴻⵏ ⵏ ⵢⵉⴷⵉⵏⴰⵕⴻⵏ, ⵢⴻⵔⵏⴰ ⴰⴷ ⵜⴻⵙⵄⵓ ⵜⴰⵣⵎⴻⵔⵜ ⵏ ⵓⴼⴰⵔⴻⵙ (ⵉⵏⵜⴰⴵ) ⵏ ⴳⴰⵔ 30 ⴷ 55 ⵏ ⵢⵉⵎⴰⵢⵓⵏⴻⵏ ⴷⴻⴳ ⵡⴰⵙⵙ, ⴷ ⵜⵉⵏ ⵏ 20.000 ⵏ ⵢⵉⴽⴰⵎⵢⵓⵏⴻⵏ ⴷⴻⴳ ⵓⵙⴻⴳⴳⴰⵙ.

ⵙⴻⴳ ⵢⵉⴷⵉⵙ ⴰⵏⵎⴻⵜⵜⵉ-ⴰⴷⴰⵎⵙⴰⵏ, ⵍⵍⵓⵣⵉⵏ-ⴰ ⴰⴷ ⵜⴻⵙⵙⴻⵅⴷⴻⵎ ⴳⴰⵔ 250 ⴷ 450 ⵏ ⵢⵉⵅⴻⴷⴷⴰⵎⴻⵏ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵎⴰⵙⵙ ⴰⵉⵜ ⴰⵍⵉ, ⴰⵢ ⴷ-ⵢⴻⵔⵏⴰⵏ ⴷ ⴰⴽⴽⴻⵏ, ⵙⴻⴳ-ⴰ ⵖⴻⴼ 5 ⵏ ⵢⵉⵙⴻⴳⴳⴰⵙⴻⵏ, ⵍⵍⵓⵣⵉⵏ-ⴰ ⴰⴷ ⵜⴰⵡⴻⴹ ⵖⴻⵔ 2.000 ⵏ ⵢⵉⵅⴻⴷⴷⴰⵎⴻⵏ.

ⵖⴻⴼ ⵍⴻⵃⵙⴰⴱ ⵏ ⵓⵎⴰⵙⴰⵢ-ⴰ, ⴳⵍⵧⴱⴰⵍ ⵎⵧⵜⵧⵔⵙ ⵉⵏⴷⵓⵙⵜⵔⵉⴻⵙ ⵜⴻⵙⵙⴻⴼⵔⴰ ⴰⴷ ⵜⴻⵙⵄⵓ ⴰⵎⵎⴰⵙ ⵏ ⵓⵙⵙⵉⵍⴻⵖ (ⵜⴰⴽⵡⵉⵏ) ⴰⵢⴷⴻⴳ ⴰⴷ ⵍⴻⵎⵎⴷⴻⵏ ⵢⵉⵏⴻⵍⵎⴰⴷⴻⵏ ⵏ ⵜⴻⵙⴷⴰⵡⵉⵜ ⴷ ⵡⵉⴷ ⵏ ⵡⴰⵎⵎⴰⵙⴻⵏ ⵏ ⵓⵙⵙⵉⵍⴻⵖ ⴰⵙⴰⴷⵓⵔⴰⵏ (ⵎⵉⵀⴰⵏⵉ).

ⴳⵍⵧⴱⴰⵍ ⵎⵧⵜⵧⵔⵙ ⵉⵏⴷⵓⵙⵜⵔⵉⴻⵙ ⵍⴰ ⵜⵅⴻⴷⴷⴻⵎ, ⵉⵎⵉⵔ-ⴰ, ⵉ ⵓⵙⵏⴻⴼⵍⵉ (ⵜⴰⵏⵎⵉⵢⴰ) ⵏ ⵓⵥⴻⴹⴹⴰ-ⵏⵏⴻⵙ ⵏ ⵓⴼⵔⴰⵇ, ⵖⴻⴼ ⵍⴻⵃⵙⴰⴱ ⵏ ⵓⵏⴻⵎⵀⴰⵍ ⵏ ⵜⴻⵙⵏⵓⵍⵣⵓⵣⵜ ⴰⵢ ⵢⴻⵔⵔⴰⵏ ⵜⴰⵊⵎⵉⵍⵜ ⵉ « ⵓⵎⵄⴰⵡⴻⵏ » ⴷ ⵜⵡⵉⵍⴰⵢⵜ ⵏ ⵜⴱⴰⵜⴻⵏⵜ ⴰⵢ ⵢⴻⵙⵙⴰⴼⴻⵙⵙⴻⵏ ⵍⴻⴱⵏⵉ ⵏ ⵍⵍⵓⵣⵉⵏ-ⴰ ⴷⴻⴳ ⵡⴰⴽⴰⵍ ⵏ ⵡⴰⵣⴰⵍ ⵏ 56.000 ⵏ ⵢⵉⵎⵉⵜⵔⴻⵏ ⵉⵎⴽⵓⵥⴻⵏ (ⵎ2).