ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵜⴻⵍⵍⴰ ⵜⵓⴳⴳⵣⴰ ⵖⴻⴼ ⵜⵖⴻⵍⵍⵉⵙⵜ ⴷ ⵓⵔⴽⴰⴷ ⵏ ⵜⵓⵏⴻⵙ
ⵜⵓⵏⴻⵙ – ⴷⴻⴼⴼⵉⵔ ⵍⵎⵓⵊⴰ ⵏ ⵜⵎⴻⵙⴱⴰⵏⵉⵢⵉⵏ-ⵏⵏⵉ ⴰⵢ ⵢⴻⵙⵙⴻⵏⵀⴻⵣⵣⴻⵏ ⵜⵓⵏⴻⵙ ⴷⴻⴳ ⵡⵓⵙⵙⴰⵏ-ⴰ ⵉⵏⴻⴳⴳⵓⵔⴰ, ⵢⴻⵏⵏⴰ-ⴷ ⵓⵙⴻⵍⵡⴰⵢ ⴰⵜⵓⵏⵙⵉ ⴱⴻⵊⵉ ⵛⴰⵉⴷ ⴻⵙⵙⴻⴱⵙⵉ, ⴰⵙⵙ ⵏ ⵍⴰⵕⴻⴱⵄⴰ, ⴷⴻⴳ ⵢⵉⵡⴻⵜ ⵏ ⵜⵉⵏⴰⵡⵜ ⴷⴻⴳ ⵜⵍⵉⵥⵔⵉ ⴷ ⴰⴽⴽⴻⵏ ⵍⵍⴰⵏ ⵡⵉⴷ ⴰⵢ ⵍⴰ ⵢⴻⵜⵜⵃⴰⴽⴰⵕⴻⵏ ⵜⴰⵖⴻⵍⵍⵉⵙⵜ ⴷ ⵓⵔⴽⴰⴷ ⵏ ⵜⵓⵏⴻⵙ.
ⵢⴻⵙⵜⴻⵄⵕⴻⴼ ⵓⵙⴻⵍⵡⴰⵢ ⴰⵜⵓⵏⵙⵉ, ⴰⵙⵙ ⵏ ⵍⵊⴻⵎⵄⴰ ⵜⴰⵎⴻⴷⴷⵉⵜ, ⴷ ⴰⴽⴽⴻⵏ ⵜⵉⵎⴻⵙⴱⴰⵏⵉⵢⵉⵏ ⵖⴻⴼ ⵜⵔⴻⴱⴱⴰⵡⵜ (ⴱⴰⵟⴰⵍⴰ) ⴷ ⵓⵄⵣⴰⵍ ⵏ ⴽⵔⴰ ⵏ ⵎⴻⴷⴷⴻⵏ ⴷⴻⴳ ⵜⵎⴻⵜⵜⵉ ⵉⴱⴰⵏ ⴰⴷ ⴷ-ⵉⵍⵉⵏⵜ, ⵎⴰⵛⴰ ⵢⴻⵏⵏⴰ-ⴷ ⴷ ⴰⴽⴽⴻⵏ ⵍⵍⴰⵏ ⴽⵔⴰ ⵏ ⵢⵉⴷⵉⵙⴰⵏ ⵓⵎⵉ ⵓⵔ ⵜⴻⵚⴼⵉ ⵏⵏⴻⵢⵢⴰ ⴰⵢ ⵍⴰ ⵢⴻⵜⵜⵏⴰⴷⵉⵏ ⴰⴷ ⵙⵇⴻⴷⵛⴻⵏ ⵜⴰⴳⵏⵉⵜ-ⴰ ⵉ ⵍⴼⴰⵢⴷⴰ-ⵏⵙⴻⵏ.
« ⵍⵍⴰⵏ ⵢⵉⴷⵉⵙⴰⵏ ⵓⵎⵉ ⵓⵔ ⵣⴻⴷⴷⵉⴳⴻⵜ ⵏⵏⴻⵢⵢⴰ ⵢⴻⵔⵏⴰ ⵜⵜⵡⴰⵙⵙⵏⴻⵏ », ⵙⵇⴻⴷⵛⴻⵏ ⵜⵉⵎⴻⵙⴱⴰⵏⵉⵢⵉⵏ-ⴰ ⵜⵓⵣⵔⵉⴼⵉⵏ (ⵛⴰⵔⵄⵉⵢⵢⴰ) ⴷⴻⴳ ⴽⵔⴰ ⵏ ⵜⴻⵎⵏⴰⴹⵉⵏ ⴰⴽⴽⴻⵏ ⴰⴷ ⵣⴻⵔⵄⴻⵏⵜ ⵍⵅⵉⵍⴰⴼ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ, ⵢⴻⵔⵏⴰ ⵢⴻⵏⵏⴰ-ⴷ ⴷ ⴰⴽⴽⴻⵏ ⵉⵎⴷⴰⵏⴻⵏ-ⴰ ⵢⴻⵜⵜⵡⴰⵙⵙⴻⵏ ⵓⵡⴻⵀⵀⵉ-ⵏⵙⴻⵏ ⴰⵙⴻⵔⵜⵉ, ⵢⴻⵔⵏⴰ ⴽⵔⴰ ⵙⴻⴳ-ⵙⴻⵏ ⵇⵇⵏⴻⵏ ⵖⴻⵔ ⵢⵉⴽⴰⴱⴰⵔⴻⵏ ⵢⴻⵙⵄⴰⵏ ⵜⵜⴻⵙⵔⵉⵃ, ⵎⴰ ⴷ ⵡⵉⵢⴰⴹ ⵇⵇⵏⴻⵏ ⵖⴻⵔ ⵢⵉⴽⴰⴱⴰⵔⴻⵏ ⵓⵔ ⵢⴻⵙⵄⵉⵏ ⵜⵜⴻⵙⵔⵉⵃ.
ⵢⴻⵏⵏⴰ-ⴷ ⴷⴰⵖ ⵓⵙⴻⵍⵡⴰⵢ ⴷ ⴰⴽⴽⴻⵏ ⵢⴻⵙⵙⴻⴼⴽ ⴰⴷ ⴷ-ⵢⵉⵍⵉ ⵍⴻⵃⴷⴻⵔ ⵙⴻⴳ ⵡⴰⴷⴰⴼ ⵏ ⵢⵉⵔⴻⴱⵔⴰⴱⴻⵏ ⵖⴻⵔ ⵜⵎⴻⵙⴱⴰⵏⵉⵢⵉⵏ-ⴰ, ⴰⵎ ⵡⴰⴽⴽⴻⵏ ⴰⵢ ⴷ-ⵢⴻⵔⵏⴰ ⴷ ⴰⴽⴽⴻⵏ ⵍⵍⴰⵏ ⴽⵔⴰ ⵏ ⵢⵉⵎⴻⵙⴼⴻⵙⴷⴻⵏ ⴷ ⵢⵉⵎⴰⴽⴰⵔⴻⵏ ⴰⵢ ⵉⴼⵓⵕⵙⴻⵏ ⵜⵎⴻⵙⴱⴰⵏⵉⵢⵉⵏ-ⴰ ⴰⴽⴽⴻⵏ ⴰⴷ ⴳⴻⵏ ⵍⴻⵛⵖⴰⵍ ⵏ ⵜⴻⴽⵔⵉⴹⵜ (ⵄⵓⵏⴼ), ⴰⴷ ⵔⵥⴻⵏ ⵏⴻⵖ ⴰⴷ ⴰⴽⵔⴻⵏ ⴰⵢⵍⴰ ⵏ ⵓⵡⴰⵏⴰⴽ (ⴷⴰⵡⵍⴰ) ⵏⴻⵖ ⵏ ⵎⴻⴷⴷⴻⵏ, ⴷⵖⴰ ⴷ ⴰⵢⴰ ⴰⵢ ⵢⴻⵙⵙⴰⵡⴹⴻⵏ ⵉⴷⵓⴱⴰ ⴰⴷ ⴷ-ⵃⴻⵜⵜⵎⴻⵏ ⴰⴳⴷⴰⵍ ⵏ ⵜⵓⴼⴼⵖⴰ, ⵢⴻⵔⵏⴰ ⵢⴻⵙⵎⴻⴽⵜⵉ-ⴷ ⵓⵙⴻⵍⵡⴰⵢ ⴷ ⴰⴽⴽⴻⵏ ⵎⴰⵣⴰⵍ ⵜⴰⴳⵏⵉⵜ ⵏ ⵜⵓⵄⵊⵉⵍⵉⵏ ⴷⴻⴳ ⵍⴼⴻⵄⵍ.
ⵉⵡⴻⵜ-ⴷ ⵛⴰⵉⴷ ⴻⵙⵙⴻⴱⵙⵉ ⵙ ⵜⴻⵇⵙⴻⵃ ⴷⴻⴳ ⴽⵔⴰ ⵏ ⵜⵜⴰⵡⵉⵍⴰⵜ ⵏ ⵢⵉⵙⴰⵍⴰⵏ ⴰⵢ ⵢⴻⵙⵎⴻⵖⵔⴻⵏ ⵜⴰⴳⵏⵉⵜ ⴷⴻⴳ ⵓⵙⵙⵉⵡⴻⴹ ⵏ ⵢⵉⵙⴰⵍⴰⵏ ⵖⴻⴼ ⵜⴻⴳⵏⵉⵜ ⴰⵢⴷⴻⴳ ⵜⴻⵍⵍⴰ ⵜⵎⵓⵔⵜ.
ⴷⴻⴳ ⵡⴰⴽⵓⴷ ⴰⵢⴷⴻⴳ ⵢⴻⵙⵜⴻⵄⵕⴻⴼ ⴷ ⴰⴽⴽⴻⵏ ⵜⵉⵎⴻⵙⴱⴰⵏⵉⵢⵉⵏ-ⴰ ⵏ ⵢⵉⵍⴻⵎⵥⵉⵢⴻⵏ ⴷ ⵜⵓⵣⵔⵉⴼⵉⵏ ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⵜⴰⵔⴻⴱⴱⴰⵡⵜ ⴷ ⵓⵄⵣⴰⵍ-ⵏⵙⴻⵏ ⵙⴻⴳ ⵢⵉⴷⵉⵙ ⴰⴷⴰⵎⵙⴰⵏ, ⵢⴻⵙⵎⴻⴽⵜⵉ-ⴷ ⴷ ⴰⴽⴽⴻⵏ ⴰⴱⴻⵔⵔⵉⵃ ⵏ ⵜⴻⴳⵔⴰⵡⵍⴰ ⵜⴰⵜⵓⵏⵙⵉⵜ ⵏⴻⵜⵜⴰ ⴷ ⵜⵉⵍⴻⵍⵍⵉ ⴷ ⵏⵏⵉⴼ.
ⴰⵏⴰⴱⴰⴹ (ⵃⵓⴽⵓⵎⴰ) ⴰⵎⵉⵔⴰⵏ ⵏ ⵜⵓⵏⴻⵙ ⵢⴻⴱⴷⴰ ⴰⵅⴻⴷⴷⵉⵎ-ⵏⵏⴻⵙ ⵇⵔⵉⴱ ⴰⵙⴻⴳⴳⴰⵙ ⴰⵢⴰ, ⵢⴻⵔⵏⴰ ⵢⴻⵡⵕⴻⵜ-ⴷ ⵜⴰⴳⵏⵉⵜ ⵜⴰⴷⴰⵎⵙⴰⵏⵜ ⴷ ⵜⴰⵡⴻⵄⵕⴰⵏⵜ ⴰⵢⴷⴻⴳ ⵜⴰⵔⴻⴱⴱⴰⵡⵜⵔ ⵜⵃⵓⵣⴰ ⴰⵣⴰⵍ ⵏ 700.000 ⵏ ⵢⵉⵍⴻⵎⵥⵉⵢⴻⵏ, ⴳⴰⵔ-ⴰⵙⴻⵏ 300.000 ⵙⴻⴳ ⵡⵉⴷ ⴰⵢ ⴷ-ⵢⴻⵡⵡⵉⵏ ⵉⴳⴻⵔⴷⴰⵙⴻⵏ (ⵛⴰⵀⴰⴷⴰⵜ) ⵉⵙⴷⴰⵡⴰⵏⴻⵏ, ⵢⴻⵔⵏⴰ ⵖⴻⴼ ⵡⴰⵢⴰ, ⵢⴻⵙⵙⵓⵜⴻⵔ ⵓⵙⴻⵍⵡⴰⵢ ⵙⴻⴳ ⵓⵏⴰⴱⴰⴹ ⴰⴷ ⴷ-ⵉⵇⴻⴷⴷⴻⵎ ⴰⵀⵉⵍⴻⵏ ⵉ ⵍⵎⴻⵏⴷ ⵏ ⵓⵙⵙⴻⵏⵇⴻⵙ ⵏ ⵜⵔⴻⴱⴱⴰⵡⵜ ⵖⴻⴼ ⵣⵉⴽ ⵍⵃⴰⵍ ⴷⴻⴳ ⵜⴻⵎⵏⴰⴹⵉⵏ ⵉⵅⵓⵚⵚⴻⵏ.
