ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⴰⵙⴻⵏⴼⴰⵔ ⵏ ⵓⵙⵍⴰⴳ ⵏ ⵓⴱⵔⵉⴷ ⵏ ⵡⵓⵣⵣⴰⵍ ⵍⵄⴻⴼⵕⵓⵏ-ⵍⴻⵅⵎⵉⵙ ⵏ ⵜⵎⴻⵍⵢⴰⵏⵜ ⴰⴷ ⵉⴼⴰⴽ ⴷⴻⴳ 2018

ⵍⴻⴱⵍⵉⴷⴰ – ⵢⴻⵏⵏⴰ-ⴷ ⵓⵏⴻⵖⵍⴰⴼ ⵏ ⵓⵎⴻⵙⵏⵉ (ⵏⴰⵇⵍ), ⴱⵧⵓⴷⵊⴻⵎⴰⴰ ⵜⴰⵍⴰⵉ, ⴰⵙⵙ ⵏ ⵍⴻⵜⵏⵉⵢⴻⵏ ⴷⴻⴳ ⵍⴻⴱⵍⵉⴷⴰ ⴷ ⴰⴽⴽⴻⵏ ⵢⴻⵙⵙⴻⴼⴽ ⴰⴷ ⵉⴼⴰⴽ ⵓⵙⴻⵏⴼⴰⵔ ⵏ ⵓⵙⵍⴰⴳ ⵏ ⵓⴱⵔⵉⴷ ⵏ ⵡⵓⵣⵣⴰⵍ ⵏ ⵜⵔⵉⵙⵉⵜⵉ ⵍⵄⴻⴼⵕⵓⵏ (ⵍⴻⴱⵍⵉⴷⴰ) – ⵍⴻⵅⵎⵉⵙ ⵏ ⵜⵎⴻⵍⵢⴰⵏⵜ (ⵄⵉⵏ ⴷⴷⴻⴼⵍⴰ) ⵢⴻⵔⵏⴰ ⴰⴷ ⵢⴻⴱⴷⵓ ⴰⵅⴻⴷⴷⵉⵎ ⴷⴻⴳ ⵜⴻⵣⵡⴰⵔⴰ ⵏ 2018.

ⴰⵏⴻⵖⵍⴰⴼ, ⴰⵢ ⵢⴻⵙⴼⴻⵇⴷⴻⵏ ⴰⵃⵔⵉⵛ ⵙⴻⴳ ⵓⵙⴻⵏⴼⴰⵔ-ⴰ ⴷⴻⴳ ⵡⴰⴽⴰⵍ ⵏ ⵜⵡⵉⵍⴰⵢⵜ ⵏ ⵍⴻⴱⵍⵉⴷⴰ ⵢⴻⵔⵏⴰ ⵖⴻⵣⵣⵉⴼ 56,3 ⵏ ⵢⵉⴽⵉⵍⵓⵎⵉⵜⵔⴻⵏ, ⵉⴳⴻⵔ-ⴷ ⵜⵉⵖⵔⵉ ⵉ ⵢⵉⵎⴹⴻⴱⴱⵔⴻⵏ ⵏ ⵜⴻⵕⵎⵉⵙⵉⵏ ⴰⵢ ⴷ-ⵢⴻⵍⵀⴰⵏ ⵙ ⵍⴻⴱⵏⵉ-ⵏⵏⴻⵙ ⴰⴽⴽⴻⵏ ⴰⴷ ⴼⴰⴽⴻⵏ ⴰⵅⴻⴷⴷⵉⵎ, ⵎⴰ ⴰⵟⴰⵙ, ⴷⴻⴳ ⵜⴻⵣⵡⴰⵔⴰ ⵏ 2018, ⴰⴽⴽⴻⵏ ⴰⴷ ⵢⴻⵣⵎⴻⵔ ⵓⵡⴰⵏⴰⴽ (ⴷⴰⵡⵍⴰ) ⴷ ⵢⵉⵎⴻⵣⴷⴰⵖⴻⵏ ⴰⴷ ⴷ-ⵙⴼⴰⵢⴷⵉⵏ ⵙⴻⴳ-ⵙ.

ⴰⵙⴻⵏⴼⴰⵔ-ⴰ ⵃⴰⵣⴻⵏ-ⴰⵙ-ⴷ ⵜⴰⵊⴻⵍⵍⴰⴱⵜ ⵏ 69 ⵏ ⵢⵉⵎⴻⵍⵢⴰⵕⴻⵏ ⵏ ⵢⵉⴷⵉⵏⴰⵕⴻⵏ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵉⵅⴻⴱⴱⴻⵔ ⵓⵏⴻⵖⵍⴰⴼ.

ⵙⴻⴳ ⵢⵉⴷⵉⵙ ⵏⵉⴹⴻⵏ, ⵉⵡⴻⴽⴽⴻⴷ-ⴷ ⵎⴰⵙⵙ ⵜⴰⵍⴰⵉ ⴷ ⴰⴽⴽⴻⵏ ⵢⴻⵙⵙⴻⴼⴽ ⴰⴷ ⵜⵜⵡⴰⴽⴽⵙⴻⵏ ⴰⴽⴽ ⵢⵉⵄⴻⵡⵡⵉⵇⴻⵏ ⴰⵢ ⵉⵣⴻⵎⵔⴻⵏ ⴰⴷ ⵙⵙⴰⵥⵢⴻⵏⵜ ⵜⵉⴷⴷⵉⵜ ⵏ ⵓⵅⴻⴷⴷⵉⵎ, ⵍⴰⴷⵖⴰ ⵡⵉⴷ ⵢⴻⵇⵇⵏⴻⵏ ⵖⴻⵔ ⵢⵉⵎⴰⵡⵍⴰⵏ ⵏ ⵡⴰⴽⴰⵍ, ⴰⴽⴽⴻⵏ ⴰⴷ ⵉⴼⴰⴽ ⵓⵅⴻⴷⴷⵉⵎ ⴷⴻⴳ ⵡⴰⴽⵓⴷ ⴰⵢⴷⴻⴳ ⵙⵙⴻⴼⵔⴰⵏ.

« ⵙⴻⴳ ⵢⵉⵎⵉⵔ-ⴰ ⴷ ⴰⵙⴰⵡⴻⵏ, ⵢⴻⵙⵙⴻⴼⴽ ⴰⴷ ⴼⵔⵓⵏ ⴰⴽⴽ ⵡⵓⴳⵓⵔⴻⵏ ⵢⴻⵇⵇⵏⴻⵏ ⵖⴻⵔ ⵜⴻⵏⵎⴻⴳⵍⵉⵡⵉⵏ ⵓⵇⴱⴻⵍ ⵎⴰ ⵢⴻⴱⴷⴰ ⵓⵙⴻⵏⴼⴰⵔ, ⴰⴽⴽⴻⵏ ⵓⵔ ⴷ-ⵉⴳⴻⵍⵍⵓ ⴰⵔⴰ ⵡⴰⵢⴰ ⵙ ⵍⴰⵜⴻⵕ ⴷⴻⴳ ⵜⵉⴷⴷⵉⵜ ⵏ ⵓⵅⴻⴷⴷⵉⵎ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵏⴻⵖⵍⴰⴼ.

ⵉⵅⴻⴷⴷⵉⵎⴻⵏ ⵏ ⵓⵙⵍⴰⴳ ⵏ ⵓⴱⵔⵉⴷ ⵏ ⵡⵓⵣⵣⴰⵍ ⵏ ⵜⵔⵉⵙⵉⵜⵉ ⵍⵄⴻⴼⵕⵓⵏ-ⵍⴻⵅⵎⵉⵙ ⵏ ⵜⵎⴻⵍⵢⴰⵏⵜ ⵃⵓⵣⴰⵏ-ⴷ ⴷⴰⵖ ⵍⴻⴱⵏⵉ ⵏ ⵙⵉⵏ ⵏ ⵢⵉⴳⴻⵏⵏⴰⵔⵉⵢⴻⵏ (ⴰⵏⴼⴰⵇ), ⵡⵉⵏ ⵏ ⵔⴻⵎⴹⴰⵏ ⵖⴻⵣⵣⵉⴼⴻⵏ 2869 ⵏ ⵍⵎⵉⵜⵔⴰⵜ, ⴷ ⵡⵉⵏ ⵏ ⴳⵓⵏⵟⴰⵙ ⵖⴻⵣⵣⵉⴼⴻⵏ 7348 ⵏ ⵍⵎⵉⵜⵔⴰⵜ, ⴰⵎ ⵡⴰⴽⴽⴻⵏ ⴰⴷ ⴱⵏⵓⵏ ⴷⴰⵖ 6 ⵏ ⵜⴻⵖⵙⴰⵔ (ⵎⴰⵃⴰⵟⵟⴰⵜ) ⵏ ⵜⵎⴰⵛⵉⵏⵜ, ⵖⴻⴼ ⵡⴰⴽⴽⴻⵏ ⴰⵢ ⴰⵖ-ⴷ-ⵙⴼⴻⵀⵎⴻⵏ ⴷⵉⵏ.

ⴰⴱⵔⵉⴷ-ⴰ ⴰⴷ ⵢⵉⵍⵉ ⴷ ⴰⵃⵔⵉⵛ ⵙⴻⴳ ⵢⵉⵣⵉⵔⵉⴳ (ⵅⴰⵟⵟ) ⴳⴰⵔ ⵍⴻⵣⵣⴰⵢⴻⵔ ⴷ ⵡⴻⵀⵕⴰⵏ, ⵢⴻⵔⵏⴰ ⴰⵙⵎⵉ ⴰⴷ ⵢⴻⴱⴷⵓ ⴰⴷ ⵢⴻⵜⵜⵡⴰⵖⴻⵍⵍⴰⵜ, ⴰⴷ ⵣⴻⵎⵔⴻⵏ ⵎⴻⴷⴷⴻⵏ ⴰⴷ ⵜⵜⴻⴷⴷⵓⵏ ⵙ ⵡⴰⵣⵣⴰⵍ ⵏ 160 ⵏ ⵢⵉⴽⵉⵍⵓⵎⵉⵜⵔⴻⵏ ⵉ ⵜⵙⴰⵄⴻⵜ, ⵎⴰ ⴷ ⵙⵙⴻⵍⵄⴰ ⴰⴷ ⵜⴻⵜⵜⴻⴷⴷⵓ ⵙ ⵡⴰⵣⵣⴰⵍ ⵏ 110 ⵏ ⵢⵉⴽⵉⵍⵓⵎⵉⵜⵔⴻⵏ ⵉ ⵜⵙⴰⵄⴻⵜ, ⵢⴻⵔⵏⴰ ⴰⵢⴰ ⴰⴷ ⵢⴻⵜⵜⴻⴽⴽⵉ ⴷⴻⴳ ⵓⵙⵊⵓⴵⴵⴻⴳ ⵏ ⵜⴷⴰⵎⵙⴰ ⵏ ⵜⴻⵎⵏⴰⴹⵜ.