ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵓⵏⵉⵛⴻⴼ ⵜⵓⴳⴰⴷ ⵙⴻⴳ ⵜⵎⴻⵔⵏⵉⵡⵜ ⵏ ⵢⵉⴳⴻⵔⴷⴰⵏ ⴳⴰⵔ ⵢⵉⵎⵉⵏⵉⴳⴻⵏ ⴰⵢ ⵍⴰ ⵉⵣⴻⴳⴳⵔⴻⵏ ⴰⴳⵔⴰⴽⴰⵍ

ⴳⴻⵏⴻⵠⴻ – ⵢⴻⵏⵏⴰ-ⴷ ⵓⵙⴻⵏⴷⵓⵇ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⵉ ⵜⴳⴻⵔⴷⴰ (ⵓⵏⵉⵛⴻⴼ), ⴰⵙⵙ ⵏ ⵜⵜⵍⴰⵜⴰ, ⴷ ⴰⴽⴽⴻⵏ ⵜⴻⵛⵖⴻⴱ-ⵉⵜ ⵜⴻⴳⵏⵉⵜ ⵏ ⵜⵎⴻⵔⵏⵉⵡⵜ ⵏ ⵢⵉⴳⴻⵔⴷⴰⵏ ⴰⵢ ⵍⴰ ⵉⵣⴻⴳⴳⵔⴻⵏ ⵉⵍⴻⵍ ⴰⴳⵔⴰⴽⴰⵍ ⴳⴰⵔ ⵟⵟⴻⵔⴽ ⴷ ⵍⴻⴳⵔⵉⴳ.

« ⴰⵙⵙ-ⴰ, ⵉⴳⴻⵔⴷⴰⵏ ⵡⵡⴹⴻⵏ ⵖⴻⵔ 36% ⵙⴻⴳ ⵡⵉⴷ ⴰⵢ ⵍⴰ ⵉⵄⴻⵔⵔⴹⴻⵏ ⴰⴷ ⴳⴻⵏ ⴰⵣⴳⴰⵔ ⴰⵎⵉⵀⴰⵡ (ⵅⴰⵟⵉⵔ) ⵏ ⵢⵉⵍⴻⵍ ⴳⴰⵔ ⵟⵟⴻⵔⴽ ⴷ ⵍⴻⴳⵔⵉⴳ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⵓⵏⵉⵛⴻⴼ.

ⴷⴻⴳ ⵓⵣⵔⵓⴳ ⵏ ⵜⵍⵉⵙⴰ ⴳⴰⵔ ⵍⴻⴳⵔⵉⴳ ⴷ ⴳⴻⵠⴳⴻⵍⵉⵍⵊⴰ (ⴷⴻⴳ ⵎⴰⵙⵉⴷⵓⵏⵢⴰ), « ⵉⴳⴻⵔⴷⴰⵏ ⴷ ⵜⵙⴻⴷⵏⴰⵏ ⵡⵡⴹⴻⵏ ⵖⴻⵔ 60% » ⵙ ⵓⵊⴻⵎⵎⴰⵍ, ⵢⴻⵔⵏⴰ ⵄⴻⴷⴷⴰⵏ, ⵉ ⵜⵉⴽⴽⴻⵍⵜ ⵜⴰⵎⴻⵣⵡⴰⵔⵓⵜ, ⴰⵎⴹⴰⵏ ⵏ ⵢⵉⵔⴳⴰⵣⴻⵏ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⵙⴰⵔⴰⵀ ⵛⵔⵧⵡⴻ, ⵜⴰⵎⵓⵜⵍⴰⵢⵜ (ⵏⴰⵟⵉⵇⴰ) ⵏ ⵓⵏⵉⵛⴻⴼ.

ⴷⴻⴳ ⵢⵓⵏⵢⵓ ⵢⴻⵣⵔⵉⵏ, 73% ⵙⴻⴳ ⵢⵉⵎⵉⵏⵉⴳⴻⵏ ⴰⵢ ⴷ-ⵢⴻⵜⵜⴰⵡⴹⴻⵏ ⵖⴻⵔ ⵓⵣⵔⵓⴳ-ⴰ ⵍⵍⴰⵏ ⴷ ⵉⵔⴳⴰⵣⴻⵏ, ⵢⴻⵔⵏⴰ ⴰⵍⴰ 10% ⴰⵢ ⵢⴻⵍⵍⴰⵏ ⵙⵄⴰⵏ ⴷⴷⴰⵡ 18 ⵏ ⵢⵉⵙⴻⴳⴳⴰⵙⴻⵏ.

ⵉⴳⴻⵏⵙⴰⵙⴻⵏ (ⵎⵓⵎⴰⵜⵜⵉⵍⵉⵏ) ⵏ ⵓⵏⵉⵛⴻⴼ ⵡⴻⴽⴽⴷⴻⵏ-ⴷ ⴷ ⴰⴽⴽⴻⵏ ⵉⴳⴻⵔⴷⴰⵏ ⵜⵜⴻⵏⴹⴻⵔⵔⴰⵢⴻⵏ ⵓⴳⴰⵔ ⵙⴻⴳ ⵜⴻⴳⵏⴰⵜⵉⵏ ⵜⵉⵡⴻⵄⵕⴰⵏⵉⵏ ⵏ ⵓⵣⴳⴰⵔ ⵏ ⵢⵉⵍⴻⵍ.

ⵖⴻⴼ ⵍⴻⵃⵙⴰⴱ ⵏ ⵜⵓⴷⴷⵙⴰ ⵜⴰⴳⵔⴰⵖⵍⴰⵏⵜ ⵏ ⵢⵉⵏⵉⴳ, 60 ⵙⴻⴳ 272 ⵏ ⵢⵉⵎⵉⵏⵉⴳⴻⵏ ⴰⵢ ⴷ-ⵓⴼⴰⵏ ⵎⵎⵓⵜⴻⵏ ⴳⴰⵔ ⵟⵟⴻⵔⴽ ⴷ ⵍⴻⴳⵔⵉⴳ ⴷⴻⴳ ⵢⴻⵏⵏⴰⵢⴻⵔ ⵍⵍⴰⵏ ⴷ ⵉⴳⴻⵔⴷⴰⵏ.

ⵙⴻⴳ ⵢⵉⴷⵉⵙ ⵏⵉⴹⴻⵏ, ⴰⵟⴰⵙ ⵏ ⵢⵉⴳⴻⵔⴷⴰⵏ ⴰⵢ ⵢⴻⵡⵡⴹⴻⵏ ⵖⴻⵔ ⵜⵓⵕⵓⴼⵜ ⵡⴰⵔ ⵎⴰ ⴷⴷⴰⵏ-ⴷ ⵢⵉⴷ-ⵙⴻⵏ ⵢⵉⵎⴻⵇⵔⴰⵏⴻⵏ.

ⵜⴰⵏⴻⴳⴳⴰ ⵏ ⵓⵙⵙⴻⵎⵢⵓⴷⴷⴻⵙ ⴰⵎⵙⵓⵍⵜⴰⵏ ⵏ ⵜⵓⵕⵓⴼⵜ, ⴻⵓⵔⵧⵒⵧⵍ, ⵜⴻⵏⵏⴰ-ⴷ, ⴰⵙⵙ ⵏ ⵍⵃⴻⴷⴷ, ⴷ ⴰⴽⴽⴻⵏ ⵓⴳⴰⵔ ⵏ 10.000 ⵏ ⵢⵉⴳⴻⵔⴷⴰⵏ ⵉⵎⵉⵏⵉⴳⴻⵏ (ⵓⵔ ⵢⴻⵙⵄⵉⵏ ⵉⵎⴻⵇⵔⴰⵏⴻⵏ ⵢⵉⴷ-ⵙⴻⵏ) ⴰⵢ ⵉⵄⴻⵔⵇⴻⵏ ⴷⴻⴳ ⵜⵓⵕⵓⴼⵜ ⴷⴻⴳ 24 ⵏ ⵡⴰⵢⵢⵓⵔⴻⵏ ⵉⵏⴻⴳⴳⵓⵔⴰ, ⵢⴻⵔⵏⴰ ⴷ ⴰⵢⴰ ⴰⵢ ⵢⴻⴵⴵⴰⵏ ⴰⴷ ⵢⵉⵍⵉ ⵛⵛⴻⴽ ⴷ ⴰⴽⴽⴻⵏ ⴰⵀⴰⵜ ⴰⵟⴰⵙ ⵙⴻⴳ-ⵙⴻⵏ ⵅⴻⴹⴼⴻⵏ-ⵜⴻⵏ ⵢⵉⵥⴻⴹⵡⴰⵏ ⵏ ⵜⴻⵊⵔⵉⵎⵜ ⵢⴻⵜⵜⵡⴰⵙⵙⵓⴷⴷⵙⴻⵏ ⴰⴽⴽⴻⵏ ⴰⴷ ⵜⴻⵏ-ⵖⴻⵍⵍⵜⴻⵏ, ⵍⴰⴷⵖⴰ ⴷⴻⴳ ⵓⵏⵔⴰⵔ ⵏ ⵡⵓⵣⵓⴼ (ⴵⵉⵏⵙ).

ⴰⵣⴰⵍ ⵏ 62.200 ⵏ ⵢⵉⵎⵉⵏⵉⴳⴻⵏ ⴷ ⵢⵉⵣⵔⴰⵣⴰⵖⴻⵏ, ⴰⵎⵓⵔ ⴰⵎⴻⵇⵔⴰⵏ ⵙⴻⴳ-ⵙⴻⵏ ⵓⵙⴰⵏ-ⴷ ⵙⴻⴳ ⵙⵓⵔⵢⴰ, ⴰⴼⵖⴰⵏⵉⵙⵜⴰⵏ ⴷ ⵄⵉⵔⴰⵇ, ⴰⵢ ⵢⵓⴷⴼⴻⵏ ⵖⴻⵔ ⵜⵓⵕⵓⴼⵜ ⵙⴻⴳ ⵜⵎⵓⵔⵜ ⵏ ⵍⴻⴳⵔⵉⴳ ⴷⴻⴳ ⵢⴻⵏⵏⴰⵢⴻⵔ ⵢⴻⵣⵔⵉⵏ, ⵖⴻⴼ ⵍⴻⵃⵙⴰⴱ ⵏ ⵜⵓⴷⴷⵙⴰ ⵜⴰⴳⵔⴰⵖⵍⴰⵏⵜ ⵏ ⵢⵉⵏⵉⴳ. 20.000 ⵙⴻⴳ-ⵙⴻⵏ ⵍⵍⴰⵏ ⴷ ⵉⴳⴻⵔⴷⴰⵏ ⵡⵓⴽⵓⴷ ⵓⵔ ⴷ-ⴷⴷⵉⵏ ⵢⵉⵎⴻⵇⵔⴰⵏⴻⵏ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⵜⵓⴷⴷⵙⴰ-ⴰ.