ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵜⵓⵏⴻⵙ: ⵢⴻⵜⵜⵡⴰⴽⴽⴻⵙ ⵓⴳⴷⴰⵍ ⵏ ⵜⵓⴼⴼⵖⴰ ⴷⴻⴳ ⵢⵉⴹ

ⵜⵓⵏⴻⵙ – ⵏⵏⴰⵏ-ⴷ ⵢⵉⴷⵓⴱⴰ (ⵙⵓⵍⵓⵟⴰⵜ) ⵉⵜⵓⵏⵙⵉⵢⴻⵏ, ⴰⵙⵙ ⵏ ⵍⴻⵅⵎⵉⵙ, ⴷⴰⴽⴽⴻⵏ ⵢⴻⵜⵜⵡⴰⴽⴽⴻⵙ ⵓⴳⴷⴰⵍ-ⵏⵏⵉ ⵏ ⵜⵓⴼⴼⵖⴰ ⴰⵢ ⴷ-ⴳⴰⵏ ⴰⵙⵙ ⵏ 22 ⵢⴻⵏⵏⴰⵢⴻⵔ ⵢⴻⵣⵔⵉⵏ ⵖⴻⴼ ⵍⴵⴰⵍ ⵏ ⵍⵎⵓⵊⴰ-ⵏⵏⵉ ⵏ ⵜⵎⴻⵙⴱⴰⵏⵉⵢⵉⵏ ⵜⵉⵎⴻⵇⵔⴰⵏⵉⵏ ⴰⵢ ⵉⵏⴻⴽⵔⴻⵏ ⵉ ⵜⵉⴽⴽⴻⵍⵜ ⵜⴰⵎⴻⵣⵡⴰⵔⵓⵜ ⵙⴻⴳ ⵡⴰⵙⵎⵉ ⴰⵢ ⴷ-ⵜⴻⵍⵍⴰ ⵜⵏⴻⴽⵔⴰ ⵜⴰⵖⴻⵔⴼⴰⵏⵜ ⵏ 2011.

« ⵉⵎⵉ ⴰⵢ ⵜⴻⵍⵀⴰ ⵜⴻⴳⵏⵉⵜ ⵏ ⵜⵖⴻⵍⵍⵉⵙⵜ (ⴰⵎⵏ), ⵢⴻⵍⵍⴰ-ⴷ ⵓⵖⵜⴰⵙ ⴰⵙⵙ ⵏ ⵍⴻⵅⵎⵉⵙ (…) ⵉ ⵜⵓⴽⴽⵙⴰ ⵏ ⵓⴳⴷⴰⵍ ⵏ ⵜⵓⴼⴼⵖⴰ ⴷⴻⴳ ⵡⴰⴽⴽ ⵜⵉⵎⵏⴰⴹⵉⵏ ⵏ ⵜⵓⵏⴻⵙ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵖⵍⵉⴼ ⴰⵜⵓⵏⵙⵉ ⵏ ⵜⵖⴰⵡⵙⵉⵡⵉⵏ ⵏ ⴷⴰⵅⴻⵍ ⴷⴻⴳ ⵢⵉⵡⴻⵏ ⵏ ⵓⵍⵖⵓ (ⴱⴰⵢⴰⵏ).

ⴷⴻⴳ ⵜⴰⵣⵡⴰⵔⴰ, ⴰⴳⴷⴰⵍ-ⵏⵏⵉ ⵏ ⵜⵓⴼⴼⵖⴰ ⵢⴻⵍⵍⴰ-ⴷ ⵙⴻⴳ ⵙ8:00 ⵏ ⵜⵎⴻⴷⴷⵉⵜ ⴰⵔⵎⴰ ⴷ ⵙ5:00 ⵏ ⵜⵚⴻⴱⵃⵉⵜ, ⵙⴰⴽⴽⵉⵏ ⵢⴻⵜⵜⵡⴰⵙⵙⴰⴼⵙⴻⵙ ⵙⴻⴳ 29 ⵢⴻⵏⵏⴰⵢⴻⵔ ⴷ ⴰⵙⴰⵡⴻⵏ, ⵢⴻⵔⵏⴰ ⵢⵓⵖⴰⵍ ⵉⴱⴻⴷⴷⵓ-ⴷ ⵖⴻⴼ ⵙ12:00 ⴷ ⴰⵙⴰⵡⴻⵏ.

ⵏⴻⴽⵔⴻⵏⵜ, ⴷⴻⴳ ⵢⴻⵏⵏⴰⵢⴻⵔ ⵢⴻⵣⵔⵉⵏ, ⵜⵎⴻⵙⴱⴰⵏⵉⵢⵉⵏ ⴷ ⵜⵉⵎⴻⵇⵔⴰⵏⵉⵏ ⴷⴻⴳ ⵜⵓⵏⴻⵙ, ⵢⴻⵔⵏⴰ ⵙⴻⴳ ⵡⴰⵙⵎⵉ ⴰⵢ ⴷ-ⵜⴻⵍⵍⴰ ⵜⵏⴻⴽⵔⴰ ⵜⴰⵖⴻⵔⴼⴰⵏⵜ ⵏ 2011, ⵓⵔ ⵉⵄⴰⵡⴻⴷ ⵢⴻⵏⴽⴻⵔ ⵛⵛⵡⴰⵍ ⴰⵎⴻⵇⵔⴰⵏ ⴰⵏⴻⵛⵜ ⵡⴰ ⴰⵢ ⵉⵏⴻⴽⵔⴻⵏ ⴷⴻⴳ ⵢⴻⵏⵏⴰⵢⴻⵔ.

ⵢⴻⴱⴷⴰ-ⴷ ⵓⵎⵓⵙⵙⵓ-ⴰ (ⵃⴰⵔⴰⴽⴰ) ⵏ ⵜⵎⴻⵙⴱⴰⵏⵉⵢⵉⵏ ⴷⴻⴼⴼⵉⵔ ⵎⴰ ⵢⴻⵎⵎⵓⵜ ⵢⵉⵡⴻⵏ ⵏ ⵓⵎⴻⵙⴱⴰⵏⵉ, ⵔⵉⴷⵀⴰ ⵢⴰⵀⵉⴰⵧⵓⵉ, ⴰⵙⵙ ⵏ 16 ⵢⴻⵏⵏⴰⵢⴻⵔ ⵙ ⵜⵔⵉⵙⵉⵜⵉ, ⴷⴻⴳ ⵡⴰⴽⵓⴷ ⴰⵢⴷⴻⴳ ⵢⴻⵍⵍⴰ ⵢⴻⵜⵜⵛⴻⵜⴽⵉ-ⴷ ⵉⵎⵉ ⴰⵢ ⴽⴽⵙⴻⵏ ⵉⵙⴻⵎ-ⵏⵏⴻⵙ ⵙⴻⴳ ⵡⵓⵎⵓⵖ (ⵇⴰ’ⵉⵎⴰ) ⵏ ⵡⵉⴷ ⴰⴷ ⵙⵙⵉⴷⴼⴻⵏ ⴰⴷ ⵅⴻⴷⵎⴻⵏ ⴷⴻⴳ ⵜⵡⵓⵔⵉ ⵜⴰⵏⴰⴳⴷⵓⴷⵜ.

ⵓⵔⴼⴰⵏ ⵏ ⵍⵖⴰⵛⵉ ⵣⴻⵔⵄⴻⵏ, ⴷⴻⴳ ⵡⵓⵙⵙⴰⵏ ⴰⵢ ⴷ-ⵉⴹⴻⴼⵔⴻⵏ, ⵖⴻⵔ ⵜⴻⵎⵏⴰⴹⵉⵏ ⵏⵉⴹⴻⵏ, ⵢⴻⵔⵏⴰ ⵢⴻⵍⵍⴰ-ⴷ ⵢⵉⵎⴻⵏⵖⵉ ⴳⴰⵔ ⵢⵉⵎⴻⵙⴱⴰⵏⵉⵢⴻⵏ ⴰⵢ ⵢⴻⵍⵍⴰⵏ ⵜⵜⵣⴻⵍⵍⵉⵏ ⵉⵥⵔⴰ ⴷ ⵢⵉⵖⴰⵍⵍⴻⵏ ⵏ ⵜⵖⴻⵍⵍⵉⵙⵜ ⴰⵢ ⴰⵙⴻⵏ-ⴷ-ⵢⴻⵜⵜⴰⵔⵔⴰⵏ ⵙ ⵍⴳⴰⵣ ⵏ ⵢⵉⵎⴻⵟⵟⴰⵡⴻⵏ.

ⴷⴻⴳ ⵢⵉⴹ ⵏ 21 ⴷ 22 ⵢⴻⵏⵏⴰⵢⴻⵔ, ⵔⵥⴰⵏ ⵢⵉⵎⴻⵙⴱⴰⵏⵉⵢⴻⵏ ⵜⵉⵃⵓⵏⴰ ⴷⴻⴳ ⵢⵉⵡⴻⵏ ⵏ ⵓⴳⵎⴰⵎ (ⵃⴰⵢⵢ) ⴰⵖⴻⵔⴼⴰⵏ ⴷⴻⴳ ⵜⵓⵏⴻⵙ ⵜⴰⵎⴰⵏⴻⵖⵜ (ⴻⵜⵜⴰⴷⵀⴰⵎⴻⵏ).

ⴷⵖⴰ, ⴰⵣⴻⴽⴽⴰ-ⵏⵏⵉ ⴽⴰⵏ, ⴳⴰⵏ-ⴷ ⵢⵉⴷⵓⴱⴰ ⵉⵜⵓⵏⵙⵉⵢⴻⵏ ⴰⴳⴷⴰⵍ ⵏ ⵜⵓⴼⴼⵖⴰ « ⵖⴻⴼ ⵍⴵⴰⵍ ⵏ ⵓⵜⵄⴻⴷⴷⵉ ⵖⴻⴼ ⵡⴰⵢⵍⴰ ⴰⵏⴰⴳⴷⵓⴷ ⴷ ⵡⵓⵙⵍⵉⴳ », ⴷ « ⵓⵎⵉⵀⵉ » (ⵅⴰⵟⴰⵔ) ⵖⴻⴼ ⵜⵖⴻⵍⵍⵉⵙⵜ ⵏ ⵜⵎⵓⵔⵜ ⴷ ⵓⵖⵔⴻⴼ.

ⵓⵇⴱⴻⵍ ⴰⴳⴷⴰⵍ-ⴰ ⵏ ⵜⵓⴼⴼⵖⴰ, ⴳⴰⵏ-ⴷ ⵢⵉⴷⵓⴱⴰ ⵉⵜⵓⵏⵙⵉⵢⴻⵏ ⴰⴳⴷⴰⵍ ⵏⵉⴹⴻⵏ ⴷⴻⴳ ⵜⴻⵎⵏⴰⴹⵜ ⴰⵢ ⴷ-ⵢⴻⵣⵣⵉⵏ ⵖⴻⴼ ⵜⵎⴰⵏⴻⵖⵜ ⴰⵙⵙ ⵏ 24 ⵏⵡⴻⵎⴱⴻⵕ 2015, ⴷⴻⴼⴼⵉⵔ ⵎⴰ ⵜⴻⵍⵍⴰ-ⴷ ⵜⵅⴰⵣⵣⴰⴱⵉⵜ-ⵏⵏⵉ ⵜⴰⵏⴻⵖⵎⴰⵏⵜ ⴰⵢⴷⴻⴳ ⵜⵜⵡⴻⵏⵖⴻⵏ ⵢⵉⵙⴻⵔⴷⴰⵙⴻⵏ ⵏ ⵜⵖⴻⵍⵍⵉⵙⵜ ⵜⴰⵙⴻⵍⵡⴰⵢⴰⵏⵜ ⴷⴻⴳ ⵜⵓⵏⴻⵙ ⵜⴰⵎⴰⵏⴻⵖⵜ. ⴰⵙⵙ-ⵏⵏⵉ, 12 ⵏ ⵢⵉⵙⴻⵔⴷⴰⵙⴻⵏ ⴰⵢ ⵢⴻⵎⵎⵓⵜⴻⵏ.