ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵓⵙⵎ ⵍⴻⵣⵣⴰⵢⴻⵔ ⵜⴻⵅⵚⴻⵔ ⴷⴻⴳ ⵡⴻⵀⵕⴰⵏ ⴷⴻⴼⴼⵉⵔ 17 ⵏ ⵜⴻⵎⵍⵉⵍⵉⵢⵉⵏ ⵡⴰⵔ ⵍⴻⵅⵚⴰⵔⴰ

ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – ⵜⴻⵅⵚⴻⵔ ⵓⵙⵎ ⵍⴻⵣⵣⴰⵢⴻⵔ (ⵜⴰⵎⵖⵓⵏⵜ 1ⵓⵜ ⵏ ⵎⵧⴱⵉⵍⵉⵙ) ⵉ ⵜⵉⴽⴽⴻⵍⵜ ⵜⴰⵎⴻⵣⵡⴰⵔⵓⵜ ⴰⵙⵙ ⵏ ⵙⵙⴻⴱⵜ ⴷⴻⴳ ⵡⴻⵀⵕⴰⵏ, ⵎⴳⴰⵍ ⵎⵛ ⵡⴻⵀⵕⴰⵏ ⵙ 2 ⵖⴻⵔ 1, ⴷⴻⴼⴼⵉⵔ ⵎⴰ ⵜⴻⵡⵡⵉ-ⴷ ⴰⵎⴻⵛⵡⴰⵕ ⵏ 17 ⵏ ⵜⴻⵎⵍⵉⵍⵉⵢⵉⵏ ⵡⴰⵔ ⵍⴻⵅⵚⴰⵔⴰ.

ⵓⵍⴰ ⵎⴰ ⵜⵉⵎⵍⵉⵍⵉⵜ ⵜⴻⴱⴷⴰ-ⵜⵜ ⵓⵙⵎ ⵍⴻⵣⵣⴰⵢⴻⵔ ⵎⵍⵉⵃ, ⵎⵉ ⵢⴻⵙⵙⴰⴷⴻⴼ ⴰⵧⵓⴷⵉⴰ ⵉⵙⵡⵉ ⴰⵎⴻⵣⵡⴰⵔⵓ ⴷⴻⴳ ⵜⴻⴷⵇⵉⵇⵜ ⵜⵉⵙ 71, ⵎⴰⵛⴰ ⵉⵡⴻⵀⵕⴰⵏⵉⵢⴻⵏ ⵙⵙⴰⵡⴹⴻⵏ ⴰⴷ ⵙⵙⵉⴷⴼⴻⵏ ⵉⵙⵡⵉ-ⵏⵙⴻⵏ ⴰⵎⴻⵣⵡⴰⵔⵓ ⵙ ⵜⵢⵉⵜⴰ ⵏ ⵣⴰⴰⴱⵉⵢⴰ ⴷⴻⴳ ⵜⴻⴷⵇⵉⵇⵜ ⵜⵉⵙ 74, ⵎⴰ ⴷ ⵉⵙⵡⵉ-ⵏⵙⴻⵏ ⵡⵉⵙ ⵙⵉⵏ ⵢⴻⵔⵏⴰ-ⵜ ⴱⴻⵏⵢⴰⵀⵉⴰ ⵙ ⵜⵢⵉⵜⴰ-ⵏⵏⴻⵙ ⴷⴻⴳ ⵜⵉⵙ 76.

ⵎⴰⵛⴰ ⵓⵍⴰ ⵎⴰ ⵜⴻⵅⵚⴻⵔ ⵓⵙⵎ ⵍⴻⵣⵣⴰⵢⴻⵔ ⵜⵉⵎⵍⵉⵍⵉⵜ-ⴰ (ⴷ ⵍⴻⵅⵚⴰⵔⴰ ⵜⵉⵙ ⵙⵏⴰⵜ ⵙⴻⴳ ⴳⴰⵔ 19 ⵏ ⵜⴻⵎⵍⵉⵍⵉⵢⵉⵏ), ⵎⴰⵣⴰⵍ-ⵉⵜⵜ ⴷ ⵏⴻⵜⵜⴰⵜ ⴰⵢ ⴷ ⵜⴰⵎⴻⵣⵡⴰⵔⵓⵜ ⵙ 41 ⵏ ⵜⴻⵏⵇⵉⴹⵉⵏ, ⵢⴻⵔⵏⴰ ⵜⵓⴳⴰⵔ ⵙ 10 ⵏ ⵜⴻⵏⵇⵉⴹⵉⵏ ⵛⵔ ⴱⴻⵍⵧⵓⵉⵣⴷⴰⴷ ⴰⵢ ⵔⵏⴰⵏ ⵢⵉⵍⴻⵎⵥⵉⵢⴻⵏ ⵉⵏⴰⴷⴷⴰⵍⴻⵏ ⵏ ⵍⴻⵇⴱⴰⵢⴻⵍ ⵙ 1 ⵖⴻⵔ 0 ⵙ ⵢⵉⵙⵡⵉ ⴰⵢ ⵢⴻⵙⵙⴰⴷⴻⴼ ⴷⵉⴰⵡⴰⵔⴰ ⴷⴻⴳ ⵜⴻⴷⵇⵉⵇⵜ ⵜⵉⵙ 18.

ⵎⴰ ⴷ ⴷⵔⴱ ⵜⴰⴵⵏⴰⵏⵜ ⵢⴻⵙⵙⴰⴷⴻⴼ-ⴰⵙ ⴱⴻⵏⵜⵉⴱⴰ ⵉⵙⵡⵉ ⴷⴻⴳ ⵜⴻⴷⵇⵉⵇⵜ ⵜⵉⵙ 7, ⵎⴰⵛⴰ ⵜⴻⵙⵙⴰⵡⴻⴹ ⴰⴷ ⴷ-ⵜⴻⵔⴼⴻⴷ ⵉⵎⴰⵏ-ⵏⵏⴻⵙ ⵙ ⵢⵉⵙⵡⵉ ⵏ ⴽⵀⵉⴰⵜ ⴷⴻⴳ ⵜⴻⴷⵇⵉⵇⵜ ⵜⵉⵙ 27, ⴷ ⵡⵉⵏ ⵏ ⴳⵓⵉⵜⵧⵓⵏ ⴷⴻⴳ ⵜⵉⵙ 82, ⴷⵖⴰ ⵙ ⵡⴰⵢⴰ ⴰⵢ ⵜⴼⵓⴽ ⵜⴻⵎⵍⵉⵍⵉⵜ ⵙ 2 ⵖⴻⵔ 1.

ⴷ ⵔⵔⴱⴻⵃ-ⴰ ⴰⵢ ⵢⴻⴵⴵⴰⵏ ⴷⵔⴱ ⵜⴰⴵⵏⴰⵏⵜ ⴰⴷ ⴷ-ⵜⵓⵖⴰⵍ ⵖⴻⵔ ⵓⵎⴽⴰⵏ ⵡⵉⵙ 3 ⴷⴻⴳ ⵓⵙⴻⵜⵜⴻⴼ ⵙ 30 ⵏ ⵜⴻⵏⵇⵉⴹⵉⵏ, ⵖⴻⵔ ⵢⵉⴷⵉⵙ ⵏ ⵎⵧ ⴱⴳⴰⵢⴻⵜ, ⴰⵢ ⵜⴻⵔⵏⴰ ⵛⵙ ⵇⵙⴻⵏⵟⵉⵏⴰ ⵙ 1 ⵖⴻⵔ 0. ⵉⵙⵡⵉ ⴰⵢ ⵜⵓⵖ ⴱⴳⴰⵢⴻⵜ ⵢⴻⵍⵍⴰ-ⴷ ⵙ ⵜⵢⵉⵜⴰ ⵏ ⵜⴻⵎⵇⴰⵙⵉⵜ ⴰⵢ ⵢⴻⵙⵙⴰⴷⴻⴼ ⵓⵇⴱⴻⵟⴰⵏ ⵢⴰⵛⵉⵏⴻ ⴱⴻⵣⵣⴰⵣ ⴷⴻⴳ ⵜⴻⴷⵇⵉⵇⵜ ⵜⵉⵙ 47.

ⵎⴻⵏⵖⵉⵔ ⵎⵛ ⵡⴻⵀⵕⴰⵏ ⴰⵢ ⵢⴻⵙⵙⴰⵡⴹⴻⵏ ⴰⴷ ⵜⴻⵔⵥ ⴰⵎⴻⵣⵔⴰⵔ ⵏ ⵔⵔⴱⴰⵃ ⵏ ⵓⵙⵎ ⵍⴻⵣⵣⴰⵢⴻⵔ, ⴰⵙⵙ ⵡⵉⵙ 19 ⵏ ⵜⴻⵍⵖⵓⵖⴰ ⵢⴻⵍⵍⴰ-ⴷ ⴷⴰⵖ ⴷ ⴰⵙⵙ ⵏ ⵔⵔⴱⴻⵃ ⵏ ⵏⴰ ⵃⵓⵙⵉⵏ ⴷⴰⵢ ⴰⵢ ⵢⴻⵙⵙⴰⵡⴹⴻⵏ ⴰⴷ ⵜⴻⵔⵏⵓ ⵓⵙⵎ ⵍⵃⴻⵕⵕⴰⵛ ⵙ 3 ⵖⴻⵔ 0 ⴷⴻⴳ ⵓⵙⴰⵔⵉⵔ ⵏ 5 ⵢⵓⵍⵢⵓ.

ⴷⴻⴳ ⵜⴻⵎⵍⵉⵍⵉⵜ-ⴰ, ⴷ ⴳⴰⵙⵎⵉ ⴰⵢ ⵢⴻⵙⵙⴰⴷⴼⴻⵏ ⵉⵙⵡⵉ ⴰⵎⴻⵣⵡⴰⵔⵓ ⴷⴻⴳ ⵜⴻⴷⵇⵉⵇⵜ ⵜⵉⵙ 10. ⵧⵓⵀⴰⴷⴷⴰ ⵢⴻⵔⵏⴰ ⵡⵉⵙ ⵙⵉⵏ ⴷⴻⴳ ⵜⵉⵙ 22, ⵎⴰ ⴷ ⵛⵀⵧⵓⴱⴰⵏⵉ ⵢⴻⵅⵜⴻⵎ-ⵉⵜⵜ ⵙ ⵡⵉⵙ 3 ⴷⴻⴳ ⵜⴻⴷⵇⵉⵇⵜ ⵜⵉⵙ 47.

ⵡⴰ ⵢⴻⵍⵍⴰ-ⴷ ⴷ ⵔⵔⴱⴻⵃ ⵙ ⵡⴰⵣⴰⵍ-ⵏⵏⴻⵙ ⵉ ⵏⴰ ⵃⵓⵙⵉⵏ ⴷⴰⵢ ⴰⵢ ⴷ-ⵢⴻⵡⵡⴹⴻⵏ ⵖⴻⵔ ⵜⵍⴻⵎⵎⴰⵙⵜ ⵏ ⵓⵙⴻⵜⵜⴻⴼ ⵙ 25 ⵏ ⵜⴻⵏⵇⵉⴹⵉⵏ, ⴷⴻⴳ ⵡⴰⴽⵓⴷ ⴰⵢⴷⴻⴳ ⵉⵃⴻⵕⵕⴰⵛⵉⵢⴻⵏ ⵜⵕⵓⵃ-ⴰⵙⴻⵏ ⵜⴻⴳⵏⵉⵜ ⴰⴽⴽⴻⵏ ⴰⴷ ⴷ-ⴰⵍⵉⵏ ⵖⴻⵔ ⵓⵎⴽⴰⵏ ⵡⵉⵙ 3 ⵖⴻⵔ ⵢⵉⴷⵉⵙ ⵏ ⴷⵔⴱ ⵜⴰⴵⵏⴰⵏⵜ ⴷ ⵎⵧ ⴱⴳⴰⵢⴻⵜ.

ⵙⴻⴳ ⵢⵉⴷⵉⵙ ⵏⵉⴹⴻⵏ, ⵔⵛ ⵍⴰⵕⴻⴱⵄⴰ ⵜⴻⵔⵏⴰ ⵜⴻⵅⵚⴻⵔ ⵎⴳⴰⵍ ⵊⵙ ⵚⴰⵡⵔⴰ ⵙ 0 ⵖⴻⵔ 1, ⵢⴻⵔⵏⴰ ⴷ ⴰⵢⴰ ⴰⵢ ⵜⵜ-ⵢⴻⴵⴵⴰⵏ ⴰⴷ ⵜⴻⵇⵇⵉⵎ ⴷ ⵜⴰⵏⴻⴳⴳⴰⵔⵓⵜ ⴷⴻⴳ ⵓⵙⴻⵜⵜⴻⴼ.