ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵢⴻⵏⵏⴰ-ⴷ ⵓⵙⴻⵇⵇⴰⵎⵓ ⴰⵙⴻⵍⵡⴰⵢⴰⵏ ⴰⵍⵉⴱⵉ ⴷⴰⴽⴽⴻⵏ ⵢⴻⵜⵜⵡⴰⵙⵙⴻⴱⴷⴻⴷ-ⴷ ⵓⵏⴰⴱⴰⴹ ⵏ ⵜⴷⵓⴽⵍⵉ ⵜⴰⵖⴻⵍⵏⴰⵡⵜ

ⵟⵔⴰⴱⵍⴻⵙ – ⵢⴻⵏⵏⴰ-ⴷ ⵓⵙⴻⵇⵇⴰⵎⵓ ⴰⵙⴻⵍⵡⴰⵢⴰⵏ ⴰⵍⵉⴱⵉ, ⴰⵙⵙ ⵏ ⵍⵃⴻⴷⴷ ⵜⴰⵎⴻⴷⴷⵉⵜ, ⴷⴰⴽⴽⴻⵏ ⵢⴻⵜⵜⵡⴰⵙⵙⴻⴱⴷⴻⴷ-ⴷ ⵓⵏⴰⴱⴰⴹ ⵏ ⵜⴷⵓⴽⵍⵉ ⵜⴰⵖⴻⵍⵏⴰⵡⵜ ⴰⵎⴰⵢⵏⵓ ⴷⴻⴳ ⵍⵉⴱⵢⴰ, ⵢⴻⵔⵏⵓ ⵜⵜⵓⵏⴻⴼⴽⴻⵏ ⵢⵉⵙⵎⴰⵡⴻⵏ ⵏ ⵡⵉⴷ ⴰⴷ ⵢⴻⵜⵜⴻⴽⴽⵉⵏ ⴷⴻⴳ-ⵙ ⵉ ⵓⵎⵏⵉ (ⴱⴰⵔⵍⴰⵎⴰⵏ) ⴰⵍⵉⴱⵉ ⴰⴽⴽⴻⵏ ⴰⴷ ⵜ-ⵢⴻⵇⴱⴻⵍ.

«ⵢⴻⵜⵜⵡⴰⵙⵙⴻⴱⴷⴻⴷ-ⴷ ⵓⵏⴰⴱⴰⴹ ⴰⵙⵙ-ⴰ ⵢⴻⵔⵏⵓ ⵢⴻⵜⵜⵡⴰⵣⴻⵏ ⵉ ⵓⵎⵏⵉ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵎⵓⵜⵍⴰⵢ ⵏ ⵓⵙⴻⵇⵇⴰⵎⵓ ⴰⵙⴻⵍⵡⴰⵢⴰⵏ, ⴼⴰⵜⵀⵏⵉ ⴰⵍ-ⵎⴻⵊⴻⴱⵔⵉ, ⴷⴻⴳ ⵢⵉⵡⴻⵏ ⵏ ⵓⵙⴰⵔⴰⴳ ⵏ ⵜⵖⴻⵎⵙⴰ.

ⴰⵏⴰⴱⴰⴹ-ⴰ ⴰⴷ ⵉⵍⵉⵏ ⴷⴻⴳ-ⵙ 18 ⵏ ⵢⵉⵎⴰⵙⵍⴰⴹⴻⵏ (ⴰⵄⴹⴰ’), ⴳⴰⵔ-ⴰⵙⴻⵏ 5 ⵏ ⵢⵉⵏⴻⵖⵍⴰⴼⴻⵏ ⵏ ⵓⵡⴰⵏⴰⴽ (ⴷⴰⵡⵍⴰ) ⴷ 3 ⵏ ⵜⵙⴻⴷⵏⴰⵏ, ⵢⴻⵔⵏⵓ ⵍⵍⴰⵏ ⴷⴻⴳ-ⵙ ⵢⵉⴳⴻⵏⵙⴰⵙⴻⵏ ⵏ ⵡⴰⴽⴽ ⵜⵉⴳⵔⴰⵡⵉⵏ ⵜⵉⵙⴻⵔⵜⴰⵏⵉⵏ ⵜⵉⵍⵉⴱⵉⵢⵉⵏ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ.

ⴰⵙⴻⵇⵇⴰⵎⵓ ⴰⵙⴻⵍⵡⴰⵢⴰⵏ ⵍⵍⴰⵏ ⴷⴻⴳ-ⵙ 9 ⵏ ⵢⵉⵎⴰⵙⵍⴰⴹⴻⵏ ⵙⴻⴳ ⵜⴻⴳⵔⴰⵡⵉⵏ ⵜⵉⵍⵉⴱⵉⵢⵉⵏ ⵢⴻⵎⵅⴰⵚⴰⵎⴻⵏ ⵢⴻⵔⵏⴰ ⴷ ⴼⴰⵢⴻⵣ ⴰⵍ-ⵙⴰⵔⵔⴰⵊ ⴰⵢ ⴷ ⵉⵎⴹⴻⴱⴱⴻⵔ-ⵏⵏⴻⵙ. ⴷⴻⴳ ⵓⵎⵜⴰⵡⴰ (ⵉⵜⵜⵉⴼⴰⵇ) ⴰⵢ ⴷ-ⵢⴻⵍⵍⴰⵏ ⴷⴷⴰⵡ ⵍⴻⵄⵏⴰⵢⴰ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ, ⴷ ⴰⵍ-ⵙⴰⵔⵔⴰⵊ ⴰⴷ ⵢⵓⵖⴰⵍⴻⵏ ⴷ ⴰⵏⴻⵖⵍⴰⴼ ⴰⵎⴻⵏⵣⵓ ⵏ ⵍⵉⴱⵢⴰ.

ⴷⴻⴼⴼⵉⵔ ⵎⴰ ⵉⵅⴻⴱⴱⴻⵔ-ⴷ ⵖⴻⴼ ⵓⵙⵙⴻⴱⴷⴻⴷ ⵏ ⵓⵏⴰⴱⴰⴹ-ⴰ, ⵢⴻⵏⵏⴰ-ⴷ ⴷⴰⵖ ⵓⵎⵓⵜⵍⴰⵢ ⵏ ⵓⵙⴻⵇⵇⴰⵎⵓ ⴰⵙⴻⵍⵡⴰⵢⴰⵏ: « ⵏⴻⵙⵙⴰⵔⴰⵎ ⴰⴷ ⵢⵉⵍⵉ ⵡⴰⵢⴰ ⴷ ⵜⴰⵣⵡⴰⵔⴰ ⵏ ⵜⴳⴰⵔⴰ ⵏ ⵜⴰⵍⵓⴼⵜ ⴷⴻⴳ ⵍⵉⴱⵢⴰ ».

ⴰⵎⵏⵉ ⴰⵢⵢⴻⵙ ⵙⵜⴻⵄⵕⴼⴻⵏ ⵍⴻⴵⵏⴰⵙ (ⵡⵉⵏ ⵏ ⵟⵓⴱⵔⵓⵇ, ⴷⴻⴳ ⵓⴳⵎⵓⴹ ⵏ ⵍⵉⴱⵢⴰ) ⵢⴻⵙⵙⴻⴼⴽ ⴰⴷ ⵢⴻⴷⵖⴻⵔ (ⵢⵓⵚⴰⵡⵡⵉⵜ) ⴰⵙⵙ ⵏ ⵍⴻⵜⵏⵉⵢⴻⵏ ⵏⴻⵖ ⵜⵜⵍⴰⵜⴰ ⴰⴽⴽⴻⵏ ⴰⴷ ⵢⴻⵇⴱⴻⵍ ⴰⵏⴰⴱⴰⴹ-ⴰ ⴰⵎⴰⵢⵏⵓ ⵏ ⵜⴷⵓⴽⵍⵉ ⵜⴰⵖⴻⵍⵏⴰⵡⵜ.

ⵍⵉⴱⵢⴰ ⵜⴻⵙⵄⴰ ⴰⵎⵏⵉ ⵏⵉⴹⴻⵏ (ⴰⵢⵢⴻⵙ ⵓⵔ ⵙⵜⴻⵄⵕⴼⴻⵏ ⴰⵔⴰ ⵍⴻⴵⵏⴰⵙ) ⴷⴻⴳ ⵟⵔⴰⴱⵍⴻⵙ, ⵜⴰⵎⴰⵏⴻⵖⵜ ⵏ ⵍⵉⴱⵢⴰ.

ⴰⵏⴰⴱⴰⴹ ⵏ ⵜⴷⵓⴽⵍⵉ ⵜⴰⵖⴻⵍⵏⴰⵡⵜ ⴰⵢ ⴷ-ⵙⵙⵓⵎⵔⴻⵏ, ⵏⴰⵇⴰⵍ, ⵍⵍⴰⵏ ⴷⴻⴳ-ⵙ 32 ⵏ ⵢⵉⵏⴻⵖⵍⴰⴼⴻⵏ, ⵎⴰⵛⴰ ⵢⵓⴳⵉ-ⵜ ⵓⵎⵏⵉ ⴰⵢⵢⴻⵙ ⵙⵜⴻⵄⵕⴼⴻⵏ ⵍⴻⴵⵏⴰⵙ ⴰⵙⵙ ⵏ 25 ⵢⴻⵏⵏⴰⵢⴻⵔ.