ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⴰⵙⵙⴻⵇⴷⴻⵛ ⵏ ⵓⵣⴻⴱⴳ ⴰⵍⵉⴽⵜⵕⵓⵏⴰⵏ ⴷⴻⴳ ⵡⴻⵎⴽⴰⵏ ⵏ ⵍⵃⴻⴱⵙ ⵓⵄⴹⵉⵍ
ⵡⴻⵀⵕⴰⵏ – ⵢⴻⵏⵏⴰ-ⴷ ⵓⵏⴻⵣⵔⴰⴼ (ⵇⴰⴹⵉ) ⴷⴻⵔⵔⴰⴷⵊ ⵉⵙⵀⴰⴽ, ⵢⴻⵍⵍⴰⵏ ⴷ ⴰⵎⴰⵙⵍⴰⴹ (ⵄⵓⴹⵡ) ⴷⴻⴳ ⵜⴻⵙⵎⵉⵍⵜ ⵜⴰⵖⴻⵍⵏⴰⵡⵜ ⵏ ⵓⵙⵙⴻⵜⵔⴻⵔ ⵏ ⵜⴻⵖⴷⴻⵎⵜ, ⴰⵙⵙ ⵏ ⵜⵜⵍⴰⵜⴰ ⴷⴻⴳ ⵡⴻⵀⵕⴰⵏ, ⴷⴰⴽⴽⴻⵏ ⵓⵔ ⵢⴻⵜⵜⵄⴻⴹⴹⵉⵍ ⵓⵏⴰⴱⴰⴹ ⴰⴷ ⵢⴻⵇⴱⴻⵍ ⴰⵙⵙⴻⵇⴷⴻⵛ ⵏ ⵓⵣⴻⴱⴳ ⴰⵍⵉⴽⵜⵕⵓⵏⴰⵏ ⴷⴻⴳ ⵡⴻⵎⴽⴰⵏ ⵏ ⵡⴻⵃⴱⴰⵙ ⵓⵄⴹⵉⵍ.
ⴷⴻⴳ ⵢⵉⵡⴻⵏ ⵏ ⵓⵙⴰⵔⴰⴳ ⴰⵢ ⵉⴳⴰ ⴷⴻⴳ ⵢⵉⵊⵉⴼⴻⵕ ⵏ ⵜⵎⴻⵙⵔⵉⵜ ⵜⴰⴳⵔⴰⵖⵍⴰⵏⵜ ⵏ ⵢⵉⵎⴰⵍ ⴰⵙⵏⴰⵜⵡⵉⵍⴰⵏ (ⵜⵉⴽⵏⵓⵍⵓⴵⵉ) ⴰⵢ ⵢⴻⴱⴷⴰⵏ ⴰⵙⵙ ⵏ ⵍⴻⵜⵏⵉⵢⴻⵏ ⴷⴻⴳ ⵡⴻⵀⵕⴰⵏ, ⵉⵡⴻⴽⴽⴻⴷ-ⴷ ⵎⴰⵙⵙ ⴷⴻⵔⵔⴰⴷⵊ ⴷⴰⴽⴽⴻⵏ ⴰⵙⵙⴻⵇⴷⴻⵛ ⵏ ⵓⵣⴻⴱⴳ ⴰⵍⵉⴽⵜⵕⵓⵏⴰⵏ ⴷ « ⴰⵙⵓⵔⵉⴼ ⴷⴻⴳ ⵡⴻⴱⵔⵉⴷ ⵏ ⵓⵙⵙⴻⵜⵔⴻⵔ » ⵏ ⵜⴻⵖⴷⴻⵎⵜ ⵢⴻⵔⵏⵓ ⴷ ⵜⵜⴰⵡⵉⵍ ⵏ ⵜⵄⴻⵙⵙⴰⵙⵜ ⴰⵢ ⵙⵙⴻⵇⴷⴰⵛⴻⵏⵜ ⴰⵟⴰⵙ ⵏ ⵜⵎⵓⵔⴰ.
ⵜⵜⴰⵡⵉⵍ-ⴰ ⵢⴻⵍⵍⴰ ⴷ ⴰⵃⵔⵉⵛ ⵙⴻⴳ ⵜⵄⴻⵙⵙⴰⵙⵜ ⵢⴻⵔⵏⵓ ⵢⴻⵜⵜⵇⴰⴷⴰⵔ ⵜⵉⵍⴻⵍⵍⵉⵢⵉⵏ ⵜⵉⵏⵜⴻⵔⵔⴰⵙⴰⵏⵉⵏ (ⴼⴰⵔⴷⵉⵢⵢⴰ), ⴰⵎ ⵡⴰⴽⴽⴻⵏ ⴰⵢ ⵢⴻⵜⵜⵄⴰⵡⴰⵏ ⴰⵎⴻⵃⴱⵓⵙ ⴰⴷ ⵉⵄⴰⵡⴻⴷ ⴰⴷ ⵢⴰⴼ ⴰⵎⴽⴰⵏ-ⵏⵏⴻⵙ ⴷⴻⴳ ⵜⵎⴻⵜⵜⵉ.
ⵢⴻⵏⵏⴰ-ⴷ ⴷⴰⵖ ⵎⴰⵙⵙ ⴷⴻⵔⵔⴰⴷⵊ ⴷⴰⴽⴽⴻⵏ ⵜⵜⵡⴰⵀⴻⵢⵢⴰⵏ-ⴷ ⴰⴽⴽ ⵜⵜⴰⵡⵉⵍⴰⵜ ⵉⵜⵡⵉⵍⴰⵏⴻⵏ (ⵜⵉⵇⵏⵉⵢⵢⴰ) ⵉ ⵡⴰⵢⴰ ⵢⴻⵔⵏⵓ ⴰⵙⵙⴻⵇⴷⴻⵛ ⵏ ⵓⵣⴻⴱⴳ-ⴰ ⵓⵔ ⵜⴻⵜⵜⵄⴻⴹⴹⵉⵍ ⴰⴷ ⵢⴻⴱⴷⵓ, ⴰⵎ ⵡⴰⴽⴽⴻⵏ ⴰⵢ ⴷ-ⵢⴻⵔⵏⴰ ⴷⴰⴽⴽⴻⵏ ⴰⵣⴻⴱⴳ-ⴰ ⴰⴷ ⴷ-ⵢⴻⵜⵜⵡⴰⵅⴷⴰⵎ ⴷⴻⴳ ⵡⴻⵣⵖⴰⵔ, ⵎⴰⵛⴰ ⴷ ⵉⵎⴰⵣⵣⴰⵢⴻⵏ (ⵅⵓⴱⴰⵔⴰ’) ⵉⴷⵣⴰⵢⵔⵉⵢⴻⵏ ⴰⴷ ⴷ-ⵢⴻⵍⵀⵓⵏ ⵙ ⵍⴻⴱⵏⵉ ⵏ ⵓⵣⴰⴷⵓⵔ ⵏ ⵢⵉⵙⴻⴼⴽⴰ ⴷ ⵡⴰⵎⴻⴽ ⴰⴷ ⵢⴻⵜⵜⴻⴷⴷⵓ ⵓⵣⴻⴱⴳ-ⴰ.
ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⴰⴼⴰⴽⵉ ⵏ ⵓⵙⵙⴻⵜⵔⴻⵔ ⵏ ⵜⴻⵖⴷⴻⵎⵜ, ⵢⴻⵏⵏⴰ-ⴷ ⵓⵏⴻⵣⵔⴰⴼ-ⴰ ⴷⴰⴽⴽⴻⵏ ⵍⴰ ⴷ-ⵙⵙⴻⵡⵊⴰⴷⴻⵏ ⵢⵉⵡⴻⵏ ⵏ ⵓⵣⴰⴷⵓⵔ ⵏ ⵢⵉⵙⴻⴼⴽⴰ ⵏ ⵍⴰⵜⴻⵕ ⴰⵊⵉⵏⴰⵏ (ⴱⴰⵚⵎⴰ ⴵⵉⵏⵉⵢⵢⴰ) ⵉ ⵓⴼⴻⵔⵔⵓ ⵏ ⵜⴻⵎⵙⴰⵍ ⵢⴻⵇⵇⵏⴻⵏ ⵖⴻⵔ ⵜⴻⵊⵔⵉⵎⵉⵏ.
