ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵓⵍⴰⵛ ⵉⵏⴻⵖⵎⴰⵙⴻⵏ ⵢⴻⵜⵜⵡⴰⵃⴻⴱⵙⴻⵏ ⵖⴻⴼ ⵕⵕⴰⵢ-ⵏⵙⴻⵏ (ⴰⵏⴻⵖⵍⴰⴼ)
ⵜⵉⵒⴰⵣⴰ – ⵢⴻⵏⵏⴰ-ⴷ ⵓⵏⴻⵖⵍⴰⴼ ⵏ ⵜⴻⵖⵡⴰⵍⵜ (ⵉⵜⵜⵉⵚⴰⵍ), ⵀⴰⵎⵉⴷ ⴳⵔⵉⵏⴻ, ⴰⵙⵙ ⵏ ⵍⴻⵜⵏⵉⵢⴻⵏ ⴷⴻⴳ ⵜⵉⵒⴰⵣⴰ ⴷⴰⴽⴽⴻⵏ ⴰⵖⵍⵉⴼ-ⵏⵏⴻⵙ ⵓⵔ ⴷ-ⵢⴻⴽⵍⵉⵙ ⵓⵍⴰ ⴷ ⵢⵉⵡⴻⵜ ⵏ ⵍⵉⵃⴰⵍⴰ ⴰⵢⴷⴻⴳ ⵢⴻⵜⵜⵡⴰⵃⴱⴻⵙ ⵓⵏⴻⵖⵎⴰⵙ ⴷⴻⴳ ⵍⴻⵣⵣⴰⵢⴻⵔ ⵖⴻⴼ ⵍⴵⴰⵍ ⵏ ⵕⵕⴰⵢ-ⵏⵏⴻⵙ ⴷⴻⴳ ⵜⵖⴻⵎⵙⴰ, ⴰⵎ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴷⴰⴽⴽⴻⵏ ⵢⴻⵣⵎⴻⵔ ⵍⵃⴰⵍ ⵎⵍⵉⵃ ⴰⴷ ⴷ-ⵢⴻⵜⵜⵡⴰⵙⵙⴻⴱⴷⴻⴷ ⵓⵙⴻⵇⵇⴰⵎⵓ ⵏ ⵡⴻⵃⴽⴰⵎ ⵏ ⵜⵖⴻⵎⵙⴰ ⵢⵓⵔⴰⵏ ⴷⴻⴳ « ⵛⵜⴻⵎⴱⴻⵕ ⴰⵢ ⴷ-ⵢⴻⵜⵜⴻⴷⴷⵓⵏ ».
ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⴰⵃⴱⴰⵙ ⵏ ⵓⵏⴻⵎⵀⴰⵍ (ⵎⵓⴷⵉⵔ) ⵏ ⵜⴻⵔⴳⴰ ⵏ ⵜⵍⵉⵥⵔⵉ ⵏ ⴽⴱⵛ ⵖⴻⵔ ⵢⵉⴷⵉⵙ ⵏ ⵢⵉⵎⴰⵙⴰⵢⴻⵏ (ⵎⴰⵙ’ⵓⵍⵉⵏ) ⵏⵉⴹⴻⵏ ⵏ ⵜⴻⵔⴳⴰ-ⴰ, ⵢⴻⵏⵏⴰ-ⴷ ⵓⵏⴻⵖⵎⴰⵙ ⴷⴻⴳ ⵢⵉⵡⴻⵏ ⵏ ⵡⴻⵎⵢⴰⴳⴻⵔ ⴷ ⵜⵖⴻⵎⵙⴰ ⴷⴻⴳ ⵜⵉⵒⴰⵣⴰ ⴷⴰⴽⴽⴻⵏ « ⴰⵖⴻⵔⵎⴰⵏ ⵢⴻⵙⵄⴰ ⴰⵣⵔⴻⴼ ⴰⴷ ⵉⵥⴻⵔ ⵉⵙⴰⵍⵉ ⴰⵢⵖⴻⴼ ⵢⴻⵍⵍⴰ ⵍⴻⵜⵜⴽⴰⵍ », ⵢⴻⵔⵏⵓ « ⵓⵔ ⵢⴻⵣⵎⵉⵔ ⴰⴷ ⴷ-ⵉⵡⴻⵏⵏⴻⵜ ⵜⴰⵎⵙⴰⵍⵜ ⴰⵢⵖⴻⴼ ⵎⴰⵣⴰⵍ ⵍⴰ ⴷ-ⵢⴻⵜⵜⵉⵍⵉ ⵡⴻⵃⵜⴰⵛ ».
« ⵓⵔ ⴷ-ⵜⴻⵍⵍⵉ ⵓⵍⴰ ⴷ ⵢⵉⵡⴻⵜ ⵏ ⵍⵉⵃⴰⵍⴰ ⵏ ⵡⴻⵃⴱⴰⵙ ⵏ ⵓⵏⴻⵖⵎⴰⵙ ⵖⴻⴼ ⵕⵕⴰⵢ-ⵏⵏⴻⵙ ⵏⴻⵖ ⵖⴻⴼ ⵓⵅⴻⴷⴷⵉⵎ-ⵏⵏⴻⵙ ⴷⴻⴳ ⵜⵖⴻⵎⵙⴰ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵉⵡⴻⴽⴽⴻⴷ, ⴰⵎ ⵡⴰⴽⴽⴻⵏ ⴰⵢ ⴷ-ⵢⴻⵔⵏⴰ ⴷⴰⴽⴽⴻⵏ « ⴰⵃⵔⴰⵣ ⵏ ⵜⵍⴻⵍⵍⵉ ⵏ ⵜⵖⴻⵎⵙⴰ ⵢⴻⵜⵜⵡⴰⴹⵎⴻⵏ ⴷⴻⴳ ⵜⵎⴻⵏⴹⴰⵡⵜ ⵜⴰⵎⴰⵢⵏⵓⵜ », ⵢⴻⵔⵏⵓ ⵉⴳⴻⵔ-ⴷ ⵜⵉⵖⵔⵉ ⵉ ⵜⵔⴻⴳⵡⴰ ⵏ ⵜⵍⵉⵥⵔⵉ ⴰⴽⴽⴻⵏ ⴰⴷ ⵇⴰⴷⵔⴻⵏⵜ ⴰⵍⵓⴳ-ⵏⵙⴻⵏⵜ (ⴷⴰⴼⵜⴰⵔ) ⵏ ⵛⵛⵓⵔⵓⴹ ⴰⵢ ⵢⴻⵍⵍⴰⵏ ⴷ « ⵍⵇⴰⴹⵉ ⴰⵡⵃⵉⴷ » ⴳⴰⵔ-ⴰⵙⴻⵏⵜ ⴷ ⵓⴷⴰⴱⵓ ⵏ ⵡⴻⵃⴽⴰⵎ ⵏ ⵡⴻⵙⵍⵉⵥⵔⵉ.
ⵉⵄⴰⵡⴻⴷ ⵉⴳⴻⵔ-ⴷ ⵎⴰⵙⵙ ⴳⵔⵉⵏⴻ ⵜⵉⵖⵔⵉ ⵉ ⵢⵉⵏⴻⵖⵎⴰⵙⴻⵏ ⴷ ⵜⵜⴰⵡⵉⵍⴰⵜ ⵏ ⵢⵉⵙⴰⵍⴰⵏ, ⵙ ⵓⵎⴰⵜⴰ, ⴰⴽⴽⴻⵏ ⴰⴷ ⵇⴰⴷⵔⴻⵏ ⵜⴻⵣⴷⴻⴳ ⵏ ⵚⵚⴻⵏⵄⴰ ⵙ ⵜⵉⴵⴵⵉⵏ ⵏ ⵓⵙⵙⴻⵏⴽⴻⵔ ⵏ ⵜⵎⴻⵙ ⴷ ⵡⴻⵜⵃⴻⵇⵇⴻⵇ ⵙⴻⴳ ⵜⴻⵖⴱⴰⵍⵓⵜ (ⵎⴰⵚⴷⴰⵔ) ⵏ ⵢⵉⵙⴰⵍⵉ.
« ⵜⵜⵡⴰⵙⵙⴻⵎⵍⴰⵍⴻⵏⵜ-ⴷ ⴰⴽⴽ ⵜⴻⴳⵏⴰⵜⵉⵏ ⵉ ⵓⵙⵙⴻⴱⴷⴻⴷ ⵏ ⵓⴷⴰⴱⵓ ⵏ ⵡⴻⵃⴽⴰⵎ ⵏ ⵜⵖⴻⵎⵙⴰ ⵢⵓⵔⴰⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵔⵏⴰ ⵓⵏⴻⵖⵍⴰⴼ ⴰⵢ ⴷ-ⵉⵡⴻⴽⴽⴷⴻⵏ ⴷⴰⴽⴽⴻⵏ ⵉⵎⵉⵔ-ⴰ, 99% ⵙⴻⴳ ⵢⵉⵏⴻⵖⵎⴰⵙⴻⵏ ⵜⵜⵡⴰⵙⵙⵏⴻⵏ ⵙ ⵜⴽⴰⵔⴹⴰ ⵜⴰⵙⴰⴷⵓⵔⴰⵏⵜ ⵏ ⵓⵏⴻⵖⵎⴰⵙ, ⵢⴻⵔⵏⵓ ⵢⴻⵏⵏⴰ-ⴷ ⴷⴰⴽⴽⴻⵏ ⵉⵏⴻⵖⵎⴰⵙⴻⵏ-ⴰ ⴷ ⵜⴰⴷⵓⵙⵉ (ⵇⵓⵡⵡⴰ) ⵜⴰⵍⵙⴰⵏⵜ ⴰⵢ ⵉⵣⴻⵎⵔⴻⵏ ⴰⴷ ⴷ-ⵜⴻⵙⵙⵓⴷⴷⴻⵙ ⵜⵉⴼⵔⴰⵏⵉⵏ ⵢⴻⵔⵏⵓ ⴰⴷ ⴷ-ⵜⴻⵙⵙⴻⴱⴷⴻⴷ ⴰⴷⴰⴱⵓ.
