ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵍⴱⴰⴽ: ⴰⴷ ⴷ-ⵜⵉⵍⵉ ⵜⵏⴻⵎⵙⴻⵍⵜ ⵜⴰⵖⴻⵍⵏⴰⵡⵜ ⴷⴻⴳ ⵢⵓⵍⵢⵓ ⵉ ⵓⴱⴻⴷⴷⴻⵍ ⵏ ⴽⵔⴰ ⵏ ⵜⵖⴰⵡⵙⵉⵡⵉⵏ
ⵜⵉⵒⴰⵣⴰ – ⵜⴻⵏⵏⴰ-ⴷ ⵜⵏⴻⵖⵍⴰⴼⵜ ⵏ ⵓⵙⵙⴻⴳⵎⵉ ⴰⵖⴻⵍⵏⴰⵡ, ⵏⵧⵓⵔⵉⴰ ⴱⴻⵏⴳⵀⴻⴱⵔⵉⵜ, ⴰⵙⵙ ⵏ ⵜⵜⵍⴰⵜⴰ, ⴷⴻⴳ ⵜⴻⵔⵣⵉ-ⵏⵏⴻⵙ ⵖⴻⴼ ⵜⵡⵉⵍⴰⵢⵜ ⵏ ⵜⵉⵒⴰⵣⴰ, ⴷⴰⴽⴽⴻⵏ ⴰⴷ ⴷ-ⵜⵉⵍⵉ ⵜⵏⴻⵎⵙⴻⵍⵜ (ⵡⴰⵔⵛⴰ) ⵜⴰⵖⴻⵍⵏⴰⵡⵜ ⵉ ⵍⵎⴻⵏⴷ ⵏ ⵓⴱⴻⴷⴷⴻⵍ ⵏ ⴽⵔⴰ ⵏ ⵜⵖⴰⵡⵙⵉⵡⵉⵏ ⴷⴻⴳ ⵓⴽⴰⵢⴰⴷ ⵏ ⵍⴱⴰⴽ « ⴷⴻⴳ ⵡⴰⵢⵢⵓⵔ-ⴰ ⵏ ⵢⵓⵍⵢⵓ ».
« ⵍⴰ ⴷ-ⵢⴻⵜⵜⵉⵍⵉ ⵓⵀⴻⵢⵢⵉ ⵉ ⵓⵙⵙⵓⴷⴷⴻⵙ ⵏ ⵢⵉⵡⴻⵜ ⵏ ⵜⵏⴻⵎⵙⴻⵍⵜ ⵜⴰⵖⴻⵍⵏⴰⵡⵜ ⵙ ⵡⴻⵎⵄⴰⵡⴻⵏ ⴷ ⵡⴻⵖⵍⵉⴼ ⵏ ⵡⴻⵍⵎⵓⴷ ⵉⵎⵉⵏⴻⴳ ⴷ ⵓⵏⴰⴷⵉ ⵓⵙⵙⵏⴰⵏ ⵙ ⵢⵉⵙⴻⵎ-ⵏⵏⴻⵙ ⴷ ⴰⵛⵔⵉⴽ ⴰⵅⴰⵜⴰⵔ, ⴷ ⵢⴻⵛⵔⵉⴽⴻⵏ ⵉⵏⵎⴻⵜⵜⵉⵢⴻⵏ (ⵉⴵⵜⵉⵎⴰⵄⵉⵢⵢⴰ) » ⵉ ⵍⵎⴻⵏⴷ ⵏ ⵓⵙⵙⴻⴽⵢⴻⴷ ⵏ ⵜⵜⴰⵡⵉⵍⴰⵜ ⵏ ⵓⵙⵙⴻⴼⵔⴻⴽ (ⵜⴰⵙⵢⵉⵔ) ⵏ ⵢⵉⴽⴰⵢⴰⴷⴻⵏ-ⴰ ⵉ ⵍⵎⴻⵏⴷ ⵏ ⵓⵃⴻⵣⵣⴻⴱ ⵉ ⴽⵔⴰ ⵏ ⵡⵓⴳⵓⵔⴻⵏ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⵜⵏⴻⵖⵍⴰⴼⵜ ⴷⴻⴳ ⵢⵉⵡⴻⵜ ⵏ ⵜⵙⴻⵖⵔⵓⵜ ⵉ ⵜⵖⴻⵎⵙⴰ ⴷⴻⴳ ⵜⴳⴰⵔⴰ ⵏ ⵢⵉⵡⴻⵜ ⵏ ⵜⴼⵓⴳⵍⴰ ⴰⵢ ⴷ-ⵢⴻⵍⵍⴰⵏ ⴷⴻⴳ ⵜⴻⵙⵖⵉⵎⵜ ⵏ ⵜⵡⵉⵍⴰⵢⵜ ⵉ ⵜⵔⵉⵔⵉⵜ ⵏ ⵜⴻⵊⵎⵉⵍⵜ ⵉ ⵢⵉⵏⴻⵍⵎⴰⴷⴻⵏ ⴰⵢ ⴷ-ⵜⴻⵡⵡⵉⵏ ⵉⴽⴰⵢⴰⴷⴻⵏ-ⵏⵙⴻⵏ ⵏ ⵡⴻⵙⵡⵉⵔ ⴰⵎⴻⵏⵣⵓ ⴷ ⵡⴻⵍⵎⵓⴷ ⴰⵍⴻⵎⵎⴰⵙ.
ⵜⴻⵏⵏⴰ-ⴷ ⵎⴰⵙⵙⴰ ⴱⴻⵏⴳⵀⴻⴱⵔⵉⵜ, ⴷⴻⴳ ⵜⴻⵎⵙⴰⵍⵜ-ⴰ, ⴷⴰⴽⴽⴻⵏ ⵜⴻⵙⵙⴰⵡⴻⴹ, ⵙⴻⴳ ⵎⴻⵍⵎⵉ ⴽⴰⵏ, ⴷⴻⴳ ⵢⵉⵡⴻⵏ ⵏ ⵡⴻⵎⵢⴰⴳⴻⵔ ⴰⵢⴷⴻⴳ ⵜⴻⵙⵙⴰⵡⴻⵍ ⴷ ⵢⴻⵛⵔⵉⴽⴻⵏ ⵉⵏⵎⴻⵜⵜⵉⵢⴻⵏ, ⵖⴻⵔ ⵢⵉⵡⴻⵏ ⵏ ⵡⴻⵎⵜⴰⵡⴰ (ⵉⵜⵜⵉⴼⴰⵇ) ⴰⵢⴷⴻⴳ ⵜⴻⵎⵙⴻⴼⵀⴰⵎ ⵢⵉⴷ-ⵙⴻⵏ ⴰⴽⴽⴻⵏ ⴰⴷ ⵢⵓⵖⴰⵍ ⵍⴱⴰⴽ ⴰⴷ ⵢⴻⵜⵜⴰⴹⴹⴰⴼ 3 ⵏ ⵡⵓⵙⵙⴰⵏ ⴷⴻⴳ ⵡⴻⴱⴷⵉⵍ ⵏ 5 ⵏ ⵡⵓⵙⵙⴰⵏ, ⴷ ⴰⵛⵓ ⴽⴰⵏ, ⵓⵔ ⵜⴻⵙⵙⴰⵡⴻⴹ ⴰⴷ ⵜⴻⵎⵙⴻⴼⵀⴰⵎ ⵢⵉⴷ-ⵙⴻⵏ ⵖⴻⴼ ⴽⵔⴰ ⵏ ⵜⴻⵎⵙⴰⵍ ⵏⵉⴹⴻⵏ.
«ⵜⴰⴳⵔⴰⵡⵜ ⵏ ⵓⵅⴻⴷⴷⵉⵎ, ⴰⵢ ⴷ-ⵢⴻⵜⵜⵡⴰⵙⴱⴻⴷⴷⴻⵏ ⵙⴻⴳ ⵎⴻⵍⵎⵉ ⴽⴰⵏ, ⵜⴻⵜⵜⵡⴰⴽⴻⵍⵍⴻⴼ ⴰⴷ ⴷ-ⵜⴻⵙⵙⵓⵎⴻⵔ ⵜⵉⴼⵔⴰⵜⵉⵏ ⵉ ⵡⴻⵙⴽⴰⵙⵉ (ⵏⵉⵇⴰⵛ) ⴷⴻⴳ ⵜⵏⴻⵎⵙⴻⵍⵜ-ⴰ ⵜⴰⵖⴻⵍⵏⴰⵡⵜ ⴰⵔⴰ ⴷ-ⵢⵉⵍⵉⵏ ⵓⵇⴱⴻⵍ ⵡⵓⵖⴰⵍ ⵖⴻⵔ ⵓⵖⴻⵔⴱⴰⵣ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⵜⵏⴻⵖⵍⴰⴼⵜ ⵏ ⵓⵙⵙⴻⴳⵎⵉ ⴰⵖⴻⵍⵏⴰⵡ.
