ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵢⴻⵙⵙⴰⵡⴻⵍ ⵎⴻⵙⵙⴰⵀⴻⵍ ⴷⴻⴳ ⵔⵧⵎⴰ ⴷ ⵓⵏⴻⵖⵍⴰⴼ ⴰⵟⴰⵍⵢⴰⵏⵉ ⵏ ⵜⵖⴰⵡⵙⵉⵡⵉⵏ ⵏ ⵡⴻⵣⵖⴰⵔ
ⵔⵧⵎⴰ– ⵢⴻⵙⵙⴰⵡⴻⵍ ⵓⵏⴻⵖⵍⴰⴼ ⵏ ⵜⵖⴰⵡⵙⵉⵡⵉⵏ ⵏ ⵍⵎⴻⵖⵔⴻⴱ, ⴰⴱⴷⴻⵍⴽⴰⴷⴻⵔ ⵎⴻⵙⵙⴰⵀⴻⵍ, ⴰⵙⵙ ⵏ ⵍⴻⵅⵎⵉⵙ ⴷⴻⴳ ⵔⵧⵎⴰ, ⴷ ⵓⵏⴻⵖⵍⴰⴼ ⴰⵟⴰⵍⵢⴰⵏⵉ ⵏ ⵜⵖⴰⵡⵙⵉⵡⵉⵏ ⵏ ⵡⴻⵣⵖⴰⵔ.
ⵢⵉⵡⴻⵏ ⵏ ⵡⴰⵙⵙ ⵓⵇⴱⴻⵍ ⵏ ⵜⴻⴷⵡⵉⵍⵜ ⵏ ⵡⴻⵎⵛⵉⵡⴻⵕ ⴰⵙⵓⴷⴷⵙⴰⵏ (ⵉⵙⵜⵔⴰⵜⵉⴵⵉ) ⵖⴻⴼ ⵜⴻⵎⵙⴰⵍ ⵜⵉⵙⴻⵔⵜⴰⵏⵉⵏ ⴷ ⵜⵖⴻⵍⵍⵉⵙⴰⵏⵉⵏ ⴰⵔⴰ ⴷ-ⵢⵉⵍⵉⵏ ⴰⵙⵙ ⵏ ⵍⵊⴻⵎⵄⴰ ⴷⴻⴳ ⵔⵧⵎⴰ, ⵢⴻⵍⵍⴰ-ⴷ ⵡⴻⵎⵢⴰⴳⴻⵔ-ⴰ ⴳⴰⵔ ⵎⴻⵙⵙⴰⵀⴻⵍ ⴷ ⵓⵏⴻⵖⵍⴰⴼ ⴰⵟⴰⵍⵢⴰⵏⵉ ⵏ ⵜⵖⴰⵡⵙⵉⵡⵉⵏ ⵏ ⵡⴻⵣⵖⴰⵔ ⵉ ⵓⵙⵙⵓⴽⴽⵓ ⵏ ⵜⵉⵟ ⵖⴻⴼ ⵜⴻⴳⵏⵉⵜ ⵏ ⵡⴰⵙⵙⴰⵖⴻⵏ ⵉⵙⵉⵏⴷⵉⵙⴻⵏ ⴷ ⵢⴻⴱⵔⵉⴷⴻⵏ ⵏ ⵓⵙⵙⴻⵎⵖⴻⵔ ⴷ ⵓⵙⵙⴻⵊⵀⴻⴷ-ⵏⵙⴻⵏ.
ⵢⴻⵍⵍⴰ-ⴷ ⵡⴻⵎⵢⴰⴳⴻⵔ-ⴰ ⴷⴰⵖ ⴷ ⵜⴰⴳⵏⵉⵜ ⵉ ⵡⴻⵎⵛⵉⵡⴻⵕ ⴷ ⵓⵙⵙⴻⵎⵢⵓⴷⴷⴻⵙ ⵏ ⵡⴰⴷⴷⵓⴷⴻⵏ ⵏ ⵙⵏⴰⵜ-ⴰ ⵏ ⵜⵎⵓⵔⴰ ⵖⴻⴼ ⵜⴻⵎⵙⴰⵍ ⵜⵉⵎⵏⴰⴹⴰⵏⵉⵏ ⴷ ⵢⵉⵎⴻⵏⵖⵉ ⵎⴳⴰⵍ ⵜⵔⴻⵎⵎⵉⵖⵜ (ⵉⵔⵀⴰⴱ).
ⵛⴻⴽⵕⴻⵏ-ⴷ ⵙⵉⵏ-ⴰ ⵏ ⵢⵉⵏⴻⵖⵍⴰⴼⴻⵏ ⵜⵉⵛⵛⵓⵔⴽⴰ ⵜⴰⵙⵓⴷⴷⵙⴰⵏⵜ ⵢⴻⵇⵇⵏⴻⵏ ⵙⵏⴰⵜ-ⴰ ⵏ ⵜⵎⵓⵔⴰ, ⴰⵎ ⵡⴰⴽⴽⴻⵏ ⴰⵢ ⴷ-ⵡⴻⴽⴽⴷⴻⵏ ⵖⴻⴼ ⵜⵜⵉⵄⴰⴷⴰⵜ ⵢⴻⵎⴳⴻⵔⵔⴰⴷⴻⵏ ⵢⴻⵍⵍⴰⵏ ⴳⴰⵔ ⵙⵏⴰⵜ-ⴰ ⵏ ⵜⵎⵓⵔⴰ ⴷⴻⴳ ⵡⴰⵀⵉⵍ-ⵏⵙⴻⵏⵜ ⵏ ⵡⴰⵙⵙⴰⵖⴻⵏ ⵉⵙⵉⵏⴷⵉⵙⴻⵏ ⴰⵎⴰ ⵙⴻⴳ ⵢⵉⴷⵉⵙ ⵏ ⵜⵙⴻⵔⵜⵉⵜ, ⴰⵎⴰ ⵙⴻⴳ ⵡⵉⵏ ⵏ ⵜⴷⴰⵎⵙⴰ.
ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⵜⵉⵎⵙⴰⵍ ⵜⵉⵎⵏⴰⴹⴰⵏⵉⵏ, ⵍⴰⴷⵖⴰ ⵜⴰⴳⵏⵉⵜ ⴷⴻⴳ ⵍⵉⴱⵢⴰ, ⵙⴽⴻⵢⴷⴻⵏ ⵙⵉⵏ-ⴰ ⵏ ⵢⵉⵏⴻⵖⵍⴰⴼⴻⵏ ⵜⵉⴷⵢⴰⵏⵉⵏ ⵜⵉⵏⴻⴳⴳⵓⵔⴰ ⴰⵢ ⴷ-ⵢⴻⵍⵍⴰⵏ ⴷⴻⴳ ⵜⵎⵓⵔⵜ-ⴰ.
ⵛⴻⴽⵕⴻⵏ-ⴷ ⴷⴰⵖ ⵉⵙⵓⵔⵉⴼⴻⵏ ⴰⵢ ⴷ-ⵢⴻⵍⵍⴰⵏ ⵖⴻⵔ ⵙⴷⴰⵜ ⴷⴻⴳ ⵓⵙⵙⴻⴼⵄⴻⵍ ⵏ ⵡⴻⵎⵜⴰⵡⴰ (ⵉⵜⵜⵉⴼⴰⵇ) ⴰⵙⴻⵔⵜⴰⵏ ⴰⵍⵉⴱⵉ, ⴰⵎ ⵡⴰⴽⴽⴻⵏ ⴰⵢ ⴷ-ⴳⵔⴻⵏ ⵜⵉⵖⵔⵉ ⵉ ⵢⵉⴷⵉⵙⴰⵏ ⵉⵍⵉⴱⵉⵢⴻⵏ ⴰⴽⴽⴻⵏ ⴰⴷ ⴱⴻⴷⴷⴻⵏ ⵖⴻⵔ ⵢⵉⴷⵉⵙ ⵏ ⵓⴽⴰⵍⴰ (ⵎⴰⵙⴰⵔ) ⴰⵙⴻⵔⵜⴰⵏ ⵏ ⵓⴼⴻⵔⵔⵓ ⵢⴻⵍⵍⴰⵏ ⴷⴷⴰⵡ ⵍⴻⵄⵏⴰⵢⴰ ⵏ ⵢⴻⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ, ⵙ ⵡⴻⵎⵛⵉⵡⴻⵕ ⴰⵔⴰ ⴷ-ⵉⵃⴰⵣⴻⵏ ⴰⴽⴽ ⵉⴷⵉⵙⴰⵏ, ⵢⴻⵔⵏⵓ ⴷ ⴰⵢⴰ ⴽⴰⵏ ⴰⵢ ⵉⵣⴻⵎⵔⴻⵏ ⴰⴷ ⵢⴻⴵⴵ ⵜⴰⵎⵓⵔⵜ-ⴰ ⵜⴰⵏⴰⵔⴰⴳⵜ ⴰⴷ ⵜⵇⴰⴱⴻⵍ ⵉⵛⵇⵉⵔⵔⵡⴻⵏ-ⵏⵏⴻⵙ ⵢⴻⴳⴳⵜⴻⵏ, ⴰⵎⴰ ⴷ ⵡⵉⴷ ⵏ ⵜⵙⴻⵔⵜⵉⵜ, ⵡⵉⴷ ⵏ ⵜⵖⴻⵍⵍⵉⵙⵜ ⵏⴻⵖ ⵏ ⵜⴷⴰⵎⵙⴰ, ⵢⴻⵔⵏⵓ ⵢⴻⵙⵙⴻⴼⴽ ⴰⴷ ⴷ-ⵢⵉⵍⵉ ⵡⴰⵢⴰ ⵙ ⵓⵇⴰⴷⴻⵔ ⵏ ⵜⵏⴰⵢⴰ ⴷ ⵜⵓⵎⵎⴷⴰ ⵏ ⵡⴰⴽⴰⵍ-ⵏⵏⴻⵙ, ⵜⴰⴷⵓⴽⵍⵉ-ⵏⵏⴻⵙ ⴷ ⵡⴻⵎⵙⴻⴼⵀⴰⵎ ⴳⴰⵔ ⵡⴰⵔⵔⴰⵡ ⵏ ⵡⴻⵖⵔⴻⴼ-ⵏⵏⴻⵙ.
