ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⴰⴷ ⵢⴻⵜⵜⵡⴰⵎⴹⴻⵍ ⵡⴻⵙⵡⴰⵏⴳⴰⵎ ⴰⴷⵣⴰⵢⵔⵉ ⵎⴰⵍⴻⴽ ⵛⵀⴻⴱⴻⵍ ⴰⵙⵙ ⵏ ⵍⴰⵕⴻⴱⵄⴰ ⴷⴻⴳ ⵙⴽⵉⴽⴷⴰ (ⵜⴰⵡⴰⵛⵓⵍⵜ)

ⵙⴽⵉⴽⴷⴰ– ⴰⴷ ⵢⴻⵜⵜⵡⴰⵎⴹⴻⵍ ⵡⴻⵙⵡⴰⵏⴳⴰⵎ ⴷ ⵓⵎⴻⵙⵏⴻⵎⴷⴰⵏ ⴰⴷⵣⴰⵢⵔⵉ ⵎⴰⵍⴻⴽ ⵛⵀⴻⴱⴻⵍ (1953-2016) ⴰⵙⵙ ⵏ ⵍⴰⵕⴻⴱⵄⴰ ⴷⴻⴳ ⵜⴻⵎⴷⵉⵏⵜ ⵏ ⵙⴽⵉⴽⴷⴰ, ⴰⵏⴷⴰ ⴰⵢ ⴷ-ⵉⵍⵓⵍ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴰⵙⵙ ⵏ ⵜⵜⵍⴰⵜⴰ ⴳⵎⴰ-ⵙ ⵏ ⵓⵎⴻⵕⵃⵓⵎ, ⵜⴰⵢⴻⴱ ⵛⵀⴻⴱⴻⵍ.

ⴰⵙⵙ ⵏ ⵍⴰⵕⴻⴱⵄⴰ ⵜⴰⵏⴻⵣⵣⴰⵢⵜ, ⴰⴷ ⵜⴻⵔⵙ ⵜⴼⴻⴽⴽⴰ ⵏ ⵓⵎⴻⵕⵃⵓⵎ ⴷⴻⴳ ⵍⴻⵇⵚⴻⵔ ⵏ ⵢⴻⴷⵍⴻⵙ ⴰⴽⴽⴻⵏ ⴰⴷ ⴰⵙ-ⴱⴻⵇⵇⵉⵏ ⵙⵙⵍⴰⵎ ⵢⵉⵎⴻⵣⴷⴰⵖⴻⵏ ⵏ ⵜⴻⵎⴷⵉⵏⵜ-ⴰ. ⵙⴰⴽⴽⵉⵏ, ⴰⴷ ⵥⵥⴰⵍⵍⴻⵏ ⴼⴻⵍⵍ-ⴰⵙ ⴷⴻⴳ ⵜⵎⴻⵙⴳⵉⴷⴰ ⵏ ⵓⵖⴰⵔⴰⵎ (ⵃⴰⵢⵢ) ⵏ ⵎⴻⵔⴵ ⴷⴷⵉⴱ, ⵓⵇⴱⴻⵍ ⵎⴰ ⵎⴻⴹⵍⴻⵏ-ⵜ ⴷⴻⴳ ⵡⴻⵎⴽⵓⵥ ⴰⵡⴰⵛⵓⵍⴰⵏ ⵏ ⵜⵎⴻⵇⴱⴻⵔⵜ ⵏ ⵎⴻⵏⵣⴻⵍ ⵍⵎⵓⴵⴰⵀⵉⴷⵉⵏ ⴰⵢ ⵉⴱⴻⵄⴷⴻⵏ ⵙ 15 ⵏ ⵢⵉⴽⵉⵍⵓⵎⵉⵜⵔⴻⵏ ⵖⴻⴼ ⵙⴽⵉⴽⴷⴰ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴳⵎⴰ-ⵙ ⵏ ⵓⵎⴻⵕⵃⵓⵎ.

ⵖⴻⴼ ⵍⴻⵃⵙⴰⴱ ⵏ ⵎⴰⵙⵙ ⵜⴰⵢⴻⴱ ⵛⵀⴻⴱⴻⵍ, ⴰⴷ ⵢⴻⵃⴷⴻⵕ ⵓⵏⴻⵖⵍⴰⴼ ⵏ ⵢⴻⴷⵍⴻⵙ, ⴰⵣⵣⴻⴷⴷⵉⵏⴻ ⵎⵉⵀⵧⵓⴱⵉ, ⴷ ⵡⴰⵛⵃⴰⵍ ⵏ ⵡⵓⴷⵎⴰⵡⴻⵏ ⵏ ⵓⵎⴰⴹⴰⵍ ⵏ ⵢⴻⴷⵍⴻⵙ.

ⵢⵓⵡⴻⴹ ⵎⴰⵍⴻⴽ ⵛⵀⴻⴱⴻⵍ ⵍⴻⵄⴼⵓ ⵏ ⵕⴻⴱⴱⵉ ⴷⴻⴳ ⵢⵉⴹ ⵏ ⵍⵊⴻⵎⵄⴰ ⴷ ⵙⵙⴻⴱⵜ ⴷⴻⴳ ⵢⵉⵡⴻⵏ ⵏ ⵡⴻⵙⴱⵉⵟⴰⵔ ⴷⴻⴳ ⵒⴰⵔⵉⵙ (ⴼⵕⴰⵏⵙⴰ) ⵖⴻⵔ 63 ⵏ ⵢⵉⵙⴻⴳⴳⴰⵙⴻⵏ.

ⵉⵍⵓⵍ ⵓⵎⴻⵕⵃⵓⵎ ⴷⴻⴳ ⵢⴻⴱⵔⵉⵔ ⵏ 1953 ⴷⴻⴳ ⵙⴽⵉⴽⴷⴰ ⵢⴻⵔⵏⵓ ⵢⴻⵣⵔⴻⵡ ⴷⴻⴳ ⵜⴻⵎⴷⵉⵏⵜ-ⴰ, ⵙⴰⴽⴽⵉⵏ ⵢⴻⵣⵔⴻⵡ ⴷⴻⴳ ⵜⴻⵙⴷⴰⵡⵉⵜ ⵏ ⵇⵙⴻⵏⵟⵉⵏⴰ ⴰⵏⴷⴰ ⴰⵢ ⵢⴻⵅⴷⴻⵎ ⴷⴰⵖ ⴷ ⴰⵙⴻⵍⵎⴰⴷ ⵓⵇⴱⴻⵍ ⵎⴰ ⵢⴻⴷⴷⴰ ⵖⴻⵔ ⴼⵕⴰⵏⵙⴰ ⴰⵏⴷⴰ ⴰⵢ ⵉⴽⴻⵎⵎⴻⵍ ⵜⵉⵣⵔⴰⵡⵉⵏ-ⵏⵏⴻⵙ. ⴷⴻⴳ 1980, ⵢⵓⵡⴻⵢ-ⴷ ⴰⴷⵓⴽⵜⵓⵕⴰ ⴷⴻⴳ ⵜⴻⵙⵏⴰⴼⵙⵉⵜ ⵙⴻⴳ ⵜⴻⵙⴷⴰⵡⵉⵜ ⵏ ⵒⴰⵔⵉⵙ. ⵙⵉⵏ ⵏ ⵢⵉⵙⴻⴳⴳⴰⵙⴻⵏ ⵙⴰⴽⴽⵉⵏ, ⵢⵓⵡⴻⵢ-ⴷ ⴰⴷⵓⴽⵜⵓⵕⴰ ⵡⵉⵙ ⵙⵉⵏ ⴷⴻⴳ ⵜⴻⵙⵏⴻⵎⴷⴰⵏⵜ ⴷ ⵜⵓⵙⵙⵏⴰ ⵏ ⵢⴻⵙⵖⴰⵏⴻⵏ. ⴷⴻⴳ 1984, ⵉⴳⴰ ⵜⵉⵙⴻⵔⵙⵉⵜ-ⵏⵏⴻⵙ ⵜⵉⵙ ⴽⵔⴰⴹⵜ ⵏ ⵓⴷⵓⴽⵜⵓⵕⴰ ⴷⴻⴳ ⵜⵓⵙⵙⵏⵉⵡⵉⵏ ⵜⵉⵙⴻⵔⵜⴰⵏⵉⵏ ⴷⴻⴳ ⵓⵙⵓⴷⵓ ⵏ ⵜⴻⵣⵔⴰⵡⵉⵏ ⵜⵉⵙⴻⵔⵜⴰⵏⵉⵏ ⵏ ⵒⴰⵔⵉⵙ ⵢⴻⵔⵏⵓ ⴷⵉⵏ ⴰⵢ ⵢⴻⴱⴷⴰ ⴰⵅⴻⴷⴷⵉⵎ ⴷⴻⴳ ⵓⴳⴻⵣⴷⵓ ⵏ ⵜⴻⵣⵔⴰⵡⵉⵏ ⵜⴰⵄⵕⴰⴱⵉⵏ ⴷ ⵜⵉⵙⵍⴰⵎⴰⵏⵉⵏ.

ⵢⵓⵔⴰ-ⴷ ⵎⴰⵍⴻⴽ ⵛⵀⴻⴱⴻⵍ ⴰⵛⵃⴰⵍ ⵏ ⵢⴻⴷⵍⵉⵙⴻⵏ, ⴳⴰⵔ-ⴰⵙⴻⵏ « ⴰⵙⴻⴳⵣⴰⵡⴰⵍ ⵏ ⵢⵉⵣⴰⵎⵓⵍⴻⵏ ⵉⵏⵙⴻⵍⵎⴻⵏ » (1995) ⴷ « ⵜⴰⵎⵙⴰⴽⵍⵉⵜ ⴷⴻⴳ ⵜⵎⵓⵔⴰ ⵜⵉⵏⵙⴻⵍⵎⵉⵏ » (2007). ⵢⴻⵙⵙⵓⵖⴻⵍ ⴷⴰⵖ ⵍⴻⵇⵔⴰⵏ ⵖⴻⵔ ⵜⵓⵜⵍⴰⵢⵜ ⵜⴰⴼⵕⴻⵏⵙⵉⵙⵜ.