ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵍⵃⴻⴷⴷ, 05 ⵢⴻⴱⵔⵉⵔ 2015 13:45 ⵜⴰⵎⴻⵙⵔⵉⵜ ⵜⴰⵖⴻⵍⵏⴰⵡⵜ ⵏ ⵓⵅⴻⴷⴷⵉⵎ: ⵓⴳⴰⵔ ⵏ 300 ⵏ ⵜⴽⴻⴱⴱⴰⵏⵉⵢⵉⵏ ⵜⵉⵎⴻⵥⵢⴰⵏⵉⵏ ⴰⵢ ⵢⴻⵜⵜⴻⴽⴽⴰⵏ

ⵍⴻⵣⵣⴰⵢⴻⵔ – ⵜⴰⵥⵔⵉⴳⵜ ⵜⵉⵙ ⵅⴻⵎⵙⴰ ⵏ ⵜⵎⴻⵙⵔⵉⵜ ⵜⴰⵖⴻⵍⵏⴰⵡⵜ ⵏ ⵓⵙⵙⴻⵎⵔⴻⵙ (ⵙⴰⵍⴻⵎ-2015) ⵢⴻⵜⵜⵡⴰⵍⴷⴻⵢ ⴰⵙⵙ ⵏ ⵍⵃⴻⴷⴷ ⴷⴻⴳ ⵍⴻⵇⵚⴻⵔ ⵏ ⵜⴻⵎⵣⵉⴽⴽⵏⵉⵏ (ⵙⴰⴼⴻⵅ) ⴷⴻⴳ ⵓⵣⵓⵎⴱⵉ ⵏ ⵍⴻⴱⵃⴻⵕ ⵏ ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ, ⵙ ⵓⵜⵜⴻⴽⴽⵉ ⵏ ⵡⵓⴳⴰⵔ ⵏ 300 ⵏ ⵜⴽⴻⴱⴱⴰⵏⵉⵢⵉⵏ ⵜⵉⵎⴻⵥⵢⴰⵏⵉⵏ.

ⵜⴰⴼⴰⴳⵍⴰ ⵏ ⵡⴻⵍⴷⴰⵢ ⵏ ⵜⵎⴻⵙⵔⵉⵜ-ⴰ ⴰⵔⴰ ⵢⴻⵇⵇⵉⵎⴻⵏ ⴰⵔⵎⴰ ⴷ 12 ⵏ ⵢⴻⴱⵔⵉⵔ, ⵢⴻⵙⵙⴻⵍⵡⵉ-ⵜⵜ ⵓⵏⴻⵖⵍⴰⴼ ⵏ ⵓⵅⴻⴷⴷⵉⵎ, ⵏ ⵓⵙⵙⴻⵎⵔⴻⵙ ⴷ ⵜⵖⴻⵍⵍⵉⵙⵜ ⵜⴰⵏⵎⴻⵜⵜⵉⵜ, ⵎⵧⵀⴰⵎⴻⴷ ⴻⵍ ⴳⵀⴰⵣⵉ, ⵙ ⵡⴻⵃⴷⴰⵕ ⵏ ⵢⵉⵎⴰⵙⵍⴰⴹⴻⵏ ⵏ ⵓⵏⴰⴱⴰⴹ ⴻⴷ ⵓⵎⴰⵔⵓ ⴰⵎⴰⵜⵓ ⵏ ⵜⴷⵓⴽⵍⵉ ⵜⴰⵎⴰⵜⵓⵜ ⵏ ⵢⵉⵅⴻⴷⴷⴰⵎⴻⵏ ⵉⴷⵣⴰⵢⵔⵉⵢⴻⵏ (ⵓⴳⵜⴰ).

ⵜⴰⴷⵢⴰⵏⵜ-ⴰ ⴰⵢ ⴷ-ⵢⴻⵍⵍⴰⵏ ⵙ ⵓⵙⴻⵏⵜⴻⵍ ⵏ « ⴰⵙⵙⵉⵍⴻⵖ: ⴷ ⵜⴰⵙⴰⵔⵓⵜ ⵏ ⵓⵏⴻⴽⵛⵓⵎ ⵖⴻⵔ ⵓⵅⴻⴷⴷⵉⵎ », ⴷ ⵜⵉⵏ ⴰⵔⴰ ⴷ-ⵉⵇⴻⴷⴷⵎⴻⵏ ⵢⴻⵔⵏⴰ ⴰⴷ ⵜⴻⵔⵔ ⴰⵣⴰⵍ ⵉ ⵜⵜⴰⵡⵉⵍⴰⵜ ⵏ ⵡⴻⵙⵎⴰⵍ ⵏ ⵓⵅⴻⴷⴷⵉⵎ, ⴰⵎ ⵡⴰⴽⴽⴻⵏ ⴰⵔⴰ ⵜⵅⴻⴱⴱⴻⵔ ⵎⴻⴷⴷⴻⵏ ⵖⴻⴼ ⵜⵎⵓⵙⵙⵏⵉ ⵏ ⵓⵅⴻⴷⴷⵉⵎ ⴻⴷ ⵜⵣⴻⵎⵎⴰⵔ ⵏ ⵜⴽⴻⴱⴱⴰⵏⵉⵢⵉⵏ ⵜⵉⵎⴻⵥⵢⴰⵏⵉⵏ.

« ⵜⴰⵎⴻⵙⵔⵉⵜ-ⴰ ⵜⴻⵍⵍⴰⴷ ⴰⴽⴽⴻⵏ ⴰⴷ ⵙⵙⵏⴻⵏ ⵎⴻⴷⴷⴻⵏ ⵜⵉⵣⴻⵎⵎⴰⵔ ⴻⴷ ⵢⵉⵥⵓⴱⴰⵥ ⵏ ⵓⵡⴻⴽⴽⴻⵍ ⵏ ⵍⴻⵛⵖⴰⵍ ⵉ ⵜⴽⴻⴱⴱⴰⵏⵉⵢⵉⵏ ⵜⵉⵎⴻⵥⵢⴰⵏⵉⵏ ⴰⵔⴰ ⵢⴻⵜⵜⴻⴽⴽⴻⵏ ⴷⴻⴳ ⵜⴻⵎⵣⵉⴽⴽⴻⵏⵜ-ⴰ, ⴰⵎ ⵡⴰⴽⴽⴻⵏ ⴰⵔⴰ ⴷ-ⵢⴻⵊⴱⴻⴷ ⵡⴰⵢⴰ ⵍⵡⴻⵍⵀⴰ ⵏ ⵢⵉⵏⴻⵔⵣⴰⴼⴻⵏ, ⵍⴰⴷⵖⴰ ⵉⵍⴻⵎⵥⵉⵢⴻⵏ ⴰⵢ ⵍⴰ ⵢⴻⵜⵜⵏⴰⴷⵉⵏ ⴰⵅⴻⴷⴷⵉⵎ, ⴰⵎⴰ ⴷ ⴰⵅⴻⴷⴷⵉⵎ ⵙ ⵜⵛⴻⵀⵕⵉⵜ, ⴰⵎⴰ ⴷ ⴰⵙⵙⴻⴱⴷⴻⴷ ⵏ ⵜⴽⴻⴱⴱⴰⵏⵉⵢⵉⵏ, ⴰⵎ ⵡⴰⴽⴽⴻⵏ ⴰⵔⴰ ⵙⵙⵏⴻⵏ ⴷⴰⵖ ⵎⴻⴷⴷⴻⵏ ⵍⴻⵎⵄⴰⵡⵏⴰⵜ ⴰⵢ ⵍⴰ ⵢⴻⵜⵜⵓⵏⴻⴼⴽⴰⵢⴻⵏ ⴷⴻⴳ ⵡⴻⵏⵔⴰⵔ ⵏ ⵓⵙⵙⴻⵎⵔⴻⵙ.

ⵜⴰⵎⴻⵙⵔⵉⵜ ⵏ ⵙⴰⵍⴻⵎ 2015, ⴰⵢ ⴷ-ⵢⴻⵙⵙⵓⴷⴷⴻⵙ ⵡⴻⵖⵍⵉⴼ ⵏ ⵓⵅⴻⴷⴷⵉⵎ ⴻⴷ ⵓⵙⵙⴻⵎⵔⴻⵙ, ⵜⴻⵍⵍⴰ-ⴷ ⴷⴰⵖ ⴷ ⵜⴰⴳⵏⵉⵜ ⵏ ⵜⴻⵎⵍⵉⵍⵉⵜ ⴻⴷ ⵡⴻⵎⴱⴰⴷⴷⴻⵍ ⴳⴰⵔ ⵢⵉⵍⴻⵎⵥⵉⵢⴻⵏ ⴰⵔⴰ ⴷ-ⵢⴻⵙⴼⴰⵢⴷⵉⵏ ⵙⴻⴳ ⵜⵜⴰⵡⵉⵍⴰⵜ-ⴰ ⵏ ⵓⵄⵉⵡⴻⵏ ⴰⴽⴽⴻⵏ ⴰⴷ ⴷ-ⵇⴻⴷⴷⵎⴻⵏ ⵜⵉⴽⴻⴱⴱⴰⵏⵉⵢⵉⵏ, ⵉⴼⴰⵔⵉⵙⴻⵏ ⴻⴷ ⵙⵙⵔⴰⴱⴻⵙ-ⵏⵙⴻⵏ, ⵢⴻⵔⵏⴰ ⴰⴷ ⴳⴻⵏ ⴰⵙⵙⴰⵖⴻⵏ ⵏ ⵢⵉⵡⴻⵥⵍⴰ ⴳⴰⵔ-ⴰⵙⴻⵏ ⴻⴷ ⵜⴽⴻⴱⴱⴰⵏⵉⵢⵉⵏ ⵜⵉⴷⴰⵎⵙⴰⵏⵉⵏ ⵢⴻⵎⴳⴻⵔⵔⴰⴷⴻⵏ.

ⴰⴷ ⵜⵜⴻⴽⴽⵉⵏ ⴷⴰⵖ ⴷⴻⴳ ⵜⵎⴻⵙⵔⵉⵜ-ⴰ ⵡⵓⴷⵓⵙⴻⵏ ⴰⵢ ⴷ-ⵢⴻⵍⵀⴰⵏ ⴻⴷ ⵓⵙⵙⴻⴼⵄⴻⵍ ⵏ ⵜⵜⴰⵡⵉⵍⴰⵜ-ⴰ ⴰⵢ ⵢⴻⵙⵏⴻⵔⵏⴰⵢⴻⵏ ⴰⵙⵙⴻⵎⵔⴻⵙ ⴻⴷ ⵡⴻⵙⵏⵓⵍⴼⵓ ⵏ ⵜⴽⴻⴱⴱⴰⵏⵉⵢⵉⵏ ⵜⵉⵎⴻⵥⵢⴰⵏⵉⵏ (ⴰⵏⵙⴻⵊ, ⵛⵏⴰⵛ ⴻⴷ ⴰⵏⴻⵎ) ⴰⴽⴽⴻⴷ ⵢⴻⵖⵍⵉⴼⴻⵏ ⴰⵢ ⵜⴻⵔⵣⴰ ⵜⴻⵎⵙⴰⵍⵜ ⵏ ⵡⴻⵙⵎⴰⵍ ⵏ ⵓⵙⵙⴻⵎⵔⴻⵙ, ⵏ ⵢⵉⵍⴻⵎⵥⵉⵢⴻⵏ ⴻⴷ ⵜⴻⵅⵅⴰⵎⵉⵏ ⵜⵉⵎⵙⴰⴷⵓⵔⵉⵏ.