ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵍⵃⴻⴷⴷ, 26 ⵢⴻⴱⵔⵉⵔ 2015 1800

ⵜⵓⴽⵛⵉ ⵏ ⵢⵉⵙⵎⴰⵡⴻⵏ ⵉ ⵢⵉⵎⵓⴽⴰⵏ ⵉⵏⴰⴳⴷⵓⴷⴻⵏ: ⵉⴼⵓⴽ ⵛⵛⵖⴻⵍ ⴷⴻⴳ 8 ⵏ ⵜⵡⵉⵍⴰⵢⵉⵏ

ⵍⴻⴱⵍⵉⴷⴰ – ⵜⵓⴽⵛⵉ ⵏ ⵢⵉⵙⵎⴰⵡⴻⵏ ⵉ ⵍⴱⴻⵏⵢⴰⵏⴰⵜ ⴷ ⵢⵉⵎⵓⴽⴰⵏ ⵉⵏⴰⴳⴷⵓⴷⴻⵏ ⴷ ⵢⵉⵡⴻⵏ ⵏ ⵛⵛⵖⴻⵍ ⴰⵢ ⴷ-ⵢⴻⴱⴷⴰ ⴰⵙⴻⴳⴳⴰⵙ ⵢⴻⵣⵔⵉⵏ ⵓⵖⵍⵉⴼ, ⵢⴻⵔⵏⴰ ⵢⴻⴷⴷⴰ « ⵎⵍⵉⵃ » ⵖⴻⵔ ⵙⴷⴰⵜ, ⵉⵎⵉ ⴰⵢ ⵉⴼⵓⴽ ⵛⵛⵖⴻⵍ-ⴰ ⵙ 100% ⴷⴻⴳ ⵟⴰⵎⴻⵜ (8) ⵏ ⵜⵡⵉⵍⴰⵢⵉⵏ ⵏ ⵜⵎⵓⵔⵜ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⴰⵙⵙ ⵏ ⵍⵃⴻⴷⴷ ⴷⴻⴳ ⵍⴻⴱⵍⵉⴷⴰ, ⵜⴰⵏⴻⵎⵀⴰⵍⵜ ⵏ ⵓⵏⴱⴰⴹ ⴰⴷⵉⴳⴰⵏ ⴰⵢ ⵉⵅⴻⴷⴷⵎⴻⵏ ⵖⴻⵔ ⵓⵖⵍⵉⴼ ⵏ ⵜⵖⴰⵡⵙⵉⵡⵉⵏ ⵏ ⴷⴰⵅⴻⵍ, ⴼⴰⵜⵉⵀⴰ ⵀⴰⵎⵔⵉⵜ.

« ⵛⵛⵖⴻⵍ ⵉⴼⵓⴽ ⵙ 100% ⴷⴻⴳ ⵟⴰⵎⴻⵜ (8) ⵏ ⵜⵡⵉⵍⴰⵢⵉⵏ, ⵢⴻⵔⵏⴰ ⵜⴻⵇⵇⵉⵎ-ⴷ ⴽⴰⵏ ⵜⵔⴰⵔⴰⵙⵜ, ⴰⵎ ⵡⴰⴽⴽⴻⵏ ⴰⵢ ⵍⵍⴰⵏⵜ 22 ⵏ ⵜⵡⵉⵍⴰⵢⵉⵏ ⵏⵉⴹⴻⵏ ⴰⵢⴷⴻⴳ ⴰⵢ ⵉⴼⵓⴽ ⵛⵛⵖⴻⵍ ⵙ 80%, ⴳⴰⵔ-ⴰⵙⴻⵏⵜ ⵜⴰⵡⵉⵍⴰⵢⵜ ⵏ ⵍⴻⴱⵍⵉⴷⴰ ⴰⵏⴷⴰ ⴰⵢ ⵢⵓⵥⴰ ⵎⵍⵉⵃ ⵛⵛⵖⴻⵍ-ⴰ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⵎⴰⵙⵙⴰ ⵀⴰⵎⵔⵉⵜ ⴷⴻⴳ ⵢⵉⵡⴻⵏ ⵏ ⵓⵎⵢⴰⴳⴻⵔ ⴰⵢⴷⴻⴳ ⵜⴻⵎⵍⴰⵍ ⴷ ⵢⵉⵙⴻⵍⵡⴰⵢⴻⵏ ⵏ ⵜⵖⵉⵡⴰⵏⵉⵏ, ⵉⵖⴻⵍⵍⴰⵜⴻⵏ ⵏ ⵜⴷⴰⵢⵕⵉⵡⵉⵏ ⴷ ⵢⵉⵏⴻⵎⵀⴰⵍⴻⵏ ⵉⵙⵍⴻⴽⵎⴰⵏⴻⵏ ⵜⵡⵉⵍⴰⵢⵜ, ⴷ ⴰⵎⵢⴰⴳⴻⵔ ⴰⵢ ⴷ-ⵢⴻⵍⵍⴰⵏ ⵖⴻⴼ ⵡⴰⵎⴻⴽ ⴰⵔⴰ ⵜⵜⵡⴰⵚⴻⵏⵏⴼⴻⵏ ⵍⴱⴻⵏⵢⴰⵏⴰⵜ ⴷ ⵢⵉⵎⵓⴽⴰⵏ ⵉⵏⴰⴳⴷⵓⴷⴻⵏ.

« ⴰⵔ ⵉⵎⵉⵔ-ⴰ, ⵜⵜⵡⴰⵃⴻⵙⴱⴻⵏ-ⴷ ⵙ ⵓⵊⴻⵎⵎⴰⵍ 39.332 ⵏ ⵢⵉⵎⵓⴽⴰⵏ ⵓⵎⵉ ⵜⵜⵓⵏⴻⴼⴽⴻⵏ ⵢⵉⵙⵎⴰⵡⴻⵏ ⴷⴻⴳ ⵜⵎⵓⵔⵜ ⵙ ⵍⴻⴽⵎⴰⵍ-ⵏⵏⴻⵙ, ⵎⴰⵛⴰ ⵎⴰⵣⴰⵍ ⵍⵍⴰⵏ 23.636 ⵏ ⵢⵉⵎⵓⴽⴰⵏ ⴰⵢ ⵡⴻⵔⵄⴰⴷ ⵓⵔ ⵢⴻⵙⵄⵉⵏ ⵉⵙⴻⵎ », ⴷⵖⴰ, ⵖⴻⴼ ⵍⴻⵃⵙⴰⴱ-ⵏⵏⴻⵙ, ⴷ ⴰⵢⴰ ⴰⵢ ⴷ-ⵢⴻⵙⵙⴽⴰⵏⴰⵢⴻⵏ ⴷⴰⴽⴽⴻⵏ ⵎⴰⵣⴰⵍ ⵍⵍⴰⵏ ⴰⵟⴰⵙ ⵏ ⵢⵉⵎⵓⴽⴰⵏ ⵉⵏⴰⴳⴷⵓⴷⴻⵏ ⴷⴻⴳ ⵜⵎⵓⵔⵜ ⵓⵔ ⵙⵄⵉⵏ ⴰⵔⴰ ⵉⵙⵎⴰⵡⴻⵏ.