ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⴰⵙⵎⴻⴽⵜⵉ ⵏ ⵜⵓⴹⴹⴼⴰ ⵏ ⴼⴰⵍⴻⵙⵟⵉⵏ: ⵙⵏⴰⵜ ⵏ ⵜⴻⴳⵔⴰⵡⵉⵏ ⵜⵉⴼⴰⵍⴻⵙⵟⵉⵏⵉⵢⵉⵏ ⵉ ⵍⵎⴻⵏⴷ ⵏ ⵜⵓⵇⵇⵍⴰ ⵏ ⵢⵉⵣⵔⵓⵣⴰⵖ

ⵍⴷⵣⴰⵢⴻⵔ ⵜⴰⵎⴰⵏⴻⵖⵜ – ⵜⵉⵔⵏⵉ ⵜⴰⵖⴻⵔⴼⴰⵏⵜ ⴷ ⵜⵉⵔⵏⵉ ⵜⴰⵎⴻⴳⴷⴰⵢⵜ ⵉ ⵓⵙⵍⴻⵍⵍⵉ ⵏ ⴼⴰⵍⴻⵙⵟⵉⵏ ⵏⵏⴰⵏⵜ-ⴷ, ⴰⵙ ⵏ ⵙⵙⴻⴱⵜ ⴷⴻⴳ ⵍⴷⵣⴰⵢⴻⵔ, ⴷⴰⴽⴽⴻⵏ ⵎⴰⵣⴰⵍ-ⵉⵜⴻⵏⵜ ⴹⴹⴼⴻⵏⵜ ⴷⴻⴳ ⵓⵣⵔⴻⴼ ⵏ ⵜⵓⵇⵇⵍⴰ ⵏ ⵢⵉⵣⵔⵓⵣⴰⵖ ⵉⴼⴰⵍⴻⵙⵟⵉⵏⵉⵢⴻⵏ ⴰⵢ ⴷ-ⵢⴻⵜⵜⵡⴰⵥⵥⵄⴻⵏ ⵙⴻⴳ ⵡⴰⴽⴰⵍ-ⵏⵙⴻⵏ ⴷⴻⴳ 1948, ⴰⵎ ⵡⴰⴽⴽⴻⵏ ⴰⵢ ⴹⴹⴼⴻⵏ ⴷⴻⴳ ⵜⴷⵓⴽⵍⵉ ⵜⴰⵖⴻⵍⵏⴰⵡⵜ, ⵢⴻⵔⵏⴰ ⵏⵏⴰⵏ-ⴷ ⴷⴰⴽⴽⴻⵏ « ⵓⵍⴰⵛ ⵜⵉⴼⵔⴰⵜ ⵉ ⵜⴰⵍⵓⴼⵜ ⵜⴰⴼⴰⵍⴻⵙⵟⵉⵏⵉⵜ ⵡⴰⵔ ⵎⴰ ⵜⴻⴼⵔⴰ ⵜⴰⵍⵓⴼⵜ ⵏ ⵢⵉⵣⵔⵓⵣⴰⵖ ».

ⵉ ⵓⵙⵎⴻⴽⵜⵉ ⵏ ⵓⵎⵓⵍⵍⵉ ⵡⵉⵙ 67 ⵏ ⵏⵏⴰⵇⴱⴰ (ⵜⴰⵡⴰⵖⵉⵜ) ⵏ ⵜⵓⴹⴹⴼⴰ ⵏ ⵡⴰⴽⴰⵍ ⵏ ⴼⴰⵍⴻⵙⵟⵉⵏ, ⵢⴻⵍⵍⴰ-ⴷ ⵢⵉⵡⴻⵏ ⵏ ⵓⵙⴰⵔⴰⴳ ⴰⵢⴷⴻⴳ ⵢⴻⵜⵜⴻⴽⴽⴰ ⵓⴳⴻⵏⵙⴰⵙ ⵏ ⵜⴻⵔⵏⵉ ⵜⴰⵎⴻⴳⴷⴰⵢⵜ ⵏ ⵓⵙⵍⴻⵍⵍⵉ ⵏ ⴼⴰⵍⴻⵙⵟⵉⵏ, ⵎⵧⵀⴰⵎⴻⴷ ⴻⵍ ⵀⴰⵎⴰⵎⵉ, ⴷ ⵓⴳⴻⵏⵙⴰⵙ ⵏ ⵜⴻⵔⵏⵉ ⵜⴰⵖⴻⵔⴼⴰⵏⵜ ⴷⴻⴳ ⵍⴷⵣⴰⵢⴻⵔ, ⵙⴰⵍⴰⵀ ⵎⵧⵀⴰⵎⴻⴷ, ⵢⴻⵔⵏⴰ ⵢⴻⵏⵏⴰ-ⴷ ⵓⵏⴻⴳⴳⴰⵔⵓ-ⴰ ⴷⴰⴽⴽⴻⵏ « ⴰⵎⵓⵍⵍⵉ-ⴰ ⵡⵉⵙ 67 ⴷ ⵡⵉⵏ ⴰⵢⴷⴻⴳ ⴰⵔⴰ ⵜⴻⵊⵀⴻⴷ ⵜⵓⴹⴹⴼⴰ ⵏ ⵓⵖⵔⴻⴼ ⴰⴼⴰⵍⴻⵙⵟⵉⵏⵉ ⴷⴻⴳ ⵓⵣⵔⴻⴼ-ⵏⵏⴻⵙ ⵏ ⵜⵓⵇⵇⵍⴰ ⴷⴻⴳ ⵓⴽⴰⵜⴰⵔ ⵏ ⵜⵏⴻⵖⵜⵓⵙⵜ ⵜⵉⵙ 194 ⵓⵙⴻⵇⵇⴰⵎⵓ ⵏ ⵜⵖⴻⵍⵍⵉⵙⵜ (ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ) », ⴰⵎ ⵡⴰⴽⴽⴻⵏ ⴰⵔⴰ ⵜⴻⵊⵀⴻⴷ ⴷⴰⵖ ⵜⵓⴹⴹⴼⴰ ⵏ ⵢⵉⴼⴰⵍⴻⵙⵟⵉⵏⵉⵢⴻⵏ ⴷⴻⴳ ⵜⴷⵓⴽⵍⵉ-ⵏⵙⴻⵏ ⵜⴰⵖⴻⵍⵏⴰⵡⵜ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ.

ⵙⴰⵍⴰⵀ ⵎⵧⵀⴰⵎⴻⴷ ⵢⴻⵏⵏⴰ-ⴷ ⴷⴰⵖ ⴷⴰⴽⴽⴻⵏ ⵙ ⵜⴷⵓⴽⵍⵉ-ⵏⵙⴻⵏ ⵜⴰⵖⴻⵍⵏⴰⵡⵜ ⴰⵢ ⵙⵙⴰⵡⴹⴻⵏ ⵢⵉⴼⴰⵍⴻⵙⵟⵉⵏⵉⵢⴻⵏ ⴰⴷ ⵙⵅⴻⵚⵔⴻⵏ ⵉⵖⴰⵡⴰⵙⴻⵏ ⵉⵙⵕⴰⵢⵉⵍⵉⵢⴻⵏ ⴰⵢ ⵢⴻⴽⴽⴰⵜⴻⵏ ⴰⴽⴽⴻⵏ ⴰⴷ ⵜⴻⵏ-ⵙⴼⴻⵛⵍⴻⵏ.

ⵙⴻⴳ ⵢⵉⴷⵉⵙ ⵏⵉⴹⴻⵏ, ⵢⴻⵏⵏⴰ-ⴷ ⴷⴰⴽⴽⴻⵏ ⴷ ⴰⵡⴻⵣⵖⵉ ⴰⴷ ⴷ-ⴰⴼⴻⵏ ⵜⵉⴼⵔⴰⵜ ⵜⴰⵙⴻⵔⵜⵉⵜ ⵡⴰⵔ ⵎⴰ ⵜⴻⵜⵜⵡⴰⵙⵙⴻⴼⵄⴻⵍ ⵜⵏⴻⵖⵜⵓⵙⵜ ⵜⵉⵙ 194 ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⴰⵢ ⴷ-ⵢⴻⵏⵏⴰⵏ ⴷⴰⴽⴽⴻⵏ ⵉⵣⵔⵓⵣⴰⵖ ⵉⴼⴰⵍⴻⵙⵟⵉⵏⵉⵢⴻⵏ ⵙⵄⴰⵏ ⴰⵣⵔⴻⴼ ⴰⴷ ⵇⵇⵍⴻⵏ ⵖⴻⵔ ⵡⴰⴽⴰⵍ-ⵏⵙⴻⵏ ⵢⴻⵔⵏⴰ ⴰⴷ ⴰⵙⴻⵏ-ⵢⴻⵜⵜⵡⴰⵖⵔⴻⵎ ⵡⴰⵢⴻⵏ ⵙⵕⵓⵃⴻⵏ.

ⵏⵏⵉⴳ ⵡⴰⵢⴰ, ⵢⴻⵏⵏⴰ-ⴷ ⴷⴰⴽⴽⴻⵏ ⴰⵣⵔⴻⴼ ⵏ ⵜⵓⵇⵇⵍⴰ ⵏ ⵢⵉⵣⵔⵓⵣⴰⵖ ⵢⴻⵇⵇⴻⵏ ⵎⵍⵉⵃ ⵖⴻⵔ ⵢⵉⵎⴻⵏⵖⵉ ⴰⴼⴰⵍⴻⵙⵟⵉⵏⵉ.

ⵎⵧⵀⴰⵎⴻⴷ ⵙⴰⵍⴰⵀ ⵢⴻⴱⴷⴻⵔ-ⴷ ⴷⴰⵖ ⵜⵉⴷⵢⴰⵏⵉⵏ ⵜⵉⵏⴻⴳⴳⵓⵔⴰ ⴰⵢ ⵍⴰ ⴷ-ⵉⴹⴻⵔⵔⵓⵏ ⴷⴻⴳ ⵜⵎⵓⵔⴰ ⵜⴰⵄⵕⴰⴱⵉⵏ ⴷ ⵡⴰⵎⴻⴽ ⴰⵢ ⵃⵓⵣⴰⵏⵜ ⵉⵎⴻⵏⵖⵉ ⴰⴼⴰⵍⴻⵙⵟⵉⵏⵉ, ⵍⴰⴷⵖⴰ ⵜⵉⴷⵢⴰⵏⵉⵏ ⴰⵢ ⵍⴰ ⴷ-ⵢⴻⵜⵜⵉⵍⵉⵏ ⴷⴻⴳ ⵙⵓⵔⵢⴰ ⴷ ⵢⴰⵎⴰⵏ, ⴰⵎ ⵡⴰⴽⴽⴻⵏ ⴰⵢ ⵢⴻⵜⵜⵀⴻⵎ ⴰⵏⴰⴱⴰⴹ ⴰⵎⴰⵔⵉⴽⴰⵏⵉ ⴰⵢ ⵢⴻⴼⴽⴰⵏ ⴰⴼⵓⵙ ⴷⴻⴳ ⵜⴻⵎⵙⴰⵍⵜ-ⴰ « ⴰⴽⴽⴻⵏ ⴰⴷ ⵢⴻⵙⵙⵉⵡⴻⴹ ⵖⴻⵔ ⵏⵏⴼⴻⵄ-ⵏⵏⴻⵙ ⵢⴻⵔⵏⴰ ⴰⴷ ⴰⵙ-ⵢⴻⴹⵎⴻⵏ ⵜⴰⵖⴻⵍⵍⵉⵙⵜ (ⵍⴰⵎⴰⵏ) ⵉ ⵉⵙⵕⴰⵢⵉⵍ ».

ⴰⵙⵙⴻⴷⵔⴻⵎ ⵏ ⵙⵓⵔⵢⴰ, ⵏ ⵢⴰⵎⴰⵏ ⵏⴻⵖ ⵏ ⵜⵎⵓⵔⴰ ⵜⴰⵄⵕⴰⴱⵉⵏ ⵏⵉⴹⴻⵏ, ⴰⴽⴽⴻⵏ ⴱⵖⵓⵏⵜ ⵉⵍⵉⵏⵜ, « ⴷ ⴰⵢⴻⵏ ⴰⵔⴰ ⴷ-ⵢⴻⴳⵍⵓⵏ ⵙ ⵍⴻⵅⵚⴰⵔⴰ ⵉ ⵢⵉⵎⴻⵏⵖⵉ ⴰⴼⴰⵍⴻⵙⵟⵉⵏⵉ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ, ⴰⵎ ⵡⴰⴽⴽⴻⵏ ⴰⵢ ⴷ-ⵉⴳⴻⵔ ⵜⵉⵖⵔⵉ ⴰⴽⴽⴻⵏ ⵓⵔ ⴷ-ⵢⴻⵜⵜⵉⵍⵉ ⴰⵔⴰ ⵍⴻⵜⵜⴽⴰⵍ ⵖⴻⴼ ⵓⵏⴰⴱⴰⴹ ⴰⵎⴰⵔⵉⴽⴰⵏⵉ « ⴰⵢ ⵢⴻⴷⴷⴰⵏ ⴷⴻⴳ ⵢⵉⴷⵉⵙ ⵏ ⵉⵙⵕⴰⵢⵉⵍ ⴷⴻⴳ 22-ⴰ ⵏ ⵢⵉⵙⴻⴳⴳⴰⵙⴻⵏ ⵏ ⵍⴻⵎⵛⴰⵡⵕⴰⵜ ».

ⵉⵎⴹⴻⴱⴱⴻⵔ ⵏ ⵜⴻⵔⵏⵉ ⵜⴰⵖⴻⵔⴼⴰⵏⵜ ⵉⴳⴻⵔ-ⴷ ⵜⵉⵖⵔⵉ, ⴷⴻⴳ ⵜⴻⵎⵙⴰⵍⵜ-ⴰ, ⵉ ⵓⵛⴰⵕⴻⵄ ⵏ ⵉⵙⵕⴰⵢⵉⵍ, ⴰⵎ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴷⴰⴽⴽⴻⵏ ⵜⵉⵔⵉⵔⵉⵜ ⵢⴻⵍⵀⴰⵏ ⴰⴽⴽ ⵉ ⵓⵏⴰⴱⴰⴹ ⴰⵎⴻⴹⴹⴰⵔⴼⵓ ⵉⵙⵕⴰⵢⵉⵍⵉ ⵏⴻⵜⵜⴰ ⴷ ⴰⵙⴷⵓⴽⴽⴻⵍ ⵏ ⵢⵉⴼⴰⵍⴻⵙⵟⵉⵏⵉⵢⴻⵏ ⴷ ⵓⵙⵙⴻⴱⴷⴻⴷ ⵏ ⵓⵏⴰⴱⴰⴹ ⵏ ⵓⵎⵙⴻⴼⵀⴰⵎ ⴰⵖⴻⵍⵏⴰⵡ.

ⵙⴻⴳ ⵜⴰⵎⴰ ⵏⵉⴹⴻⵏ, ⵉⴳⴻⵔ-ⴷ ⴷⴰⵖ ⵜⵉⵖⵔⵉ ⵉ ⵓⵙⵙⵓⴷⴷⴻⵔ ⵏ ⵜⵙⴻⵇⵇⵓⵎⴰ ⴰⵢ ⵢⴻⴽⴽⴰⵜⴻⵏ ⵖⴻⴼ ⵜⵓⵇⵇⵍⴰ ⵏ ⵢⵉⵣⵔⵓⵣⴰⵖ, ⴰⵏⴷⴰ ⵎⴰ ⵍⵍⴰⵏⵜ ⴷⴻⴳ ⵓⵎⴰⴹⴰⵍ, ⵍⴰⴷⵖⴰ ⴷⴻⴳ ⵜⵓⵕⵓⴼⵜ, ⴰⴽⴽⴻⵏ ⴰⴷ ⴷ-ⵙⵙⴻⴽⵏⴻⵏ ⵢⵉⴼⴰⵍⴻⵙⵟⵉⵏⵉⵢⴻⵏ ⵜⵓⴹⴹⴼⴰ-ⵏⵙⴻⵏ ⴷⴻⴳ ⵓⵣⵔⴻⴼ-ⴰ.

ⴷⵖⴰ ⵢⴻⵔⵔⴰ ⵜⴰⵊⵎⵉⵍⵜ, ⴷⴻⴳ ⵜⴻⵎⵙⴰⵍⵜ-ⴰ, ⵉ ⵡⴰⴷⴷⵓⴷ ⵏ ⵜⴷⵓⴽⵍⵉ ⵜⵓⵕⵓⴼⵉⵜ ⴰⵢ ⵉⵖⵓⵏⵣⴰⵏ ⵉⴼⴰⵔⵉⵙⴻⵏ ⵉⵙⵕⴰⵢⵉⵍⵉⵢⴻⵏ, ⴰⵎ ⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴷⴰⴽⴽⴻⵏ ⵢⴻⵙⵙⴻⴼⴽ ⴰⴷ ⵢⴻⵜⵜⵡⴰⵙⵙⴻⴼⵄⴻⵍ ⵓⵖⴰⵏⵣⵓ ⴰⴷⴰⵎⵙⴰⵏ ⴷ ⵡⵉⵏ ⵏ ⵜⴻⵙⴷⴰⵡⵉⵢⵉⵏ.

ⵙⴻⴳ ⵜⴰⵎⴰ ⵏⵉⴹⴻⵏ, ⴰⴳⴻⵏⵙⴰⵙ ⵏ ⵜⴻⵔⵏⵉ ⵜⴰⵎⴻⴳⴷⴰⵢⵜ ⵉ ⵓⵙⵍⴻⵍⵍⵉ ⵏ ⴼⴰⵍⴻⵙⵟⵉⵏ, ⵎⵧⵀⴰⵎⴻⴷ ⵀⴰⵎⴰⵎⵉ, ⵢⴻⵏⵏⴰ-ⴷ ⴷⴰⴽⴽⴻⵏ ⵉⵙⵕⴰⵢⵉⵍ « ⵜⴻⵅⵚⴻⵔ » ⴷⴻⴳ ⵓⵅⴻⴷⴷⵉⵎ-ⵏⵏⴻⵙ ⴰⴽⴽⴻⵏ ⴰⴷ ⵜⴻⵙⵙⴻⴼⵛⴻⵍ ⵉⵎⴻⵏⵖⵉ ⴰⴼⴰⵍⴻⵙⵟⵉⵏⵉ ⴰⵢ ⵢⴻⵇⵇⵍⴻⵏ « ⵉⵎⵉⵔ-ⴰ ⴷ ⵓⵍ ⵏ ⵓⵅⴻⴷⴷⵉⵎ ⵏ ⵜⵎⵓⵔⴰ ⵜⴰⵄⵕⴰⴱⵉⵏ ».

ⵙⴻⴳ ⵢⵉⴷⵉⵙ ⵏⵉⴹⴻⵏ, ⵉⵡⴻⴽⴽⴻⴷ-ⴷ ⴷⴰⴽⴽⴻⵏ « ⵡⴰⵔ ⴰⵣⵔⴻⴼ ⵏ ⵜⵓⵇⵇⴽⵍⴰ, ⵙ ⴽⵔⴰ ⵏ ⵓⵅⴻⴷⴷⵉⵎ ⴰⵔⴰ ⴷ-ⵢⵉⵍⵉⵏ ⵉ ⴼⴻⵔⵔⵓ ⵏ ⵜⴰⵍⵓⴼⵜ ⵏ ⴼⴰⵍⴻⵙⵟⵉⵏ ⵓⵔ ⵢⴻⵙⵙⴰⵡⴰⴹ ⵖⴻⵔ ⵡⴰⵛⴻⵎⵎⴰ ».

ⴰⴳⴻⵏⵙⴰⵙ ⵏ ⵜⴻⵔⵏⵉ ⵜⴰⵎⴻⴳⴷⴰⵢⵜ ⵉ ⵓⵙⵍⴻⵍⵍⵉ ⵏ ⴼⴰⵍⴻⵙⵟⵉⵏ ⵉⵃⴻⵜⵜⴻⵜ-ⴷ ⴷⴰⴽⴽⴻⵏ ⵢⴻⵙⵙⴻⴼⴽ ⴰⴷ ⴷ-ⵜⵉⵍⵉ ⵜⴷⵓⴽⵍⵉ ⴳⴰⵔ ⵜⴻⴳⵔⴰⵡⵉⵏ ⵜⵉⵙⴻⵔⵜⵉⵢⵉⵏ, ⵉⵎⵓⵙⵙⴰ ⵉⵖⴻⵍⵏⴰⵡⴻⵏ ⵉⴼⴰⵍⴻⵙⵟⵉⵏⵉⵢⴻⵏ ⴷ ⵢⵉⵎⴻⵖⵏⴰⵙⴻⵏ.

ⴷⵖⴰ ⵉ ⵍⵎⴻⵏⴷ ⵏ ⵡⴰⵢⴰ, ⵉⴳⴻⵔ-ⴷ ⵜⵉⵖⵔⵉ ⵉ ⵓⵙⵙⴻⴱⴷⴻⴷ ⵏ ⵓⵏⴰⴱⴰⴹ ⵏ ⵓⵙⵙⵓⴽⴽⴻⵙ ⴰⵖⴻⵍⵏⴰⵡ ⴰⵢⴷⴻⴳ ⴰⵔⴰ ⵜⵜⴻⴽⴽⵉⵏ ⴰⴽⴽ ⵢⵉⴷⵉⵙⴰⵏ ⵏ ⵓⵖⵔⴻⴼ ⴰⴼⴰⵍⴻⵙⵟⵉⵏⵉ ⴰⴽⴽⴻⵏ ⴰⴷ ⴱⴻⴷⴷⴻⵏ ⴷⴻⴳ ⵡⵓⴷⴻⵎ ⵏ ⵓⵏⴰⴱⴰⴹ ⵉⵙⵕⴰⵢⵉⵍⵉ.

ⵉⴳⴻⵔ-ⴷ ⴷⴰⵖ ⵜⵉⵖⵔⵉ ⵓⴳⴻⵏⵙⴰⵙ-ⴰ ⵉ ⵓⴹⴼⴰⵔ ⵏ ⵜⵉⴽⵍⵉ ⵜⴰⵎⴰⵢⵏⵓⵜ ⴷⴻⴳ ⵢⵉⵎⴻⵏⵖⵉ, ⴷ ⵜⵉⵏ ⴰⵢⴷⴻⴳ ⴰⵔⴰ ⴷ-ⵔⵔⴻⵏ ⵜⵓⴷⴻⵔⵜ ⵉ ⵓⵣⴱⵓ ⴰⵖⴻⵔⴼⴰⵏ ⵖⴻⴼ ⵍⴻⵃⵙⴰⴱ ⵏ ⵡⴰⵢⴻⵏ ⴰⵢ ⴷ-ⵢⴻⵏⵏⴰ ⵓⵙⴻⵇⵇⴰⵎⵓ ⴰⵍⴻⵎⵎⴰⵙ ⴰⴼⴰⵍⴻⵙⵟⵉⵏⵉ ⴷⴻⴳ ⵜⴻⵎⵍⵉⵍⵉⵜ-ⵏⵏⴻⵙ ⵏ ⵎⴻⵖⵔⴻⵙ ⵢⴻⵣⵔⵉⵏ.